Nsenohki Meteikan Ni Atail Kin Wia Peidek kan oh Rong Kanahieng
1 Pali moron en aramas akan kin perenki kasalehda pein arail pepehm kan ahpw irail sohte perenki aramas en kapwungala irail de wia peidek tohto ong irail. Ihme kahrehda, nin duwen Kristian sounpapah kan, kitail anahne en koahiekla doadoahngki peidek kan pwehn kahrehong aramas akan en kasalehda ahr pepehm akan.—Lepin Padahk 20:5.
2 Atail peidek kan anahne en kamwekid madamadau en aramas, kaidehn kahrehong irail en nsensuwed. Ni ahnsou me emen brother kin kalohk ihmw lel ihmw, e kin wia peidek me duwehte met, “Komw lemeleme me pahn mie ahnsou ehu me aramas pahn kak kasalehda wahu ong aramas teikan?” Mwurin tohnimwo pahn sapeng ah peidek, e pahn idek reh: “Dahme ke lemeleme anahne en wiawi ma met pahn pweida?” de “Dahme kahrehda ke ahneki madamadau wet?” Emen brother ni ahnsou me e kin kalohk ahnsou soh lipilipil oh nan wasa kan me aramas kin mihmihseli ie, e kin wia peidek ong irail akan me kin naineki seri, “Dahme ke kin keieu perenki nin duwen pahpa men de nohno men?” Mwuri, e wia peidek wet, “Dahme ke kin keieu pwunodki?” Tehk mwahu duwen peidek pwukat. Peidek pwukat kin mweidong aramas en kasalehda pein arail madamadau kan oh re sohte kin kansensuwedih irail. Ahpw, irair en aramas akan kin wekpeseng, kitail anahne kawekila oaralap me kitail pahn koasoia oh peidek kan me kitail kin wia pwehn pwungiong aramas akan me mihmi nan atail wasahn kalohk.
3 Sewese Aramas akan en Kasalehda Arail Pepehm kan: Ma aramas akan kin perenki kasalehong kitail arail madamadau de pepehm kan, eri, rong mwahu oh dehr sopuk arail koasoi. (Seims 1:19) Ni kadek, kasalehda ahmw kalahnganki ahr kin kasalehda ahr madamadau kan. (Kolose 4:6) Ke kak nda met: “Kalahnganki omw kasalehong ie ahmw madamadau kan.” Ni mehlel, kapinga irail. Ni kadek, ke kak pil wia peidek kan me pahn sewese iuk en wehwehki duwen arail madamadau kan oh kahrepen irail kin ahneki soangen madamadau pwukat. Rapahki mehkot me kitail kak pwungkihpene. Ni ahnsou me ke men kasalehong irail iren Paipel ehu, ke kak nda met, “Mie pak ke medemedewe me met pahn kak pweida?” Kitail en dehr ahneki madamadau me kitail kin pwung ahnsou koaros oh pil kitail en dehr akamai ong irail.—2 Timoty 2:24, 25.
4 Ia mwomwen atail kin rong aramas akan pahn kak kamwekid irail en perenki rong de soh. Aramas kin ese ma kitail kin wia rongorong sang nan kapehditail de soh. Emen Sounapwalih en Mwemweit koasoia, “Ni ahnsou me ke kin kasalehda me ke kin perenki rong dahme aramas akan kin koasoia, e kin kahrehong irail en karanih iuk oh met kin wia kilelepen omw kin nsenohkin irail.” Rong kanahieng meteikan kin kasalehda wahu ong irail, oh met pahn kakete kamwekid irail en perenki rong duwen Rongamwahuo.—Rom 12:10.