Soangsoangen Aramas akan Pahn Ale Komourparail
1. Dahme kin poahsoaniada atail nanpwungmwahu rehn Koht?
1 Sapwellimen Koht limpoak kadek kin ritingadahng kitail elen komour. Iei kupwuren Siohwa met: “soangsoangen aramas koaros en ale komourparail oh sukuhliki loalokong pwung en padahk mehlel.” (1 Tim. 2:3, 4) Atail nanpwung mwahu rehn Koht kin poahsoanda pohn atail pwoson meirong tomw en Sises, kaidehn pohn wehi me kitail kohsang, de soangen aramas dah kitail, de pil atail koahiek de mwomwatail. (Sohn 3:16, 36) Nin duwen aramas me kin ieiang Koht wia sapwellime doadoahk, kitail pil anahne kihsang madamadau en lipilipilki aramas, pwe ma kitail sohte pahn wia met, e pahn kahrehiong kitail en pil sohte sewese aramas akan me Siohwa ketin kupwurperenki.
2, 3. Dahme pahn kak sewese kitail en dehr kin kadeik aramas pwehki mwomwerail?
2 Liksang Kadeik: Siohwa kin mahsanih dahme mih loalatail, kaidehn sang ni e kailok ohng aramas de lipilipilki aramas. (1 Sam. 16:7) E pil kak kasawih aramas akan oh dahme re pahn kak wia oh wiahla. Kahrehda, irail me kin men kaperenda Ih kin wia aramas kesempwal ekei mwohn silangi. (Akkai 2:7) Kitail kin kilangwong aramas nin duwen me Koht kin ketin wia?
3 Ekei pak, kitail kin pwuriamweikihla soangen aramas akan me kitail kin tuhwong nan kalohk. Mwein ele irail kin doadoahngki likoun aramas semwehmwe de likou oh kapwat me sohte konehng, de ekei pil kin alis reirei, oh ekei kin doadoahngki tiati ni tumwarail oh lowerail. Ekei mwein sohte imwarail. Ekei mwein kin lemei ong kitail. Kitail dehpa kadeik irail pwehki irail sohte wia sapwellimen Siohwa tohnkaudok, ahpw kitail en ahneki madamadau pwung oh konehng oh pil tamataman me mahs “kitail me pweipwei, sapeik, oh Sehdan kin pitipitih kitail.” (Taitus 3:3, NW) Ni atail pahn kin pohnese ire wet, kitail pahn kin ngoangki kalohk ong aramas koaros, pil ong irail akan me mwomwen sohte warohng.
4, 5. Dahme kitail kak sukuhliki sang mehn kahlemeng mwahu en Sises oh Pohl?
4 Mehn Kahlemeng Mwahu kan nan Keieun Senturi: Sises Krais kin kihong eh ahnsou pwehn sewese irail akan me meteikan kin medemedewe me irail sohte kak wiahla sapwellimen Siohwa tohnkaudok. (Luk 8:26-39) Pil pein Sises sohte kin wia wiewia kan me suwed, ahpw e ketin mwahngih me aramas kak kekeidki elen mour me suwed. (Luk 7:37, 38, 44-48) Kahrehda, e kin kasalehda limpoak ong irail, “e ahpw kupwurohkinirailla. Pwehki irail rasehng pelin sihpw ehu me sohte silepe.” (Mark 6:34) Kitail pil kak wia uwen atail kak en kin kahlemengih mehn kahlemeng mwahu en Sises?
5 Wahnpoaron Pohl pil kostakaidi, kamakam, oh pil selidi. (Wiewia 14:19; 16:22, 23) Ahpw, iaduwen—soangen irair pwukat kin kahrehong ih en kailongki aramas oh lemeleme me sohte katepe en sewese aramas sang wehi oh keinek teikan? Soh! E mwahngih me irail me ahneki mohngiong mehlel akan pil kak diarek nan wehi koaros oh keinek koaros, oh e ketin ngoangki diarada soangen aramas pwukat. Met pil duwehte ahmw madamadau ong aramas akan nan ahmw wasahn kalohk me pil kohsang wehi teikan oh arail tiahk pil weksang ahmw?
6. Iaduwen atail ahneki madamadau pwung e kin kak en kamwekid irail me kapw kan me kin iang towehda mihding kan?
6 Kasamwo Meteikan Rahnwet: Sapwellimen Koht aramas tohto kin pil peren pwehki ahnsou me irail tepiada perenki rong padahk mehlel, brother oh sister teikan kin kasamwo irail oh kadek ong irail mendahki mwomwerail sohte nohn mwahu oh konehng nin tepio. Emen ohl me alis reirei, piten moange lel pohn pwopwe, oh likouki likou samin, pedolong nan Kingdom Hall nan Germany. Pali laud en aramas kin wehwehki me ah mour sakanakan. Ahpw, mendahki irair pwukat, brother oh sister kan kasamwo ih ni limpoak ong mihding. Arail limpoak sair ah mohngiong kahrehda e pwurodo wihk mwurio. Mwuri ekis, e kamwakelehda ih, kesehla simwoak, oh ih oh serepein me mihmi reho inou sarawihla. Sohte pwand, ira oh neira seri kan pil tepida papah Siohwa nin duwen peneinei ehu.
7. Iaduwen kitail kak kahlemengih atail Koht me sohte kin ketin lipilipilki aramas?
7 Ni atail kilang mehn kahlemeng mwahu en Koht ni E sohte kin ketin lipilipilki aramas akan, eri kitail en pil sewese aramas koaros en pil paiekihda sapwellimen Koht limpoak kadek. “Koht sohte ketin lipilipilki aramas. E kin ketin kupwurperenki mehmen me kin lemmwiki Ih, oh pil wiewia me pwung; sohte lipilipil ih soangen aramas dah.”—Wiewia 10:34, 35.