Koul 99 (221)
Pwulopwul kan! Kahlemengih Arail Pwoson
1. Samuel wisikdohng Sailo ni ah pwelel
Pwehn keirda papah Koht nan imwen kaudok.
E wiahla samworo en Israel men,
E kawahu mwaren Koht, wia Nasaraid.
Samworo Ilai, nah pwutak kan suwed.
Ira soh kaweid suwed pwutak Samuel?
Soh, Samuel lelepek; e kaiahn ohng peik.
E sohte kak en kesehla Siohwa.
2. Pwutak Timoty pil sang’te ah seri
Ese Pwuhk Sarawi, wia elder mwahu.
E kin mourki mehkan me e sukuhliki.
E kin song lelepek ni ahnsou koaros.
E kahlemeng mwahu nan ah mwomwohdiso,
E ale ah pwais ni koaros kin pwungki.
E ale pwais tohrohr en seiloak iang Pohl;
Ah seiloak wahdo kapai laud ohng koaros.
3. Sister kan, taman peinakapw en Israel
Ah pwoson ‘Iohwa rasehng takai pweilaud.
Mendahki ah lidu, eh pwoson kehlail;
Ah ngoang oh mehlel kamwekid meteikan.
Ohng ahn Nahman ah pwoud e padahkihong:
‘Soukohp en ‘Iohwa men kak kihsang soumwahu.’
Soupeidi en Siria karonge ih.
Laduo wahdohng ih kapai mwuledek.
4. Se kangoange riat pwulopwul koaros
En alasang kaweid kaselel pwukat.
“Ahnsou imwi” wet mie aht pwukoah laud.
Siohwa pahn kadar’ me E pilada.
Me pwulopwul koaros, iang towe “peio”
Iang laduhn Koht koaros me poakohng me pwung.
Sen lohki keper kan oh kapinga Ih
Oh iang ale kapai ni imwin rahn kan.