Sewese Irail kan me Saikinte Kaunopada en Onopki Pwuhk en Paipel Padahngki
1. Ia duwe, koaros kin tepidahte perenki pwuhken Paipel Padahngki? Menlau kawehwehda.
1 Pwe emen en kak wiahla tohnkaudok en Siohwa, e anahne sukuhlki dahme Paipel kin padahngki. Ahpw ekei kin iang pelien lamalam kan me kaidehn Kristian oh sohte kin wiahki me Paipel iei Mahsen en Koht. Ah ekei sohte kin kamehlele Koht oh sohte kin wauneki Paipel. Soangen mehn sawas dah kan me mie ong irail kan me nin tapio sohte pahn men ale pwuhken Paipel Padahngki? Iren mehn sawas kan me kileldi pah kin poahsoankihda dahme sounkalohk kan sang sahpw 20 samwa kin koasoia.
2. Ma emen kin nda me e sohte kin kamehlele Koht, dahme kitail anahne diarada, oh dahme kahrehda?
2 Me Sohte Kin Kamehlele Koht: Ma emen kin nda me e sohte kin kamehlele Koht, e kesempwal en diarada ia kahrepen met. Met pwehki eh kin kamehlele padahk me dene mour pein miehla oh aramas kohsang mahn? Ia duwe, soahng sapahrek kan nan sampah oh mwalaun en pelien lamalam kin kahrehda eh sohla kamehlele Koht? E kohsang sahpw kan me kin keinapwih aramas sang kamehlele Koht? Mwein e sohte nda me e sohte kamehlele Koht douluhl, ahpw e kin leme me e sohte anahne kamehlele Koht. Sounkalohk tohto kin diarada me ma re pahn idek, “Ih met me ke kin kamehlele sang mahs?” met kin kamwakid aramaso en kawehwehda kahrepen eh kamehlele met. Rongorongete mahs oh dehr kauhdi eh koasoi. Ni atail kin wehwehkihda kahrepen ahn aramaso sohte kamehlele Koht, eri kitail pahn ese ia mwomwen atail pahn sapeng ih oh mehnia pwuhk me kitail pahn kihong ih.—Lep. Pad. 18:13.
3. Ia duwen atail kak kasalehda me kitail wauneki aramaso oh dahme e kamehlele?
3 Ahnsou me ke sapeng, kanahieng pwe ken dehr kahrehiong aramaso en medewe me ke kin kawe eh madamadau. Sawas wet kohsang Amerika: “E uhdahn kesempwal en wauneki ahn emen pwuhng en pilada dahme e kamehlele. E pahn keieu mwahu en idek peidek kan me pahn kamwakid aramas en medemedewe oh koasoanehdi dahme re pein kamehlele. Met mwahusang nannanti en kana nan akamai.” Mwurin eh kin rong ahn tohnihmwo madamadau, emen sounapwalih me kin seiloak kin kalapw idek met mwohn eh sapeng, “Mie pak ke medemedewe ma met pil kak mehlel?”
4. Ia duwen atail kak sewese mehn Buddhist kan?
4 Mehn Buddhist tohto sohte kin kalapw medemedewe duwen Koht. Ekei sounkalohk nan Britain kin perenki doadoahngki pwuhken Lasting Peace and Happiness—How to Find Them ni ahnsou re kin kalohk ong soangen aramas pwukat. Mwurin tehk tepin pwuhk wet, irail kin koasoiahpene nan ehu pali me oaralap “Uhdahn Mie Sounkapikada me Keieu Lapalap? (Is There Really a Most High Creator?)” oh mwuri pil ehu pali me oaralap “Pwuhken Kaweid en Kapai ong Aramas Koaros (A Guidebook for the Blessing of All Mankind).” Mwurin mwo, irail ele kak kasalehda pwuhken Paipel Padahngki oh ndaiong tohnihmwo, “Mehnda ma ke sohte kamehlele Koht, onop Paipel pahn mwahu pwehki e kin audaudki kaweid mwahu tohto.” Emen pioneer nan Amerika me kin doadoahk nan mwomwohdisohn lokaiahn China koasoia: “Aramas tohto nan at wasahn kalohk kin perenki wadek pwuhk kan. Re kin kalapw wadekala pwuhko pwon mwohn at pwurala rehrail. Ahpw irail ele sohte wehwehki ia mwomwen onop en Paipel eh kak wiawi. Kahrehda I kin perenki kihla pwuhken Rohng Mwahu ni ei tepin tuhwong tohnihmw pwehki e ntingdi ni ahl ehu me kin kangoange aramas en koasoakoasoipene.” Emen sounapwalih me kin seiloak me kin doadoahk nanpwungen mwomwohdisohn lokaiahn China kan nan Amerika nda me re kak doadoahngki pwuhken Paipel Padahngki ni arail tepin tuhwong tohnihmw. Ahpw, mwein e pahn mwahu en tepikihda irelaud 2 me kin koasoia duwen Paipel, a kaidehn irelaud 1 me kin koasoia duwen Koht.
5. Dahme kahrehda e kesempwal kitail en kanengamah?
5 Ekei anahne ahnsou laud en kakairada arail pwoson Koht, kahrehda e kesempwal kitail en kanengamah. Atail tepin koasoipene ele sohte pahn kamwakid tohnihmw en pwungki me mie Sounkapikada. Ahpw mwuhr ele e pahn nda me mwein mie Sounkapikada de e wehwehki dahme kahrehda emen kak tepida kamehlele met.
6. Dahme kahrehda ekei ele sohte men esehla Paipel?
6 Me Sohte Kesempwalki de Sohte Kamehlele Paipel: Ahpw emen me nda me mwein mie Koht kin kalapw sohte men ese dahme Paipel padahngki pwehki e sohte kamehlele me Paipel iei Mahsen en Koht. Mwein e kohsang sahpw me pali laud en aramas kaidehn Kristian oh e kin wiahki Paipel mehkot me pid pwihnen Kristian likamw kan. De mwein e kohsang sahpw me me tohto dene irail Kristian ahpw sohte nohk nsenohki Paipel kahrehda e sohte medewe me Paipel pahn kak sewese ih. Ia duwen atail kak sewese soangen aramas pwukat ren kalaudehla arail men esehla Paipel oh tepida onopki pwuhken Paipel Padahngki?
7. Dahme kin kalapw kamwakid aramas en men esehla Paipel?
7 Ohpis en Sounkadehdehn Siohwa kan nan Krihs ntingihdi: “Ahl me keieu mwahu en sewese irail me sohte men esehla Paipel iei pahkala Paipel oh kasalehiong irail dahme e audaudki. Sounkalohk tohto kin diarada me mahsen en Paipel kin kamwakid ahn emen mohngiong laudsang dahme pein sounkalohk kin nda. (Ipru 4:12) Arail kilang mwaren Koht nan Paipel kin sewese me tohto en kalaudehla arail men esehla Paipel.” Ohpis en India ntingihdi: “Padahk mehlel duwen mour oh mehla kin uhdahn kamwakid mehn Hindu tohto. Oh pil duwehte inou en Paipel me pid sampah ehu me aramas solahr kin lipilipilki aramas.” Sounkalohk kan kin koasoia duwen kahpwal kan me aramas tohto nan arail wasahn kalohk kin medemedewe. Met kin kalapw mweidohng ren kak kasalehda dahme Paipel mahsanih Wehin Koht pahn wia pwehn kapwungala kahpwal pwukat.
8. Dahme kitail kak ndaiong irail me sohte perenki Paipel pwehki pwihnen Kristian likamw kan?
8 Ma emen sohte perenki Paipel pwehki pwihnen Kristian likamw kan, sewese en ese me irail kasapwungehla padahk kan nan Paipel. Ohpis en Sounkadehdehn Siohwa kan nan India ntingihdi: “Ekei pak, se anahne sewese aramas en wehwehki me palien sarawi kan sohte ahneki manaman pohn Paipel.” E nda me irail me iang Hindu kin kalapw pwuriamweikihla section 4 en kisin pwuhk What Is the Purpose of Life? How Can You Find It?, me kasalehda ia duwen palien sarawi kan ar kin song en kasapwungehla oh kauwehla Mahsen en Koht. Emen pioneer nan Brazil kin ndahng aramas: “Ke sou men esehla duwen audepen Paipel? Aramas tohto kin wia met ni saledek oh sohte me kin idingkihong irail en iang ehu pelien lamalam. Ke pahn pwuriamweikihla dahme ke pahn diar.”
9. Dahme kahrehda kitail en dehr medewedahr me kitail sohte kak sewese emen me sohte men ese dahme Paipel padahngki nin tapio?
9 Siohwa kin ketin kasawih ahn emenemen mohngiong. (1 Sam. 16:7; Lep. Pad. 21:2) E kin ketin kainangih irail me mohngiong mehlel ong kaudok mehlel. (Sohn 6:44) Pali laud en aramas pwukat saikinte sukuhlki duwen Koht de Paipel. Atail doadoahk en kalohk kin kihong irail ahnsou mwahu en “ale komourparail oh marainkihla me mehlel.” (1 Tim. 2:4) Kahrehda, ma ekei sohte men ese dahme Paipel padahngki nin tapio, dehr medewedahr me ke sohte kak sewese irail! Doadoahngki ehu pwuhk me pahn kamwakid irail en men esehla met. Mwuhr, ele ke pahn kak tepida doadoahngki neitail pwuhk en wia onop en Paipel, Dahme Paipel Uhdahn Padahngki?
[Koakon nan pali 4]
Ma tohnihmwo nda me e sohte kamehlele Koht, doadoahngki met:
• Idek, “Ih met me ke kin kamehlele sang mahs?” pwehn diar ia kahrepen eh kamehlele met.
• Ma e wia emen Buddhist, doadoahngki kisin pwuhk Lasting Peace and Happiness—How to Find Them, pali 9-12.
• Ma e kamehlele padahk me dene mour pein miehla oh aramas kohsang mahn, ele mepwukat pahn kak sawas:
Ire kan nan Awake! oaralap “Was It Designed?”
Kasdo The Wonders of Creation Reveal God’s Glory
Kisin pwuhk pwukat A Satisfying Life—How to Attain It, section 4; Was Life Created?; oh The Origin of Life—Five Questions Worth Asking
• Ma e solahr pwoson Koht pwehki koasoandi sapahrek oh lokolok, ele pwuhk pwukat pahn kak sawas:
Pwuhken Is There a Creator Who Cares About You?, Irelaud 10
Kisin pwuhk pwukat Does God Really Care About Us?, pali 6, oh What Is the Purpose of Life?, section 6
• Tepida doadoahngki pwuhk en Paipel Padahngki ni tohnihmwo eh tepida medewe me mwein mie Koht. Mwein e pahn mwahu en tepikihda irelaud 2 de ehu ire me konehng ih.
[Koakon nan pali 5]
Doadoahngki met ma tohnihmwo sohte kamehlele Paipel:
• Doadoahngki irelaud 17 oh 18 nan pwuhk en Life—How Did It Get Here? By Evolution or by Creation?
• Ong irail me iang Hindu, doadoahngki kisin pwuhk Why Should We Worship God in Love and Truth?
• Ong mehn Suhs kan, doadoahngki kisin pwuhk Will There Ever Be a World Without War?, pali 3-11.
• Koasoiahpene kamwahupen idawehn kaweid kan en Paipel. Mehn sawas kan me ke kak doadoahngki en kasalehiong emen kamwahupen Paipel:
Ire kan nan Awake! oaralap “Help for the Family”
Kasdo The Bible—Its Power in Your Life
Kisin pwuhk kan Rohng Mwahu Sang Rehn Koht!, iren mehn kasukuhl 9 oh 11; A Book for All People, pali 22-26; oh A Satisfying Life—How to Attain It, section 2
Ong Buddhist kan, doadoahngki kisin pwuhk The Pathway to Peace and Happiness, pali 3-7.
Ong irail me iang Muslim, doadoahngki kisin pwuhk Real Faith—Your Key to a Happy Life, section 3.
Ma ke kin kalohk nan wasa me pali laud en aramas sohte perenki Paipel, mwein e pahn mwahu en dehr kasalehda me soahng mwahu kan me ke kin ehukihong irail kohsang nan Paipel lao ke pwurepwurehng pwurala rehrail.
• Kawehwehda ia duwen kokohp kan en Paipel ar pweida. Pwuhk kan me ke kak doadoahngki:
Kasdo The Bible—Accurate History, Reliable Prophecy
Kisin pwuhk A Book for All People, pali 27-29
• Tepida doadoahngki pwuhken Paipel Padahngki ni tohnihmwo eh tepida idek dahme Paipel padahngki duwen soangsoangen ire kan.
[Koakon en pali 6]
Ma tohnihmwo nda: “I sohte kamehlele Koht,” ke kak nda:
• “I kak kawehwehiong komwi dahme kamehlelehiong ie me mie Sounkapikada?” Oh eri ehukihong ire kan sang pwuhken Reasoning, pali 84-86 de koasoanehdi en wahla ehu pwuhk me ke perenki wadek.
• “Ahpw ma mie Koht, Soangen Koht dahmen ke men ih en wia?” Pali laud en tohnihmw kin sapeng me re men karanih Koht me limpoak, pwung pahrek, oh mahk, emen me sohte lipilipilki aramas. Kasalehiong ih sang nan Paipel me Koht sapwellimanki irair kaselel pwukat. (Mwein ke kak pil doadoahngki irelaud 1 en pwuhken Paipel Padahngki, tepikihda parakrap 6.)
Ma tohnihmwo nda: “I sohte Kamehlele Paipel,” ke kak nda:
• “Me tohto kin ahneki soangen pepehmohte. Ekei kin medemedewe me Paipel sohte pwungohng palien sains oh me koasoandi en Paipel sohte doadoahk nan atail ahnsou. Mie pak ke wadek Paipel? [Mweidohng tohnihmw en sapeng. Mwuri kasalehiong pali 3 en kisin pwuhk A Book for All People, oh kihong ih kisin pwuhket.] Me tohto sohte kin kamehlele Paipel pwehki palien sarawi kan kin kasapwungehla eh padahk kan. Ni ei pwurodo I men koasoia ehu karasepe sang pali 4 oh 5.”
• “Aramas tohto kin pil pwungki omwi madamadau wet. I kak kasalehiong komwi mehkot me kamwakid ei madamadau duwen Paipel? [Wadek Sohp 26:7 me kasalehda me Paipel pwungohng palien sains.] Paipel pil audaudki kaweid mwahu kan me kak sewese peneinei kan. Ni ei pwurodo I men kasalehiong komwi ehu karasaras.”
• “Kalahnganki omw padahkihong ie duwen met. Ma mehlel Koht me ketin ntingihdi pwuhk ehu ong aramas, dahme ke medewe e pahn audaudki?” Mwuri kasalehiong aramaso mehkot sang nan Paipel me pahrekiong dahme e sapengki.