Wiahda Meirong kan me Keieu Mwahu ong Siohwa

“Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kaun-o.”​—KOL. 3:23.

TEHK MA KE KAK SAPENG:

Ia duwen atail kak wauneki Siohwa nan atail wiewia en ehuehu rahn?

Soangen meirong dah kan me kitail kin wia nan atail kaudok ong Koht?

Soahng dah kan me kitail kak kihong Siohwa?

1-3. (a) Pwehki Sises eh ketikihdahr sapwellime mour nin duwen meirong ehu, met wehwehki me Siohwa solahr ketin kupwurki kitail en wia meirong? Menlau kawehwehda. (b) Peidek dahieu me kitail ele ahneki duwen atail meirong kan?

NI MWEHIN wahnpoaron ko, Siohwa ketin kasansalehiong sapwellime aramas ko me sapwellimen Sises meirongo kasohrelahr Kosonned en Moseso. (Kol. 2:13, 14) Siohwa solahr ketin kupwurki meirong kan en mahn oh meirong teikan me mehn Suhs kan kin wiewia erein sounpar epwiki kei. Kosonnedo kapwaiadahr eh pwukoa sang ni eh kahluwalahng aramas pwukat rehn Krais.​—Kal. 3:24.

² Met sohte wehwehki me Kristian akan solahr nsenohki wiahda meirong kan. Ni mehlel, wahnpoaron Piter koasoia anahnepen “patohwandahng Koht meirong kan” me kin pidada kaudok me Koht ketin kupwurki pwehki Krais. (1 Pit. 2:5) Wahnpoaron Pohl pil kasansalehda me mour en Kristian men duwehte “mehn meirong” me inoudahr ong Koht.​—Rom 12:1.

³ Kitail kin wiahda meirong kan ong Siohwa, ni atail meirongkihong mehkot de ni atail mehndahkihla soahng kan pwe kitail en kak kamwahwihala atail papah ih. Sang dahme kitail esehier duwen meirong kan me mehn Israel kan kin wiahda, ia duwen atail kak uhdahn kamehlele me Siohwa kin ketin kupwurki atail meirong kan?

MEIRONG KAN EN EHUEHU RAHN

4. Dahme kitail anahne tamataman duwen atail wiewia en ehuehu rahn?

⁴ E kakete apwal en wehwehki ia duwen atail wiewia en ehuehu rahn eh kak pidada atail wiahiong Siohwa meirong kan. Mwein kitail sohte medewe me soangen wiewia pwukat me duwehte doadoahk nan ihmw, kohla sukuhl oh doadoahk de netinet kak pidada atail nanpwungmwahu reh. Ahpw ma ke inoukihongehr Siohwa omw mour de pahn kereniong wia met, e kesempwal en tamataman me wiewia pwukat uhdahn kak pidada omw nanpwungmwahu reh. Ahnsou koaros kitail wia Kristian kei nan ehuehu rahn, oh kitail anahne doadoahngki kaweid kan en Paipel nan irair koaros en atail mour. Ihme kahrehda Pohl kangoange kitail: “Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Kaun-o, ahpw kaidehn ong aramas.”​—Wadek Kolose 3:18-24.

5, 6. Dahme kak sewese kitail en pilada dahme kitail pahn wia oh likawih?

⁵ Atail wiewia en ehuehu rahn kaidehn kisehn atail papah Koht. Ahpw, ire mehlel me Pohl kangoange kitail en doadoahk duwehte me kitail doadoahk ong Siohwa ni mour unsek kin kahrehiong kitail en medewe ia duwen atail anahne mwekid ahnsou koaros. Eri, dahme kitail sukuhlki sang met? Ia duwe, kitail kin ahnsou koaros mwekid oh likouda ni ahl me konehng Kristian kan? De nan atail wiewia en ehuehu rahn, kitail kakete namenengki nda me kitail Sounkadehdehn Siohwa kan, pwehki atail mwekid kan de atail likouda? Kitail en dehr mweidohng met en wiawi! Kitail sohte men wia mehkot me aramas akan kakete medewe mehkot suwed duwen mwaren Koht.​—Ais. 43:10; 2 Kor. 6:3, 4, 9.

⁶ Kitail pahn koasoiapene duwen atail ineng en doadoahk duwehte me kitail doadoahk ong Siohwa ni mour unsek eh kin kamwakid atail madamadau oh wiewia kan nan soangsoangen irair kan. Ni atail kin koasoiapene met, kitail anahne tamataman me meirong koaros me mehn Israel ko patohwanohng Siohwa anahne wia me keieu mwahu.​—Eks. 34:26.

IA DUWEN OMW MOUR EH KIN PIDADA

7. Dahme kin pidada atail inoukihong Koht atail mour?

⁷ Ni omw inoukihong Siohwa omw mour, ke wiahda pilipil mwahu ehu. Ke inoukihda me ke pahn doadoahngki omw mour unsek en papah ih. Met wehwehki me ke pahn mwohneki ih nan irair koaros en omw mour. (Wadek Ipru 10:7.) Ni omw nantihong en sukuhlki dahme Siohwa ketin kupwurki duwen ire ehu oh mwekidki dahme e kupwurki, e uhdahn kin imwila mwahu ong uhk. (Ais. 48:17, 18) Kitail wia aramas kei me sarawi oh peren pwehki atail kin kahlemengih Siohwa me kin ketin kaweid kitail.​—Lip. 11:44; Mel. 104:31.

8. Dahme kahrehda e kesempwal kitail en tamataman me Siohwa ketin medewehki ahn mehn Israel ko arail meirong kan nin duwen mehkot me sarawi?

⁸ Siohwa kin ketin medewehki ahn mehn Israel kan meirong nin duwen mehkot me sarawi. (Lip. 6:25; 7:1) Lepin lokaiahn Ipru me kawehwehdi “sarawi” kin wehwehki en katohrohrla de wia sapwellimen Koht kelehpw. Ma kitail men Siohwa en ketin kupwurki atail meirong kan, kitail anahne liksang soahng koaros nan sampah wet me samin. Kitail sohte kak poakohng mehkot me Siohwa ketin kalahdeki. (Wadek 1 Sohn 2:15-17.) Met wehwehki me kitail anahne liksang emen de mehkot me pahn kahrehiong Koht en ketin saminkin kitail. (Ais. 2:4; Kaud. 18:4) E pil wehwehki me kitail sohte kak kilikilang de medemedewe duwen soahng kan me samin.​—Kol. 3:5, 6.

9. Dahme kahrehda mwomwen atail wiewia ong meteikan kin kesempwal?

⁹ Pohl kangoangehki ienge me pwoson kan: “Kumwail dehr manokehla wiewia mwahu kan oh amwail sawaspene, pwe ih soangen meirong pwukat me Koht kin ketin kupwurperenki.” (Ipru 13:16) Eri ma ahnsou koaros kitail kin wia dahme mwahu oh sewese meteikan, Siohwa pahn ketin kilangwohng atail wiewia kan nin duwen meirong kan me e ketin kupwurperenki. Ni atail kin nsenohki meteikan, kitail kin kasalehda me kitail Kristian mehlel kei.​—Sohn 13:34, 35; Kol. 1:10.

MEIRONG KAN NAN KAUDOK

10, 11. Ia duwen Siohwa eh ketin kilangwohng atail kalohk oh kaudok? Dahme met anahne kamwakid kitail en wia?

¹⁰ Ehu ahl me kitail kak wia me mwahu ong meteikan iei sang ni atail kin kalohki “koapworopwor me kitail kin kadehdehda.” Ke kin doadoahngki ahnsou mwahu koaros en kalohk? Pohl koasoia me kitail anahne “wiahiong Koht atail tungoal meirong en kaping” me iei wahn ewetail me kin kadehdehda mwareo. (Ipru 10:23; 13:15; Os 14:2) E kak sawas mwahu en medewe uwen ahnsou me kitail kin doadoahngki ong kalohki rongamwahwo oh ia duwen atail kak kamwahwihala atail kalohk. Padahk tohto nan Mihting en Kalohk kin sewese kitail en wia met. Ahpw pwehki atail doadoahk en kalohk ihmw lel ihmw oh ahnsou sohte lipilipil iei wiewiahn “meirong en kaping” kan me wia kisehn atail kaudok, eri atail meirong pwukat anahne wia me keieu mwahu. Atail irair kan kin wekpeseng, ahpw mwomwen atail pepehm oh madamadau duwen papah Siohwa kin kalapw kamwakid uwen laud en ahnsou kitail kin doadoahngki ong kalohk.

¹¹ Ahnsou koaros kitail kin kaudok ong Siohwa sohte lipilipil ma kitail mi ni imwatailo de nan mwomwohdiso. E kupwurki kitail en wia met. Mehnda kitail solahr anahne peikiong kosonned en Sapad de kohla Serusalem pwehn towehda kasarawi kan, kitail kak alehte kasukuhl sang kosonned pwukat. Soahng tohto kitail kin wia rahn koaros, ahpw Koht ketin kasik kitail en doadoahngki ekei atail ahnsou pwehn onopki Paipel, kapakap, oh towehda mihting kan. Oh tapwin peneinei pwukoahki wia onop en Paipel rehn tohn eh peneinei. (1 Des. 5:17; Ipru 10:24, 25) Eri e mwahu en pein idek rehtail, I pahn kak kamwahwihala ei kaudok ong Koht?

12. (a) Dahme kitail kak karasahiong meirong en warpwohmwahu nan kaudok en mehn Israel rahnwet? (b) Ia duwen atail kak kapakap pwehn duwehte warpwohmwahu?

¹² Nanmwarki Depit koulkihong Siohwa: “Komw ketin kupwurehla ei tungoal kapakap duwehte warpwohmwahu.” (Mel. 141:2) E mwahu en medewe pak depe kitail kin kapakap oh dahme kitail kin kapakapki. Pwuhken Kaudiahl kin kapahrekiong “kapakap en sapwellimen Koht aramas akan” warpwohmwahu. E koasoia me kapakap kan me Siohwa ketin kupwurki kin rasehng mehkot me pwohmwahu. (Kaud. 5:8) Mahs nan Israel, warpwohmwahu me kin kalapw kadoadoahk pohn sapwellimen Siohwa pei sarawio anahne en kaunopada ni keneinei. Siohwa pahn kupwurperenki ihte ma e wiawihda nin duwen me kileldi nan kosonned me e ketikihda. (Eks. 30:34-37; Lip. 10:1, 2) Pil duwehte, ma kitail kin kapakap ni ahl ehu me Siohwa ketin kaweidkin kitail oh kitail kilangwohng kapakap nin duwen mehkot me sarawi, kitail kak kamehlele me e pahn kupwurperenki atail kapakap kan.

KITAIL KIHWEI OH KITAIL ALE

13, 14. (a) Dahme Epaprodaitus oh mwomwohdiso en Pilipai wia ong Pohl? Ia ahn Pohl pepehm duwen met? (b) Ia duwen atail kak idawehn mehn kahlemeng en Epaprodaitus oh mehn Pilipai kan?

¹³ Mwohni me kitail kihda pwehn sewese doadoahk en kalohk nan sampah pwon duwehte meirong ehu, sohte lipilipil ma kitail kihda laud de tikitik. (Mark 12:41-44) Ni mwehin wahnpoaron ko, mwomwohdiso en Pilipai kadarala Epaprodaitus Rom pwehn apwalih ahn Pohl anahn kan. Epaprodaitus wahla ekei mwohni rehn Pohl nin duwen kisakis ehu sang mwomwohdiso. Met kaidehn keieun mehn Pilipai kan arail kasalehiong Pohl kadek. Re kadaralahng Pohl kisakis wet pwehki re sohte men en pwunodki mwohni ahpw re men en doadoahngki eh ahnsou laud nan kalohk. Dahme Pohl medewehki kisakis wet? E nda me met “rasehng meirong pwohmwahu ehu ong Koht, meirong ehu me e pahn ketin ale oh kupwurperenki.” (Wadek Pilipai 4:15-19.) Pohl kin uhdahn kalahnganki kadek en mehn Pilipai kan, oh Siohwa pil ketin kupwurperenki.

¹⁴ Rahnwet, Siohwa pil kin ketin kupwurperenki atail sawas ong doadoahk en kalohk nan sampah pwon. Oh e ketin inoukihda me ma kitail pahn pousehlahte mwohneki mahs sapwellime Wehio, e pahn ketikihong kitail dahme kitail anahne pwe kitail en pwoson kehlail oh mour ehuehu rahn.​—Mad. 6:33; Luk 6:38.

KASALEHDA OMW KALAHNGAN

15. Soahng dah kan me ke kin kalahngankihong Siohwa?

¹⁵ Mie kahrepe tohto me kitail en kalahngan ong Siohwa. Ehuehu rahn kitail anahne kalahngankihong ih kisakis en mour. E ketikihong kitail soahng koaros me kitail anahne pwehn mour, duwehte mwenge, likou, ihmw, oh kisinieng me kitail esingengki. Oh kitail pil kalahnganki loalokong pwung en padahk mehlel kan en Paipel me kin kihong kitail pwoson oh koapworopwor ong ahnsou kohkohdo. Kahrehda kitail anahne kaudok ong Siohwa oh wiahda meirong en kaping pwehki ihs Siohwa oh dahme e ketin wiahiong kitail.​—Wadek Kaudiahl 4:11.

16. Ia duwen atail kin kasalehda me kitail kalahnganki sapwellimen Krais meirong?

¹⁶ Nan iren onop en mwoweo e koasoia me sapwellimen Krais meirong iei kisakis kesempwal ehu ong aramas sang rehn Koht. Kisakis wet kasalehda uwen laud en sapwellimen Koht limpoak ong kitail. (1 Sohn 4:10) Ia duwen atail kin kasalehda me kitail kalahnganki met? Pohl koasoia: “Pwe limpoak en Krais me kamwakamwakid kiht, pwehki at dehdehkier padahk wet: aramastehmen pwoukihla aramas koaros; . . . E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Kor. 5:14, 15) Pohl koasoia me ma kitail uhdahn kalahnganki dahme Koht ketin wiadahr, kitail pahn doadoahngki atail mour pwehn wauneki Koht oh sapwellime Ohl. Kitail kin kasalehda atail limpoak oh kalahngan ong Koht oh Krais sang ni atail kin peik oh inengieng men kalohk oh katohnpadahk.​—1 Tim. 2:3, 4; 1 Sohn 5:3.

17, 18. Ia duwen ekei ar kin kalaudehla arail meirong en kaping ong Siohwa? Menlau kihda karasepe ehu.

¹⁷ Ke pahn kak kamwahwihala omw meirong en kaping ong Koht? Mwurin me tohto arail medemedewe soahng mwahu koaros me Siohwa ketin wiahiong irail, re kin wiahda wekidekla kan pwe ren kalaudehla arail ahnsou en kalohk oh doadoahk teikan nan sapwellimen Siohwa pwihn. Ekei kak iang sawaspen pioneer sounpwong ehu de tohto sang nan ehuehu sounpar, oh ekei kak iang pioneer. A ekei kin sewese kauwada wasahn kaudok en Sounkadehdehn Siohwa kan. Mepwukat wia ahl kaselel kei en kasalehda atail kalahngan. Ma kitail kin papah Koht ni madamadau oh pepehm pwung, me iei en kasalehiong ih atail kalahngan, Koht pahn ketin kupwurki dahme kitail kin wia.

¹⁸ Kristian tohto kin men kasalehda arail kalahngan ong Siohwa. Morena iei emen irail. E tikida nin duwen emen Kadolik ahpw e ahneki peidek tohto duwen Koht oh ia wehwehn mour. E kin rapahki pasapeng kan nan padahk oh tiahk en Kadolik oh nan lamalam en mehn Eisia. Ahpw eh peidek kan pasapengla sansal ihte ni ahnsou me e tepida onopki Paipel rehn Sounkadehdehn Siohwa kan. Morena kin uhdahn kalahngankihong Siohwa dahme e sukuhlki nan Paipel pwehki met kahrehiong en ahneki nsenamwahu mehlel nan eh mour. Eri e men kalahngan ong Siohwa sang ni eh doadoahngki eh kehl koaros ni eh papah. Mwurinte eh papidaisla, e wia sawaspen pioneer sounpwong koaros, oh mwurinte eh irair kan mweidohng, e wiahla pioneer men. Met wiawiher sounpar 30 samwalahro, oh Morena wiewiahte pioneer men.

19. Ia duwen omw kak kalaudehla omw meirong kan ong Siohwa?

¹⁹ Mie sapwellimen Siohwa ladu lelepek tohto me arail irair sohte mweidohng irail ren pioneer. Sohte lipilipil dahme kitail kak wia nan atail papah Siohwa, kitail koaros kak wiahda meirong kan me e kin ketin kupwurki. Ni mwomwatail, kitail kapwaiada kaweid en Paipel kan oh tamataman me kitail wiliwilian Siohwa ahnsou koaros. Ni pwoson, kitail anahne likih Koht me e pahn ketin kapwaiada kupwure. Nan atail wiewia kan, kitail kin sawas kalohkiseli rongamwahwo. Kitail kin kasalehda me kitail uhdahn kalahngankihong Siohwa soahng koaros me e ketin wiahiong kitail. Eri kitail en pousehlahte wiahiong Siohwa meirong kan sang ni atail mour unsek.

[Kilel nan pali 27]

Sapwellimen Siohwa kamwahu kin kamwakid uhk ken kamwahwihala omw meirong en kaping?

[Kilel nan pali 25]

Ke kin doadoahngki ahnsou mwahu koaros pwehn kalohk?