Pwihn Samworo en Nanmwarkio me Wia Kamwahu ong Aramas Koaros

“Kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu, sapwellimen Koht aramas kei.”​—1 PIT. 2:9.

KE KAK KAWEHWEHDA?

Iahd me Siohwa tepin inoukihda pwihn samworo en nanmwarkio?

Ia duwen tohn inou kapwo ar wiahla pwihn samworo en nanmwarkio?

Ia duwen pwihn samworo en nanmwarkio ar pahn wia kamwahu ong aramas koaros?

1. Dahme kahrehda saken soutik en Kauno pil adaneki Kataman? Ia kahrepen kasarawi wet?

NI PWOHNG en Nisan 14 pahr 33, Sises Krais oh sapwellime wahnpoaron 12 ko kasarawi kaimwiseklahn Pahsohpa en mehn Suhs kan. Sises eri ketin mahsanihong Sudas Iskariot me pahn kereniongehr pangala ih en kohkohla. Mwuri, Sises ketin tapihada kasarawi tohrohr ehu. Mwuhr aramas kin ndahki kasarawi wet saken soutik en Kauno. (1 Kor. 11:20) Sises ketin mahsanih pak riau: “Kumwail wia met ong ni katamanpei.” Aramas pil kin ese me kasarawi wet iei Kataman. E wia ahnsou kesempwal ehu ni atail kin tamanda dahme Krais ketin wia, ahpw mehlel eh pwoukinkitailla. (1 Kor. 11:24, 25) Sounkadehdehn Siohwa kan nan sampah pwon kin kapwaiada kehkehlik wet sang ni arail kin wia Kataman nan pahr koaros. Nan pahr 2012, Nisan 14 nin duwen kalendar en mehn Suhs, tepida ni kihrlahn ketipin en Niepeng, April 5.

2. Dahme Sises mahsanihki duwen pilawao oh waino?

² Tohnpadahk Luk padahkihong kitail dahme Sises ketin wia oh mahsanih ni ahnsowo: “E ahpw ketikihda pilawa ieu, kapingkalahngan ong Koht, ketin pilitikihpeseng pilawao oh ketikihong irail, mahsanih, ‘Iei werei met me pengpengkinkumwaillahr. Kumwail wia met ong ni katamanpei.’ Pil duwehte, mwurin konoto, e ketikihong irail dahl ehu, mahsanih, ‘Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.’” (Luk 22:19, 20) Ia duwen wahnpoaron ko arail wehwehki mahsen pwukat?

3. Ia duwen wahnpoaron ko arail wehwehki sapwellimen Sises mahsen duwen pilawao oh waino?

³ Wahnpoaron ko wehwehki duwen meirong en mahn akan me samworo ko kin patohwanohng Koht ni tehnpas sarawio nan Serusalem. Meirong pwuko kin wiawi pwe Siohwa en ketin kupwurkin aramas akan me kin kihda mehn meirong ko oh meirong tohto wia meirong en mahkpen dihp kan. (Lip. 1:4; 22:17-29) Eri ni Sises eh mahsanih me paliwere pahn pengpengla oh ntah pahn kepwilipwildi pwehki irail, wahnpoaron ko wehwehki me Sises pahn ketikihda pein sapwellime mour unsek nin duwen meirong ehu. Sapwellime meirong pahn uhdahn kesempwal sang meirong en mahn akan.

4. Ia wehwehn Sises eh mahsanih: “Dahl wet iei delen sapwellimen Koht inou kapw me wiawihkidahr ntahi”?

⁴ Ia wehwehn Sises eh mahsanih: “Dahl wet iei delen sapwellimen Koht inou kapw me wiawihkidahr ntahi”? Wahnpoaron ko ese kokohp en Seremaia duwen inou kapw wet. (Wadek Seremaia 31:31-33.) Sapwellimen Sises mahsen kasalehda me e pahn ketin tapihadahr inou kapwo. Inou kapw wet pahn wiliandi inou en Kosonnedo me Siohwa ketin wiahda ong mehn Israel ko sang ni eh ketin doadoahngki Moses. Ia duwe, inou riau pwukat dokpene?

5. Kapai dah kei me inou en Kosonnedo kihong mehn Israel ko?

⁵ Ei, kahrepen meirong pwukat kin dokpene. Ni Siohwa eh ketin wiahda inou en Kosonned ong mehn Israel ko, e mahsanih: “Ma kumwail pahn peikiong ie oh dadaur ei inou, kumwail pahn wiahla nei aramas kesempwal. Tohn sampah pwon uhdahn nei, ahpw kumwail me pahn wiahla nei aramas pilipil. Kumwail eri pahn wiahla wehi ehu me pahn papah ie nin duwen samworo, pwihnen aramas ehu me kasarawihong iehte.” (Eks. 19:5, 6) Ia duwen mehn Israel ko ar wehwehki mahsen pwukat?

INOU EN “PWIHN SAMWORO EN NANMWARKIO”

6. Inou dahieu me inou en Kosonnedo sewese en pweida?

⁶ Mehn Israel ko ese dahkot “inou” ehu, de pwungkipenehn mehkot kesempwal, pwehki mwowe Siohwa ketin wiahda inou kei ong Noha oh Eipraam. (Sen. 6:18; 9:8-17; 15:18; 17:1-9) Nan sapwellime inowo, Siohwa ketin inoukihong Eipraam: “Pwehki kadaudokomw wehi koaros en sampah pahn uhdahn kapaiairailda.” (Sen. 22:18, NW) Siohwa ketin wiahda inou en Kosonnedo pwehn sewese pweidahn inou wet. Poahsoankihda inou en Kosonnedo, mehn Israel ko kak wiahla sapwellimen Siohwa “aramas pilipil.” Ia kahrepen mehn Israel ko ar pahn wiahla aramas pilipil kei? Pwe ren kak wiahla ‘wehi ehu me pahn papah Siohwa nin duwen samworo.’

7. Ia wehwehn iren Paipel kan ni ar mahsanih ‘wehi ehu me pahn papah ih nin duwen samworo’?

⁷ Mehn Israel ko kin wehwehki duwen nanmwarki kan oh samworo kan. Ahpw ohl tehmen mahs me wia nanmwarki oh samworo men ahnsou tehieu me Siohwa ketin kupwurki. Ohlo iei Melkisedek. (Sen. 14:18) Ni eh ketin doadoahngki inou en Kosonnedo, Siohwa ketikihong mehn Israel ko ahnsou mwahu ren ahneki ‘wehi ehu me pahn papah ih nin duwen samworo’ me pilipilda sang arail wehi. Mwuhr, iren Paipel kan koasoiahki irail me pilipilda pwukat nin duwen “pwihn samworo en Nanmwarkio.”​—1 Pit. 2:9.

8. Dahme samworo kan me Koht ketin idihada kin wia?

⁸ Nanmwarki men uhdahn kin kakaun. Ahpw dahme samworo men kin wia? Ipru 5:1 kawehwehda: “Samworo lapalap koaros kin pilipilda sang rehn aramas akan oh kileldi en papah Koht nin duwen wiliepen aramas akan pwe en meirongkihong Koht ar kisakis akan pwehki diparail kan.” Samworo men me Siohwa ketin idihada kin wiliandi aramas akan mwohn silangi. E kin peki mahk rehn Siohwa en ketin mahkohng dipen aramas akan sang ni eh patohwanohng Siohwa meirong kan. Samworo men pil kin wiliandi Siohwa mwohn aramas akan ni eh kin padahkihong irail sapwellimen Koht kosonned kan. (Lip. 10:8-11; Mal. 2:7) Ni ahl pwukat, samworo men kin sewese aramas dipan kan ren pwurehng ahneki nanpwungmwahu rehn Koht.

9. (a) Dahme mehn Israel ko anahne wia pwe ren ahneki ahnsou mwahu ren wia ‘wehi ehu me pahn papah Koht nin duwen samworo’? (b) Dahme kahrehda Siohwa ketin idihada ekei ren wia samworo kei nanpwungen mehn Israel ko? (c) Dahme kahrehda mehn Israel ko sohte kak wia ‘wehi ehu me pahn papah Koht nin duwen samworo’ nan inou en Kosonnedo?

⁹ Inou en Kosonnedo kihong mehn Israel ko ahnsou mwahu ren wiahla nanmwarki oh samworo kei pwehn wia kamwahu ong “tohn sampah pwon.” Ahpw mie mehkot me mehn Israel ko anahne wia pwe ren ahneki kapai kaselel wet. Koht ketin mahsanih: “Kumwail pahn peikiong ie oh dadaur ei inou.” Ia duwe, re kak uhdahn “peikiong” Siohwa? Ei, ahpw kaidehn ni unsek. (Rom 3:19, 20) Pwehki kahrepe wet Siohwa ketin idihada ekei ren wia samworo kei nanpwungen mehn Israel ko. Samworo pwukat sohte kin papah nin duwen nanmwarki kei. Re kin wiahda meirong en mahn akan pwehki dipen aramas akan. (Lip. 4:1–6:7) Dihp pwukat pil kin iangahki dipen samworo ko. (Ipru 5:1-3; 8:3) Mendahki Siohwa ketin kupwurki meirong pwukat, re sohte kak kihsang douluhl dipen mehn Israel ko. Samworo ko nan inou en Kosonnedo pil sohte uhdahn kak kahrehiong mehn Israel me mohngiong mehlel ko ren pwurehng ahneki nanpwungmwahu rehn Koht. Wahnpoaron Pohl kasalehda nin duwen met: “Ntahn kouwol oh kuht sohte mwahn pahn kak kamwakelehsang dipen aramas akan.” (Ipru 10:1-4) Pwehki mehn Israel ko ar sohte peikiong soahng koaros me mi nan Kosonnedo, re riahla. (Kal. 3:10) Nan irair wet, re sohte kak papah aramas teikan koaros nin duwen pwihn samworo en nanmwarkio.

10. Ia kahrepen inou en Kosonnedo?

¹⁰ Met sohte wehwehki me mehn Israel ko sohte kak wiahla kisehn ‘wehi ehu me pahn papah Koht nin duwen samworo’ nin duwen me Siohwa ketin inoukidahr. Ma re uhdahn nantihong peikiong Siohwa, re pahn ahneki kapai wet, ahpw kaidehn ahnsou me re mi pahn Kosonnedo. Dahme kahrehda? (Wadek Kalesia 3:19-25.) Pwehn wehwehki met, kitail anahne ese ia kahrepen inou en Kosonnedo. Kosonnedo kin perehsang mehn Israel peik kan kaudok likamw. E pil sewese irail ren wehwehki me irail aramas dipan kei oh re anahne meirong ehu me laudsang dahme arail samworo lapalap men kak wiahda. Kosonnedo pahn kaunopada irail pwe ren kamehlele ihs me Krais de Mesaia. Ahd pwukat wehwehki “Me Keidi Men.” Ahpw ni Mesaiao eh ketido, e pahn wiahda inou kapw me soukohp Seremaia kohpadahr. Irail me pwungki Krais pahn iang inou kapw oh pahn wiahla ‘wehi ehu me pahn papah Koht nin duwen samworo.’ Kitail pahn koasoiapene ia duwen met eh pahn wiawi.

IRAIL ME IANG INOU KAPWO WIAHLA PWIHN SAMWORO EN NANMWARKIO

11. Ia duwen Sises eh ketin wiahla poahsoanpen pwihn samworo en nanmwarkio?

¹¹ Nan pahr 29, Sises en Nasaret ketin wiahla Mesaia. E sounpar 30 ape ni eh ketin papidaisla. Eh papidais kin kasalehda me e perenki wia pwukoa tohrohr me Siohwa ketin kupwurki ong ih. Siohwa eri ketin mahsanih duwen ih: “Kowe, me iei nei pwutak kompoake.” Oh Siohwa ketin keiekihdi sapwellime manaman a kaidehn leh. (Mad. 3:13-17; Wiewia 10:38) Koht ketin keiehdi Sises pwe en kak wiahla Samworo Lapalap oh Nanmwarki ni ahnsou kohkohdo pwe koaros me kamehlele ih en paiekihda. (Ipru 1:8, 9; 5:5, 6) Eri, e pahn ketin kahrehiong meteikan ren kak uhdahn wiahla kisehn pwihn samworo en nanmwarkio.

12. Dahme sapwellimen Sises meirong kak wia?

¹² Nin duwen Samworo Lapalap, soangen meirong dahieu me Sises kak ketin wiahda pwe en kak mahkohng ni unsek dihp me irail me kamehlele sohsohki? Dahme Sises mahsanih ni eh tapihada Katamanpen eh pwoula kin sewese kitail en wehwehki me meirongo iei sapwellime mour unsek nin duwen aramas men. (Wadek Ipru 9:11, 12.) Mwurin Sises eh ketin keidi pwehn wiahla Samworo Lapalap, e mweidohng pein ih en lelohng kasongosong oh lokolok lao e pwoula. (Ipru 4:15; 5:7-10) Mwurin eh iasada, e kohdahla nanleng oh patohwanohng Siohwa pweinen meirongo. (Ipru 9:24) Sang ahnsowo kohla, Sises kak “louloukin” irail me pwoson eh meirong rehn Siohwa. E kak sewese irail ren papah Koht oh ahneki koapworopwor en ale mour soutuk. (Ipru 7:25) Sapwellime meirong pil kamanahla inou kapwo.​—Ipru 8:6; 9:15.

13. Dahme pahn wiawihong irail me mi nan inou kapwo?

¹³ Koht ketin luke irail me pahn iang inou kapwo oh katohreiirailla de keiekihdi irail sapwellime manaman. (2 Korint 1:21) Mehn Suhs lelepek kan oh mwuri mehn liki kan iang mi nan inou wet. (Ep. 3:5, 6) Dahme pahn wiawihong irail me mi nan inou kapwo? Koht pahn ketin mahkohng douluhl diparail kan. Siohwa ketin inoukihdahr: “I pahn mahkikihong diparail kan oh I solahr pahn tamanda arail sapwung kan.” (Ser. 31:34) Keriau, pwehki Siohwa eh ketin mahkohngehr diparail kan, re kak wiahla ‘wehi ehu me pahn papah ih nin duwen samworo.’ Piter padahkihong Kristian keidi kan: “Kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu, sapwellimen Koht aramas kei, me pilipildahng kalohkiseli wiewia kapwuriamwei kan en nin limen Koht, me ketin malipeikumwaildo sang nan rotorot ong nan sapwellime marain lingaling.” (1 Pit. 2:9) Wahnpoaron Piter doadoahngki mahsen kan me Siohwa ketin doadoahngki ni eh ketin padahkihong mehn Israel ko Kosonnedo. Piter pwurehng koasoia mahsen pwukat oh kasalehda me mahsen pwuko pweida rehn Kristian ko me mi nan inou kapwo.​—Eks. 19:5, 6.

PWIHN SAMWORO EN NANMWARKIO ME WIA KAMWAHU ONG ARAMAS KOAROS

14. Ia wasa pwihn samworo en nanmwarkio kin papah ie?

¹⁴ Ia wasa me irail me mi nan inou kapwo pahn papah ie? Re kin papah nin sampah. Nin duwen pwihn ehu, irail samworo kei. Re kin weliwelian Siohwa rehn aramas akan sang arail kin kalohki sapwellimen Siohwa “wiewia kapwuriamwei kan” oh kihda kaweid me rasehng mehn ketihnain. (Mad. 24:45; 1 Pit. 2:4, 5) Mwurin arail mehla oh iasada, re pahn iang Krais nanleng oh uhdahn kak wia doadoahk en nanmwarki oh samworo kan. (Luk 22:29; 1 Pit. 1:3-5; Kaud. 1:6) Wahnpoaron Sohn kilangada tohto ngehn akan me mi limwahn mwoalen Siohwa nanleng nan kaudiahl ehu. Irail kin kokoulikiong “Sihmpwulo” “koul kapw pwoatet”: “Pwehki omwi pwoulahr, oh pwehki ntahmwi, me komw ketin kasapahlkidohng aramas akan rehn Koht, sang kadaudok koaros, oh lokaia koaros, wehi koaros, oh sahpw koaros. Komw ketin wiahkiniraillahr wehin samworo ehu, pwe re en papah at Koht; oh re pahn kakaun [“sampah,” NW].” (Kaud. 5:8-10) Pil nan ehu kaudiahl, Sohn koasoiahki nanmwarki pwukat: “Re pahn wiahla samworo en Koht oh Krais, oh re pahn iang kakaun erein pahr kido.” (Kaud. 20:6) Nanmwarki pwukat iangahki Krais wiahda pwihn en samworo en nanmwarkio me wia kamwahu ong aramas koaros.

15, 16. Ni ahl dahkei pwihn samworo en nanmwarkio pahn wia kamwahu ong aramas akan?

¹⁵ Ia duwen 144,000 ko arail kin wia kamwahu ong aramas akan sampah? Kaudiahl irelaud 21 kawehwehda samworo pwukat nin duwen kahnimw ehu nanleng, Serusalem Kapw me adaneki “werek en Sihmpwulo.” (Kaud. 21:9) Iretikitik 2 lel 4 mahsanih: “I ahpw kilangada Kahnimw Sarawio, Serusalem Kapw, e kohkohdi sang nanleng rehn Koht, kaunopada mwahu oh kapwata, duwehte lih kamwohd emen me kapwatadahr pwe en tuhwong eh pwoud. I ahpw pil rongada ngihl laud ehu sang nan mwoahlo, me mahsanih, ‘Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.’” Kapai pwukat inenen kaselel! Solahr mwahiei, nsensuwed, medek de pahtou pwehki mehla solahr pahn wiawi. Aramas akan ahpw pahn unsekla oh pwurehng kompoakepahnkihla Koht douluhl.

¹⁶ Kaudiahl 22:1, 2 kalaudehla atail wehwehki duwen kapai kan me kohsang pwihn samworo en nanmwarkio. E mahsanih: “Tohnlengo pil kasalehiong ie pillap en pilen komouro, mwakelekel duwehte kilahs, me uhsang ni mwoalen Koht oh Sihmpwulo, oh kin pwilipwilwei nanwerengen ahl en kahnimwo. Ni pali koaros en keilen pillapo tuhkehn komour pwoat uhda ie me kin wa pak ehu nan sounpwong koaros; oh teh kan kin wiahla wini mehn kamwahwihala tohn wehi kan.” Kaudiahl wet kasalehiong kitail ia duwen “tohn wehi kan” ar pahn mwahuda sang douluhl arail soh unsek me re sohsohki sang Adam. Soahng mering kan uhdahn pahn sohrala.

PWIHN SAMWORO EN NANMARKIO KANEKEHLA DOADOAHKO

17. Dahme pwihn samworo en nanmwarkio pahn kanekelahr ni kaimwiseklahn pahr kido?

¹⁷ Ni kaimwiseklahn pahr kido, pwihn samworo en nanmwarkio pahn seweseier aramas akan ren unsekla. Samworo Lapalap oh Nanmwarkio Sises Krais pahn uhd patohwanohng Siohwa aramas unsek koaros. (Wadek 1 Korint 15:22-26.) Eri, pwihn samworo en nanmwarkio pahn kanekelahr arail doadoahko.

18. Mwurin tohn pwihn samworo en nanmwarkio ar kanekehla arail doadoahko, ia duwen Siohwa eh pahn ketin doadoahngki irail?

¹⁸ Ia duwen Siohwa eh pahn ketin doadoahngki pwihn samworo en nanmwarkio mwurin pahr kido? Kaudiahl 22:5 mahsanih: “Re pahn kin kakaun nin duwen nanmwarki kei erein dih koaros kohkohlahte.” Ihs me re pahn kaunda? Paipel sohte mahsanih duwen met. Ahpw Siohwa pahn doulahte kesempwalki irail. Re sohte pahn kak mehla oh re ahneki koahiek sang ni arail kin sewese aramas soh unsek kan. Eri re pahn doulahte wia nanmwarki kei oh Siohwa pahn ketin doadoahngki irail pwehn kapwaiada kupwure kohkohlahte.

19. Dahme Katamano pahn katamanki koaros me iang towehda?

¹⁹ Ni atail pahn kasarawi Katamanpen pwoulahn Siseso Niepeng, April 5, 2012, e pahn katamankin kitail padahk en Paipel pwukat. Kristian keidi kan me mihmihte nin sampah pahn kasalehda me re wia kisehn inou kapwo sang ni arail pahn kak kang pilawa me sohte doal ihs oh nim wain weitahta. Met pahn katamankin irail arail kapai kaselel kan oh arail pwukoa kan nan sapwellimen Koht koasoandi poatopoat. Kitail koaros me pahn towehda pahn men kasalehda atail kalahnganki pwihn samworo en nanmwarkio me Siohwa Koht ketin pilada pwehn wia kamwahu ong aramas koaros.

[Kilel nan pali 31]

Pwihn samworo en nanmwarkio pahn wia kamwahu ong aramas koaros kohkohlahte