“Wia Soahng Koaros ong Rongamwahu”
1. Dahme sounkalohki Wehio men kin perenki wia ong meteikan? Pwekida?
1 Wahnpoaron Pohl kin kamehlele me e ahneki pwukoa en kalohki rongamwahu ong meteikan. (1 Kor. 9:16, 19, 23) Duwehte Pohl, kitail wehwehki me aramas akan kak paiekihda rongamwahu kohkohlahte. Met kin kamwakid kitail en wia uwen atail kak en ehukihong irail rongamwahu.
2. Me pid duwen koasoandi en kalohk, wekidekla dah kan kitail pahn perenki wia? Pwekida?
2 Kalohk nan Wasa oh Ahnsou me Aramas Kak Dierek Ie: Sounlaid koahiek men kin kihdi uhk kaidehn nan wasa oh ahnsou me mengeiong ih, ahpw wasa oh ahnsou me e kak koledi diren mwahmw. Ni atail kin “laidih aramas akan,” kitail pil anahne kawekila atail koasoandi kan pwehn tuhwong aramas akan nan atail wasahn kalohk oh perenki doadoahk en koledi “soangen mwahmw koaros.” (Mad. 4:19; 13:47) Kitail kak doadoahngki ni soutik pwehn tuhwong aramas akan ni imwarail de ni menseng pwehn tuhwong irail ni wasa sohte lipilipil mwohn re kohla doadoahk? En Pohl mehn akadei iei en “uhdahn kalohki rongamwahu ong aramas koaros” oh e kin isaneki ahnsou mwahu koaros pwehn wia met.—Wiewia 17:17; 20:20, 24, NW.
3, 4. Ia duwen kitail kak kawekila atail padahk nan kalohk? Ia duwen met kak pweida mwahu?
3 Kawekila Ahmw Padahk ong Anahn en Aramas: Sounlaid kan kin doadoahngki soangsoangen wiepe kan pwehn koledi soangsoangen mwahmw. Ia duwen kitail kak kasalehda rongamwahu en Wehio ni ahl me kak kamwakid aramas nan atail wasahn kalohk? Kitail anahne nsenohki pepehm en aramas oh kasalehda ehu oaralap me aramas tohto kin nsenohki. Oh kitail anahne rong kanahieng arail madamadau duwen ireo. (Seims 1:19) Kitail kak idek ehu peidek pwe irail en kak kasalehda arail madamadau. (Lep. Pad. 20:5) Ni ahl wet, kitail kak kawekila mwomwen atail kasalehda rongamwahu pwehn kamwakid irail. Pohl wiahla “soahng koaros rehn aramas koaros.” (1 Kor. 9:22) Kitail anahne kawekila atail padahk pwehn kamwakid emenemen tohnihmw.
4 E inenen kaperen en ehukihong aramas akan “rongamwahu en popohl”! (Ais. 52:7) Kitail en “wia soahng koaros ong rongamwahu” pwehn sewese aramas tohto.—1 Kor. 9:23, NW.