IREN MEHN KASUKUHL 25
Ia Kupwuren Koht ong Kitail?
Paipel kasalehda me mour en aramas “me mwotomwot oh diren apwal.” (Sohp 14:1) Ih met me Koht uhdahn ketin kupwurki ong kitail? Ma soh a ia kupwure ong kitail? Met uhdahn pahn kak pweida? Tehk pasapeng kaloalamwahu kan sang nan Paipel.
1. Soangen mour dah me Siohwa ketin kupwurki kitail en ahneki?
Siohwa ketin kupwurki kitail en ahneki mour me keieu mwahu. Ni ahnsou me e ketin kapikada tepin aramas ako, Adam oh Ihp, e ketikinirahdi nan mwetuwel en Ihden, wasa kaselel ehu. Mwuri, Koht ketin “kupwuramwahwih ira, mahsanih, ‘Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros.’” (Senesis 1:28) Siohwa ketin kupwurki ira en naineki seri, kaparadaisihala sampah oh apwalih mahn akan. E ketin kupwurki aramas koaros en ahneki roson unsek oh mour kohkohlahte.
Mendahki mepwukat saikinte pweida,a kupwuren Koht sohte wekila. (Aiseia 46:10, 11) E ketin kupwukupwurehte aramas peik kan ren mour kohkohlahte nin sampah me sohte kahpwal.—Wadek Kaudiahl 21:3, 4.
2. Ia duwen atail kak ahneki mour nsenamwahu ni ahnsou wet?
Ni Siohwa eh ketin kapikkitailda, e ketikihong kitail anahn en ale sapwellime kaweid. Ihme kahrehda, kitail kin ahneki ineng en esehla oh kaudokiong ih. (Wadek Madiu 5:3-6.) E ketin kupwurki kitail en ahneki nanpwungmwahu keren reh, pwe kitail en ‘kapwaiada sapwellime mahsen koaros, poakohng ih oh papah ni [mohngiongitail] unsek.’ (Deuderonomi 10:12; Melkahka 25:14) Ni atail kin wia met, kitail kak uhdahn nsenamwahu mendahki mie atail kahpwal. Ni atail kin kaudokiong Siohwa, kitail kin pehm me mie katepen atail mour pwehki kitail kin mourki mour me e ketin kupwurki.
KALAUDEHLA OMW ESE MET
Sukuhlki duwen limpoak laud me Siohwa ketin kasalehda ni eh ketin kaunopadahng kitail sampah oh dahme sapwellime Mahsen kin padahkihong kitail duwen kahrepen mour.
3. Siohwa ketin kupwurki aramas akan ren ahneki mour nsenamwahu
Kilang KISIN KASDO, oh mwuri koasoiapene peidek wet.
Dahme kahrehda Koht ketin kapikada sampah kaselel wet?
Wadek Eklesiasdes 3:11, (NW)b oh mwuri koasoiapene peidek wet:
Dahme met padahkihong uhk duwen Siohwa?
4. Kupwuren Siohwa sohte wekila
Wadek Melkahka 37:11; Aiseia 55:11 oh 1 Sohn 2:17, oh mwuri koasoiapene peidek wet:
Ia duwen atail ese me kupwuren Siohwa ong kitail sohte wekila?
Ihmw ehu me wasa tohto ohla kak pwurehng onohnsapahlda. Duwehte met, Koht pahn ketin onehda sapahl sampah wet me aramas akan kauwelahr ong aramas akan me poakohng ih
5. Mie katepen atail mour ni atail kin kaudokiong Siohwa
En ese ia kahrepen mour kak wadohng kitail nsenamwahu. Kilang KISIN KASDO, oh mwuri koasoiapene peidek wet.
Ia duwen Terumi eh ahneki mour nsenamwahu ni eh esehla kahrepen mour?
Wadek Eklesiasdes 12:13, oh mwuri koasoiapene peidek wet:
Pwehki Siohwa ketin wiahda soahng tohto ong kitail, ia duwen atail kak kasalehiong ih me kitail kalahnganki?
MA EMEN IDEK: “Ia kahrepen mour?”
Ia duwen omw pahn sapeng?
DAHME KE SUKUHLKIER
Siohwa ketin kupwurki kitail en pereperenki mour kohkohlahte nin sampah me sohte kahpwal. Ni atail kaudokiong ih nan mohngiongitail unsek, e pahn mie katepen atail mour—pil ni ahnsou wet.
Kousapahl
Ia kupwuren Siohwa ong Adam oh Ihp nin tapio?
Ia duwen atail ese me kupwuren Koht ong aramas akan sohte wekila?
Ia duwen omw kak ahneki mour nsenamwahu?
PIL TEHK
Tehk mehn kadehde me mwetuwel en Ihden uhdahn mie.
“Mwetuwel En Ihden Mehlel De Likamw?” (Kahn Iroir, February 1, 2011)
Sukuhlki kahrepen atail kak kamehlele me sampah pahn mihmi kohkohlahte.
Tehk dahme Paipel mahsaniheki duwen esehla kahrepen omw mour.
Kilang emen ohl me kin medewe me e ahneki soahng koaros ahpw e diarada dahme e sohte ahneki nan eh mour.
a Ke pahn sukuhlki dahme sapwungala nan iren mehn kasukuhl en mwurin met.
b Eklesiasdes 3:11, (NW): “E ketin wiahda soahng koaros en kaselel ni ahnsou me konehng. E pil ketikihong nan mohngiongirail ineng en mour kohkohlahte.”