Dahme Paipel Mahsanih Duwen Mweipeseng oh Tohrohrpeseng en Pwopwoud

Siohwa kin kupwurki me pwopwoud kan en kin loalopwoat ong arail inoun pwopwoud. Ni ahnsou me e ketin kapwopwoudih tepin ohl oh lih, e mahsanih: “Iei kahrepe wet me ohl emen pahn kin . . . ehukihong eh pwoud, pwe ira en kin wiahla ehu.” Mwuhr, Sises Krais ketin kapwurehiong ire wet oh pousehla mahsanih: “Eri, kaleke aramas de kamweidpeseng me Koht ketin kapatapenehr.” (Senesis 2:24; Madiu 19:3-6) E sansal me Siohwa oh Sises kin ketin wiahki pwopwoud koasoandi ehu me sohte pahn imwisekla lao ohl pwopwoudo de lih pwopwoudo pahn mehla. (1 Korint 7:39) Pwehki pwopwoud eh kin wia koasoandi sarawi ehu, emen en dehr wiahki mweipeseng en pwopwoud mehkot tikitik ehu. Ni mehlel, Siohwa kin kalahdeki mweipeseng en pwopwoud me sohte pahrekiong koasoandi en Paipel.​—Malakai 2:15, 16.

Ia kahrepe me Paipel kin mweidohng pwopwoud ehu en kak mweipeseng? Siohwa kin kalahdeki kamwahl oh tiahk samin me pid wia nsenen pwopwoud. (Senesis 39:9; 2 Samuel 11:26, 27; Melkahka 51:4) Ni mehlel, e kin ketin kilangwohng tiahk samin me pid wia nsenen pwopwoud mehkot me uhdahn suwed, kahrehda e kin ketin wiahki tiahk wet kahrepe ehu me kak kamweidpeseng pwopwoud ehu. (Me pid duwen dahme kin pidada tiahk samin me pid wia nsenen pwopwoud, menlau kilang Irelaud 9, parakrap 7.) Siohwa kin ketikihong emen me sohte wiahda dihp en pilada ma e pahn mihmihte rehn eh pwoud me wiahda dihp de e pahn mweisang ih. (Madiu 19:9) Ma e pahn pilada en mweisang eh pwoudo, Siohwa sohte pahn kalahdeki eh pilipilo. Ni ahnsowohte, mwomwohdiso en Kristian sohte kin kangoange emen en mweisang eh pwoud. Nan ekei irair kan, emen me sohte wiahda dihp ele pahn pilada en mihmihte rehn eh pwoud me wiahda dihp, ahpw mehlel ma eh pwoudo koluhla mehlel. Irail kan me ahneki pwuhng en mweisang arail pwoud anahne wiahda arail pilipil oh pwukoahki dahme pahn kak wiawi pwehki arail pilipilo.​—Kalesia 6:5.

Nan ekei irair kan me inenen apwal, ekei Kristian akan kin pilada en tohrohrasang de mweisang arail pwoud mendahki re sohte wiahda tiahk samin me pid wia nsenen pwopwoud. Nan soangen irair pwukat, Paipel kin kaweidki me emen me pahn tohrohrasang eh pwoud “sohte pahn pwurehng pwopwoudida, de e uhdahn pahn pwurehng eh wereko.” (1 Korint 7:11) Kristian menet sohte kin ahneki saledek en rapahki emen pwehn pwoudikihda. (Madiu 5:32) Kitail pahn tehkpene ekei kahrepe kan me ekei kin pilada en tohrohrasang arail pwoud.

Ohl pwopwoud kahng apwalih eh peneinei. Peneinei ehu ele uhdahn semwehmwe oh sohte itar arail anahn akan pwehki ohl pwopwoudo sohte kin apwalih irail mendahki e kak wia met. Paipel mahsanih: “Eri, ma emen sohte kin apwalih . . . uhdahn kisehn pein eh peneinei, e kahmahmkilahr eh pwoson, oh e suwedsang irail kan me sohte arail pwoson.” (1 Timoty 5:8) Ma ohlo sohte pahn wekila, liho ele pahn medemedewe ma e pahn anahne wiahda doaropwe en tohrohrasang eh pwoud pwehn pere eh anahn akan oh pil anahn en nah seri kan. Elder kan nan mwomwohdiso anahne tehk ni keneinei duwen Kristian emen me kahng apwalih eh peneinei. Emen me kahng apwalih eh peneinei pahn kakete piskensang nan mwomwohdiso.

Tiahk lemei me inenen keper. Emen ele kin inenen lemei oh wia soahng kan me keper ong ahn eh pwoud roson de mour. Ma me lemeio wia Kristian men, elder kan nan mwomwohdiso pahn tehk ma met mehlel de soh. Emen me sohte kak koledi eh mwakar oh kin kalapw wia tiahk lemei pahn kakete piskenla.​—Kalesia 5:19-21.

Uhwong laud me kin irehdihsang emen en wia kaudok mehlel. Emen ele kin kaukaule irehdi eh pwoud en dehr pousehla wia kaudok mehlel de idingkihong ih en kauwehla sapwellimen Koht koasoandi kan. Ma ih duwen met, emen me mihmi nan kahpwal wet anahne koasoanehdi ma e pahn wiahda doaropwehn tohrohrasang eh pwoud pwehn “peikiong Koht, a kaidehn aramas.”​—Wiewia 5:29.

Nan soangen irair apwal pwukat koaros, kitail en dehr padahkihong emen me sohte wiahda sapwung ma e anahne tohrohrasang eh pwoud de soh. Kristian koahiek kan oh elder kan ele pahn sewese ih oh kihda kaweid kan sang nan Paipel. Ahpw re sohte kak ese soahng koaros me kin wiawi nanpwungen pwopwoud ehu. Siohwa kelehpw kak mwahngih met. Lih pwopwoud Kristian men de ohl pwopwoud Kristian men sohte pahn wauneki Koht de koasoandi en pwopwoud ma e pahn kalaudehla dahme uhdahn mehlel duwen eh kahpwal nan peneinei pwehn kak tohrohrasang eh pwoud. Siohwa mwahngih ahn emen widing pwehn tohrohrasang eh pwoud mendahki ma e kin song en ekihla met. Ni mehlel, “mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.” (Ipru 4:13) Ahpw ma irair keper ehu kin pousehla wiawi, kitail en dehr kauwe Kristian men me pahn koasoanehdi en tohrohrasang eh pwoud nin duwen ihte pilipil me e kak wia. Ni mehlel, “kitail koaros pahn uh mwohn silangin Koht, pwe kitail en pakadeikda reh.”​—Rom 14:10-12.