Omw Peneinei Kin Kaunopada Pwehn Komourla?
1 Pweidahn kokohp en Paipel kihda mehn kadehde me imwin koasoandi suwed wet uhdahn kerendohr. Kitail kin momour nan ahnsou apwal akan duwehte mwohn Nohliko. (Mad. 24:37-39) Noha pitsang ohlahn sampah ahnsowo pwehki “eh mour poadidiong Koht.” (Sen. 6:9) Noha anahne padahkihong eh peneinei duwen dahme Siohwa kupwurki irail en wia pwehki irail pil pitsang Nohliko. Ni ahl dah kitail en kahlemengih Noha oh kaunopada nin duwen peneinei ehu pwehn pitsang imwin koasoandi suwed wet?
2 Lohkiseli Duwen Mour Pwung: Noha dadaurete erein sounpar 40 lel 50 nin duwen emen me kin “lohkiseli duwen mour pwung.” (2 Pit. 2:5) Mehn mpe kan kin kapailoke ih ni eh kin wia doadoahk en kalohk. Mwein tohnleng suwed kan me wiahla mwomwen aramas akan kamwakid irail en wia met. Kitail kin kalapw tuhwong aramas akan me sohte nsenohki oh me kapailok, met kasalehda me imwin koasoandi wet inenen kerendohr. (2 Pit. 3:3, 4) Ahpw weksang aramas nan mwehin Noha, aramas tohto kin mwekidki atail nannanti oh “pokondohng” sapwellimen Siohwa kaudok. (Ais. 2:2) Kitail pahn doarehla ‘pein kitail oh pil irail kan me kin rong kitail’ ihte ma kitail dadaurete. (1 Tim. 4:16) Ia uwen kesempwal ong pahpa oh nohno kan ren padahkihong neirail seri kan duwen anahn en wia doadoahk en kalohk ni karuwaru sang ni dahme re nda oh sang arail mehn kahlemeng!—2 Tim. 4:2.
3 E “Kapwaiada Mehkoaros me Koht Ketin Mahsanih”: Komourpen Noha oh eh peneinei poahsoankihda arail idawehn sapwellimen Siohwa kaweid kan ni keneinei. (Sen. 6:22) E pil kesempwal ong kitail en “perenki peik” ong kaweid kan sang Paipel oh ladu lelepek kan. (Seims 3:17, New World Translation) Mie ehu peneinei me seri kan me laudlahr katamanki iaduwen arail pahpa kin kapwaiada kaweid kan me kohsang sapwellimen Siohwa pwihn. Karasepe, e kin wia onop en peneinei wihk koaros oh kahre peneineio nan doadoahk en kalohk ni imwin wihk koaros. E nantihong luke emenemen nah seri ko en iang ih nan doadoahk en kalohk ehuehu wihk. E koasoanehdi teng nan kapehde en “kapwaiada mehkoaros me Koht ketin mahsanih” met me kahrehiong nah seri kan en ahneki pepehm en kesempwalki wia met, oh me wenemen koaros kekeirda oh wiahla ladu loalopwoat kan en Siohwa.
4 Imwin koasoandi wet pahn mwadangete kohdo. (Luk 12:40) Sang atail en kahlemengih Noha oh ahneki pwoson, kitail oh atail peneinei pahn uhdahn kaunopadahr!—Ipru 11:7.