Mour Mwurin Mehla​—⁠Dahme Paipel Mahsanih?

“Pwe ke wiawihda sang pwehl oh ke pahn pwurehng wiepwella.”​—SENESIS 3:​19.

1, 2. (a) Ia lamalam wekpeseng kan me pid mour mwurin mehla? (b) Dahme kitail anahne en kasawih pwehn esehla dahme Paipel kin padahngki duwen soul?

“LAMALAM me dene mie kalokolok soutuk sohte kin pahrekiong padahk duwen en Koht limpoak ong mehkan me e ketin kapikada. . . . Pwehn kamehlele me soul kin kalokolok soutuk pwehki sapwung kan me e wiahda erein sounpahr keite, oh sohte kihong ih ahnsou mwahu en kapwungala ah sapwung kan, kin uhwong madamadau pwung koaros,” koasoia sounpadahk en pelien lamalam en Hindu Nikhilananda.

² Duwehte Nikhilananda, me tohto nan rahnwet sohte soanamwahu nan arail madamadau ni arail kin rong padahk me pid kalokolok soutuk. Ni ahlohte, meteikan sohte kak wehwehki soahngen padahk me duwehte alehdi irair en Nirvana oh ehuongala me momour kan. Pil rehn irail kan me dene ahr padahk kan kin poahsoanda pohn Paipel, arail padahngki dahkot soul oh dahme kin wiawihong ni ahnsou me e mehla kin wekpeseng. Ahpw dahme Paipel kin uhdahn padahngki duwen soul? Pwehn diarada pasepengo, kitail anahne kasawihada wehwehn lepin lokaiahn Ipru oh Krihk me kin kawehwe “soul” nan Paipel.

Soul Nin Duwen Padahk en Paipel

3. (a) Lepin lokaia dahieu me kin kawehwe “soul” nan Pali Nting Sarawi en Ipru, oh ia wehwehn lepin lokaia wet? (b) Iaduwen Senesis 2:7 kin kadehdehda me lepin lokaia “soul” kin wehwehki aramaso pwon?

³ Lepin lokaiahn Ipru me kin kawehwe “soul” iei neʹphesh, oh e kin pwarada pahn pak 754 nan Pali Nting Sarawi en Ipru. Ia wehwehn neʹphesh? Nin duwen me The Dictionary of Bible and Religion kosoia, e “kin kalap wehwehki aramaso pwon.” Met kin pwungiong dahme Paipel koasoiahki soulo nan Senesis 2:​7 [New World Translation]: “Siohwa Koht eri ketikihda nesen pwehl ehu sang nanpwel oh ketin wiahkihda war ehu me mwomwen aramas oh poukohng nan tumwe esingek en mour, oh ohlo wiahla ohl [soul] momour men.” Tehk me tepin ohlo “wiahla” soul [ohl] men. Met wehwehki me, Adam sohte ahneki soul ehu; ahpw e wia soul ehu​—⁠duwehte emen me wiahla toahkte ih toahkte men. Eri, lepin lokaia “soul” wasaht iei aramaso pwon.

4. Lepin lokaia dahieu kin kawehwe “soul” nan Pali Nting Sarawi en Krihk, oh ia wehwehn lepin lokaia wet?

⁴ Lepin lokaiao me kawehwe “soul” (psy·kheʹ) pwarada tohto sang pak epwiki kei nan Pali Nting Sarawi en Krihk. Duwehte neʹphesh lepin lokaia wet kin kalap wehwehki aramaso pwon. Karasepe ehu, tehk mahsan pwukat: “Ahi soul pahtoulahr.” (Sohn 12:​27, NW) “Masak tepiada kipehdi soul koaros.” (Wiewia 2:​43, NW) “Soul koaros en uhpahiong kaun lapalap kan.” (Rom 13:​1, NW) “Kamweitala soul pahtou kan.” (1 Deselonika 5:​14, NW) “Aramas malaulau keite, ehi, soul walimen, me pitsang pihlo.” (1 Piter 3:​20, NW) E sansal me, psy·kheʹ, duwehte neʹphesh, kin wehwehki aramaso pwon. Nin duwen me loalokong Nigel Turner kasalehda, me lepin lokaia wet “kin wehwehki aramaso, paliwaro me sapwellimen Koht rûaḥ [angin mour] poukohng loale. . . . Soul iei aramaso pwon.”

5. Mahn akan soul? Kawehwehda.

⁵ Kitail en pil tehk me, nan Paipel lepin lokaiao “soul” sohte kin kadoadoahk ongete aramas akan ahpw pil ong mahn akan. Karasepe ehu, ni ah kasalehda kapikipikadahn me mour kan nansed, Senesis 1:20 mahsanih me Koht kehkehlingki: “Pihl akan en kapwarehda soul momour kan.” Oh ni rahn en kapikipik en mwuri, Koht mahsanih: “Sampah en audaudkihda soul momour kan nin duwen arail soahng, mahn mand kan oh mahn kerep kan oh mahn lawalo kan en sampah nin duwen arail soahng.”​—⁠Senesis 1:​24, NW; pil kilang Nempe 31:​28, NW.

6. Dahme kitail kak ndahki en Paipel doadoahngki lepin lokaiao “soul”?

⁶ Ihme kahrehda, lepin lokaiahn wai “soul” me kin kadoadoahk nan Paipel kin wehwehki aramas emen de mahn emen de mour me aramas men de mahn men kin nsenamwahuki. (Kilang koakon me oaralap koasoia: ‘“Soul” nin duwen Mour ehu me Kapikipikda.’) En Paipel kin kawehwe soul me mengei, duduwehte, oh sohte kin audaudkihda padahk en aramas oh tiahk likamw en aramas. Ma ih duwen met, peidek karuaru me kitail anahne idek iei, Nin duwen me Paipel mahsanih, dahme kin wiawihong soulo ni ah mehla?

Me Melahr Akan Sohte Kehn Wasa

7, 8. (a) Dahme Pwuhk Sarawi kin kasalehda duwen irair en me melahr akan? (b) Kihda karasaras kan sang nan Paipel me kasalehda me soul kak mehla.

⁷ Eklesiasdes 9:​5, 10 kin kasalehda ni sansal ia irair en me melahr kan, wasaht kitail wadek: “Me melahr akan sohte ese mehkot . . . Solahr doadoahk, solahr pilahn, solahr loalokong nan sousou.” (Moffatt) Ihme kahrehda, mehla kin wia irair en sohla momour. Sounmelkahkao ntingihdi me ni ahnsou me emen mehla, “re kin pwurehng wiepwella; ni rahnohte ah madamadau kan kin imwisekla.” (Melkahka 146:​4, NW) Me melahr akan sohte kin kehn wasa, re solahr kak mwekid.

⁸ Ni ahnsou me Koht ketikihong kalokepen Adam, e mahsanih: “Pwe ke wiawihda sang pwehl oh ke pahn pwurehng wiepwella.” (Senesis 3:19) Mwohn Koht wiahda ih sang ni pwelen sampah oh ketikiohng ih mour, Adam sohte mie. Ni ahnsou me e mehla, e pwurelahng ni irairohte. Kalokepe iei mehla​—⁠kaidehn e kosoulahng nan ehu wasa tohrohr. Eri, dahme wiawihong ah soul? Pwehki nan Paipel lepin lokaiao “soul” kin kalapw wehwehki aramas emen, ni atail koasoia me Adam mehla, kitail kak nda me soulo me adaneki Adam mehla. Ele met pahn kapwuriamwei ong aramas kan me kin kamehlele me soul sohte kak mehla. Ahpw, Paipel mahsanih: “Soul me wiahda dihp​—⁠pein ih pahn mehla.” (Esekiel 18:​4, NW) Lipai 21:1 (NW) kin koasoia duwen “soul ehu me mehla” (“paliwar mehla ehu,” The Jerusalem Bible). Oh mehn Nasaraid kan kin ale kehkehlik en dehr karanih “soul me mehla” (“paliwar ehu me mehla,” Lamsa).​—Nempe 6:6.

9. Ia wehwehn en Paipel mahsanih me en Resel “soul pidoi sang reh”?

⁹ Ahpw, iaduwen mahsen ko me kileledi nan Senesis 35:18 (NW) me pid mehlahn Resel, me wiawi nindoken e naitikih keriemen en nah pwutako? Wasao kitail wadek: “Pwehki ah soul pidoi sang reh (pwehki e mehla) e ekerki ede Penoni; ahpw semeo likwerikih Pensamin.” Ire wet kin koasoakoasoia me Resel ahneki mehkot loale me pidoi sang reh ni ahnsou me e mehla? Uhdahn soh. Tamataman me, lepin lokaiao “soul” kin pil wehwehki mouro me aramas men ahneki. Ihme nan irair wet en Resel “soul” kin wehwehki ah “mour.” Ihme kahrehda ekei kawehwehn Paipel kan kin kawehwe lepin lokaia ko “ah soul pidoi sang reh” me iei “ah mour wie kohkohdi” (Knox), “e kaimwisekla ah esingek” (JB), oh “ah mour kohkohsang reh” (Bible in Basic English). Sohte mehn kadehde me kasalehda mie wasahkis rehn Resel me momourte mwurin ah mehla.

10. Ni ahl dahieu soul en nein liohdio nah pwutako ‘pwurodo rehn pwutako’?

¹⁰ Met kin duwehte kaiasadahn nein lihodi men pwutako, me kileledi nan 1 Nanmwarki irelaud 17. Nan iretikitik 22 (NW), kitail wadek me ni ahnsou me Elaisa kapakapki pwutako, “Siohwa karonge en Elaisa kapakap, eri soul en serio pwurehng pedolong nan pwutako oh e mourda.” Pil pwurehng, lepin lokaiao “soul” kin wehwehki “mour.” Ihme kahrehda, New American Standard Bible kin koasoia: “Mour en serio pwurodo reh oh e mourda.” Ehi, met iei mour, kaidehn mwohmw ehu me soh sansal, me pwurodohng pwutako. Met kin pahrekiong dahme Elaisa mahsanihong inen pwutako: “Kilang, noumw pwutaken (aramaso pwon) pwe e mouradahr.”​—1 Nanmwarki 17:23.

Iaduwen Ngehno?

11. Dahme kahrehda lepin lokaia “ngehn” sohte kin wehwehki me met iei kisehn paliwaren aramas men me kin momourte mwurin mehla?

¹¹ Paipel mahsanih me ni ahnsou me aramas men mehla, “ngehne kin pidoi, oh e pwurehng wiepwella.” (Melkahka 146:⁠4, NW) Met kin wehwehki me ngehn ehu uhdahn kin pidoi sang nan paliwaro oh uhsehlahte momour mwurin aramaso mehla? Met sohte kak wiawi, pwe sounmelkahkao koasoia mwuri: “Ni rahnohte ah lamalam kan kin sohla mie” (“ah madamadau koaros kin imwisekla,” The New English Bible). Eri, dahkot ngehno, oh iaduwen e kin ‘pidoi’ sang aramaso ni ahnsou me aramaso mehla?

12. Ia wehwehn lepin lokaia kan en Ipru oh Krihk me kin kawehwe “ngehn” nan Paipel?

¹² Nan Paipel lepin lokaiao me kawehwe “ngehn” (lokaiahn Ipru, ruʹach; lokaiahn Krihk, pneuʹma) kin wehwehki “esingek.” Ihme kahrehda, R. A. Knox sohte doadoahngki kawehweo “ngehne kin pidoi” ahpw e doadoahngki lepin lokaia ko “esingek pidoi sang nan paliwere.” (Melkahka 145:⁠4) Ahpw wehwehn lepin lokaiao “ngehn” kin laud sang ihte esiesingek. Karasepe ehu, ni ah kasalehda ohlahn mouren aramas oh mahn kan nan ahnsoun Nohlik lapalap, Senesis 7:22 (NW) mahsanih: “Soahng koaros me esingek en kehl [de, ngehn; lokaiahn Ipru, ruʹach] en mour kin mih reh, me mih nan sampah, mehla.” Eri, “ngehn” kin wehwehki kehl en mour me kin doadoahk nan mour koaros, nan aramas kan oh nan mahn akan, oh e kin momourki esingek.

13. Iaduwen ngehn kin pwurala rehn Koht ni ahnsou me aramaso mehla?

¹³ Eri, ia wehwehn Eklesiasdes 12:7 ni ah mahsanih me ni ahnsou me aramas men mehla, “ngehne pwurala rehn Koht mehlel me ketikihda”? (NW) Met kin wehwehki me ngehno kin uhdahn seiloaklahng nan wehwe lao e lel rehn Koht? Soh, kaidehn ih wehwehn met. Pwehki ngehno iei kehl en mour, e “pwurala rehn Koht mehlelo” me wehwehki en aramaso koapworopwor en mour ahnsou kohkohdo ahnsouwet miher rehn Koht. Koht kelepw me kak kapwurehdo ngehno, de kehl en mour, oh kahrehong aramaso en pwurehng mourda. (Melkahka 104:30) Ahpw Koht kupwurki en wia met?

“E Pahn Pwurehng Mourda”

14. Dahme Sises mahsanih oh wia pwehn pwehn wahdo meleilei oh kamweit ong rien Lasarus lih kan mwurin riara Lasarus mehla?

¹⁴ Nan kisin kahnimw en Pedani, mpen mwail riau ni palimese en Serusalem, Mery oh Marda kin wie mwahmwahieiki mehla mwadang en riara ohl, Lasarus. Sises iang ira nsensuwedla, pwehki e kin poakohng Lasarus oh rie lih kan. Iaduwen Sises pahn kamweitala rien Lasarus lih ko? Sises sohte wiahiong ira koasoi apwal ehu, ahpw e padahkihong ira dahme mehlel. Sises ihte mahsanih: “Riomw ohlo pahn pwurehng mourda.” Sises eri ketilahng nin sousou, oh e kaiasada Lasarus​—⁠kapwuredo mour ong ohl emen me melahr erein rahn pahieu!​—⁠Sohn 11:​18-23, 38-44.

15. Iaduwen Marda mwekidiki dahme Sises mahsanih oh wia?

¹⁵ Marda pwuriamweiki en Sises mahsanih me Lasarus pahn “pwurehng mourda”? E sansal me soh, pwe e sapengki: “I patohwan ese me e pahn pwurehng mourda ni rahnen neko.” E pwosonehr inou en kaiasada. Sises eri padahkihong: “Ngehi me mour sapahl oh Sounkomour. Mehmen me pwoson ie, menda ma e pahn mehla, ahpw e pahn mour.” (Sohn 11:​23-25) En Lasarus pwurehng mourda sang ni manaman kapwuriamweio kin kakehlailla en Marda pwoson oh kahrehong meteikan en pwosonla. (Sohn 11:45) Ahpw ia uhdahn wehwehn lepin lokaiao “iasada”?

16. Dahme lepin lokaiao “iasada” kin wehwehki?

¹⁶ Lepin lokaiao “iasada” kin kawehwe sang lepin lokaiahn Krihk a·naʹsta·sis, me uhdahn kin wehwehki “pwurehng uhda.” Sounkawehwehn Ipru kan en lokaiahn Krihk kin kawehwe a·naʹsta·sis ong lepin lokaia ehu me wehwehki “kapwuredohng mour me melahr kan” (lokaiahn Ipru, techi·yathʹ ham·me·thimʹ).a Ihme kahrehda, iasada kin pidada kamourada aramaso sang ni irair en mehla​—⁠kapwurehdo oh pwurehng kihong mouren aramaso.

17. (a) Dahme kahrehda Siohwa Koht oh Sises Krais sohte pahn apwalki kaiasada emenemen aramas? (b) Inou dahieu Sises ketin wiahda me pid irail ko me sousoun kataman?

¹⁷ Pwehki sohte imwin sapwellime erpit oh sapwellime mehn kataman me unsek, Siohwa Koht kak ni mengei kaiasada aramas. E sohte apwal ong ih en tamatamante irair en mour en me melahr akan​—⁠arail irair akan, ahr mour en mahs, oh oaritik kan koaros me wiahda emenemen aramas. (Sohp 12:13; pil kilang Aiseia 40:26.) Me laud sang met, nin duwen me wiawihong Lasarus, Sises Krais kupwurki oh kak kaiasada me melahr akan. (Tehk Luk 7:​11-17; 8:​40-56) Ni mehlel, Sises mahsanih: “Ahnsou ehu pahn kohdo me irail koaros me mihmi nan sousou en kataman kan pahn rong kapitie [Sises], oh re pahn pedoisang nan arail sousou kan.” (Sohn 5:​28, 29, NW) Ehi, Sises Krais inoukihda me irail ko koaros me katamanparail mihmi rehn Siohwa pahn iasada. E sansal me, nin duwen me Paipel kasalehda, soul kin mehla, oh kopwungpwunglahn mehla iei iasada. Ahpw aramas lik kei mourehr oh melahr. Ihs nanpwungarail me Koht kin tamatamante, awiawih kaiasada?

18. Ihs me pahn iasada?

¹⁸ Irail ko me kin raparapahki elen mour pwung nin duwen sapwellimen Siohwa ladu kan pahn iasada. Ahpw, aramas rar teikan mehlahier ahpw saikinte kasalehda ma re pahn peikiong sapwellimen Koht kosonned pwung de soh. Re saikinte wehwehkihla sapwellimen Siohwa kupwur kan de re saikinte ahneki ahnsou itar en wiahda wekidekla kan me anahn nan ahr mour. Koht kin pil tamatamante irail pwukat oh irail pahn iasada, pwehki Paipel inoukihda: “Me aramas koaros, me mwahu oh suwed, pahn iasada sang mehla.”​—⁠Wiewia 24:15.

19. (a) Kasansal dahieu Sohn kilangada duwen kaiasadao? (b) Dahme “pisikendilahng nan lehn kisiniei,” oh ia wehwehn lepin lokaia ko?

¹⁹ Wahnpoaron Sohn kilangada kasansal en me iasada kan me uh mwohn mwoalen Koht. E kasalehda met, ni ah ntingihdi: “Madau eri kapehda me melahr akan. Mehla oh wasahn mehla akan pil kapehda me melahr akan me ira kolokol. Irail koaros eri pakadeida duwen ar wiewia kan. Mwuri, mehla oh wasahn me melahr akan ahpw pisikendilahng nan lehn kisinieio. Eri, lehn kisiniei wet, iei keriaun mehla.” (Kaudial 20:​12-14) Medemedewe ia wehwehn met! Irail kan koaros me mehla me katamanparail mih rehn Koht pahn saledek sang Hades, de Sheol, sousou. (Melkahka 16:10; Wiewia 2:31) Eri “mehla oh Hades [sousou]” pahn pisikendilahng nan “lehn kisiniei,” me kin karasahiong ohla soutuk. Sousou sohla pahn mie.

Koapworopwor Kaselel Ehu!

20. Soahngen wasa dahieu me aramas rar kan me melahr ahnsouwet pahn iasadahng?

²⁰ Ni ahnsou me aramas rar kei pahn iasada, re sohte pahn pwurodohn mour pohn sampah ehu me tehn. (Aiseia 45:18) Re pahn pirida ong wasa ehu me kaselellahr oh re pahn diarada me wasahn kousoan, likou, oh mwenge tohto kaunopadahngehr ong irail. (Melkahka 67:6; 72:16; Aiseia 65:​21, 22) Ihs me pahn wiahda kaunopada pwukat koaros? E sansal me, pahn mie aramas akan me pahn koukousoan nan sampah kapwo mwohn iasadahn irail kan nan sampah pahn tepida wiawi. Ahpw ihs irail pwukat?

21, 22. Koapworopwor kaselel dahieu me mihmi mwohn irail ko me momour ni “imwin rahn akan”?

²¹ Pweidahn kokohp kan en Paipel kasalehda me kitail momour ni “imwin rahn akan” en koasoandi wet en mehkan.b (2 Timoty 3:1) Ni ahnsou keren, Siohwa Koht pahn ketin kauhdi wiewia sapwung en aramas akan pwehn kihsang me suwed kan pohn sampah. (Melkahka 37:​10, 11; Lepin Padahk 2:​21, 22) Ni ahnsowo, dahme pahn wiawihong irail kan me kin lelepek papah Koht?

²² Siohwa pahn ketin kasorehla me sapwung ahpw e sohte pahn iangahkihla me pwung kan. (Melkahka 145:20) E sohte kin ketin wia soahng wet, oh e sohte pahn wia met ni ahnsou me e kamwakelehsang pohn sampah aramas suwed koaros. (Pil tehk Senesis 18:​22, 23, 26.) Ni mehlel, kaimwiseklahn pwuhk en Paipel kin koasoia duwen “pokon ehu me inenen kalaimwuhnie me sohte aramas kak wadekedi uwen tohto! Re kohsang nan wehi koaros, ni kadaudok koaros, nan sahpw koaros, oh lokaia koaros,” re “keidier nan kamakam laudo.” (Kaudiahl 7:​9-14) Ehi, pokon kalaimwun ehu pahn pitsang kahn kamakam kohwalap me pahn kaimwisekihla koasoandi suwed wet en mehkan, oh re pahn pedolong nan sapwellimen Koht sampah kapwo. Wasao, tohnsampah peik kan kak paiekihda ni unsek sapwellimen Koht koasoandi kaselel en kasaledek tohnsampah sang dihp oh mehla. (Kaudiahl 22:​1, 2) Ihme kahrehda, “pokon kalaimwun” sohte pahn mehla. Ia uwen met wia koapworopwor kaselel ehu!

Mour Poatopoat​—Solahr Mehla

23, 24. Dahme komw anahne wia ma komw men paiekihda mour kohkohlahte sohte mehla nan Paradais nin sampah?

²³ Kitail kak likih koapworopwor kaselel wet? Uhdahn! Pein Sises Krais kasalehda me pahn mie ahnsou ehu me aramas pahn mour kohkohlahte sohte mehla. Mwohnte e kaiasada kompoakepaho Lasarus, Sises padahkihong Marda: “Mehmen me momour oh pwoson ie, sohte pahn mehla kohkohlahte.”​—⁠Sohn 11:26.

²⁴ Ke men mour kohkohlahte nan Paradais nin sampah? Ke inengieng pwurehng kilang irail kan me komw kin poakohng? “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwuren Koht pahn momour kohkohlahte,” wahnpoaron Sohn mahsanih. (1 Sohn 2:17) Met iei ahnsoun sukuhliki ia kupwuren Koht oh en nantiong mour pahrekiong met. Eri, komwi, iangahki aramas rar teikan me kin wiewia kupwuren Koht, kak mour kohkohlahte nan Paradais nin sampah.

[Nting tikitik kan me mi pah]

Komw Tamatamante?

◻ Ia uhdahn wehwehn tepin lepin lokaia ko me kin kawehwe “soul”?

◻ Dahme kin wiawihong soul ni ahnsou me e mehla?

◻ Nin duwen me Paipel kasalehda, dahme pahn kopwungala mehla?

◻ Koapworopwor kaselel dahieu mihmi mwohn me lelepek kan nan rahnwet?

[Koakon nan pali 27]

“Soul” nin duwen Mour ehu me Kapikipikda

Ahnsou kan, lepin lokaiao “soul” kin wehwehki mour me aramas men de mahn emen kin paiekihda. Met sohte kin wekidala en Paipel kin kawehwe me soul iei aramas de mahn. Pwehn karasahda met: Kitail koasoia me aramas men kin momour, wehwehki me aramaso momour. Kitail pil kak nda me aramaso ahneki mour. Ni ahlohte, aramas momour men iei soul ehu. Ahpw, ni ahnsou me e momour, kitail kin nda me “soul” iei mehkot me e ahneki.

Karaspe ehu, Koht padahkihong Moses: “Ohl akan koaros me raparapahki omw soul melahr.” E sansal me, en Moses imwintihti kan kin raparapahki en kihsang ah mour. (Eksodus 4:​19, NW; pil kilang Sosua 9:​24; Lepin Padahk 12:10.) Sises doadoahngki lepin lokaiao ni ahlohte ni ah mahsanih: “Nein Aramas ketido . . . pwehn kihda ah soul nin duwen tomw ehu pwehn wiliandi me tohto.” (Madiu 20:​28, NW; pil kilang Madiu 10:28.) Nan ehuehu irair, lepin lokaiao “soul” kin wehwehki “mouren me kapikipikda men.”

[Kilel kan nan pali 27]

Irail pwukat koaros soul kei

[Credit Line]

Hummingbird: U.S. Fish and Wildlife Service, Washington, D.C./Dean Biggins

[Kilel nan pali 29]

Sises kasansalehda me kopwungpwunglahn mehla iei iasada

[Kilel nan pali 30]

“Mehmen me momour oh pwoson ie, sohte pahn mehla kohkohlahte.”​—Sohn 11:26