Perenki Omw Koapworopwor

Koapworopwor duwehte poudek ehu. (Ipru 6:19) E kin sewese kitail en soikala soahng kan me pahn kauwehla atail pwoson ni atail lelohng soahng kan me rasehng melimel nansed. (1 Tim. 1:18, 19) Melimel nansed kin rasehng atail nsensuwedkihla mehkot, luhssang atail kepwe kan, ahneki soumwahu me mihmi werei rehtail, mehlahn emen me kitail poakohng, de soahng sohte lipilipil me keper ong atail loalopwoat.

Koapworopwor oh pwoson kin kahrehiong kitail en kak kilang ni sansal keting me Koht ketin inoukihongkitailehr. (2 Kor. 4:16-18; Ipru 11:13, 26, 27) Eri, mehnda ma atail koapworopwor nanleng de nin sampah, kitail anahne kaukaule kakairada met sang ni atail pahn doudouloale inou kan me kileldi nan sapwellimen Koht Mahsen. Eri, ni ahnsou me kitail kin lelohng kahpwal kan, e pahn mengeiong kitail en kolokolete atail peren.—1 Pit. 1:6, 7.

KILANG KISIN KASDO REJOICE IN THE HOPE, OH MWURI SAPENGALA PEIDEK PWUKAT:

• Dahme kahrehda Moses wia mehn kahlemeng mwahu en alasang?

• Pwukoa dah me kohieng tapwin peneinei kan?

• Oaralap dah kan me kumwail kak koasoiapene nan amwail Kaudok en Peneinei?

• Ia duwen koapworopwor eh kak seweseiuk en kamehlele me ke kak powehdi kahpwal kan?

• Dahme ke kasikasik ni ahnsou kohkohdo?