Iren Sawas kan ong Doaropwehn Kasukuhl ong Mihting en Mour oh Kalohk
November 4-10
SOAHNG KESEMPWAL KAN SANG MAHSEN EN KOHT | 1 SOHN 1-5
“Dehr Poakohng Sampah De Mehkan nin Sampah”
Nantihong Idawehn Mehn Kahlemeng Mwahu Me Sises Wiadahr
13 Ekei aramas pahn lemeleme me kaidehn soahng koaros nan sampah me suwed. Met pwung, ahpw sampah oh audepe kan kak kerempwa kitailla oh kahrehong kitail en ekis ekis solahr papah Siohwa. Oh pil, sohte mehkot me mihmi nan sampah kin sewese kitail en karanih Koht. Kahrehda, ma kitail pahn poakohng sampah oh dipwisou me mihmi nan sampah, mendahki dipwisou pwukat sohte uhdahn suwed, kitail mihla nan keper. (1 Timoty 6:9, 10) Oh pil, soahng tohto nan sampah me suwed oh kak kauwehla atail pwoson. Ma kitail kilang kasdo kan de TV prokram kan me kin kasalehda tiahk lemei, pei, mahwen, nohn kesempwaliki dipwisou en sampah kan, de tiahk samin, soahng kan pahn ekis ekis wia soahng kan me mwahu ong kitail—oh mwuri, soahng pwukat pahn wia kasongosong kan ong kitail. Ma kitail pahn werekiong aramas me kin keieu kesempwaliki irail en kamwahuwihala arail mour ong soahng kan me pidada ineng en uduk de irail kin mwohneki rapahki ahl akan en kalaudehla palien pisnis nan arail mour, soahng pwukat pil kak wiahla dahme keieu kesempwal nan atail mour duwehte irail pwukat.—Madiu 6:24; 1 Korint 15:33.
Medewe Soangen Aramas Dah Me Konehng Ken Wia
18 Dahme pil kak sewese kitail en pelianda “dipwisou me mihmi nin sampah” iei en tamataman dahme Sohn koasoia: “Sampah wet oh mehkoaros nin sampah me aramas kin inengieng kin sosohrala.” (1 Sohn 2:17) E mwomwen me ahn Sehdan koasoandi pahn mihmi kohkohlahte. Ahpw ehu rahn e pahn imwisekla. Mehkoaros nan ahn Sehdan sampah pahn kereniong sohrala. Atail tamataman met pahn sewese kitail en sohte lohdi pahn ahn Sehdan widing kan.
Raparapahki Soahng Kesempwal kan Sang Mahsen en Koht
Sapwellimen Siohwa Mehn Kataman Kan Me Likilik
14 Mehn kataman tohto ong kitail en kasalehda limpoak ong emenemen mi nan Palien Paipel ni Lokaiahn Krihk. Sises mahsanih me kosonned me keriaun kesempwal iei en “poakohng mehn mpomw duwen omw kin poakohng pein uhk.” (Mad. 22:39) Seims rien Siseso kin ndahki limpoak “kosonned en Wehin Kohto.” (Seims 2:8) Wahnpoaron Sohn ntingihedi: “Kompoakepahi kesempwal kan, kosonned wet me I kehsehkin kumwail kaidehn kosonned kapw ehu. Pwe iei kosonnedohte me kumwail aleier sang nin tapio. Eri soh, kosonned wet me I kehsehkin kumwail me kapw.” (1 Sohn 2:7, 8) Ia wehwehn Sohn eh koasoia “kaidehn kosonned kapw ehu”? E kin koasokoasoia kosonned en kasalehda limpoak. Kosonned wet “kaidehn kosonned kapw ehu” pwehki Sises mahsanih duwe sounpar tohto mwowe, de “sang nin tapio.” Ahpw kosonned wet pil “kapw” pwehki mwuhr tohnpadahk ko pahn kasalehda limpoak me soh roporop ni irair kapw kan. Rahnpwukat, kitail kalahnganki atail ale mehn kataman kan me sewese kitail en dehr roporop duwehte aramas tohto nan sampah wet. Ahpw kitail kin kasalehda limpoak ni soh roporop.
it-1-E 862 par. 5
Mahkpen Dihp
E kin konehng en kapakapki sapwellimen Koht kupwurmahk ong meteikan, pil ong tohnmwomwohdiso pwon. Moses wia met ong wehin Israel, ni eh wehkada dipen wehio oh pekimahngki diparail kan, oh Siohwa ketin karonge ih. (Nem 14:19, 20) Pil Solomon, ni kasarawien tehnpas sarawio, e kapakapki me Siohwa en kin ketin mahkohng sapwellime aramas akan ni ahnsou me re dipada oh eri sohpeisang arail ahl sapwung. (1Na 8:30, 33-40, 46-52) Esra kin wiliandi mehn Suhs kan me pwuralahng sapwarailo oh wehkada mwohn pokon diparail kan. Eh kapakap sang nan mohngiong oh eh kangoang imwikihla aramas ako arail mwekid pwehn ale sapwellimen Siohwa mahk. (Esr 9:13–10:4, 10-19, 44) Seims kangoange me luwet men en eker ohl mah kan nan mwomwohdiso pwe ren kapakapki ih, oh “ma e wiahda dihp, e pahn ale mahkpen dipe.” (Sei 5:14-16) Ahpw mie soangen “dihp ehu me kin kahrehda mehla,” dihp en uhwongada sapwellimen Koht manaman, nsenki wiewia dihp ehu me sohte kak ale mahkpe. Kristian men en dehr kapakapki irail kan me kin wia dihp ni ahl wet.—1So 5:16; Md 12:31; Ipr 10:26, 27; kilang SIN, I; SPIRIT.
November 11-17
SOAHNG KESEMPWAL KAN SANG MAHSEN EN KOHT | 2 SOHN 1-13; 3 SOHN 1-14–SUD 1-25
“Kitail Anahne Pei Pwehn Mihmihte nan Padahk Mehlel”
“Kumwail Kehlailkihda Amwail Miniminiong Kauno”
8 Kitail kin ese en Sehdan doadoahk kan pwehki iren Pwuhk Sarawi kan kin kasalehda duwen ahl akan me e kin doadoahngki. (2 Korint 2:11) Ong ohl pwungo Sohp, Tepilo doadoahngki paisuwed, mehlahn kompoakpe kan, uhwong en peneinei, lokolok en paliwar, oh karaun likamw en irail akan me sohte wia kompoakpe mehlel kei. (Sohp 10:1, 2) Mendahki Sehdan mwein sohte pein kahrehda kahpwal kan rahnpwukat, kahpwal akan kin lelohng Kristian akan, oh Tepil kin doadoahngki lokolok me re lelohng pwehn wia kamwahupe.
9 Keper akan ong pali ngehn kin lalaudala nan imwin ahnsouwet. Kitail mih nan sampah ehu me repen kepwehn sampah kin kehlailsang wia mehn akadei en pali ngehn. Kasdo kan kin kalapw kasalehda tiahk suwed akan nin duwen mehkot kaperen oh kaidehn mehn kansensuwed. Oh pali laud en aramas kin “inengieng pein arail peren laudsang kupwur en Koht.” (2 Timoty 3:1-5) Soangen madamadau wet kak keper ong pali ngehn ma kitail sohte “kehlail nan mouren pwoson.”—Sud 3.
Raparapahki Soahng Kesempwal kan Sang Mahsen en Koht
it-2-E 279
Kamadipw en Limpoak kan
Paipel sohte kawehwehda ia mwomwen kamadipw en limpoak pwukat de pil kasalehda ia uwen ar kalapw wiawi. (Sud 12) Kaun Sises Krais sohte ketin kehkehlingki duwen met, de pil sapwellime wahnpoaron ko, oh e sansal me soahng pwukat sohte anahne wiawi pwehki kosonned de e pahn wiawi kohkohlahte. Ekei kin nda me kamadipw pwukat kin wiawi ekei pak ni ahnsou me Kristian kepwehpwe kan kin wiahda kamadipw oh luke iengarail tohnkaudok semwehmwe kan. Me sopwoupwou kan, me liohdi kan, me kepwehpwe oh me sohte paiamwahu kan eri kin ehupene kamadipw nin duwen pirien ehu.
it-2-E 816
Takai
Pil ehu lepin lokaiahn Krihs, spi·lasʹ, me kin ni sansal dokedoke soangen takai ehu de mad ehu me sohte sansal pahn pihl. Sud doadoahngki met nan karasaras pwehn kawehwehda soangen aramas me kin wailong nan mwomwohdisohn Kristian, iangahki arail madamadau suwed kan. Duwehte takai soh sansal kan ar kin keper ong sohp kan, ih pil duwen aramas pwukat arail kin keper ong meteikan nan mwomwohdiso. E koasoiahki soangen aramas pwukat: “Irail pwukat rasehng takai pahn pihl me sohte sansal nan amwail kamadipw en limpoak kan ni arail kin iang kumwail mwenge.”—Sud 12.
“Enok Inenen Keniken Pahn Kupwuren Koht”
Ia en Enok kokohpo? E ntingdi duwe met: “Kilang! Siohwa ketidohr iangahki sapwellime tohnleng sarawi ngedehrie pwehn kadeikada aramas koaros, oh kalokehki aramas suwed kan koaros arail wiewia suwed kan me re wiadahr ni ahl suwed, oh soahng kapwuriamwei sakanakan koaros me aramas suwed kan koasoiahki duwen ih.” (Sud 14, 15, NW) Tepin mehkot me ke pahn tehkada nan iretikitiko iei me Enok mwomwen koasokoasoia mehkot me wiawiher, duwehte me Koht ketin kapwaiadahr dahme kokohpo koasokoasoia. Ih soangen ahl wet me irail kan me kin wiahda kokohp kan mwuhr kin idawehn. Kahrepen met iei pwehki soukohpo kin koasoakoasoia duwen mehkot ehu me uhdahn pahn pweida, kahrehda e kak kawehwehda met nin duwen mehkot me mwomwen wiawiher!—Aiseia 46:10.
“Enok Inenen Keniken Pahn Kupwuren Koht”
En Enok pwoson ele pahn kamwakid kitail en pein idek rehtail ma kitail kin kilang sampah wet me kitail momour loale duwehte Koht eh kin ketin kilengwohng sampah wet. Kadeik me Enok eimah kalohkio pil pidada irail kan nan atail mwehi; duwehte eh pid irail kan ni mwehin Enok. Pahrekiongete dahme Enok kin kalohkio, Siohwa ketikihdo Nohlik Lapalapo pwehn kasohrehla aramas suwed kan ni mwehin Nohao. Ahpw kasohrala wet kasalehda mwomwen kasohrala ehu me pahn wiawi. (Madiu 24:38, 39; 2 Piter 2:4-6) Rahnwet, duwehte mahso, Koht ketin onopadahr iangahki sapwellime tohnleng sarawi ngedehrie pwehn wahdo kadeik pwung ong aramas suwed kan. Emenemen kitail anahne kesempwalki ahn Enok rohngo oh ehukihong meteikan. Atail peneinei oh kompoakepatail kan ele sohte pahn iang kitail. Ele ekei pak kitail pahn pehm me kitail kelehpw. Ahpw Siohwa sohte ketin likidmeliehla Enok; e pil sohte pahn ketin likidmeliehla sapwellime ladu lelepek kan rahnwet!
November 18-24
SOAHNG KESEMPWAL KAN SANG MAHSEN EN KOHT | KAUDIAHL 1-3
“I Ese Omw Wiewia kan”
Soangen Elen Madamadau Dah Ke Kin Kasalehda?
8 Kitail kak soikala soangen madamadauo ma kitail kin tamataman me Sises “ketiki nin lime palimaun usu isuh.” “Usu” ko wehwehki elder keidi kan, ahpw dahme Paipel mahsanih duwen irail pil dokedoke elder koaros nan mwomwohdiso kan. Sises kak ketin doadoahngki “usu” ko ni ahl sohte lipilipil me e kupwurki. (Kaud. 1:16, 20) Nin duwen Tapwin mwomwohdiso, Sises uhdahn mwahngih dahme wiewiawi nanpwungen elder kan. Silangi “likamwete mpwulen kisiniei” oh e mwahngih soahng koaros. Kahrehda ma elder men anahne kaweid, Sises pahn ketin tehk mwahu me eldero pahn ale kaweid ni ahnsou oh ahl me konehng. (Kaud. 1:14) Lao Sises pahn ketin wia met, kitail anahne wauneki elder kan me kin mi “nin lime palimaun.” Pohl ntingihedi: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih [“kumwail,” NW]; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.”—Ipru 13:17.
Siohwa Kin Ketin Pere Kitail Pwe Kitail en Komourala
11 Nan kasansal me kileldi nan Kaudiahl irelaud 2 oh 3, Nanmwarki Sises Krais mwahngih dahme wiewiawi nan mwomwohdiso isuh ko. Krais sohte mwahngihete mwomwen mwomwohdiso pwukat. Nan kasansal wet, e ketin kasalehda dahme kin uhdahn wiewiawi oh pil ihs me kin wia soahng pwukat. E pil ketin kapinga mwomwohdiso pwukat oh ketikihda kaweid me ehuehu mwomwohdiso anahne. Ia wehwehn kasansal wet ong kitail? Mwomwohdiso isuh ko kin wiliandi Kristian me keidi kan mwurin pahr 1914. Mendahki kaweid me Krais ketikihda kin doke mehlel me keidi ko, mwomwohdiso en sapwellimen Koht aramas koaros nan sampah rahnwet kak paiekihda. Eri kitail kak nda me Siohwa kin ketin doadoahngki sapwellime Ohlo pwehn kaweid sapwellime aramas akan rahnwet. Ia duwen atail kak mweidohng Siohwa en ketin kaweid kitail?
Peipeian Sapwellimen Siohwa Pwihn
20 Ma kitail pahn peipeian sapwellimen Siohwa pwihn me kin kekeirada, kitail anahne pohnese pwukoa me Koht ketikihong Sises Krais nin duwen “tapwin mwomwohdiso.” (Episos 5:22, 23) Pwuhken Aiseia 55:4 padahkiong kitail: “I wiahkihla ih sounkaweid oh kaunen wehi kan, I kasalehda ei manaman ong wehi kan pwehki ih.” Sises uhdahn ese kahre aramas akan. E pil ese sapwellime sihpw kan oh arail wiewia kan. Pwe ni ahnsou e wia keseu en mwomwohdiso isuh nan Eisia Mainor, pak limau e mahsanih met: “I ese omw wiewia kan.” (Kaudiahl 2:2, 19; 3:1, 8, 15) Sises pil ketin mwahngih duwen atail anahn akan, pil duwehte Seme, Siohwa. Mwohn e padahkiong sapwellime kan duwen Kapakap en Samat, Sises mahsanih: “Koht iei Samamwail, oh e ketin mwahngih dahme konehng kumwail mwohn amwail saikinte kin peki mehkot.”—Madiu 6:8-13.
Raparapahki Soahng Kesempwal kan Sang Mahsen en Koht
kr-E 226 par. 10
Wehin Koht Kasohrehla Eh Imwintihti kan
10 Pakair en kadeik. Imwintihti koaros en Wehin Koht eri pahn uhdahn pein kadehde mwekid ieu me pahn kalaudehla arail lokolok. Sises mahsanih: “Aramas akan . . . pahn kilang Nein-aramas eh pahn ketiket kohdo pohn depwek kan ni lingan oh manaman lapalahpie.” (Mark 13:26) Kasalepen manaman kapwuriamwei wet pahn wia kilelepen Sises eh pahn ketido wia pakair en kadeik. Pil ehu kisehn kokohpo duwen imwin rahn akan, Sises ketikihda oaritik tohto kan duwen pakair me pahn wiawi ni ahnsowo. Kitail diarada ireo nan karasaras en sihpw oh kuht kan. (Wadek Madiu 25:31-33, 46.) Irail me kin utung Wehin Koht ni loalopwoat pahn ale kadeik nin duwen “sihpw” oh pahn “sarada” ni arail esehda me “komourpamwail kerendohr.” (Luk 21:28) Ahpw, irail kan me kin uhwong Wehio pahn ale kadeik nin duwen “kuht” oh pahn “pikipikir nan mwaremwarerail nan ar nsensuwed,” ni arail esehda me kasohrala douluhl awiawih irail.—Mad. 24:30; Kaud. 1:7.
Ire Kesempwal akan Sang nan Pwuhken Kaudiahl—I
2:7—Ia wehwehn “sapwellimen Koht Mwetuwel”? Pwehki mahsen pwukat kin kohwohng Kristian keidi kan, mwetuwel wet kin dokedoke wasa kaselel ehu nanleng me Koht kin ketiket ie. Me keidi lelepek pwukat pahn ale kating sang arail pahn tungoale wahn “tuhkehn komour.” Irail pahn alehdi mour me solahr kak pwurehng mehla.—1 Kor. 15:53.
November 25–December 1
SOAHNG KESEMPWAL KAN SANG MAHSEN EN KOHT | KAUDIAHL 4-6
“Tangatang en Soundake Oahs Pahmeno”
Soun Dake Oahs Pahmeno—Ihs Irail?
Ihs me soun dake oahs pwetepweto? Pwuhken Kaudiahl kasalehda ihs ih. Mwuhr e kasansalehda ih nin duwen “Mahsen en Koht.” (Kaudiahl 19:11-13) Lengileng wet, Mahseno, kin dokedoke Sises Krais, pwehki eh kin ketin wia sapwellimen Koht sounkair. (Sohn 1:1, 14) Pil patehng met, e kin mwarenki “Nanmwarkien nanmwarki kan oh Kaunen kaun akan” oh pil e kin mwarenki “Loalopwoat oh Mehlel.” (Kaudiahl 19:16) E sansal me e sapwellimanki manaman en wia nanmwarkien karis en sounpei, oh e sohte kin ketin doadoahngki sapwellime manaman ni ahl me suwed de limeidihd. Ahpw, mie peidek kan me kin pwarada.
Soun Dake Oahs Pahmeno—Ihs Irail?
Iahd me soun dake oahs pwukat tepida dake wererail oahs kan? Tehk me soun dake oahs keieuo Sises, tepida tang ni ahnsou me e ketin alehdi nihn ehu. (Kaudiahl 6:2) Iahd me Sises ketin alehdi nihn ehu nanleng nin duwen Nanmwarki men? E sohte alehdi ni ahnsou me e ketin pwuradahla nanleng mwurin eh pwoula. Paipel kasalehda me mie ahnsou ehu me e pahn anahne ketin awihki mahs. (Ipru 10:12, 13) Sises ketikihong sapwellime tohnpadahk ko kilel ehu me pahn kasalehda kaimwiseklahn ahnsou me e pahn anahne ketin awih oh tepidahn sapwellime kaunda nanleng. E mahsanih me ni ahnsou me eh kaunda pahn tepida, irair en sampah wet uhdahn pahn suwedla. E pahn mie mahwen, lehk lapalap, oh soumwahu lusulus. (Madiu 24:3, 7; Luk 21:10, 11) Ni ahnsowohte me Mahwen Keieu en Sampah tepida nan pahr 1914, e tepida sansalda me tohnsampah lelehr nan ahnsowo, ahnsou apwal ehu pohn sampah me Paipel kin kahdaneki “imwin rahn akan.”—2 Timoty 3:1-5.
Soun Dake Oahs Pahmeno—Ihs Irail?
Soun dakeo kin wehwehki mahwen. Tehk me e sohte kihsang popohl nan ekeite wehi ahpw nan sampah pwon. Nan pahr 1914, ehdin nan poadopoad me mahwen laud ehu wiawi nan sampah pwon. Mwurin mwo mahwen keriaun sampah pil wiawi, me uhdahn kauwehla laud soahng tohto sang mahwen keieuo. Ekei kapatahdi uwen tohtohn mehlahn aramas akan sang mahwen oh dipwisoun mahwen kan sangete nan pahr 1914, me aramas tohtohsang sapw (100 million) me mehla. Patehng met, aramas tohto teikan pil lokolongki ohla laud kan.
Soun Dake Oahs Pahmeno—Ihs Irail?
“I ahpw kilangada oahs toantoal men. Me dakeo kolokol mehn tenek ehu. I pil rongada ngihl ehu me peidihdo sang nanpwungen menmour pahmeno, me nda, ‘Paunen pilawa [“wihd,” NW] riau mihmi ni uwen pweinen doadoahk en rahn ehu, a paunen parli weneu mihmi ni uwen pweinen doadoahk en rahn ehu. Ahpw kaleke ke kauwehla tuhke olip kan oh mwetuwel en wain kan!’”—Kaudiahl 6:5, 6.
Soun dakeo kin wehwehki lehk lapalap. Kitail kilang wasaht kilel en tikitiklahn mwenge me kahrehda uwen paunen wihd riau (1.08 L) pahn mihmi ni uwen pweinen doadoahk en rahn ehu, ni mwehin tepin Kristian kan! (Madiu 20:2) Uwen pweineo kak pwainda paun siluh (3.24 L) en parli, nan ahnsowo wahn pilawa kin tikitiksang wihd. Ia duwen met eh kak kamwengehda peneinei laud ehu? Aramas akan kin ale kehkehlik en kin kasohtikih kenerail mwengehn ehuehu rahn, duwehte lehn olip oh wain me irail kin kalapw doadoahngki ahnsowo.
Soun Dake Oahs Pahmeno—Ihs Irail?
Kapahmen en soun dake oahso kin wehwehki mehla me kohsang soumwahu oh soahng teikan me kin kahrehda. Mwurinte nan pahr 1914, Spanish flu kemehla aramas dep kei (tens of millions). Ele aramas lime sapw (500 million) kin alehdi soumwahwo, emen sang nanpwungen meh 3 me kin iangada soumwahwo!
Ahpw kaidehn Spanish flu te me kemehla aramas tohto. Irail semen kan kapatahda me aramas sapw kei (hundreds of millions) mehkihla soangen kilitepw ieu me doar erein pahr 1901 lel 2000. Leledo rahnwet, aramas rar kei kin mehla pwehki AIDS, limengimeng, oh malaria, mendahki doadoahk laud kan eh kin wiawi ni palien wini kan.
Imwilahn met kin duduwehte, mehla kin wiawi pwehki mahwen, lehk lapalap, de kahpwal teikan. Mehlahn aramas akan sohte kin uhdi, oh mwomwen sohte koapworopwor.
Raparapahki Soahng Kesempwal kan Sang Mahsen en Koht
re-E 76-77 par. 8
Lingan en Sapwellimen Siohwa Mwoahl Nanleng
8 Sohn ese me samworo kan kin idihdida pwe ren kin papah nan impwal sarawi en mahso. Eri ele e pwuriamweikihla ni eh kilang dahme e kawehwehda mwuhro: “Mwoahl 24 kapilpene mwoahlo, oh I kilangada lapalap 24 me mwomwohd nan mwoahl pwukat me likawih likou pwetepwet, oh nihn kohl mi pohn moangarail.” (Kaudiahl 4:4) Ei, kaidehn samworo kan, ahpw mie elder 24, me mwomwohd pohn mwoalarail kan oh ahneki nihn duwehte nanmwarki kan. Ihs elder pwukat? Irail iei me keidi kan nan mwomwohdisohn Kristian, me iasadahr oh miher nan pwukoa kan me Siohwa ketin inoukihong irail. Ia duwen atail ese met?
re-E 80 par. 19
Lingan en Sapwellimen Siohwa Mwoahl Nanleng
19 Dahme menmour pwukat kin wiliandi? Kasansal ehu me kohsang rehn pil emen soukohp, Esekiel, sewese kitail en diarada pasapengo. Esekiel kilangada Siohwa ketiket pohn kuruma ehu nanleng, me menmour ko ieiang me mwomwarail duwehte dahme Sohn pil kawehwehda. (Esekiel 1:5-11, 22-28) Mwuri, Esekiel pwurehng kilangada mwoahlo me wia kuruma ehu me menmour ko ieiang. Ahpw met, e koasoakoasoia menmour ko nin duwen kerup kei. (Esekiel 10:9-15) Menmour pahmeno me Sohn kilangada uhdahn kin weliwelian sapwellimen Koht kerup tohto kan—menmour me lapalap nan Sapwellime pwihn nanleng. Sohn sohte pahn medewe me e sapwung en kilang kerup kan mihmi karanih Siohwa, pwehki nan koasoandien impwal sarawi en mahso, kerup kohl riemen mi pohn pweinen kohpwahn inou lapo, me kin weliwelian mwoalen Siohwa. Nanpwungen kerup pwukat, kapitien Siohwa kin ketikihda kehkehlik kan ong wehio.—Eksodus 25:22; Melkahka 80:1.
cf-E 36 par. 5-6
“Kilang! Iet Laiono me Kisehn Kadaudok en Suda”
5 Laiono kin kalapw pidada eimah. Mie pak ehu ke kesihnenda kowe kilikilang ohl laion men me mi mwohmw? Ma ei, eri ele ke mi ni zoo ehu oh kehlo pahn pereiukasang mahno. Ahpw, soangen mwekid wet kakete kamasepwehk. Ni omw kilikilang mesen lapalahn mahn kehlailo oh eh kangkangkiluhk, e apwal ken medewehla me laiono pahn masepwehkada oh tangasang mehkot sohte lipilipil. Paipel mahsanih me, “laion kan, mahn me keieu kehlail nanpwungen mahn koaros, me sohte kin masak mehkot.” (Lepin Padahk 30:30) Soangen soh masak wet kin duwehte sapwellimen Krais eimah.
6 Kitail pahn koasoiapene ia duwen Sises eh kin ketin kasalehda eimah duwehte laiono ni ahl siluh: pere padahk mehlel, utungada pwung pahrek, oh ni eh ketin lelohng uhwong kan. Kitail pahn pil kilang, me kitail koaros—mehnda ma kitail kin eimah sangete mahs de soh—kitail kak alasang Sises ni atail kin kasalehda eimah.