Kompoakepahnkihla Koht Kohkohlahte!

Doadoahk laud anahn pwehn kompoakepahnkihla aramas emen; oh e pil anahne doadoahk laud pwe ken kak kolokolete kompoakepahmwo. Ahmw doadoahk laud pwehn kolokolete teng en wia kompoakepahn Koht pahn wahdo kapai laud. Sises mahsanih ong irail akan me kin kamehlele ih: “Me mehlelo pahn kasaledengkumwailla.” (Sohn 8:32) Ia wehwehn met?

Ke kak ahneki peren en saledek ahnsou wet. Ke kak saledek sang padahk likamw akan oh likamw akan me kohsang rehn Sehdan. Ke kak saledek sang irairen sohte koapworopwor me aramas rar kei kin ahneki pwe re sehse Siohwa. (Rom 8:22) Kompoakepahn Koht akan kin saledek sang “masak mehla.”​—Ipru 2:14, 15.

Ke kak ahneki peren en saledek nan sapwellimen Koht sampah kapw. Ia uwen saledek kaselel ehu ke kak paiekihda ni ahnsou kohkohdo! Nan Paradais sampah, kitail pahn saledek sang mahwen, soumwahu oh mwersuwed. Saledek sang samwehmwe oh duhpek. Saledek sang wiahla aramas mahla kan oh mehla. Saledek sang masak, kalokolok, oh kopwung sapwung. Paipel mahsanih duwen Koht: “Komwi kin ketikihong irail uwen me itar oh kin ketin kaitarala ar anahn akan koaros.”​—Melkahka 145:16.

Kompoakepahn Koht akan pahn mour kohkohlahte. Mour soutuk iei kisakis kesempwal ieu me Koht pahn kihong aramas koaros me kin kompoakepahnki Ih. (Rom 6:23) Medemedewe duwen ia uwen mwahu mour kohkohlahte ong uhk!

Ke pahn ahneki ahnsou laud en wia soahng tohto. Mwein ke men esehla kesengki soangen keseng ieu. De mwein ke men esehla mahlen de wia doadoahk en kapente (daiksang). De mwein ke men esehla duwen mahn akan de tuhke kan. De mwein ke men seiloakseli oh kilang sahpw teikan oh aramas teikan. Mour soutuk pahn kak mweidong kitail en wia soahng pwukat koaros!

Ke pahn ahnekihdi ahnsou laud en wiahda kompoakepahmw tohto. Mour soutuk pahn kakehr mweidohng uhk ken esehla aramas teikan me wialahr kompoakepahn Koht. Ke pahn esehla ahr koahiek kan oh irair kaselel kan, oh re pahn kompoakepahnki uhk. Ke pahn poakohng irail, oh re pahn poakohng uhk. (1 Korint 13:8) Mour soutuk pahn kihong uhk ahmw ahnsou en kompoakepahnkihla aramas koaros nin sampah! Ahpw me mwahu sang koaros, ahmw kompoakepahnki Siohwa pahn kehlailla mehlel ni pahr akan ahr pahn doudoula mwowe. Ke kak kompoakepahnkihla Koht kohkohlahte!