Doadoahngki Ahmw Loalokong Ahnsou wet Pwe Imwin Rahn akan Pahn Kereniong Imwisekla
1 Mahsen en Koht kin kalap kasalehda me Rahn en Siohwa pahn leledo “rasehng lipirap emen”—me wehwehki, e pahn leledo mwadang oh pil ahnsou me aramas akan sohte kasik. (1 Deselonika 5:2; Madiu 24:43; 2 Pit. 3:10; Kaudiahl 3:3; 16:15) Sises mahsanih: “Iei me kumwail en pil onohnop ahnsou koaros, pwe Nein-Aramas pahn ketido ni awa me kumwail sohte sasairki.” (Madiu 24:44) Iaduwen kitail kak kolokolete lamalam en mwasamwasahn ahnsou wet pwehki imwin rahn akan pahn kereniong imwisekla? Ehu “kih” me pahn sewese kitail en pweida mwahu kitail kak diar nan kaweid wet me kohsang Siohwa Koht: “Doadoahngki ahmw loalokong.”—1 Pit. 4:7.
2 Doadoahngki ahmw loalokong kin pidada atail ahneki madamadau me kin pahrekiong kupwuren Siohwa. (Episos 5:17) E kin sewese kitail en tamataman me kitail kin wia “mehn liki kei oh mehn keiru kei” me kin mihmi nan koasoandi suwed en ahnsou wet. (1 Pit. 2:11) E kin sewese kitail en kasawihada dahme keieu kesempwal nan atail mour oh e pahn pil sewese kitail en wiahda pilipil mwahu kan.—Pilipai 1:10.
3 Wiahda Mehn Akadei Ngehnin kan: Wiahda oh pil nanti pwehn lel mehn akadei ngehnin kan kin sewese kitail en ahneki madamadau oh lamalam pwung. Ke kin ahneki mehn akadei kan ahnsou wet me ke kin nantihong pwehn lel? Ke kin nantihong wadek Paipel rahn koaros, iang towehda mihding kan koaros, wadek Watchtower oh Awake! makisihn kan koaros, oh pil kalaudehla ahmw ahnsou nan kalohk? Ma ke wiahda mehn akadei kan me mwahu ong uhk, ken nantihong pwehn lel mehn akadei pwukat, oh peki rehn Siohwa en kapaiada ahmw nanti kan, oh ke pahn pwuriamweikihla duwen imwila mwahu kan me pahn wiawi.
4 Emen elder idek rehn pwopwoud pwulopwul ehu duwen ara mehn akadei en pali ngehn kan. Met sewese ira en wehwehki me: ma ira pahn kihsang nan arail mour soahng soh katepe kan oh pwainla ara pweipwand laud ieu, ira kak iang doadoahk en Regular Pioneer. Ira eri wiahda ara mehn akadei en Regular Pioneer. Ira nantihong en pwainla ara pweipwando oh ira pil kihsang nan ara mour soangen wiewia kan me sohte katepe me kihsang ara ahnsou oh kehl. Mwurinte sounpahr ehu, ira kakehr lel ara mehn akadei. Ia imwilahn met? Ohl pwopwoudo koasoia: “Ma sohte mehn akadei pwukat, se sohte pahn kak wia dahme se wia rahnwet. Se inenen peren sang mahs. Aht mour kin meleilei oh mwahu sang mahs. Aht mour me katapan oh pil mie wehwehn aht mour met.”
5 Ni atail kin awiawih Rahn en Siohwa en leledo, kitail en mwasamwasahn ahnsou koaros oh doadoahngki atail loalokong ni atail kin mwohneki kupwuren Koht nan atail mour.—Taitus 2:11-13.