En Pwung oh Kamwakid Emen en Kamehlele

Luk 1:3

DAHME KE PAHN WIA: Doadoahngki iren sawas likilik kan me pahn sewese sounrongorong kan ren wehwehki dahme pwungo.

IA DUWEN OMW PAHN WIA MET:

• Rapahkihda oh doadoahngki iren sawas likilik kan. Poahsoanehkihda omw koasoi kan Mahsen en Koht, oh kin wadek sang nan Paipel ni uwen omw kak. Ma ke koasoia duwen ire ehu sang sains, de rongen nuhs ehu, de dahme lelohng aramas, de mehn kadehde teikan me pahn utung omw koasoio, tehk mwowe ma dahme ke doadoahngkio me likilik oh kin mehlelte.

• Doadoahngki iren sawas kan ni ahl me konehng. Kawehwehda iren Paipel kan ni ahl me pahrekiong ire tikitiko oh ire kan me mi limwah, pahrekiong dahme Paipel pwon kin mahsanih, oh pil pahrekiong sawasepen Paipel kan sang “ladu lelepek oh loalokong.” (Mad. 24:45) Ni omw doadoahngki iren sawas kan me sohte pid Paipel, dehr wekidala wehwehn de nda mehkot me weksang dahme sounntingio uhdahn koasoia.

• Sewese sounrongorong kan ren medemedewe mehn kadehde kan. Mwurin omw wadek iren Paipel ehu, de nda de kasalehda ire ehu, wia peidek kamantik kan de karasahda ire kesempwalo pwehn sewese sounrongorong kan en pein kamehlele ireo.