Sewese Tohn Sukuhl en Paipel kan en Wiahla Sounkalohki Rongamwahu en Wehio
1 Kehkehlik me Sises pwilikihdi ong sapwellime tohnpadahko me dierek nan Madiu 28:19, 20 wia pwukoa laud ehu. Krais padahkiong sapwellime tohnpadahko en katohnpadahk ong me tohto oh mwuhr irail pwukat pahn uhd pousehla oh wia doadoahk wet en katohnpadahk. Poahsoanpen doadoahk en kalohki rongamwahu en Wehin Koht ni ahnsoun imwi wet me kitail miher loale kokoudahr.—Mad. 24:14.
2 Me wia neitail tohnsukuhl en Paipel ele iei neitail seri kan de meteikan me men kitail en onop Paipel rehrail. Kitail uhdahn men sewese irail pwukat en pohnese oh alehda arail pwukoa en sewese meteikan en wiahla sapwellimen Sises Krais tohnpadahk.—Luk 6:40.
3 Kaunopiraildahng Pwukoa en Kadehde: Kangoange irail kan me ke kin onop rehrail en ehukihong meteikan dahme irail kin koledi. Ehukihong irail soangen ekspiriens en kangoang kan me kin pwarada ni ahnsoun kalohk. Kaiahne noumw seri kan sang ni ahnsou me irail tikitik en kin iang wia doadoahk en kalohk ni uwen me irail kakohng. (Mel. 148:12, 13) Kasalehiong irail sang ni ahmw lokaia oh wiewia me doadoahk en kalohk inenen kesempwal nan ahmw mour.—1 Tim. 1:12.
4 Siohwa kin doadoahngki irail kante me kin peikiong oh kapwaiada kupwure kan. Ei mehlel, irail sounkalohk kapw akan sohte nohn ese soahng tohto duwehte irail sounkalohk en Wehio kan me inoukidahr arail mour oh papidaislahr, ahpw irail anahne kamehlele oh kak kawehwehda ire mengei kan me kohsang Paipel. (Kilang pwuhken Organized, pali 79-82.) Ni arail katohreiraileweisangehr “Papilon Lapalap” oh solahr kin iang pidada palien Politik, irail anahne kaukaule towehda mihding kan en mwomwohdiso.—Kaud. 18:2, 4; Sohn 17:16; Ipru 10:24, 25.
5 Ni ahnsou me ke kilangehr me emen noumw tohnsukuhl en Paipel kan kakehr iang wia sounkalohk me saikinte papidais, ke anahne tuhkihong presiding overseer duwen met. E pahn koasoanehdi pwe elder riemen en tuhwong uhk oh noumw tohnsukuhl en Paipelo pwe irail en kak kilang me iei e kakehr wia emen sounkalohki rongamwahu en Wehio me saikinte papidais nan amwail mwomwohdiso. Ke pahn uhd ahneki pwukoa tohrohr en pousehla oh kaiahne noumw tohnsukuhl en Paipelo ni eh pahn kin iang uhk kalohk.