Iren Sawas kan ong Doaropwehn Kasukuhl ong Mihting en Mour oh Kalohk
November 2-8
SOAHNG KESEMPWAL KAN SANG MAHSEN EN KOHT | EKSODUS 39-40
“Moses Kanahieng en Kapwaiada Kaweid kan”
Siohwa Ketin Kupwurkin Uhk?
Moses weksang Kora. E wia “ohl aktikitik men, me keieu aktikitik rehn aramas en sampah kan.” (Nemp. 12:3) E kin kasalehda me e aktikitik sang ni eh kin kapwaiada dahme Siohwa ketin kaweidki en wia. (Eks. 7:6; 40:16) Kitail sohte kin wadek nan Paipel me ahnsou koaros Moses kin sapwungki sapwellimen Siohwa koasoandi kan, de e lingeringerda pwehki eh anahne idawehn sapwellime kaweid. Karasepe, Siohwa ketikihong ire pisetik kan duwen koukoudahn impwal sarawio. Kaweid pwukat pidada pohn dereht kan oh uwen tohtohn pwakel kan me mehn Israel kan en doadoahngki wiahda likou kan en impwal sarawio. (Eks. 26:1-6) Mwein ekei pak ke kakete mworuskihla ma sounapwalih men nan sapwellimen Koht pwihn kihong uhk kaweid pisetik kan. Ahpw Siohwa iei sounapwalih unsek men. E kin ketikihong sapwellime ladu kan ar doadoahk oh ketin likih me re pahn kapwaiada. Mie kahrepe mwahu ni eh ketikihda ire pisetik tohto. Moses sohte lingeringerda pahn Siohwa de medewe me Siohwa sohte ketin wauneki pwehki eh ketikihong kaweid pisetik tohto. Moses sohte medewe me Siohwa ketikihsang eh saledek en wiahda pilipil. Moses padahkihong tohndoadoahk ko en kapwaiada mehkoaros me Siohwa ketin kaweidki irail. (Eks. 39:32) Ia uwen eh aktikitik! Moses ese me doadoahko sapwellimen Siohwa, oh Siohwa ketin doadoahngki ih en kapwaiada.
Ke Kin Lelepek Ni Mehkan Koaros?
Pwuhken Ipru 3:5 mahsanih, “Moses me loalopwoat.” Dahme kahrehong Moses en lelepek? Ni kauwadahn ihmw likou en kaudok, “Moses kapwaiada soahng koaros nin duwen me Kauno ketin koasoanehdi.” (Eksodus 40:16) Nin duwen tohnkaudok kan en Siohwa, kitail kin kasalehda lelepek ni atail kin papah ih ni peik. Met kin pidada atail lelepek ong Siohwa mendahki kahpwal kan me kitail kin lelohng. Ahpw, mendahki met, kaidehn atail pweida ni kasongosong laud kante me kin kasalehda atail lelepek. Sises mahsanih, “Me kin loalopwoat ni mehkot tikitik, e pahn pil loalopwoat ni mehkot laud; oh me kin keseulikilik ni mehkot tikitik, e pahn pil keseulikilik ni mehkot laud.” (Luk 16:10) Kitail pil anahne en lelepek ni mehkan me tikitik.
Raparapahki Soahng Kesempwal kan Sang Mahsen en Koht
(Eksodus 39:34, NW) pweine me wiawihda sang kilin sihpw wol me kaduh nan poh weitahta, pweine sang kilin sihl, kahdeng en perehpe;
it-2-E 884 par. 3
Kilin Sihl
Ia Duwen Mehn Israel kan Ar Kin Alehda. Ma taʹchash en Paipel sohte kasalehda soangen kilin sihl dahieu me kin kadoadoahk, eri mie me pahn kakete peikasalki ia duwen mehn Israel kan ar kak alehda kilin sihl kan. Sihl kan kin kalapw mi nan sapwen Artic oh Antartic, ahpw ekei sihl kin mi wasa me sohte nohn lemwulemwur. Erein sounpar daulih epwiki kei, aramas akan kahredahr sihl kan en malaulaula. Ni ahnsou kan en Paipel, ele soangen mahn pwukat kin tohto nan Mediderenien oh pil nan Sehd Weitahta. Sangete pahr 1832, ehu dikseneri (English edition of Calmet’s Dictionary of the Holy Bible [pali 139]) kasalehda met: “Aramas kak diarada sihl kan pohn deke tohto kan en Sehd Weitahta, wasa kan me kapil Sanai.”—Pil kilang The Tabernacle’s Typical Teaching, sang A. J. Pollock, London, pali 47.
w15-E 7/15 21 par. 1
Ke Nsenohki Aramas en Tehk Dahme Ke Wiahda?
Ni ahnsou me doadoahk en kou impwal sarawio nekier, pelien depwek ehu eri tepida “kipehdi Impwalo oh lingaling en KAUN-O ahpw kadirehla tehnpaso.” (Eks. 40:34) Met uhdahn kasalehda mwahu me Siohwa ketin kupwurperenkihda! Ke kak medewehla en Pesalel oh Oliap ara pepehm ni ahnsowo? Mendahki adara kan sohte kileldi ni ara dipwisou ko me ira wiahda, ira uhdahn nsenamwahuki ara ese me Koht ketin kapaiahda ara doadoahk laud. (Lep. Pad. 10:22) Sounpar kan mwurin ahnsowo, ara mohngiong uhdahn kin mwekidkihda ara kin kilang me dahme ira wiahda kin doudoulahte kadoadoahk ong doadoahk en papah Siohwa. Ni ahnsou me ira pahn pwurehng mourda nan sampah kapw, Pesalel oh Oliap uhdahn pahn perenkihda ara pahn esehda me kaudok mehlel kin wiawi nan impwal sarawio erein sounpar 500 samwa!
November 9-15
SOAHNG KESEMPWAL KAN SANG MAHSEN EN KOHT | LIPAI 1-3
“Kahrepen Meirong kan”
it-2-E 525
Meirong kan
Meirong isihs kan. Meirong isihs kan kin pwonte meirongala ong Koht; tohnkaudok kan sohte kin kihsang ehu kisehn paliweren mahno. (Pil kilang Sk 11:30, 31, 39, 40.) Mepwukat kin wia pekipek ehu ong Siohwa en ketin kupwure de kasalehda eh ketin kupwurki meirong en dihp me kin ekei pak iang mepwukat. Nin duwen “meirong isihs” Sises Krais ketin patohwanda kahlepe pwon, kahlepe unsek.
it-2-E 528 par. 4
Meirong kan
Meirong en krein kan. Meirong en krein kan kin wiawihda iangahki meirong en kaminimin kan, meirong isihs kan, oh meirong en dihp kan, oh pil tepin wahnsahpw kan; ekei pak re kin kelehpw wiawihda. (Eks 29:40-42; Lip 23:10-13, 15-18; Nem 15:8, 9, 22-24; 28:9, 10, 20, 26-28; irelaud 29) Mepwukat kin kasalehda duwen Koht eh kin ketin sapan ni eh ketikihda kapai kan oh paiamwahu. Leh oh warpwohmwahu kin kalapw iangete mepwukat. Meirong en krein kan kin kak mi ni mwohmw en pilawa amas mwahu, inihn krein, de keik me mwomwen rihng de pilawa menipinip me umwda, de kuk pohn mete patapat, de sang nan ketel en wih. Ekei meirong en krein ko kin kohdi pohn pei sarawi en meirong isihso, ekei mepwukat samworo kan kin tungoalehla, oh ni meirong en kaminimin kan tohnkaudok kan kin iang tungoale. (Lip 6:14-23; 7:11-13; Nem 18:8-11) Sohte ehu rehn meirong en krein kan me kohda pohn pei sarawio pahn doal ihs de mie “sukehn loangalap” (mweinele met dokedoke syrup en pik kan de pilen wahntuhke kan) me kak mpwosda.—Lip 2:1-16.
it-2-E 526 par. 1
Meirong kan
Meirong en kaminimin kan (de meirong en popohl kan). Siohwa ketin kupwurki meirong en kaminimin kan me kin wia kilelepen popohl reh. Tohnkaudok men oh tohnimwe kin iang tungoale met (nan wasa me kelpene ni impwal sarawio; nin duwen tiahk, impwal kan kokouda kapilpene loalen kahdeng me kapil wasa me kelpeneo; nan tehnpas sarawio, perehn mwenge kan wiawihda). Samworo me apwalih meirongo kin ale pwaise, oh samworo kan me doadoahk, kin ale pil ehu pwaisarail. Eri, Siohwa kin ketin alehdi ediniei pwohmwahu en wih en meirongo. Ntao, me kin weliwelian mour, kin kowohng Koht nin duwen sapwellime. Kahrehda samworo kan, tohnkaudok kan, oh Siohwa kin mwomwen duwehte me re kin ehupene konot, me kin kasalehda nanpwungmwahu popohl. Aramas emen me kin tungoale ni eh samin (soangen samin koaros me mi nan Kosonnedo) de me tungoale uduko mwurin eh daulihalahr ahnsou me e kileldi (wasa me ekis karakar uduko kin tepida matala) pahn kamakamala sang rehn eh aramas akan. E kin kasaminehla de mwamwahliki mwengeo, pwehki sohte lipilipil ma ih me samin de eh kin tungoale met, kin wia mehkot kasaut mwohn silangin Siohwa Koht, me kasalehda eh mwamwahliki soahng sarawi kan.—Lip 7:16-21; 19:5-8.
Raparapahki Soahng Kesempwal kan Sang Mahsen en Koht
Ire Kesempwal akan Sang Nan Pwuhken Lipai
2:13—Dahme kahrehda soahl kin anahne iang “meirong koaros”? Met kaidehn en kawekila nemen mehn meirong kan. Wasa koaros nan sampah, soahl kin wia mehn kolokol mwahu en mehkan pwe ren dehr ohla. Ele e kin iang meirong kan pwe en kilelepen mehkot me sohte ohla de mwerpeseng.
it-1-E 813
Wih
Kahrepen met ong kosonnedo. Pahn Kosonned en inou lapo, nta oh wih iei sapwellimen Siohwa kelehpw. Nta kin pidada mour, me Siohwa kelehpw kak ketikihda; kahrehda Siohwa me sapwellimanki nta. (Lip 17:11, 14) Wih kin wia mehkot me keieu mwahu ni uduk en mahn. Meirong en wihn mahn kin kasalehda ni sansal ire mehlel me wasa keieu mwahu ko iei sapwellimen Siohwa, me kin ketikihda soahng tohto, oh met kin kasalehda ineng en tohnkaudok men ni eh kin patohwanohng Koht me keieu mwahu. Pwehki met iei kasalepen en mehn Israel kan ar kin patohwanohng Siohwa me keieu mwahu, ireo mahsanih ren wiahiong met en edinieida pohn pei sarawio nin duwen “konot” oh ong “pwoh kansenamwahu” ehu ong ih. (Lip 3:11, 16, NW) Kahrehda en tungoale wiho, kin kauwehla kosonned ong dahme kasarawilahr ong Koht, e kin kihsang pwuhng me Siohwa sapwellimanki ong met. Tungoale wih kin elehda kalokolok en kamakamala. Ahpw, weksang nta, wih kak kadoadoahk ong kahrepe teikan, ihte ma mahn emen pein mehla de emen mahn kemehla.—Lip 7:23-25.
Ire Kesempwal akan Sang Nan Pwuhken Lipai
3:17. Pwehki wih kin wia wasa me keieu mwahu, keinepwi me uhwong kang wihen mahn akan kin kihong nan madamadau en mehn Israel akan me wasa me keieu mwahu en mahn akan iei sapwellimen Siohwa. (Senesis 45:18) Met kin katamankihong kitail me kitail pahn kihong Siohwa uwen mwahu koaros me atail.—Lepin Padahk 3:9, 10; Kolose 3:23, 24.
November 16-22
SOAHNG KESEMPWAL KAN SANG MAHSEN EN KOHT | LIPAI 4-5
“Patohwanohng Siohwa me Keieu Mwahu Rehmw”
it-2-E 527 par. 9
Meirong kan
Meirong en tomwki dihp kan. Meirong en tomwki dihp pil wia kisehn meirong kan pwehki dihp, ong dihp sohte lipilipil. Mepwukat iei ong dihp tohrohr kan, ong ni aramas emen eh kauwehla kosonned, oh mepwukat ekis weksang meirong en dihp teikan pwe re kin kansenamwahwihala de kapwurehdo pwuhng ehu. Sohte lipilipil ma re kauwehla pwuhng en Siohwa de pwuhng en sapwellime wehi sarawi. Meirong en tomwki dihp iei en kupwuramwahwih Siohwa pwehki pwuhng me ohlao, de kapwurehdo de pwurehng ale pwuhng en inou lap kan ong me wiahda sapwungo eh koluhla oh en ale saledek sang kalokepen dipeo.—Pil kilang Ais 53:10.
w09-E 6/1 26 par. 3
E Ketin Mwahngih Atail Soh Itar kan
Me pid sapwellimen Siohwa nsenoh laud, Kosonnedo mahsanih: “Ma aramas emen sohte kak meirongki sihpw de kuht, e pahn patohwandohng KAUN-O mwuroi riemen de pitsin riemen pwehn wia meirong en tomwen dipeo.” (Iretikitik 7) Lepin lokaia “ma . . . e sohte kak meirongki” pil kak wehwehki “ma . . . peh kan sohte kak lel.” Ma mehn Israel men me nohn semwehmwe sohte kak pwainda sihpw men, eri Koht ketin kupwurki ale dahme aramaso kak meirongki—mwuroi riemen de pitsin riemen.
w09-E 6/1 26 par. 4
E Ketin Mwahngih Atail Soh Itar kan
Ia duwen ma emen sohte nah mwohni en pil pwainda menpihr riemen? “E pahn wahdo paun riau en pilawa mehn wia meirong en dihp,” Kosonnedo me mahsanih. (Iretikitik 11) Ong me keieu semwehmwe, Siohwa ketin pilada en wiahda ahl ehu oh ketin mweidada meirong en dihp me sohte doadoahngki nta. Nan Israel, semwehmwe sohte irehdihsang emen kapai en tomw de kapai en wiahda popohl rehn Koht.
Raparapahki Soahng Kesempwal kan Sang Mahsen en Koht
Sukuhlkihsang Sapwellimen Siohwa Ladu Loalopwoat kan
Ke pil kak keieu loalopwoatohng Siohwa oh loalopwoatohng meteikan sang ni omw kasalehda kadek. Karasepe, ele mie mehn kadehde me ke kilang emen riomw Kristian wiahda dihp laud ehu. Ele ke men loalopwoatohng ih, ahpw keieu ma e wia kompoakepahmw keren men de tohn omw peneinei. Ahpw ke pil ese me omw loalopwoatohng Siohwa kin kesempwalsang met. Eri duwehte Nadan, peikiong Siohwa ahpw kadekohng riomw Kristiano. Ndaiong ih me e anahne peki sawas sang elder kan oh koasoiong irail ni ahnsou mwadang. Ma e sohte wia met, ke anahne pein padahkihong elder kan. Ni omw wia met, ke kin kolokol omw loalopwoatohng Siohwa. Oh ni ahnsowohte, ke kin kadekohng riomw Kristiano pwehki elder kan kak sewese ih en pwurehng ahneki nanpwungmwahu rehn Siohwa. Re pahn kapwungala ih ni ahl kadek.—Wadek Lipai 5:1; Kalesia 6:1.
it-1-E 1130 par. 2
Sarawi
Mahn akan oh Wahnsahpw. Mesenih kouwol, sihpw wol oh kuht wol kan kin wia mehkot sarawi ong Siohwa oh sohte pahn pweipweida sapahl. Re pahn meirongala, oh samworo kan me kasarawihala pahn ale pwaise. (Nem 18:17-19) Tepin wahnsahpw kan oh eisek kis ehun soahng kan kin sarawi, duwehte meirong kan koaros oh kisakis koaros ar kasarawihla ong doadoahk en wasa sarawio. (Eks 28:38) Soahng koaros me kasarawihala ong Siohwa kin sarawi oh sohte kak wia mehkot tikitik de kadoadoahk ni ahl sohte lipilipil de mwahl ehu. Karasepe ehu iei kosonned me pid eisek kis ehun soahng kan. Karasepe, ma aramas emen katohrehla pwais ehu pwe en wia eisek kis ehu, sang wahn eh wihdo, oh mwuri ih de emen tohnimwe sapwungala ale ekei mepwukat pwehn doadoahngki ni imweo, duwehte ong kuk, aramaso dipada ni eh kauwehla sapwellimen Koht kosonned me pid wauneki soahng sarawi kan. Kosonnedo kehkehlingki me e pahn wiahda wiliepen met ong wasa sarawio uwe ieu me pahrekiong pweinen met patehng persent 20, oh pil meirongki sihpw wol roson mwahu men sang pelin sihpwo nin duwen meirong ehu. Kahrehda, wauneki laud soahng sarawi kan me sapwellimen Siohwa uhdahn anahn.—Lip 5:14-16.
November 23-29
SOAHNG KESEMPWAL KAN SANG MAHSEN EN KOHT | LIPAI 6-7
“Kasalepen Kasapahlkalahngan”
Mehn Kasukuhl kan me Kitail Kak Sukuhlkihsang Pwuhken Lipai
Keriaun mehn kasukuhl: Kitail kin papah Siohwa pwehki atail kalahngan ong ih. Kitail pahn sukuhlki mehn kasukuhl wet ni atail tehkpene duwen meirong en kaminimin kan me mehn Israel kan kin wia. Nan pwuhken Lipai, kitail sukuhlki me mehn Israel men kak kihda meirong en kaminimin nin duwen meirong en “kapingkalahngan” ehu. (Lip. 7:11-13, 16-18) E kin wia meirong wet, kaidehn pwehki e anahne wia, ahpw pwehki e men wia met. Eri aramaso kin nsenki toukihda meirong wet pwehki e poakohng eh Kohto, Siohwa. Aramas me kihda meirongo, eh peneinei, oh samworo kan pahn kang uduk en mahno me meirongala. Ahpw mie wasa kei ni mahno me kin meirongala ongete Siohwa kelehpw. Wasa dah kei me?
Meirong Kan Me Kin Kaperenda Koht
Pil ehu meirong me kin kohsang rehn aramas akan me kin pein toukihda ahr meirong kan iei meirong en kaminimin, me kileledi nan pwuhken Lipai irelaud 3. Eden meirong wet pil kak wehwehki “meirong en popohl.” Ni lokaiahn Ipru, lepin lokaia wet “popohl” kin wehwehki laudsang saledeksang mahwen de kahpwal akan. Nan pwuhk ehu me oaralap koasoia Studies in the Mosaic Institutions, e koasoia met: “Nan Paipel, e kin kawehwehda met, oh e pil kin kawehwehda duwen irairo de popohl rehn Koht, pweida mwahu, peren, oh nsenamwahu.” Ihme kahrehda, meirong en kaminimin kin wiawi, kaidehn pwehki en kakehlailda atail popohl rehn Koht, de mwomwen men kaperenda ih, ahpw e kin wiawi pwehn kasalehda kalahnganki popohl rehn Koht me aramas akan kin ahneki oh me kin kenikenla rehn Koht. Irail samworo kan oh meno me kihda meirongo kin pil iang kang uduk en meirongo mwurin nta oh wih kan pahn isikala nin duwen meirong ong Siohwa. (Lipai 3:17; 7:16-21; 19:5-8) Ni ahl lingan oh ni karasaras, meno me wahdo mehn meirongo, oh irail samworo kan, oh Siohwa Koht kin iang konotpene, oh met kin karasaiong me irail koaros kin ahneki popohl nanpwungarail.
Meirong En Kaping Kan Me Kin Kaperenda Siohwa
Iaduwen mehmeno me kin wiahda meirongo? Kosonnedo mahsanih me mehmen me pahn patohwan rehn Siohwa anahne en mwakelekel oh sarawi. Mehmen me saminlahr oh dipadahr anahne en wia meirong en dihp de meirong en kapwungala pwehn pwurehng mwakelekelda mwohn Siohwa oh mwurin met Siohwa pahn kak kupwurki eh meirong isihs de meirong en kaminimin. (Lipai 5:1-6, 15, 17) Eri, kitail kin kilang duwen ia uwen kesempwal kitail en mwakelekel ahnsou koaros mwohn Siohwa? Ma kitail men atail kaudok en pwung mwohn Koht, kitail anahne mwadangete kapwungala pein kitail ni ahnsou me kitail kin kauwehla sapwellimen Koht kosonned akan. Kitail anahne en mwadangete ale sawas me Koht kin ketikihong kitail—sang “irail me mah kan en mwomwohdiso” oh “ih me tomwkiher dipatail kan” iei Sises Krais.—Seims 5:14; 1 Sohn 2:1, 2.
Raparapahki Soahng Kesempwal kan Sang Mahsen en Koht
it-1-E 833 par. 1
Kisiniei
Me pid duwen impwal sarawio oh tehnpas sarawio. Kisiniei me kin kadoadoahk ong kaudok kin wiawi nan impwal sarawio oh mwuhr ni tehnpas sarawio. Ehuehu nimenseng oh nanpwungen nin soutik riau kan, samworo lapalapo pahn kin isikada warpwohmwahu pohn pei sarawi en warpwohmwahwo. (Eks 30:7, 8) Sapwellimen Koht kosonnedo kehkehlingki me kisiniei me mi pohn pei sarawi en meirong en isihso pahn kin wie lullul. (Lip 6:12, 13) Madamadau en mehn Suhs kan iei me kisiniei en pei sarawio uhdahno manaman en Koht me kalullihada. Mendahki me tohto pwungki, Paipel sohte kin utung met. Nin duwen tepin kaweid ko me Siohwa ketikihong Moses, nein Aaron pwutako me “pahn koasoanehdi tuwi pohn pei sarawio oh isikada” mwohn ar pahn kihdi meirongo pohn pei sarawio. (Lip 1:7, 8) Met wiawi mwurin kasapwiladahng koasoandi en samworo en Aaron oh nein Aaron ko, oh eri mwurin meirong en kasapwilda ko ar meirongala, kisinieio sang Siohwa, mweinele e kohsang ni depwek kan me mi pohn impwal sarawio, me isikada meirongo pohn pei sarawio. Pwehki met, kisiniei sang ni manamano pein miehla oh “isikala meirong isihso oh luhwen wih ko me mi pohn pei sarawio,” ahpw e sohte pein lulda sang ni tuwi en pei sarawio. Ahpw ni mehlel, kisiniei me kin wie lullul pohn pei sarawio, ele kohsang kisiniei sang Koht oh kisiniei me mihier pohn pei sarawio. (Lip 8:14–9:24) Duwehte, kisiniei sang manaman en Siohwa me isikala meirong ko mwurinte en Solomon kapakap en kasarawien tehnpas sarawio.—2Kr 7:1; pil kilang Sk 6:21; 1Na 18:21-39; 1Kr 21:26 duwen karasaras teikan me Siohwa ketin doadoahngki kisiniei sang ni manaman ni ahnsou me e ketin kupwurki meirong kan en sapwellime ladu kan.
si-E 27 par. 15
Pwuhken Paipel Nempe 3—Lipai
(3) Meirong en dihp kin anahn ong emen me sohte nsenki dipada, de dihp kan me emen sapwungala wiahda. Soangen mahn me meirongala pahn kasalehda ahn ihs dihp me tomwala—ma en samworo, en aramas akan pwon, en kaun emen de aramas sohte lipilipil men. Weksang meirong me emen kin nsenki wiahda oh meirong en kaminimin kan, meirong en dihp kin anahne wiawi.—4:1-35; 6:24-30.
November 30–December 6
SOAHNG KESEMPWAL KAN SANG MAHSEN EN KOHT | LIPAI 8-9
“Kadehdepen Sapwellimen Siohwa Kapai”
it-1-E 1207
Kasapwilada
Moses kaduhpada Aaron oh nah pwutak kan Nadap, Apihu, Eleasar oh Idamar (de, e kehkehlingki ren duhdu) ni peisin pronso ni wasa kelpeneo oh kalikawihkihda Aaron likou lingan kan en samworo lapalap. (Nem 3:2, 3) Ni eh likoukihda likou kaselelo, Aaron alehdi manaman en likou kan me kasalehda irair oh eh pwukoa kan. Moses eri keiehdi impwal sarawio, dipwisawi kan oh kepwe kan koaros, oh pei sarawi en meirong isihso, iangahki peisino oh kepwe kan me kin kadoadoahk ong mepwukat. Met kasarawihala dipwisou pwukat, oh re katohrohrla pwehn kadoadoahk ongete papah Koht. Mwuri, Moses eri keiehdi Aaron ni eh wudekihdi leh pohn moange.—Lip 8:6-12; Eks 30:22-33; Me 133:2.
it-1-E 1208 par. 8
Kasapwilada
Ni kawaluhn rahn, samworou ahnekier soahng koaros oh alehdier manaman ong pwukoa kan, ih tepin ahnsou me samworou (Moses sohte pahn iang sewese) apwalih pwukoa kan, wiahda doadoahk en tomw ong wehin Israel. Met uhdahn anahn ong kamwakel kaidehn ihte pwehki diparail kan ahpw pil pwehki ar wiewiahn sapeik me re ahpwtehn wia me pidada koupwul kohlo, me kansensuwedihada kupwuren Siohwa. (Lip 9:1-7; Eks 32:1-10) Ni kaimwiseklahn tepin pwukoa wet ong samworo kapw me kasapwiladao, Siohwa ketin kasalehda sapwellime kupwuramwahu oh eh ketin kamanahla irail ong ar pwukoa ni eh ketin kadarala kisiniei, ni soh peikasal kisinieio kohsang ni uhren depwek me mi pohnangin impwal sarawio, me isikala luhwen meirongo pohn pei sarawio.—Lip 9:23, 24.
Mehn Kasukuhl kan me Kitail Kak Sukuhlkihsang Pwuhken Lipai
Kapahieu en mehn kasukuhl: Siohwa kin ketin kapaiahda sapwellime pwihn nin sampah. Medewehla dahme wiawi nan pahr 1512 mwohn Krais, ni ahnsou me impwal sarawio kokouda ni utuhn Nahna Sainai. (Eks. 40:17) Moses wia kasarawi ehu pwehn idihada Aaron oh nah pwutak ko nin duwen samworo kei. Wehin Israel pwon pokonpene pwehn kilang samworo ko ar wia tepin arail meirongki mahn akan. (Lip. 9:1-5) Ia duwen Siohwa eh ketin kupwurki samworo ko me ahpwtehn idihdida? Ni Aaron oh Moses ara kapaiahda aramas ako, Siohwa ketin kahrehiong kisinieio en isikala luhwen meirongo pohn pei sarawio.—Wadek Lipai 9:23, 24.
Raparapahki Soahng Kesempwal kan Sang Mahsen en Koht
Dahme Kahrehda Kitail Anahne Sarawihla
Dahme koasoandi en kamwakel me samworo kan en Israel anahne wia kin padahkihong kitail rahnwet? Aramas tohto me onop Paipel rehtail kin kilang mwakelekel en atail wasahn kaudok kan, atail kin mwakelekel oh pil likouda mwahu. Patehng met, irail kan me men kaudokiong Siohwa anahne “mwakelekel . . . ni ar lamalam [“mohngiong,” NW].” (Wadek Melkahka 24:3, 4; Ais. 2:2, 3.) Eri kitail anahne papah Siohwa sang ni lamalam oh mohngiong mwakelekel oh pil mwakelekel ni paliwar. Kitail anahne kaukaule wia keseupen pein kitail. Ekei pak ele kitail kin diarada me kitail anahne wiahda wekidekla laud kan pwe kitail en kak wia aramas sarawi kei. (2 Kor. 13:5) Karasepe, emen me papidaislahr ahpw kin kilang kasdo oh kilel suwed kan anahne pein idek reh, ‘I kin kadehdehda me I wia aramas sarawi men?’ Eri, e anahne ale sawas pwehn uhdihsang tiahk kasaut wet.—Seims 5:14.
it-2-E 437 par. 3
Moses
Koht ketin koasoanehdi Moses en wia sounkadokepene Kosonned en inou lapo rehn Israel, nanpwungmwahu de pwukoa ehu me sohte aramas emen ahneki mwohn silangin Koht likin Sises Krais, me wia Sounkadokepene inou kapwo. Sang ni ntahn meirong en mahn akan Moses usupihki pwuhk en inou lapo, me weliwelian Siohwa nin duwen ehu “pwihn,” oh aramas akan (ni soh peikasal wiliepe iei ohl mah kan) iei me “pwihn” teio. E wadek pwuhk en inou lapo ong aramas ako, me sapengki, “Se pahn kapwaiada mehkoaros me KAUN-O ketin mahsanih.” (Eks 24:3-8; Ipr 9:19) Nan eh pwukoa en sounkadokepene, Moses ahneki pwais en apwalih impwal sarawio oh wiawihdahn dipwisawi kan, koasoandi me Koht ketikihong ih, oh en kasapwilada pwihnen samworo kan ong ar pwukoa, keiehdi impwal sarawio oh keiekihdi samworo lapalap Aaron leh tohrohro. Ih eri apwalih tepin doadoahk kan en pwihnen samworo kapw kan me kasarawihla.—Eks irelaud 25-29; Lip irelaud 8, 9.