Ahl Limau en Diarada Emen Ken Onop Paipel Reh
1. Ma e apwal en diarada emen en onop reh nan atail wasahn kalohk, dahme kitail en wia oh ia kahrepe?
1 Ke kin apwalki diarada emen ken onop Paipel reh? Dehr uhdi raparapahki. Siohwa kin ketin kapaiada irail kan me sohte kin pwangahkihda wia kupwure. (Kal. 6:9) Mie wiepe limau me kak sewese iuk.
2. Ia ehu ahl en diarada emen me pahn men tepida onop?
2 Idek Rehn Tohnihmwo: Aramas tohto ese me kitail kin kihla Kahn Iroir oh Awake! ahpw mwein re sehse me kitail kin wia onop en Paipel. Ke sou idek rehn tohnihmw kan ma re men onop Paipel ni omw kin kalohk ihmw lel ihmw? Ke pil kak idek rehn irail me men rong ma re men onop Paipel ni omw pwurala rehrail. Ma re sohte men onop, ke kak pousehlahte kihdi neirail pwuhk oh song sewese kalaudehla ar men rong padahk mehlel. Nanpwungen aramas akan me emen brother kin wahla neirail makasihn kan, mie pwopwoud ehu me e kin kohla rehra erein sounpar tohto. Mwurin eh kihdi makasihn kapw kan rehra, e wekidek pwehn kohkohla ahpw e medewehda en idek rehra: “Kumwa men onop Paipel?” E pwuriamweikihla ni ara sapengki me ei. Met ira papidaislahr.
3. Kitail anahne medewe me irail me towehda mihting kan miehier me onop Paipel rehrail? Menlau kawehwehda.
3 Me Kin Iang Towehda Mihting: Dehr medewe me miehier emen me kin onop Paipel rehn irail me kin kohdo iang mihting. Emen brother koasoia: “Pali laud en irail me I onop rehrail iei irail kan me kin towehda mihting. Emen sister pilada en idek rehn lih emen me nah serepein papidaislahr ko kin iang nan eh mwomwohdiso. Liho kin towehda mihting erein sounpar 15 oh kin kalapw kohdo ni Wasahn Kaudok mwohnte mihting tepida oh kohkohla mwurinte nek mihting. Liho pwungkihda en onop oh kedekedeo iangala padahk mehlel. Sistero ntingihedi: “I koluhkihla ei awih lao sounpar 15 mwuri pwehn idek reh ma e men onop.”
4. Ia duwen atail kak rapahkihda onop en Paipel sang sawas en meteikan?
4 Idek Rehn Meteikan en Sawas: Emen sister kin nannanti iang meteikan kohla rehn arail onop en Paipel kan. Ni kaimwiseklahn onopo mwurin e ale mweimwei sang rehn me wia onopo, e kin idek rehn tohnsukuhlo ma e ese meteikan me men onop Paipel. Ni omw kin kihong pwuhken Paipel Padahngki rehn emen me ke pwurehng pwurala reh: ke kak idek “Ke ese emen me pahn men naineki pwuhk wet?” Ekei pak irair kan sohte mweidohng sounkalohk oh pioneer kan ren onop rehn me re tuhwong nan kalohk. Eri padahkihong meteikan me ke pahn kak wia onop en Paipel.
5. Ia kahrepen atail ele anahne idek rehn irail me pwoudiki tohnmwomwohdiso ma re men onop?
5 Me Pwoudiki Tohnmwomwohdiso: Mie sounkalohk kan nan omw mwomwohdiso me arail pwoud sohte iang padahk mehlel? Ekei irail pwukat sohte men koasoia duwen Paipel rehn arail pwoud Kristian kan ahpw pahn pwungki onop rehn meteikan likin ar peneinei. E pahn keieu mwahu en koasoiong mahs riatailo mwohn omw pahn idek rehn eh pwoudo ma e men onop.
6. Ia uwen kesempwal en kapakap ni ahnsou me kitail kin songosong en diarada emen en onop reh?
6 Kapakap: Ke dehr peikasalki manaman en kapakap. (Seims 5:16) Siohwa ketin inoukihda en karonge atail pekipek kan ma kitail kin peki nin duwen kupwure. (1 Sohn 5:14) Emen brother me uhdahn kedirepw tepida kapakap pwehn diarada emen me e kak onop reh. Eh pwoudo kin pwunodki ma pahn mie ahnsou e kak doadoahngki pwehn sewese tohnsukuhl men, ahpw mehlel ma tohnsukuhlo pahn ahneki kahpwal kan. Kahrehda liho kapakapkiong Siohwa soahng pwukat ni eh kapakapki eh pwoudo en miehda emen en onop reh. Pasapengpen ara kapakap kan pweida mwurin wihk riau ni pioneer men nan mwomwohdiso eh diar emen ohl me men onop oh uhd kihong brothero en onop reh. En brothero pwoudo ntingihedi: “Ong irail kan me pehm me wia onop en Paipel mehkot me re nohn apwalki, I men nda: Ken kasalehda ni oaritik nan omw kapakap oh dehr uhdi pekipeki. Peren me se alehdi laudsang me se kasik.” Ma ke dadaurete, ke pahn pil kak diar emen me ke pahn onop reh. Eri, ke pahn kehn peren en sewese emen en keid nan elen “kohlahng mour.”—Mad. 7:13, 14.