Weweidki Pwoson, Kaidehn Ki Mehkan Me Ke Kilang!

“Pwe pwoson me kitail kin weweidki, kaidehk marain en paliwar.”—2 KORINT 5:7.

1. Dahme kasalehda me wahnpoaron Pohl kin weweidki pwoson, kaidehn ki mehkan me e kilang?

IEI NAN pahr 55 C.E. Pahr 20 kei dower powe, emen ohl me ede Sohl, kin kaloke Kristian akan, oh mwuhr, e wiahlahr emen Kristian. Mendahki pahr tohto dower powe, eh pwoson Koht sohte luwetala. Mendahki e sohte kin kilangki mese soahng kan en nanleng, e kin kehlail nan pwoson. Ihme kahrehda, ni ahnsou me wahnpoaron Pohl ntinglahng Kristian keidi kan me ahneki koapworopwor en mour nanleng, e mahsanih: “Pwe pwoson me kitail kin weweidki, kaidehk marain en paliwar.”—2 Korint 5:7.

2, 3. (a) Iaduwen kitail kak kasalehda me kitail weweid ki pwoson?(b) Ia wehwen en weweidki mehkan me kitail kilang?

² Pwe kitail en weweidki pwoson, kitail anahne likih oh sohte peikasalki sapwellimen Koht koahiek en kaweid atail mour. Kitail anahne en kamehlele me Siohwa mwahngih dahme keieu mwahu ong kitail. (Melkahka 119:66) Ni atail kin wiahda pilipil kan nan atail mour oh kapwaiada, kitail anahne tamataman “mehkan me kitail sohte kak kilangki mesatail.” (Ipru 11:1, The New English Bible ) Koht ketin inoukihda “lahng kapw oh sampah kapw.” (2 Piter 3:13) Ni pali teio, en weweid ki mehkan me kitail kilang kin wehwehki me kitail kin pilada mour ehu me poahsoankihda soahng kan me kitail kak kilang de ong irair en paliwar. Met keper mehlel pwe e kakete kahrehiong kitail en pohnsehsehla kupwuren Koht.—Melkahka 81:12; Eklesiasdes 11:9.

³ Mehnda ma kitail kisehn “pwihn tikitik” me ahneki koapworopwor en mour nanleng, de kitail kisehn “sihpw teikan” me ahneki koapworopwor en mour sampah, emen emen kitail anahne en kihong nan mohngiongatail duwen kaweid en kekeid ki pwoson ah kaidehn kekeid ki mehkan me kitail kilang. (Luk 12:32; Sohn 10:16) Kitail pahn kilang iaduwen atail kapwaiada kaweid wet eh pahn kak pere kitail sang “perenki wia dihp ahnsou mwotomwot,” oh pil pere kitail sang lidip en noahrok, oh pere kitail sang atail solahr tetehk mwahu duwen atail kin mih ni imwin rahn akan. Kitail pahn pil tehkpene keperpen weweid ki mehkan me kitail kilang.—Ipru 11:25.

Soikala “Perenki Wia Dihp Ahnsou Mwotomwot”

4. Pilipil dah me Moses wiahda, oh pwekihda?

⁴ Nna, song medewehla soangen mour me Moses, sapwellimen Amram pwutak, kakete ahneki. Pwehki Moses tikida rehn kisehn soupeidi kan en nan Isip, e mengei ong ih en alehdi kepwehpwe oh wia kaun emen. Moses kakete medewehda: ‘I sukuhl laud oh loalokongki loalokong ndand en Isip, oh I ahneki manaman en koasoi oh wia mehkan me I mwahuki. Ma I mihmihte nan tehnpesen soupeidi kan, I kak doadoahngki ahi kehl pwehn wia kamwahu ohng riei mehn Ipru kan me kin mih nan lokolok!’ (Wiewia 7:22) Ahpw, Moses pilada en “iang sapwellimen Koht aramas akan lokolok.” Pwekihda? Dahme kamwekid Moses en soikala pai kan en Isip? Paipel sapeng: “Pwoson me Moses lipikihsang Isip, sohte mwahn masak engieng en nanmwarkio. E wonlahte mwowe nan eh seiloak, likamwete e kilang Koht me soh sansal.” (Ipru 11:24-27) Sapwellimen Moses pwoson me Siohwa pahn ketin katingih me pwung kan sewese ih en kak soikala dihp oh noahrok oh peren mwotomwot.

5. Iaduwen mehn kahlemeng mwahu en Moses kin kangoange kitail?

⁵ Kitail pil kin kalap lelohng nan irair kan me kitail anahne wiahda soangen pilipil apwal kan me duwehte met: ‘Mie soangen tiahk de irair me I ahnlahr me I pahn anahne kesehla pwehki mepwukat sohte pahrekiong koasoandi kan me kileledi nan Pwuhk Sarawi? Iaduwen—ien alehda doadoahk me pahn wahdo pai laud ahpw kedirepwehla ahi kekeiradahn pali ngehn?’ Mehn kahlemeng mwahu en Moses kin kangoange kitail en dehr wiahda pilipil kan me kin kasalehda pilipil en sampah me kin kilangwohngete ahnsou mwotomwot ehu; ahpw, kitail en pwoson erpit en “Siohwa Koht me aramas sohte kak kilangki masarail.” Kitail en kahlemengih Moses oh kesempwaliki atail nanpwungmwahu rehn Siohwa laudsang mehkoaros me kitail kak ale sang sampah.

6, 7. (a) Iaduwen Esau kasalehda me e pilada weweidki mehkan me e kak kilang? (b) Soangen irair dah kan me kitail sukuhliki sang ahn Esau pilipil me kitail anahne kalekekitailsang?

⁶ Moses inenen weksang Esau, me kohsang keinek en Aisek. E pilada en alehdi dahme pahn mwadang kaitarala ah anahn en war. (Senesis 25:30-34) Pwehki Esau “sohte kin wauneki mehkot sarawi,” Esau netikihla eh sohso en mesenih ong “delen mwenge ehu.” (Ipru 12:16) E sohte medemedewe dahme eh pilipil en netikihla ah sohso pahn wiahiong eh nanpwung mwahu rehn Siohwa de duwen dahme eh mwekido pahn wia ong kadaudoke kan. E sohte kin ahneki madamadau ngenin. Esau pohnsehse inou kesempwal akan en Koht, oh e sohte kin kesempwaliki. E kin weweidki mehkan me e kilang ah kaidehn weweidki pwoson.

⁷ Mehn kahlemeng en Esau kasalehda me mie soahng kan me kitail anahne en kaleke kitail sang nan rahn pwukat. (1 Korint 10:11) Ni soangen ahnsou kan me kitail anahne wiahda pilipil kan, mehnda ma laud de tikitik, kitail en dehr lohdi pahn madamadau en ahn Sehdan sampah, madamadau me dene ke anahne ale dahme ke mwahuki ni ahnsowohte. Kitail anahne pein idek rehtail: ‘Irair en Esau kan kin pwarada ni ahnsou kan me I kin wiahda pilipil kan? Ma I pahn rapahki soahng kan me I perenki, met wehwehki me soahng ngenin kan pahn kohdo mwuhr? Iaduwen--ahi pilipil kan pahn kauwehla de wia keper ong ahi nanpwung mwahu rehn Koht? Soangen mehn kahlemeng dah me I kin wia ong meteikan? Ma atail pilipil kan kin kasalehda me kitail kin kalahnganki soahng kan me sarawi, Siohwa pahn kapaiada kitail.—Lepin Padahk 10:22.

Pereiukasang Lidip en Noahrok

8. Soangen kaweid dah me konehng Kristian en Laodisia kan, oh ia kesempwalpen kaweid wet ong kitail?

⁸ Kerenlahng imwin senturi keieu, Sises Krais ketikihong wahnpoaron Sohn en kilang nan kaudiahl ehu duwen pakair me e men wiahiong mwomwohdiso Laodisia. Met kaweid ieu me pid duwen noahroke dipwisou kan. Mendahki Kristian en Laodisia kan kepwehpwe, irail semwehmwe ni pali ngehn. Irail sohte weweidki pwoson, a irail mweidong arail dipwisou kan en karotongehirailsang arail anahn en pali ngehn. (Kaudiahl 3:14-18) Noahrok kepwe pil kin kamwekid aramas en rahnpwukat ni ahlohte. E kin kaluwetala atail pwoson oh kahrehong kitail tokedihsang ‘rasehng atail kin tang kehlail ni atail kin weirentang.’ (Ipru 12:1) Ma kitail sohte kanahieng, “peren kan en sampah” kak “kauwehla atail doadoahk ngehnin kan.”—Luk 8:14.

9. Iaduwen itarki oh kalahnganki mwengehn ngehn kin sewese kitail?

⁹ Ehu me kak pere atail pali ngehn iei en itarki dahme kitail ahneki oh naineki ah kaidehn en doadoahngki dipwisou en sampah wet daulihala oh men kepwehpwehkihla. (1 Korint 7:31; 1 Timoty 6:6-8) Ni atail kin weweid ki pwoson oh kaidehn mehkan me kitail kilang, kitail kin diar peren nan paradais en ngehn en rahnwet. Ni atail kin alehda mwengehn ngehn akan, met soh kin kamwekid kitail en “kokoulki atail peren”? (Aiseia 65:13,14) Pil patehng met, kitail pil kin perenkihda atail kin werekiong irail akan me kin kasalehda wahn ngehn en Koht. (Kalesia 5:22, 23) Ia uwen kesempwal atail kin diar kamweit sang sawas ngenin kan me Siohwa kin ketikihda!

10. Soangen peidek dah kan me konehng kitail en pein idek rehtail?

¹⁰ Mie ekei peidek kan me kitail kak pein idek rehtail: ‘Mwohni de dipwisou kan kin wia mehkot me keieu kesempwal nan ahi mour? I kin doadoahngki ahi pai pwehn mour nsenamwahu de utungada kaudok mehlel? Dahme I kin keieu perenki? Iei onop en Paipel oh werekiong Kristian akan nan mihding kan, de kommoal sang ahi pwukoahn Kristian akan? Iaduwen--I kin doadoahngki ahi ahnsou Rahn Kaunop oh Rahn Sarawi kan ien rapahki mehn kamweit akan de I kin doadoahngki Rahn Kaunop oh Rahn Sarawi kan pwe ien iang kalohk oh iang wiewia teikan me pidada kaudok mehlel?’ Weweidki pwoson kin wehwehki me kitail kin kedirepwki doadoahk en Wehio, ni atail likih unsek sapwellimen Siohwa inou kan.—1 Korint 15:58.

Medemedewe Imwin Ahnsou

11. Iaduwen weweidki pwoson kin sewese kitail en ahneki madamadau pwung duwen atail ahnsou me kitail mihmi ni imwin rahn akan?

¹¹ Weweidki pwoson kin sewese kitail en soikala madamadau en aramas me dene imwin ahnsou saikinte keren de sohte pahn mie imwin ahnsou. Weksang irail akan me kin peidengki oh sohte kesempwaliki kokohp kan en Paipel, kitail kin wehwehki iaduwen irair en sampah ahnsouwet ah kin pahrekiong kokohp kan en Mahsen en Koht. (2 Piter 3:3, 4) Karasepe ehu, wiewia oh mwekid en aramas soh kin kasalehda me kitail mihier ni “imwin rahn akan”? (2 Timoty 3:1-5) Ki mesen pwoson, kitail kin kilang me irair en sampah nan rahnpwukat sohte kin wehwehkiong me irair akan en mahs pwurehng wiawi. Ahpw, irair me kin wiwiawi rahnwet kin wia “kilel me pahn kasalehda ahnsoun omwi pahn ketiket nan mwoalomwi nanleng oh imwin koasoandi en sampahet.”—Madiu 24:3.

12. Iaduwen mahsen kan en Sises me kileledi nan Luk 21:20,21 pweida nan senturi keieu?

¹² Nna medewehla ehu irair me wiawi nan senturi keieu me pil pahrekiong atail ahnsou. Ahnsou me e ketiket sampah, Sises Krais kehkehlikihong sapwellime tohnpadahk ko: “Eri, ni ahnsowo irail kan me mihmi nan Sudia, re en sopolahng pohn dohl kan; oh me mihmi nan kahnimwo, re en sopohsang loale; oh me mihmi nansapw, re dehpa pwurolong nan kahnimwo.” (Luk 21:21) Kokohp wet pweida ni ahnsou me Cestius Gallus ruwese sounpei en Rom kan en kohla oh kapilpene Serusalem nan pahr 66 C.E. Ahpw, sounpei ko mwadangete pwurpeseng, oh met kihong Kristian ko ahnsou mwahu en ‘sopolahng pohn dohl kan.’ Nan pahr 70 C.E., sounpei en Rom ko pwurodo oh mahweniong kahnimw en Serusalem, oh kauwehla Tehnpas Sarawio. Soupoad Josephus ripohtki me daulih mehn Suhs million kei mehla, oh meh 97,000 me selidi. E sansal me kadeik sang rehn Koht kohwong koasoandi en mehn Suhs akan ahnsowo. Irail akan me weweid ni pwoson oh peikiong kehkehlik en Sises pitsang kahpwal.

13, 14. (a) Irair dah me mih mwohtail? (b) Dahme kahrehda kitail en kin mwasamwasahn pweidahn kokohp kan en Paipel?

¹³ Soangen irair me kereniong duwehte irair wet pahn pil pweida nan atail ahnsou. Irail me kisehn United Nations pahn iang pidada kadeik me kohsang rehn Koht. Duwehte sounpei en Rom kan kohpene pwehn kolokol popohl nan wehin Rom, ihme, duwehte met, United Nations wiawihda pwehn kaminiminpene wehi kan. Mendahki sounpei en Rom kan song apwalih wehi kan, irail me kamwomwala wehin Serusalem. Duwehte nan rahnpwukat, Paipel kohpada me irail wehi kan me kisehn United Nations pahn kin wiahki pelien lamalam nin duwen mehkot suwed oh pahn song kauwehla Serusalem—me wehwehki Kristendom—iangahki Papilon Lapalap. (Kaudiahl 17:12-17) Ehi, kaudok likamw koaros nan sampah wet pahn kasohrala ni ahnsou keren.

¹⁴ Ohlahn kaudok likamw pahn wia tepin kilelepen Kahn Kamakam Kowahlap. Ni kaimwiseklahn Kahn Kamakam Kowahlap, luwen kisehn koasoandi suwed wet pahn sohrala. (Madiu 24:29, 30; Kaudiahl 16:14, 16) Weweid ki pwoson kin kahrehiong kitail en tetehk pweidahn kokohp en Paipel. Kitail sohte kin dukila pahn likamw me dene koasoandi en United Nations iei koasoandi me Koht kin ketin doadoahngki pwehn wahdo popohl oh meleilei. Eri, iaduwen, e soh konehng atail mour en kasalehda atail kamehlele me “Rahn Lapalap en Siohwa kerendohr”?—Sepanaia 1:14.

Weweidki Mehkan Me Kitail Kilang —Ia Uwen Keper?

15. Mendahki arail pein kilang oh pehm sapwellimen Koht kapai, soangen lidip dah me wehin Israel pwupwudiong loale?

¹⁵ Irair kan me pwarada nan Israel en mahs kin wia kasalehda duwen keperpen weweid ki dahme emen kin kilang oh met kin kahrehong eh pwoson en luwetala. Mendahki mehn Israel kan pein kilang kalokolok eisek me kanamenekihala koht likamw akan en Isip, oh irail pein pehm oh kilang Siohwa kapitirailla ni ahr kotehla Sehd Weitahta, re sapeik oh wiahda sansal en kou kohl ehu oh tepida kaudokiong. Irail sohla kanengamah oh pwangahki awiawih Moses ni ahnsou me e “pwand en pwuredi sang pohn nahnao.” (Eksodus 32:1-4) Arail sohte ahneki kanengamah kahrehong irail en kaudokiong dikedik ehu me sansal ong masarail. Arail weweidki mehkot me re kak kilang inenen kansensuwedihala Siohwa oh kahrehda “kereniong aramas 3,000 kamakamala.” (Eksodus 32:28, 29) Ia uwen kansensuwed ni atail kin kilang rahnwet tohnkaudok en Siohwa men eh kin wiahda pilipil kan me kin kasalehda eh sohte kin likih sapwellimen Siohwa koahiek en kapwaiada sapwellime inou kan.

16. Dahme wiawihong mehn Israel kan pwehki mas liki en aramas?

¹⁶ Mwomwen mas liki en aramas kahrehong mehn Israel kan en lelohng nan elen irair suwed tohto. Weweidki mehkan me re kak kilang kin kahrehong irail en masak arail imwintihti kan. (Nempe 13:28, 32; Deuderonomi 1:28) E kahrehong irail en uhwong pwung oh manaman me Koht ketikihong Moses oh kaulimki ah elen mour. Soh pwoson kahrehong irail en men pwurala nan Isip, wasa me ngehn saut akan kin doadoahk laud ie, ah kaidehn Sapwen Inouo. (Nempe 14:1-4; Melkahka 106:24) Ia uwen kansensuwed ni Siohwa eh ketin mahsanih duwen sapwellime aramas akan ahr sohte wauneki ahr Nanmwarki me soh sansal!

17. Dahme kahrehda mehn Israel ako en soikala kaweid en Siohwa ni mwehin Samuel?

¹⁷ Pil ni mwehin Samuel, wehi keniken en Israel pil pwupwudiong nan lidip en weweidki mehkan me irail kak kilang. Aramas ako men en mie ahr nanmwarki me re kak kilang. Mendahki Siohwa kasalehiong irail me e kak wia arail nanmwarki, met sohte itar en kamwekid irail en weweidki pwoson. (1 Samuel 8:4-9) Irail pein kihong irail nan keper ni ahr pweipwei oh soikala sapwellimen Siohwa kaweid, oh pilada en duwehte wehi teikan me mih limwahrail.

18. Soangen mehn kasukuhl dah me kitail sukuhliki sang duwen keperpen weweidki mehkan me kitail kilang?

¹⁸ Nin duwen sapwellimen Siohwa aramas akan rahnwet, kitail kin kesempwaliki atail nanpwung mwahu rehn Koht. Kitail men sukuhliki oh kapwaiada soahng kan me kitail sukuhliki sang mehn kahlemeng mwahu kan en kawao. (Rom 15:4) Ni mehn Israel ahr weweidki mehkan me re kilang, irail manokehla me Koht ketin doadoahngki Moses pwehn kahluwa irail. Ma kitail sohte pil kanahieng, kitail pahn pil manokehla me Siohwa oh Moses Lapalap, me iei Sises Krais, kin ketin kahluwa mwomwohdiso en Kristian rahnwet. (Kaudiahl 1:12-16) Kitail anahne kanahieng kitail en dehr alehda soangen madamadau sapwung me pid duwen aramas me kin kilikilangete sapwellimen Koht pwihn pohn sampah. Atail wia met pahn kahrehong kitail en kin men kaulim oh sohlahr kalahnganki wiliepe kan iangahki mwengehn ngehn akan me “ladu lelepek oh loalokong” kin ketikihda.—Madiu 24:45.

Koasoanehdi Ahmw Madamadau me Ke Pahn Weweidki Pwoson

19, 20. Dahme ke pahn koasoanehdi nan kapehdomw en wia, oh pwekihda?

¹⁹ Pwuhk Sarawi mahsanih, “Pwe kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong koht akan me kaunda dih rotorot wet.” (Episos 6:12) Atail imwintihti keieu laud iei Sehdan me Tepil. E kin songosong en kauwehla atail pwoson Siohwa. E sohte pahn soikala soangen ahl akan me e pahn kak wia pwehn nantiong wekidala atail pilipil en papah Koht. (1 Piter 5:8) Dahme pahn kak pere kitail sang lohdi pahn mas liki en koasoandi wet en Sehdan? Weweidki pwoson, kaidehn mehkan me kitail kak kilang! Likih oh kehliki sapwellimen Siohwa inou kan pahn pere kitail sang “kesehlahr atail pwoson.” (1 Timoty 1:19) Kitail en koasoanehdi teng atail madamadau me kitail pahn doulahte oh weweidki pwoson, kehliki sapwellimen Siohwa kapai kan ni unsek. Kitail en kin kapakapki me kitail en kak pitsang soahng kan me koasoandi en wiawi ni ahnsou kohkohdo.

²⁰ Ni atail kin weweidki pwoson, kaidehn mehkan me kitail kilang, mie emen me wia mehn Kahlemeng Kaselel ong kitail. Pwuhk Sarawi mahsanih, “pwe duwen pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.” (1 Piter 2:21) Artikel en mwurin met pahn koasoia duwen iaduwen kitail kak weweid duwehte ih.

Ke Tamataman?

• Dahme ke sukuhliki sang mehn kahlemeng mwahu en Moses oh mehn kahlemeng suwed en Esau duwen weweidki pwoson, kaidehn mehkan me kitail kilang?

• Dahme kak sewese ken dehr lohdi ong lidip en noahrok?

• Iaduwen weweid ki pwoson kin pere kitail sang madamadau me imwin ahnsou saikinte keren?

• Dahme kahrehda weweidki mehkan me ke kilang inenen keper?

[Kawehweh pen kilel kan nan ehu ehu pali 9]

Moses weweidki pwoson

[Kawehweh pen kilel kan nan ehu ehu pali 10]

Mehn kamweit kan kin kedirepwehla ahmw ahnsou en wia doadoahk en papah Koht?

[Kawehweh pen kilel kan nan ehu ehu pali 12]

Iaduwen ahmw kin tetehk kanahieng Mahsen en Koht kin pere iuk?