Kisinlikou Sang Governing Body
NI ATAIL kin idawehnla mehn kahlemeng en Sises, kitail kin kapakapohng Koht ni ngidingid: “mwaromwi en sarawihla.” Atail ineng kehlail en mourki mour me kin pahrekiong kapakap wet kin sansalda sang elen atail kin mourki mour nin duwen Sounkadehdehn Siohwa kan. Mehlel, kitail anahne wia laud sang ihte ese mwaren Koht. Kitail anahne isaneki ahnsou mwahu kan koaros en kalinganahda mwareo. Ni mehlel, pwais me keieu kaselel me kitail kak perenki iei pwais en adaneki emen Sounkadehdehn Siohwa.—Madiu 6:9; Aiseia 43:10.
Nin duwen Melkahka 110:3 mahsanih, sapwellimen Siohwa aramas akan kin perenki wia doadoahk me Siohwa mahsanih me anahne en wiawi. Dahme kahrehda aramas akan en soangsoangen sounpahr oh irair kan kin toukihda pein irail en wia doadoahk en kalohk? Keieu, pwehki arail limpoak ong Koht oh arail poadidi ong ih. Deuderonomi 6:5, 6 kin padahkiong kitail en poakohng Siohwa ‘sang nan mohngiongatail unsek, ni ngenatail unsek, oh ni atail kehl koaros.’ Limpoak wet me kohsang nan mohngiongatail kin kamwekid kitail en doadoahngki atail ahnsou, kehl, oh kepwe kan en utungada mehkan me pid Wehin Koht, met kin pid en iang kalohk uwen atail kak nin duwen atail irair kin mweidong kitail.
Sapwellimen Siohwa limpoak ong tohnsampah me kamwekid ih en kaweidih rongamwahu en sapwellime Wehio en lohkiseli nan sampah pwon. E sohte kupwurki emen en kamakamla ahpw e kupwurki koaros en koluhkihla arail mour suwed oh sohpeiong Sounkapikparail pwehn ahneki mour. (2 Piter 3:9) Siohwa mahsanih: “I sohte kin kupwurperenki mehlahn aramas dipan. Ahpw en wiliakapwasang eh suwed pwe en mour.” (Esekiel 33:11) Ni ahnsou me kitail kin iang kalohk, kitail kin wia mehn kadehdehn sapwellimen Siohwa limpoak ong iengetail tohnsampah kan. Met kin uhdahn wia kahrepe ieu ong peren oh nsenamwahu me kitail kin ahneki ni ahnsou me kitail kin iang doadoahk kesempwal wet.
Atail limpoak loal ong Siohwa pil kin sansalda sang atail madamadau ong sapwellime Mahsen, Iren Paipel Sarawi kan. Ma sohte Paipel, kitail sohte pahn kak esehla Koht oh karanih ih, nin duwen Seims 4:8 kin luhke kitail en wia. Kitail pil sohte pahn kak ese dahme kitail mihmiehki wasaht oh dahme pahn wiawi ni ahnsou kohkohdo. Kitail sohte pahn ese me atail pahpa kalap Adam iei me wia utupen atail kahpwal akan. (Rom 5:12) Kitail pil sohte pahn kak esehla sapwellimen Koht limpoak laud ni ah ketikihdo sapwellime Iehros nin duwen tomw ong kitail. Ni ahl teikan tohto, Siohwa kin ketin ehukihong kitail sapwellime loalokong, erpit, oh dehde. Ia uwen laud kitail kin kesempwalki kisakis me e ketikihong kitail, me iei sapwellime Mahsen! Atail kalahnganki kisakis kaselel wet kin kamwakid kitail en ‘isaneki ahnsou mwahu’ en wadek, onop, oh doudouloale duwen sapwellime mahsen kan. (Episos 5:15, 16; Melkahka 1:1-3) Kitail en dehr nsensuwedkihla ahnsou me kitail kin doadoahngki pwehn wadek Mahsen en Koht ni rahn koaros. Ni pali tehieu, atail limpoak ong Koht anahne kahrehiong kitail en perenki sapwellime Mahsen, oh en kalaudehla atail wehwehki duwen ih oh kaloalehla atail limpoak ong ih.
Kitail sukuhlikier sang nan Paipel me ni ahnsou me Adam wiahda dihp ong Siohwa, e kahrehong kadaudoke kan koaros me pahn ipwidi, iangahki emen emen kitail, nan irair en kansensuwed oh sohte koapworopwor. Ahpw, Koht kakehr oh ketin wiadahr ehu ahl ong tohnsampah, wiahda kahk kan pwehn kasansalehda me sapwellime kupwur kan ong sampah wet pahn pweida.—Senesis 3:15.
Ni soh peikasal emen emen kitail koaros ahneki ineng kehlail en kasarawihla mwar kaselel en atail Koht. Ni atail kin kalaudehla loalokong duwen soangen Koht kaselel dah Siohwa, kitail kin mwekidki en miniminiong ih oh sapwellime pwihn ni atail kin pakairki sapwellime mwar lapalap oh kupwure kan. Kitail kin kamehlele me kitail kin kenikenla reh oh ahneki sapwellime kapai kan ni ahnsou wet oh pil lella atail ahnsou kohkohdo nan sampah kapw me sohte imwi.
Kiht kisehn Governing Body kin men kamehlelehong kumwail aht limpoak ong kumwail brother oh sister kompoak kan. Se pil men kasalehda aht kalahngan loal duwen amwail nanti laud en doadoahngki luwen ahnsou mwohn “kahn kamakam kowahlap” pwehn lel uwen tohtohn aramas akan ki rongamwahu. (Kaudiahl 7:14) Ni amwail kin wia met, kumwail kin kihong irail ahnsou mwahu duwehte kumwail alehdier, en ale loalokong en Koht oh Krais me pahn kahluwalahng mour soutuk.—Sohn 17:3.
Riamwail brother kan,
Governing Body en Sounkadehdehn Siohwa kan