Irelaud 1

Ahnsou Kan Me Pahn Kohdo Kak Wia Ahnsou Kaperen Ong Ahmw Mour!

1, 2. Dahme Sounwiepomw kupwurki ong uhk?

ARAMAS emen me poakpoake iuk a kin pwoaleiukpene. Kouruhr me kohda sang mohngiong nin doken ahmw iang kompoakepahmw kan mwengmwenge. Nsenamwahu en nan kapehdomw nin doken ahmw kin kilikilang noumw seri kan wie pereperen mwadmwadong. Ahnsou pwukat kin wia ahnsou kaperen kei nan mouren aramas. Ahpw, ong aramas tohto, mour kin diren kahpwal​—⁠ehu kahpwal pwupwte pohn ehu. Ma iei duwen irair en ahmw mour, eri, ken dehr mworusala.

² Koht ketin kupwurki ken ahneki mour peren poatopoat ni ahmw pahn mihmi wasahkis me inenen kaselel. Met kaidehn ouraman ieu, pwehki pein Koht ketin kupwurki ketikihong uhk poahsoanpen soangen mour kaperen wet ni rahn kohkohdo kan. Oh met kin poahsoankihda loalokong.

3. Soangen loalokong dahieu me wia poahsoanpen peren, oh dahme kitail kak esehki me Koht kak ketikihda soangen loalokong wet?

³ Kitail koasoakoasoia wasaht soangen loalokong ieu me tohrohr, me laud sang erpit me mie rehn aramas. Loalokong tohrohr wet iei “loalokong me pid duwen Koht.” (Lepin Padahk 2:5, New World Translation) Mpen pahr 2,000 samwalahr oko, emen soun nting en Paipel mahsanih: “Aramas akan me kin kauwada ihmw​—⁠ahpw Koht, iei Ih me ketin wiahda mehkoaros.” (Ipru 3:4) Nna, medewehla uwen loalokong me Sounwiepen mehkoaros sapwellimaniki! Paipel padahkih me Koht kin ketin wadekedi oh ketin malipehki usu koaros adarail. Ia uwen madamadau wet a nohn wia mehkot kapwuriamwei, ni atail ese me nan mwutumwut en usu me kitail iang mihmi loale wiawihkihda usu lik (billion) pak epwiki kei, oh semen en sukuhliki usu kan nda me mwutumwut en usu lik (billion) pak epwiki kei pil mie nan wehwe! (Melkahka 147:4) Koht pil ketin mwahngih soahng koaros duwen kitail, kahrehda ihs likin Ih me pahn kak kihda pasapeng mwahu kan me pid peidek kesempwal akan duwen mour?—Madiu 10:30.

4. Dahme kahrehda kitail kak kasik me Koht pahn ketikihda mehn kaweidpatail, oh mehnia pwuhk me kin kaitarala anahn wet?

⁴ Nna, song medewehla me dene ohl riemen song en kamwahuwihala warara sidohsa ohla rioapwoat. Emen wia wereo oh pwangahkihda, ih eri uhdi sang ah doadoahk. Ahpw, ohl teio, ni ah meleilei, e kamwahuwihala wereo, ih eri perenda ahnsou me e kamour wereo oh e mourida oh tangatang mwahu. E sohte pahn apwal ong uhk en kilangada ihs rehra me mie nah pwuhken kaweid sang wasa me wiahda sidohsao. E soh pahn konehng me Koht pahn pil ketikihda mehn kaweid pwehn kahluwa kitail nan atail mour? Ele ke ese me Paipel mahsanih me e wia pwuhken padahk oh kaweid ehu me pwildosang rehn Sounkapikpatail oh pwuhk wet wiawihda pwehn kihong kitail loalokong me pid duwen Koht.—2 Timoty 3:16.

5. Ia uwen kesempwal en loalokong me dierek nan Paipel?

⁵ Ma mehlel Paipel wia pwuhken padahk oh kaweid ehu, eri kitail kak medewehla uwen kesempwal en loalokong me pwuhk wet audaudkihda! Nan Lepin Padahk 2:1-5, e kangoangehkin kitail en rapahki erpit, en sarepada duwehte atail kin weir kohpwahn dipwisou kesempwal me aramas emen sarepedi​—⁠kaidehn en sarep nan ahn aramas madamadau, ahpw nan pein sapwellimen Koht Mahsen. Ma kitail rapahki nan Mahsen en Koht, kitail pahn diar “loalokong me pid duwen Koht.” Ahpw, pwehki Koht mwahngih atail soh itar akan oh atail anahn akan, ihme kahrehda E ketikihong kitail mehn kaweid me pahn sewese kitail en kak ahneki mour meleilei oh peren. (Melkahka 103:14; Aiseia 48:17) Oh pil, loalokongkihla Koht kin kihong kitail rongamwahu kaselel kan.

MOUR SOUTUK!

6. Mehn kamehlel dahieu me Sises Krais ketikihda me pid esehla oh loalokongkihla Koht?

⁶ Sises Krais, me wia aramas ndand men nan poadoapoad, kawehwe duwen loalokongkihla Koht ni wehwe mengei. E mahsanih: “Met wehwehki mour soutuk, aramas akan en esehla oh loalokongkin komwihla, me komwihte Koht mehlel, oh pil esehla oh loalokongkihla Sises Krais me komw ketin kadarodohr.” (Sohn 17:3, NW) Medewehla—ahneki loalokong me pahn kahluwalahng mour soutuk!

7. Dahme kadehdehda me Koht sohte kupwurki kitail en mehla?

⁷ Ke dehpa mwadangete kalikamwe oh wiahki me mour soutuk ouraman ehu. Ahpw, tehk mahs duwen koasoandi en paliwaratail eh wiawihda. E inenen wiawihda mwahu pwehn kak songada nemen mwenge, rong, ned, kilang oh kehn wasa. Soahng tohto nan sampah me kin kamwekid atail mehn pepehm akan​—⁠mwenge iou, ngilen menpihr ngilamwahu kan, pwohmwahu en wahn rohs akan, lingan en wasa kan, aramas me kitail perenki werekiong kan! Oh pil, atail mwahliel me mwahu sang douluhl computer me keieu mwahu, pwehki atail mwahliel me wiahda kitail en kak perenki oh nsenamwahuki mehpwukat koaros. Ke lemeleme me Sounkapikpatail kupwurki kitail en mehla oh katiasang soahng pwukat koaros? E soh pahn konehng kitail en nda me E kupwurki kitail en mour peren oh nsenamwahuki atail mour kohkohlahte? Eri, iei met me loalokongkihla Koht pahn wahdohng uhk.

MOUR EN NAN PARADAIS

8. Dahme Paipel kasalehda me pid mour en aramas ni ahnsou kohkohdo?

⁸ Dahme Paipel mahsanih me pid aramas oh sampah nan ahnsou kohkohdo me pahn kak kapatapatpene ni lepin lokaia tehieu—Paradais! Sises Krais mahsanih duwen Paradais wet ni ah mahsanih ong ohl emen me pahn kamakamla: “Ke pahn iang ie mih nan Paradais.” (Luk 23:43) Koasoipen Paradais wet ele katamandohng ohlo duwen irair kaperen me tepin pahpa oh nohno, Adam oh Ihp, mih loale mahsie. Ni Koht ah ketin kapikirahda, ira unsek oh kousoan nan mwetuwel ehu me duwehte wasahn mwemweit me pein Sounkapikadao me koasoanehdi oh padokedi. E konehng mehlel wasao en adaneki Mwetuwel en Ihden, me kin wehwehki kansenamwahu.

9. Ia mwomwen mour en nan tepin Paradaiso?

⁹ Ia uwen ah nohn kaperen nan mwetuwelo! E wia uhdahn paradais ieu. Nanpwungen tuhke lingan koaros, mie tuhke kan me wahrail kan inenen iou. Ni Adam oh Ihp ara kin alialuseli nan mwetuwelo, oh nim pihl mwakelekel oh iou, oh dolungada wahn tuhke kan, sohte kahrepe ieu mie me pahn kahrehong ira en pwunod oh masepwehk. Pil mahn akan sohte kamasepwehk pwehki Koht ketikihong ohlo oh ah pwoud en kakaun mahn pwukat koaros ni limpoak. Oh pil patehng met, tepin aramas pwukat ahneki roson en paliwar. Erein ara pahn kin wiewia aramas peik kei ong Koht, rahn akan pahn kaperen ong ira oh poatopoat. Ira ahneki doadoahk kansenamwahu en apwahpwalih sapwara paradaiso. Oh Koht pil ketikihong ira kehkehlik en “kaparaparala, kadirehla sampah oh apwahpwalih.” Ira oh kadaudokara kan pahn kalaudehpeseng paradaiso lao sampah pwon wiahla wasa lingan oh kaperen ehu.—Senesis 1:28, NW.

10. Ni ahnsou me Sises mahsanih duwen Paradais, dahme e medemedewe?

¹⁰ Ahnsou me Sises mahsanih duwen paradais, e sohte koasoiaiong ohl me pahn mehlao en medewe duwen ahnsou me nekier ko. Soh, Sises mahsanih duwen ahnsou me pahn lelodo me mihmi mwohtail! E ketin mwahngih me sampah pwon pahn wiahla paradais ehu rahn. Koht pahn ketin kaunsekihala sapwellime koasoandi me E ketin koasoanehdi ong aramas oh sampah nin tepio. (Aiseia 55:10, 11) Ei, Paradais pahn pwurehng miehla nin sampah! Ia mwomwen paradaiso? Mweidohng Mahsen en Koht, Pwuhk Sarawi, en sapeng.

MOUR EN NAN PARADAIS ME PAHN KAPWURUPWURODO

11. Nan Paradais me pahn pwurehng kapwurupwurodo, dahme pahn wiawi ong soumwahu, mahla, oh mehla?

¹¹ Soumwahu, mahla, oh mehla solahr pahn wiawi. “Iei ahnsowo me me maskun kan pahn pehdpeseng, oh me salengepon kan pahn rongada wasa. Me nehtuk kan pahn douda duwehte tie men kin wia, oh me lohteng kan pahn ngisingiski ar peren.” (Aiseia 35:5, 6, NW) “Pein Koht pahn kin ketiket rehn aramas akan. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:3, 4.

12. Dahme kitail esehki me kauwehla kosonned, pei, oh wiewia samin solahr pahn wiawi nan Paradais me pahn kohdo?

¹² Kauwehla kosonned, pei, oh wiewia suwed akan solahr pahn wiawi kohkohlahte. “Aramas suwed kan pahn koakoahksang sampah . . . Ahnsou keren, aramas suwed kan pahn sohrala . . . Ke sohte pahn diar irail. Ahpw, irail me aktikitik kan pahn sapwenikihla sampah.” (Melkahka 37:9-11, NW) “Koht pahn ketin koakoahksang sampah aramas suwed akan; oh irail me widing kan pahn sohrala.”—Lepin Padahk 2:22, NW.

13. Iaduwen Koht ah pahn wahdo meleilei?

¹³ Meleilei pahn kadirehla sampah pwon. “E [Koht] kin ketin katokehdi mahwen wasa koaros nin sampah; E kin ketin katimpeseng arep kan, oh kauwehla kesik ketieu kan.” (Melkahka 46:⁠9) “Aramas pwung kan pahn pweida mwahu nan sapwellime wehi, oh popohl mwuledek pahn poatopoat erein maram eh kin kamakamarainih wasa.”​—⁠Melkahka 72:⁠7, NW.

14, 15. Dahme Paipel mahsanih me pid ihmw, doadoahk oh mwenge nan Paradais kapwurupwurodo?

¹⁴ Ihmw pahn itar ong koaros oh doadoahk pahn kansenamwahu. “Aramas akan pahn kauwada imwarail kan oh kousoanla loale . . . irail sohte pahn kauwada ihmw akan oh emen tohrohr kousoanla loale; oh sohte me pahn padokedi ahpw emen tohrohr pahn kangasang wa kan. Nei aramas akan pahn mour werei, rasehng tuhke kei; re pahn nsenamwahuki mehlel dipwisou kan me re kadoahkihada. Arail doadoahk kan pahn kin pweida mwahu, oh neirail seri kan sohte pahn diar paisuwed.”—Aiseia 65:21-23, NW.

¹⁵ Mehn ketihnain karoson akan pahn inenen kadirehla wasa. “Reken wahn pilawa en kin wiewiawihte nan wehiet; wahnsahpw en kin kipehdi dohl akan.” (Melkahka 72:16) “Sampah pahn kapwarehda wa kan; Koht, atail Koht, pahn ketin kapaia kitail.”—Melkahka 67:6, NW.

16. Dahme kahrehda mour nan Paradais pahn kaperen?

¹⁶ Mour soutuk nan paradais sampah pahn kaperen. “Me pwung kan pahn koukousoan nan sampah oh re pahn sapwenikihla kohkohlahte.” (Melkahka 37:​29, NW) “Sapwtehno pahn perenda, oh rohs akan pahn mpwek oh masalpeseng nan sahpw madekeng kan.”—Aiseia 35:1.

LOALOKONG OH AHMW MOUR AHNSOU KOHKOHDO

17. (a) Dahme ke pahn wia ma ke men iang mour nan Paradais? (b) Dahme kitail esehki me Koht pahn wiahda wekidekila laud nan sampah?

¹⁷ Ma ke inengieng mour nan paradais, eri, ke dehr mweidong mehkot en ireiukasang alehda loalokong me pid duwen Koht. Koht kin ketin loalloale aramas oh E pahn ketin ketikihdo wekidekila kan me anahn pwe sampah en wiahla paradais. Ma ke ahneki kehl en kihsang pwunod oh kopwung sapahrek kan me nohn rek nan sampah rahnwet, ke soh pahn wia met? Eri, ke soh leme me Koht pahn ketin wia met? Ni mehlel, Paipel kasalehda ni oaritik duwen ahnsou me Koht pahn ketin ketikihweisang koasoandi suwed wet oh ketin wiliankihdi kaunda unsek oh pwung. (Daniel 2:44) Ahpw, Paipel sohte kin ihte padahkiong kitail duwen mehpwukat. E pil kin kasalehong kitail iaduwen kitail kak pedolong nan sapwellimen Koht sampah kapw me E ketin inoukihda.—2 Piter 3:13; 1 Sohn 2:17.

18. Dahme loalokongkihla Koht kak wiaiong uhk nan ahnsou wet?

¹⁸ Loalokongkihla Koht pil kak wia kamwahu laud ong uhk ahnsou wet. Paipel kak pasapengla peidek kan me loal oh kin kalap kedirepwe atail lamalam. Omw pahn kin kamehlele kaweid sang Paipel pahn sewese iuk en kompoakepahnki Koht. Ia uwen kapai wet a tohrohr! Oh met kahrehda ken kak nsenamwahuki soangen meleilei me Koht kelepw kak ketikihda. (Rom 15:13, 33) Ni ahmw pahn tepiada sukuhliki loalokong kesempwal wet, ke alehdahr doadoahk ieu me keieu kesempwal oh kapai nan ahmw mour. Ke sohte pahn koluhkihla ahmw alehda loalokong me pid duwen Koht me pahn kahluwalahng mour soutuk.

19. Peidek dahieu me kitail pahn tehkpene nan irelaud en mwurin met?

¹⁹ Se kasalehdahr me Paipel iei pwuhk ehu me audaudkihda loalokong me pid duwen Koht. Ahpw, iaduwen atail pahn kak ese me Paipel sohte audaudki loalokong en aramas, ahpw e audaudkihda loalokong me siklasang loalokong en aramas? Kitail pahn tehkpene peidek wet nan irelaud en mwurin met.

SONG UWEN ME KE KOLEDI

Dahme kahrehda loalokongkihla Koht pahn kak kihong uhk peren soutuk?

Ia pahn mwomwen mour nan paradais me pahn miehla nan sampah?

Dahme kahrehda e pahn wia kamwahu ong uhk en sukuhliki duwen loalokong me pid duwen Koht ahnsou wet?