Kitail en Kihong Siohwa Dahme Keieu Mwahu
1 Sapwellimen Siohwa Kosonned ong wehin Israel kasalehda me mahn me irail kin meirongkihong Siohwa anahne “mwahu.” Siohwa kin ketin kupwursuwedki meirong en mahn me soumwahu de sohunsek. (Lipai 22:18-20; Malakai 1:6-9) Ihme kahrehda, ni ahnsou me irail kin wia meirong, irail anahne kihong Siohwa wihe koaros—pwe wihe kan me keieu mwahu. (Lipai 3:14-16) Siohwa kin warohng dahme keieu mwahu nin duwen Semen Israel oh Soumas Lapalap.
2 Rahnwet kin duwehte kawao, Koht kin tehk ma kitail kin kihda meirong me keieu mwahu de soh. Atail doadoahk en papah Siohwa anahne kasalehda me kitail wauneki Siohwa. Ni mehlel, irair en aramas koaros kin wekpeseng. Kahrehda, kitail anahne kasawih pein kitail pwehn tehk ma kitail kin kihong Siohwa dahme keieu mwahu.—Episos 5:10.
3 Papah Siohwa Sang Mohngiong Unsek: Atail doadoahk en papah Siohwa sohte kin wauneki Siohwa oh sohte kin kamwekid mohngiong en irail me kin rong kitail ma kitail kin pwangahki wia doadoahk wet. Atail kin kapinga Koht oh koasoia duwen sapwellime kupwur kan anahne en kohsang mohngiongatail me dirki kalahngan. (Melkahka 145:7) Met kin kasalehda kahrepe kesempwal en idawehn atail koasoandi en wia pein atail onop Paipel.—Lepin Padahk 15:28.
4 En kihong Siohwa dahme keieu mwahu kin pil wehwehki me kitail pahn kahlemengih Ih nin duwen sapwellime limpoak. (Episos 5:1, 2) Limpoak ong aramas pahn kamwekid kitail en nantihong kalohk ong aramas koaros me kitail kin tuhwong oh ehukihong irail duwen padahk mehlel me kin komourkitailla. (Mark 6:34) E kin pil kamwekid kitail en kasalehda me kitail nsenohki aramas akan me kitail kin koasoiong. E kin sewese kitail en medemedewe duwen irail mwurin atail tepin tuhwong irail oh e pil kin kamwekid kitail en pwurehng pwurala rehrail. E kin kamwekid kitail en wia uwen atail kak koaros en sewese irail kekeirada ni pali ngehn.—Wiewia 20:24; 26:28, 29.
5 “Meirong en Kaping”: Pil ehu ahl me kitail kak kihong Siohwa dahme keieu mwahu iei atail nannanti nan kalohk. Ma kitail kin soandi mwahu oh wia uwen atail kak koaros nan atail doadoahk en kalohk, kitail pahn kak doadoahngki mwahu atail ahnsou. (1 Tim. 4:10) Oh pil, ma kitail kin kaunopada mwahu, met pahn sewese kitail en kak koasoi ni ahl me sansal oh ngoang, oh mehpwukat pahn kak sewese mehteikan en rong oh mwekidki dahme kitail kin koasoia. (Lepin Padahk 16:21) Ni atail kin ehukihong mehteikan duwen Rongamwahu en Wehin Koht, kitail kak nda me atail koasoi kan me kin kohsang atail mohngiong kin wia “meirong en kaping.”—Ipru 13:15.