Prokram Kapw en Kapokon en Circuit
Kitail wehwehki me Siohwa Koht kin warohng atail limpoak oh kaudok. Ahpw, kasongosong kan en sampah wet kak kaluwetala atail nanpwung mwahu rehn Siohwa. (Sohn 17:14) Pwehn kakehlail atail limpoak ong Siohwa oh sewese kitail en powehdi kasongosong kan en sampah, oaralap en Kapokon en Circuit en 2000 iei “Limpoak ong Koht—Kaidehn Soahng kan me Pid Sampah.”—1 Sohn 2:15-17.
Atail limpoak loal ong Siohwa pahn kamwekid kitail en kadehde ong aramas duwen Ih. Mehlel, iang kalohk sohte kin wia mehkot me mengei ong pali laud en sapwellimen Koht aramas. Nan padahko me oaralap koasoia “Limpoak ong Koht Kin Kamwekid Kitail Nan Kalohk,” kitail pahn sukuhliki iaduwen aramas tohto powehdi arail pepehm en nennen oh namenek oh pil kahpwal teikan pwehn kak ngoangki iang kalohk ni eimah.
Iaduwen tiahk suwed me sampah kin kasalehda kin kamwekid kitail? Tiahk kan me mahs kin suwed douluhl met kin wia tiahk me aramas tohto kin wia oh re kin lemeleme me e konehng atail ahnsou. Padahko me oaralap koasoia “Irail me kin Limpoak ong Siohwa Pahn Kailongki Dahme Suwed” oh padahk kan me oaralap koasoia: “Soahng kan me Pid Sampah—Iaduwen Ke Kin Kilangwong Soahng Pwukat?” pahn sewese kitail en kehlail ni atail pahn nantihong kihsang ineng suwed kan me kin pwarada nan atail madamadau oh mohngiong.
Theocratic Ministry Sukuhl oh Service Mihding pahn wiawi nan prokram, oh pil kousapahl en Kahn Iroir en wihko. Kapahrek Ong Wehi Pokon pahn wiawi oh oaralap koasoia, “Iaduwen Limpoak oh Pwoson Pahn Powehdi Sampah,” oh e pahn kangoange kitail en kahlemengih Sises ni atail pahn nantihong dehr lohdi pahn kasongosong en sampah. (Sohn 16:33) Luhke aramas me ke kin onop Paipel rehrail en iang towehda. Sounkalohk kan me men papidais kak kehsehkin Presiding Overseer mwadang pwe e kak koasoanehdi dahme anahne wiawi mwohn emen pahn papidais.
Prokram en Kapokon en Circuit pahn sewese kitail en kasawihada ma atail limpoak ong Siohwa me kin kehlail pwe kitail kak ale kapai kan sang Siohwa. Ke dehr katiasang kapokon wet!