Doadoahk Ehu me Anahne Madamadau Karakarahk
1 Sapwellimen Koht Mahsen kaweidkin kitail en “karakarahk ni madamadau, dehr dupuk ong me suwed ong me suwed . . . ahpw, weksang met, kapaiada.” (1 Piter 3:8, 9) Kaweid wet kin inenen doadoahk ong kalohk. Ni mehlel, doadoahk en kalohk ong Kristian kan kak wia ahnsou mwahu en kasawihada ma kitail ahneki karakarahk de soh.
2 Karakarahk irair en mour ehu me kin sewese kitail en kanengamah pahn irair kansensuwed akan. Ni atail kalohk, kitail kin koasoiong aramas akan me kitail sohte ese irail ni arail sohte pein luhke kitail ni imwarail, oh kitail ese me ekei irail pahn kasalehda mwekid lemei. E anahne madamadau en karakarahk pwe kitail en kak nannanti kalohk ni atail kin lelohng soahng pwukat. Nan ehu wasahn kalohk me apwal en kalohk ie, sister pioneer riemen kalohk ihmw lel ihmw rahn koaros erein sounpahr riau oh sohte aramas kin koasoiong ira! Ahpw, ira kin kanengamah, oh rahnwet mwomwohdiso riau miehier wasao.
3 Kanengamahiong Wiewiahn Loaumwohmw: Karakarahk kin sewese kitail en kahlemengih Sises ahnsou me meteikan kin kasalehiong kitail wiewiahn lemei oh loaumwohmw. (1 Piter 2:21-23) Ni ehu ihmw, emen sister tuhwong pwopwoud ehu me lokaia suwed ong ih, keieu liho me lokaia laud ong ih oh mwuri ohlo, oh ira koaros kaus ih oh ndaiong ih me e anahne pedoisang ara wasa. Sistero kouruhrte oh nda me e koapworopworki me ehu rahn e pahn pwurehng tuhwong ira. Me wiahiong pwopwoudo en pwuriamweikihla oh ira eri rong Sounkadehde me uhd kohdo mwurin mwo, oh ira alehda luhk en iang kohla ni Kingdom Hall. Sister me ira lokaia laud ong kasamwo ira oh pil kalaudehla ah kalohk ong ira. Pil kitail kak kamwutereki kapehd en irail me kin kahng rong padahk sang ni atail kasalehda “mpai oh wahu.”—1 Pit. 3:15; Lepin Padahk 25:15.
4 Soikala Irair Aklapalap: Atail loalokongkihla Paipel sohte wiahiong kitail en kilangdiong aramas teikan de wia koasoi me kamwamwahlih irail. (Sohn 7:49) Weksang met, Mahsen en Koht kaweidkin kitail en “dehr kauwe emen.” (Taitus 3:2) Ma kitail uhdahn karakarahk oh aktikitik duwehte Sises, kitail pahn kommoalala kapehden meteikan. (Madiu 11:28, 29) Ahnsou me kitail tuhwong aramas akan nan kalohk, ma kitail kin kasalehda karakarahk oh aktikitik, met pahn kahrehong aramas akan en rong kitail.
5 Ei, madamadau karakarahk kin sewese kitail en kolokol atail lelepek ni atail pahn kalohk nan wasa kan me apwal en kalohk. E pil pahn sewese kamatarak kapehden irail me kahng rong kitail kan, oh e pil kin kamwekid madamadau en mehteikan en kin rong padahk me pid Wehin Koht. Ahpw, laudsang mehkoaros, madamadau karakarahk kin kaperenda Siohwa, me kin “ketikihda kadek sapan ong me nan kapehd karakarahk.”—1 Pit. 5:5.