Iren Sawas kan ong Doaropwehn Kasukuhl ong Mihting en Mour oh Kalohk
September 2-8
SOAHNG KESEMPWAL KAN SANG MAHSEN EN KOHT | IPRU 7-8
“Samworo Sang Met Kohkohlahte nin Duwen Koasoandien Samworo Melkisedek”
it-2-E 366
Melkisedek
Nanmwarki en Salem mahso oh “samworo en Koht Wasa Lapalahpie” Siohwa. (Sen 14:18, 22) Ih me tepin samworo me Paipel kasalehda; e ahneki pwukoa wet ahnsou kei mwohn pahr 1933 mwohn Krais. Pwehki e wia nanmwarki en Salem, me wehwehki “Popohl,” wahnpoaron Pohl kin kahdaneki Melkisedek “Nanmwarki en Popohl” oh, pwehki edeo, e kin kahdaneki ih “Nanmwarki en me Pwung.” (Ipr 7:1, 2) Aramas kin esehki Salem en mahso me iei poahsoan en kahnimw ehu me mwuhr wiahla kahnimw en Serusalem, oh ahdo patehngala ahdo Serusalem, me ekei pak kin adaneki “Salem.”—Me 76:2.
Mwurin Eipram (Eipraam) eh kalowehdi Sedorlaomer oh ienge nanmwarki ko, kaunen peneineio ahpw kohla wasa patapat nan Wahun Sape de “Wahun Nanmwarki.” Wasao Melkisedek “ketikihong Eipram pilawa oh wain” oh kapaiahda Eipraam, mahsanih: “Koht, Wasa Lapalahpie, me ketin kapikada nanleng oh sampah, en ketin kupwuramwahwih Eipram. Kaping en kohieng Koht, Wasa Lapalahpie, me ketikihong komwi manaman en powehdi omwi imwintihti kan.” Eipraam eri kihong nanmwarki-samworou “eisek kis ehun kepwe kan koaros” me iei “dipwisou kan me keieu mwahu me lohdier nan mahwen,” me e koledi sang ni eh kalowehdi nanmwarki ko me ehupene mahweniong ih.—Sen 14:17-20; Ipr 7:4.
it-2-E 367 par. 4
Melkisedek
Ia wehwehn Melkisedek eh “sohte . . . rahnen eh ipwidi oh rahnen eh mehla”?
Pohl kasansalehda ire mehlel ehu duwen Melkisedek, ni eh koasoiahki ih: “E sohte sansal ihs seme oh ine, sohte mehkot me kileldi me pid duwen irekidien eh peneinei, rahnen eh ipwidi oh rahnen eh mehla, ahpw Koht ketin wiahiong en rasehngala Sapwellime Ohlo, oh wia samworo men ahnsou koaros.” (Ipr 7:3) Duwehte aramas teikan, Melkisedek ipwidi oh mehla. Ahpw, eden eh pahpa oh nohno sohte sansalda, irekidien eh peneinei oh kadaudoke kan sohte kileldi, oh Paipel sohte kilelehdi ire ehu duwen rahnen eh ipwidi de rahnen eh mehla. Ihme kahrehda Melkisedek kak wia karasaras mwahu ong Sises Krais, me ketin sapwellimanki pwukoahn samworo kohkohlahte. Duwehte Melkisedek eh sohte kileldi ihs me ahneki eh pwukoao mwohn ih de pil alehdi pwukoao mwurin ih, ih pil duwen Krais me sohte samworo lapalap men me duwehte ih, oh Paipel kasalehda me sohte me pil pahn mwuri. Oh pil mendahki Sises ketin ipwidi wia kadaudoken Suda oh iang irekidien nanmwarki sang ni kadaudoken Depit, e sohte ahneki pwukoahn samworo pwehki eh peneinei, oh e sohte pil ahneki pwukoahn samworo oh nanmwarki ahnsoutehkis pwehki eh peneinei. Pwukoa pwukat kohwong ih pwehki pein Siohwa ketin kahukihong ih.
it-2-E 366
Melkisedek
Karasahiong Sapwellimen Krais Pwukoahn Samworo. Nan ehu kokohp duwen Mesaia me Siohwa ketin kahukihong en Depit “Kaun” iei: “Komwi pahn wiahla samworo sang met kohkohlahte nin duwen koasoandien samworo Melkisedek.” (Me 110:1, 4) Melkahka pwoatet me pwilsang rehn Koht kihong kahrepen mehn Ipru kan arail pahn kilangwohng Mesaia me inoupe mie nin duwen emen me pahn alehdi pwukoahn samworo oh pil nanmwarki ahnsoutehkis. Ni wahnpoaron Pohl eh ntingla rehn mehn Ipru kan, e kihsang peikasal en ihs me kokohpdahr, ni eh koasoia duwen “Sises . . . me ketin wialahr samworo lapalap kohkohlahte duwehte Melkisedek.”—Ipr 6:20; 5:10; pil kilang COVENANT.
Raparapahki Soahng Kesempwal kan Sang Mahsen en Koht
Meirong Kan Me Kin Kaperenda Koht
11 Wahnpoaron Pohl mahsanih, “Samworo lapalap koaros kin idihda pwe re en pwukoahki patohwandahng Koht kisakis oh mehn meirong kan.” (Ipru 8:3) Ke pil tehk wasaht me Pohl kin katohrohrpeseng meirong kan me samworo lapalap en Israel en mahs kin wiahda ni oaralap riau: “kisakis kan” oh “mehn meirong kan” de “mehn meirong kan ong dipatail kan.” (Ipru 5:1) Aramas akan kin kalapw kihong aramas teikan kisakis kan pwehn kasalehda ahr limpoak oh kalahngan, oh irail pil kin wia met pwehn kompoakepahnkin emen oh kenikenla reh. (Senesis 32:20; Lepin Padahk 18:16) Eri, ni ahlohte, kitail kak kilangwong meirong kan me ntingihdi nan Kosonnedo nin duwen “kisakis kan” ong Koht pwe kitail en kak kenikenla reh. Ahpw, aramas akan me kin kauwehla Kosonnedo pahn anahne kapwungala arail sapwung me re wiahda ni ahr kin wia “meirong kan ong diparail kan.” Nan pwuhk kan en Pentateuch (Senesis lel Deuderonomi), oh keieu nan pwuhken Eksodus, Lipai, oh Nempe kan, pwuhk pwukat kin koasoia laud duwen soangsoangen meirong kan. Edetehn kitail pahn apwalki wehwehki oh tamataman meirong pwukat ni oaritik, e kesempwal kitail en tehk duwen ekei ire kesempwal kan me kin pid meirong pwukat.
it-1-E 523 par. 5
Inou lap
Ia duwen inou lap en Kosonnedo eh “meringlahr”?
Ahpw ni karasaras, inou lap en Kosonnedo “meringlahr” ni ahnsou me Koht ketin doadoahngki soukohp Seremaia en kalohkihda me e pahn mie inou lap kapw ehu. (Ser 31:31-34; Ipr 8:13) Nan pahr 33, inou lap en Kosonnedo kasohrala pwehki sapwellimen Krais pwoula nin tuhkehn kalokoloko (Kol 2:14), oh inou lap kapwo uhd wiliandi met.—Ipr 7:12; 9:15; Wi 2:1-4.
September 9-15
SOAHNG KESEMPWAL KAN SANG MAHSEN EN KOHT | IPRU 9-10
“Mwetehn Soahng Mwahu kan me Pahn Kohdo”
it-1-E 862 par. 1
Mahkpen Dihp
Nin duwen kosonned en Koht me kowohng wehin Israel, pwe aramas emen en ale mahkpen dipe ni eh dipada rehn Koht de rehn aramas emen, keieu e anahne kapwungala sapwungo nin duwen me Kosonnedo kaweidki oh pali laud en ahnsou e ahpw pahn patohwanohng Siohwa meirong en nta. (Lip 5:5–6:7) Ih kahrepen Pohl eh kasalehda ire mehlel wet: “Kereniong mehkoaros kin mwakelekelkihla nta, oh ma nta sohte keredi sohte mahkpen dihp.” (Ipr 9:22) Ahpw uhdahno, ntahn mahn akan me meirongala sohte kak kihsang dipen aramas emen oh kihong aramaso nsenmwakelekel ni unsek. (Ipr 10:1-4; 9:9, 13, 14) Weksang met, inou kapw me kokohpdahro kak kihda ni unsek mahkpen dihp, pwehki sapwellimen Sises Krais meirong en pweinen pweipwei sapahlo. (Ser 31:33, 34; Md 26:28; 1Ko 11:25; Ep 1:7) Ni ahnsou me e pil ketiket pohn sampah, Sises, sang ni eh ketin kamwahwihala aramas mwoator men, e ketin kasalehda me e sapwellimanki pwuhng en mahkohng dihp kan.—Md 9:2-7.
cf-E 183 par. 4
“Ideidawehn Ie”
4 Me pid ahnsou me Sises ketidahla nanleng, Paipel sohte kasalehda duwen koasomw me kohwong ih, oh eh kupwurperenkihda eh pwurehng tuhwong Semeo. Ahpw Paipel kasalehda dahme pahn wiawi nanleng mwurinte Sises pwuradahla. Pwe daulih sounpar 1,500 samwa, mehn Suhs kan kin pwurupwurehng kadehdehki pein meserail kasarawi ehu. Rahn ehu nan ehuehu pahr, samworo lapalapo kin pedolongala nan Wasa Sarawiheo nan tehnpas sarawio pwehn kadingdi ntahn meirong kan en Rahnen Tomw mwohn kohpwahn inou lapo. Ni rahno, samworo lapalapo kin kamwomwada Mesaiao. Sises ketin kapwaiada wehwehn kasarawi wet me kokohppe mie, oh e ketin wia met pak ehute mwurin eh ketin pwurala nanleng. E ketila mwohn silangin Siohwa nanleng—wasa me keieu sarawi nanleng—oh ketikihong Seme pweinen sapwellime meirong en pweipwei sapahlo. (Ipru 9:11, 12, 24) Ia duwe, Siohwa ketin kupwurki met?
it-2-E 602-603
Unsek
Unsekpen Kosonned en Moseso. Kosonnedo me kohwong Israel sang rehn Moses pil iangahki koasoandi kan me pid pwukoahn samworo oh soangsoangen meirong en mahn akan. Mendahki e kohsang rehn Koht, oh e me unsek, Kosonnedo, pwukoahn samworo kan, oh meirong kan sohte kak wahdo irair en unsek ong irail kan me mi pahn Kosonnedo, duwehte me wahnpoarono kasalehda. (Ipr 7:11, 19; 10:1) E sohte kasaledekihala dihp oh mehla, ahpw e kasansalehda mwahu duwen dihp. (Ro 3:20; 7:7-13) Ahpw koasoandi pwukat koaros kin idawehn koasoandi ko me Koht ketikihda; Kosonnedo kin doadoahk duwehte “sounkaweid” men pwehn kahluwalahng aramas rehn Krais, oh wiahda “mwetehn soahng mwahu kan me pahn kohdo.” (Kal 3:19-25; Ipr 10:1) Ihme kahrehda ni Pohl eh koasoia “soahng kan me Kosonned sohte kak wia pwehki aramas akan soh unsek” (Ro 8:3), e koasoakoasoia ni sansal me samworo lapalap en mehn Suhs (me pilipilda sang ni Kosonnedo pwehn apwalih koasoandi en meirong kan oh me kin pedolong nan Wasa Sarawihieo ni Rahnen Tomw wa meirong en nta) sohte “uhdahn kak ketin doarehla” irail me e kin papah, nin duwen me Ipru 7:11, 18-28 kawehwehda. Mendahki meirong kan me kohsang en Aaron pwukoahn samworo kin kahrehiong aramas akan en kolokol arail irair pwung mwohn Koht, e sohte kin uhdahn kasaledek irail douluhl sang arail pepehm en me re dipan. Wahnpoarono koasoia duwen met ni eh koasoia me meirong en tomw kan sohte kak “kaunsekihala irail kan me kin patohla rehn Koht,” me iei, soahng kan me pid kadeikpen loalarail. (Ipr 10:1-4; pil kilang Ipr 9:9.) Samworo lapalapo sohte kak kihda pweinen pweipwei sapahlo me anahn pwehn pwainla douluhl pweinen dihp. Sapwellimen Krais pwukoahn samworo oh meirong kelehpw me kak kapwaiada met.—Ipr 9:14; 10:12-22.
Raparapahki Soahng Kesempwal kan Sang Mahsen en Koht
w92-E 3/1 31 par. 4-6
Peidek kan Sang Sounwadawad kan
Pohl koasoia me mehla ehu anahn pwehn kamanahla inou lap kan nanpwungen Koht oh aramas akan. Inou lap en Kosonnedo iei ehu karasepe. Moses me sounkadokepene, me kin kadokepene pwungpenehn nanpwungen Koht oh mehn Israel kan. Eri Moses kin wia pwukoa kesempwal ehu oh ih me kin sewese mehn Israel kan ni ahnsou me re wiahda inou lapo. Eri Moses kak wia aramas me kin kadokepene pali riau en inou lap en Kosonnedo me kohsang rehn Siohwa. Ahpw ia duwe, Moses anahne kakerehdi eh nta ong inou lap en Kosonnedo pwehn kamanamanla? Soh. Ahpw mahn akan me pahn meirongala, arail nta kin wiliandi ntahn Moseso.—Ipru 9:18-22.
A ia duwen inou lap kapwo nanpwungen Siohwa oh wehin Israel en Koht? Sises Krais sapwellimanki pwukoa wahu en sounpouse koasoi, de sounkadokepene pali riau, nanpwungen Siohwa oh Israel en Koht. Mendahki Siohwa me ketikihda inou lap wet, Sises Krais me pahn ketin kapwaiada. Likin en wia sounkadokepene pali riau, pein Sises kin ketin ehuong irail kan me pahn tepin iang inou wet. (Luk 22:20, 28, 29) Patehng met, e ketin warohng en ketikihda meirong me anahne kamanahla inou lapo. Meirong wet kaidehn meirong en mahn akan ahpw mour en aramas unsek men. Eri Pohl kak koasoiahki Krais nin duwen sounkadokepene pali riau en inou lap kapwo. Mwurin “Krais . . . “ketila nanleng, . . . mwohn silangin Koht pwehki kitail,” inou lap kapwo eri kamanamanla.—Ipru 9:12-14, 24.
Ni eh koasoakoasoia duwen Moses oh Sises nin duwen aramas me kin kadokepene pali riau, Pohl sohte nda me ira me wiahda inou lap ko me Koht ketin wiahda. Ahpw, aramas riemeno iei sounkadokepene kan me kin uhdahn iang pidada en kamanahla inou lap ko. Oh me pid ehuehu inou lap ko, mehla kin anahn—mahn akan me kin wiliandi Moses, oh Sises ketin meirongkihla sapwellime nta ong irail kan me mi nan inou lap kapwo.
it-1-E 249-250
Papidais
Luk koasoia me Sises wie loulou ni ahnsou me e ketin papidaislao. (Lu 3:21) Patehng met, sounnting en kisinlikou ong mehn Ipru kan nda me ni ahnsou me Krais ketido “nin sampah” (me iei, kaidehn ni ahnsou me e ketin ipwidi oh sohte kak wadawad oh koasoia lepin lokaia pwukat, ahpw ni ahnsou me e ketin toukihda pein ih ong papidais oh tapiada sapwellime doadoahk en kalohk) e koasoakoasoia dahme pwungiong Melkahka 40:6-8 (LXX): “Komw sohte ketin kupwurki meirong en mahn akan oh meirong teikan, pwe paliwar ehu me komw ketin kaunopohng ie. . . . Kilang! I patohdohr (wasa kis nan pwuhko, e ntingdier duwen ngehi) en wia kupwuromwi, Maing Koht.” (Ipr 10:5-9) Sises ketin ipwidi wia kisehn wehin Suhs, wehi me iang inou lapo rehn Koht, me iei, inou lap en Kosonnedo. (Eks 19:5-8; Kal 4:4) Ong ni kahrepe mehlel wet, Sises ketier nan inou lap wet rehn Siohwa Koht ni ahnsou me e toukihda pein ih ong papidaisla rehn Sohn. Sises pahn ketin wia mehkot laudsang dahme e anahne wia pwehn kapwaiada Kosonnedo. E patohwanda pein ih ong Semeo Siohwa pwehn wia ‘kupwuren’ Semeo me pid eh pahn ketin toukihda, pein paliwere me Koht ketin “kaunopohng” ih, oh me pid kasohralahn meirong en mahn akan me aramas kin kihda nin duwen Kosonnedo. Wahnpoaron Pohl kawehwehda: “Sang ni ‘kupwur’ wet, kitail sarawihkilahr meirong en kahlap en Sises Krais me wiawi pak ehute.” (Ipr 10:10) Kupwuren Sahmo ong Sises pil kin iangahki doadoahk me kin pidada Wehio, oh pil ong doadoahk wet me Sises ketin toukihda pein ih. (Lu 4:43; 17:20, 21) Siohwa ketin kupwurki oh pohnese meirong en sapwellime Ohlo, ketin keiekihdi ih sapwellime manaman oh ketin mahsanih: “Kowe me nei Pwutak kompoake; I kin kupwurperenkin uhk.”—Mr 1:9-11; Lu 3:21-23; Md 3:13-17.
September 16-22
SOAHNG KESEMPWAL KAN SANG MAHSEN EN KOHT | IPRU 11
“Kesempwalpen Pwoson”
Kasalehda Omw Pwoson Sapwellimen Siohwa Inou kan
6 Paipel kawehwehda dahkot pwoson nan Ipru 11:1, NW. (Wadek.) (1) Pwoson iei “kamehlele mehkan me kitail kin koapworopworki.” Soahng kan me kitail “koapworopworki” kin iangahki sapwellimen Koht inou kan duwen ahnsou kohkohdo. Karasepe, kitail uhdahn kamehlele me soahng suwed kan pahn sohrala oh me pahn mie sampah kapw ehu. (2) Pwoson iei “mehn kadehdepen mehkan me sansal mendahki kitail sohte kak kilangki mesatail.” Kitail ese me Siohwa Koht, Sises Krais, tohnleng kan, oh Wehio nanleng uhdahn mie, mendahki kitail sohte kak kilang. (Ipru 11:3) Ia duwen atail kak kasalehda me kitail uhdahn pwoson sapwellimen Koht inou kan oh soahng kan me kitail sohte kak kilang? Kitail kin wia met sang ni mwomwen atail mour oh dahme kitail kin nda oh wia.
w13-E 11/1 11 par. 2-5
“E Pahn Ketin Katingih Irail kan me Kin Ngoangki Rapahki Ih”
Dahme anahn pwehn kaperenda Siohwa? Pohl ntingihedi: “Ma sohte pwoson sohte me kak kaperenda [Koht].” Tehk me Pohl sohte koasoia me e apwal en kaperenda Koht ma sohte pwoson. Ahpw wahnpoarono koasoia me sohte me kak wia met. Met wehwehki, pwoson iei mehkot kesempwal ong kaperenda Koht.
Soangen pwoson dah me kin kaperenda Siohwa? Atail pwoson Koht kin anahne pidada soahng riau. Keieu, kitail “anahne kamehlele me Koht ketin mie.” Kawehwe teikan koasoia me kitail “anahne kamehlele me Koht ketin mehlel” oh “anahne kamehlele me e ketin momour.” Ia duwen atail pahn uhdahn kaperenda Koht ma kitail kin peikasalki me e ketin mie? Pil duwehte, pwoson mehlel kin pidada laudsang met, pwe ngehn suwed kan pil kin kamehlele me Siohwa ketin mie. (Seims 2:19) Atail pwoson me Koht ketin mie pahn kamwakid kitail en mwekid, iei en kasalehda atail pwoson sang ni atail kin momour ni ahl ehu me kin kaperenda ih.—Seims 2:20, 26.
Keriau, kitail “anahne kamehlele me” Koht kin “ketin katingih” aramas. Aramas emen me kin pwoson mehlel kin uhdahn kamehlele me eh kin nantihong pwehn mour ni ahl ehu me kin kaperenda Koht kaidehk doadoahk mwahl ehu. (1 Korint 15:58) Ia duwen atail pahn kak kaperenda Siohwa ma kitail kin peikasalki sapwellime koahiek de ineng en katingih kitail? (Seims 1:17; 1 Piter 5:7) Aramas men me kin pilada en kamehlele me Koht ketin uhdahn soh nsenoh, sohte kin kalahnganki, oh sohte kin kadek sohte kin ese Koht en Paipel.
Ihs me Siohwa kin ketin katingih? Pohl koasoia, “irail kan me kin ngoangki rapahki ih.” Pwuhk ehu ong sounkawehwehn Paipel kan kasalehda me lepin lokaiahn Krihs me kawehwehdi “kin ngoangki rapahki” sohte wehwehki “kolahng rapahki” ahpw e wehwehki en patohla rehn Koht “ni kaudok.” Pil ehu pwuhk kawehwehda me lepin lokaiahn Krihs wet kin pidada doadoahk laud. Ei, Siohwa kin ketin katingih irail kan me arail pwoson kin kamwakid irail en kaudokiong ih ni limpoak oh ngoang sang mohngiong unsek.—Madiu 22:37.
Kakehlakahda Omw Pwoson ong Mehkan me Ke Koapworopworki
10 Nan Ipru irelaud 11, wahnpoaron Pohl nda: “Lih ekei mie me aleier nair seri kei me pwurehng mourda sang mehla pwehki pwoson. Pil ekei, ni ar kahng ale saledek, re pilada mehla nan lokolok laud pwe re en iasadahng mour me mwahusang met.” (Ipru 11:35) Me tohto lelohng kahpwal kan ahpw re kolokolte arail loalopwoatohng Koht pwehki re uhdahn pwoson dahme Koht ketin inoukihda duwen kaiasada. Re esehier me ni ahnsou kohkohdo, Siohwa pahn ketin kaiasada irail oh re pahn mour kohkohlahte nin sampah. Medewehla duwen Napod oh Sekaraia. Pwehki ira peikiong Koht, aramas akan katehki ira takai lao ira mehla. (1 Nan. 21:3, 15; 2 Kron. 24:20, 21) Daniel lekdekdiong nan pesen laion duhpek kei, oh ienge ko lekdeklahng nan kisiniei mwehlo. Re mendahkihla arail mour pwe re sohte men kaudokiong koht likamw akan. Ohl pwukat uhdahn pwoson me Siohwa pahn ketikihong irail sapwellime manaman oh sewese irail en dadaurete pahn kalokolok pwukat.—Ipru 11:33, 34; Dan. 3:16-18, 20, 28; 6:13, 16, 21-23.
11 Aramas kin kemenkouruhrki de salihedi soukohp tohto, duwehte Maikaia oh Seremaia. Soukohp teikan, duwehte Elaisa, “kin kohkohseli nan sapwtehn, pohn nahna kan, pahn paip akan, oh nan pwoahr akan.” Irail koaros kin dadaurete oh kolokolte arail loalopwoatohng Koht pwehki re ‘kamehlele mehkan me re kin koapworopworki de kasikasik.’—Ipru 11:1, 36-38; 1 Nan. 18:13; 22:24-27; Ser. 20:1, 2; 28:10, 11; 32:2.
Raparapahki Soahng Kesempwal kan Sang Mahsen en Koht
it-1-E 804 par. 5
Pwoson
Mehn Kahlemeng en Pwoson en Mehn Mahs ako. Emenemen “sounkadehde tohto pwukat me duwehte depwek kalaimwun ehu” me Pohl koasoia (Ipr 12:1) ahneki poahsoan mwahu ong arail pwoson. Karasepe, Eipel uhdahn ese duwen sapwellimen Koht inou me pid “kadaudok” men me pahn kamwutepene moangen “serpento.” Oh e kin kilang mehn kadehde sansal kan en pweidahn mahsen en Siohwa me e ketin mahsanihong eh pahpa nohno nan Ihden. Likin Ihden, Adam oh eh peneinei kin kang pilawa sang pwudowen masarail pwehki pwehlo eh riahla ihme kahrehda e kin kawosada tuhke oh dihpw tekatek kan. Eipel kakete kilang en Ihp eh kin ininangihete eh pwoud oh me Adam kin kaunda eh pwoud. Ni soh peikasal eh nohnou kin koasoia duwen medek me e kin ahneki ni eh kin liseian. Oh pil ni ahnsowo, Kerup kan oh kedlahs kisiniei pwoat kin sinsile wasahn pedolongala nan mwetuwel en Ihden. (Sen 3:14-19, 24, NW) Soahng pwukat koaros wia “mehn kadehde sansal,” me kamehlelehiong Eipel me komourla pahn kohsang ‘kadaudok me inou mie.’ Kahrehda, sang ni pwoson, e “patohwanohng Koht meirong ehu,” me kasalehda me eh meirongo mwahusang en Kain eh meirongo.—Ipr 11:1, 4.
“Enok Inenen Keniken Pahn Kupwuren Koht”
Eri, ia wehwehn Enok eh “kasauda” pwe en dehr “kilang mehla”? Ele Siohwa kasauda Enok sang mour ong mehla, doarehsang ih medek en mehla. Ahpw keieu, Enok alehdi mehn “kadehde me e inenen keniken pahn kupwuren Koht.” Ia duwen? Mwohnte eh mehla, Enok ele alehdi kasansal ehu sang rehn Koht, ele kasansal en sampah eh wia paradais ehu. Kasansal wet me Siohwa kupwurperenki ih inenen sansal ong Enok, ni eh kommoaldi oh mehla. Wahnpoaron Pohl koasoiahki Enok oh ohl oh lih pwoson teikan, ni eh koasoia: “Aramas pwukat koaruhsie pwoson, ahpw re melahr.” (Ipru 11:13) Mwurin mwo, en Enok imwintihti kan mwein rapahki paliwere, ahpw “sohte emen kak diar,” ele pwehki Siohwa ketin ekihla, pwe ren dehr mwamwahliki de doadoahngki pwehn utung pelien lamalam likamw.
September 23-29
SOAHNG KESEMPWAL KAN SANG MAHSEN EN KOHT | IPRU 12-13
“Peneu—Kasalepen Sapwellimen Siohwa Limpoak”
Dehr Kilenglahng Dahme Mi Mwuri
18 Kaweid kehlail kan. Mwein kitail kin medemedewehte duwen ekei kaweid kan me kitail alehdi mahs. Met kak kahrehiong kitail en nsensuwed de lingeringer oh kahrehda kitail en nan kapehd tikitikla. (Ipru 12:5) Sohte lipilipil ma kitail mwadangete soikala kaweido de pwungki ahpw mwuhr nan kapehd tikitikla, re pahn imwila duwepenehte. Kitail sohte mweidohng kaweido en sewese kitail. E pahn konehngete kitail en idawehn ahn Solomon kaweid: “Tamataman ahnsou koaros dahme ke padahngkiher. Padahk kan me ke aleier iei omw mour—sinsile mwahu.” (Lep. Pad. 4:13) Duwehte soun tangahki sidohsa ehu me kin tetehkte sain kan nanialo, kitail en ale kaweid, idawehn oh wonlahte mwowe.—Lep. Pad. 4:26, 27; wadek Ipru 12:12, 13.
w12-E 7/1 21 par. 3
“Ni Amwail Pahn Kin Kapakap, Kumwail Pahn Nda, ‘Samat’”
Pahpa limpoak men kin panawih nah seri kan, pwehki e kin nsenohki duwen soangen aramas dah re pahn wiahla. (Episos 6:4) Soangen pahpa menet ele pahn tengediong eh koasoandi, ahpw e sohte douluhl kin lemei ni eh kin kapwungala nah seri kan. Pil duwehte, Samatail nanleng ele ekei pak kin ketin diarada me kitail anahne peneu. Ahpw sapwellimen Koht peneu kin ahnsou koaros wiawi ni limpoak oh sohte douluhl kin mwamwahliki aramas. Duwehte Semeo, Sises sohte douluhl kin lemei, pil ni ahnsou me sapwellime tohnpadahk ko kin pwand en kapwaiada eh kin ketin kapwungala irail.—Madiu 20:20-28; Luk 22:24-30.
“Rong Peneu oh Loalokongla”
18 Peneu ele kin kamedek, ahpw imwilahn atail sohte ale sapwellimen Koht peneu pil kin kamedek sang met. (Ipru 12:11) Kitail kak sukuhlki sang mehn kahlemeng suwed en Kain oh Nanmwarki Sedekaia. Ni Koht eh ketin mahsanihada me Kain kailongki rie pwutako oh men kemehla, e ketin mahsanihong Kain: “Dahme ke lingeringerki oh pohtoutouki? Ma ke wia mehkot pwung, ke pahn pereperen; a pwehki omw wiadahr mehkot suwed, dihp rasehng mahn lawalo men me nektehn poar pohmw. E men kaunuhkada, ahpw ke uhdahn pahn powehdi.” (Sen. 4:6, 7) Kain sohte rong sapwellimen Siohwa kaweid, kemehla rie pwutako, oh lokolongki imwila suwed erein eh mour. (Sen. 4:11, 12) Ma Kain rong Koht, e sohte pahn lelohng medek laud wet.
Raparapahki Soahng Kesempwal kan Sang Mahsen en Koht
Nantihong Tang ni Kanengamah nan Weiro
11 Pohl nda me sapwellimen Siohwa ladu kan iei “sounkadehde pwukat me tohto kapilkitailpenehr duwehte depwek kalaimwun ehu.” Re kin loalopwoatohng Siohwa lao lel ar mehla, oh arail mehn kahlemeng kan kin kasalehda me Kristian kan kak loalopwoatohng Siohwa mehnda ma re mi nan apwal laud. ‘Sounkadehde pwukat me duwehte depwek’ de irail sapwellimen Siohwa ladu en mahs kan rasehng sounweiren tang kan me tang mwahu nan weiro oh kanekehla. Medemedewe arail mehn kahlemeng kan kak kangoange Kristian mehn Suhs pwukat ren pousehlahte nan arail weirentang oh wia uwen arail kak ren kanekehla. Kitail pil kak wia met.
w89-E 12/15 22 par. 10
Meirong kan me Kin Kaperenda Siohwa
10 Eri, mehn Ipru kan anahne ren dehr mweidohng ‘soangsoangen padahk kan oh padahk kan me weksang dahme re alehdahr en kawetiraillahsang ni ahl me pwung,’ me iei padahk en pelien lamalam en mehn Suhs kan. (Kalesia 5:1-6) Kaidehn sang ni padahk pwukat, ahpw ‘sang ni kadek sapan en Koht me mohngiongirail kak kehlailkihda’ pwe irail en mihmihte nan padahk mehlel. Ekei kin akamaiki duwen mwenge oh meirong kan, pwe Pohl koasoia me mohngiong sohte kin kehlailkihda “mwenge me sohte kin wia kamwahu ehu ong irail kan me kin kedirepwkihla soahng pwukat.” Kamwahu kan kin kohsang poadidiong Koht oh kalahnganki pweinen pweipwei sapahlo, ahpw kaidehn en kin nsenohki laud duwen kangkang soangen mwenge kei oh kasarawi rahn tohrohr kan. (Rom 14:5-9) Laudsang met, meirong en Krais kahrehiong meirong kan me mehn Lipai kan kin wiahda sohla manaman.—Ipru 9:9-14; 10:5-10.
September 30–October 6
SOAHNG KESEMPWAL KAN SANG MAHSEN EN KOHT | SEIMS 1-2
“Ahl en Kolahng Dihp oh Mehla”
g17.4-E 14
Kasongosong
Ke kin lelohng songosong ni omw kin mwahukihda mehkot—ahpw mehlel mehkot me sohte mwahu. Karasepe, ni omw wie netinet ke kilangada mehkot ehu me ke lingankihda. Ke ahnekihda madamadau ehu me ke kak pirapahda dipwisowo oh sohte dierekda. Ahpw kadeikpen loalomw nda ken dehr! Eri ke pohnsehsehla madamadauo oh doula netinet. Ni ahnsowo, kasongosongo sohla, oh ke kana.
DAHME PAIPEL MAHSANIH
En lelohng nan songosong sohte kahrehiong uhk ken wia aramas suwed men. Paipel pohnese me kitail koaros kin lelohng kasongosong. (1 Korint 10:13) Dahme uhdahn kesempwal iei dahme kitail kin wia ni atail kin lelohng songosong. Ekei kin medemedewehte ineng soh konehng kan oh sohla pwand re pahn kapwaiada arail ineng. A ekei kin mwadangete pohnsehsehla pwehki e suwed.
“Emenemen kin lelohng nan songosong sang ni pein eh ineng me kin kainangiong pein ih oh pitihedi.”—Seims 1:14.
g17.4-E 14
Kasongosong
Paipel kasansalehda kahk kan me kin kahluwalahng wiewia sapwung. Seims 1:15 mahsanih: ‘Ineng [sapwungo], ni ahnsou me e ahpada, e kin kanaitikihada dihp.’ Ni kawehwe mengei, ni atail kin medemedewehte ineng sapwung ehu, kitail lelohng ahnsou ehu me atail kapwaiada inengo kin duwehte lih liseian men me pahn neitikehr, e sohte kak kauhdi eh pahn neitiko. Ahpw kitail kak soikala wia lidu en ineng sapwung kan. Kitail kak kaunirailda.
Raparapahki Soahng Kesempwal kan Sang Mahsen en Koht
it-2-E 253-254
Marain
Siohwa iei “Sahm en marain en nanleng.” (Sei 1:17) E sohte kin ihte “ketikihong kitail ketipin pwe en kamarainih rahn, maram oh usu kan pwe en dakedaker nipwong” (Ser 31:35) ahpw e pil wia Utupen marain en padahk mehlel. (2Kor 4:6) Sapwellime kosonned, koasoandi en kopwung kan, oh mahsen iei soahng kan me kin kamarainih irail kan me kin mweidohng soahng pwukat en kaweid irail. (Me 43:3; 119:105; Lep 6:23; Ais 51:4) Sounmelkahkao lohkihda: “Pwehki sapwellimomwi marain se kin kak patohwan marain.” (Me 36:9; pil kilang Me 27:1; 43:3.) Duwehte lingan en ketipino eh kin pousehlahte maramarainla sang ni dakadahn ketipin ni menseng lao “rahn pwarada,” kahrehda elen me pwung kan, kin linglinganla sang ni erpit en Koht, oh maramarainla. (Lep 4:18) Pwehn idawehn ahl me Siohwa ketikihda iei en kin keid nan sapwellime marain. (Ais 2:3-5) Ni pali teio, ni ahnsou me aramas emen kin kilangwohng soahng kan ni ahl suwed de ni koasoandi suwed, e milahr nan rotorot mosul. Nin duwen me Sises mahsanih: “Ma pwoaren mesomwen kin peirin, paliweromw unsek pahn kin rotorot. Eri, ma marain me mi loalomw uhdahn rotorot, ia uwen eh pahn laud rotorot wet!”—Md 6:23; pil kilang Deu 15:9; 28:54-57; Lep 28:22; 2Pi 2:14.
it-2-E 222 par. 4
Kosonned
“Kosonned en Nanmwarki.” “Kosonned en nanmwarki” wet kin ni pwung ilehsang oh kesempwalsang kosonned teikan me kakaun nanpwungmwahu me nanmwarki men kin ahneki rehn aramas akan. (Sei 2:8) Wehwehn inou lap en Kosonnedo iei limpoak; oh “ke anahne poakohng mehn mpomw duwen omw kin poakohng pein uhk” (kosonned en nanmwarkio) iei keriaun kehkehlik me Kosonnedo pwon oh padahk en Soukohp ako kin poahsoankihda. (Md 22:37-40) Mendahki Kristian akan solahr mi pahn inou lap en Kosonnedo, irail anahne kapwaiada kosonned en Nanmwarki Siohwa oh sapwellime Ohlo, Nanmwarki Sises Krais, me pid inou lap kapwo.