Iren Sawas kan ong Doaropwehn Kasukuhl ong Mihting en Mour oh Kalohk
© 2023 Watch Tower Bible and Tract Society of Pennsylvania
NOVEMBER 6-12
SOAHNG KESEMPWAL KAN SANG MAHSEN EN KOHT | SOHP 13-14
“Ma Aramas Emen Pahn Mehla, E Kak Pwurehng Mourda?”
Kitail Kin Rapahki Dahme Kak Kareireila Atail Mour
PIL nan rahnwet aramas malaulau me pahn sapwungki madamadau wet me pid duwen mwotomwot en mour, mendahki met ntingdi sounpar 3,500 samwa samwalahro. Aramas sohte kin itarki en mour mwotomwot oh eri mahla oh mehla. Ihme karehda, mie wiepe kan en kareireila mour me kin wie kekeirada sangete mahs lel nan rahnwet.
Ni mwein Sohp mehn Isip kan kin kang wisol en mahn akan pwe ren pwulopwulte. Ehu mehn akadei en sounwia wini kan en mahs iei en wiahda ehu pilen wini me kak kahrehong emen en mour werei. Sounwia wini tohto en mahs kin kamehlele me kohl kan me aramas pein wiahda kak kahrehong emen mour soutuk oh ma emen pahn mwenge sang nan dahl akan me wiawihkihda kohl kak kareireila mouren emen. Irail mehn Saina en mahs akan me adaneki Taoists kin kamehlele me re kak wekidala mwekimwekid en paliwar ni ahr pahn doadoahngki soangen wiepen kan me duwehte doudouloale, mwomwen omw pahn esingek, oh soangen mwenge me ke pahn kang de sohte kang oh met kak kahreihong uhk en mour soutuk.
Mehn Spain me adaneki Juan Ponce de León kin ndandki ah kin raparapahki pihl me pahn kapwulopwulla aramas. Emen toahkte nan senturi 18 ntingihdi nan nah pwuhk me adaneki Hermippus Redivivus me meipwon pwulopwul kan en kohieng nan ehu kisin pere nan ahnsoun “spring” oh arail esingek en audaudda nan pwoatol kan oh aramas en doadoahngki pwehn kareireila arail mour. Mendahki met, sohte ehute wiepe pwukat kin pweida mwahu.
w15 4/15 32 par. 1-2
Tuhke Pwoat me Paldier, E Kak Pwurehng Wosada?
TUHKE olip [Olea europaea] me paliwere welikekseli oh kekeluwakala ele sohte pahn mwomwen kaselel ma e kapahrekiong tuhke sidar laud en Lepanon. Ahpw tuhke olip kan kin kak momour nan soangsoangen wasa kan. Ekei tuhke pwukat kin kak momour lel sounpar 1,000. Kalewen tuhke olip ehu me kohpeseng kin kak pein kamourih mendahki paliwereo ohla. Ma kalewe kan kin momourte, e pahn pwurehng wosada.
Semen keineko Sohp kin kamehlele me mehnda ma e mehla, e pahn pwurehng mourda. (Sop 14:13-15) E doadoahngki tuhke pwoat—ele tuhken olip pwoat—pwehn karasahda eh kin likih sapwellimen Koht kehl en kaiasada ih. Sohp koasoia: “Mie koapworopwor nin tuhke pwoat me paldier, e kak pwurehng mourda oh wosada.” Ni keteu eh mweredi pohn sahpw madekeng, tuken tuhkehn olip madekeng pwoat kak pwurehng mourda ni pons kan ar pahn wosada sang ni kalewe ko, oh wiahda rah kan “pwe en wiahla tuhke kapw pwoat.”—Sop 14:7-9.
“Komw Ahpw Pahn Kupwurperenkiniehda, Wiepen nin Limomwiet”
Kitail sukuhlki sang en Sohp koasoi kan duwen limpoak en Siohwa: E sapwellimanki limpoak tengeteng ong irail akan me duwehte Sohp, ni ar kin pwilkiniraildi nin lime, oh mweidohng ih en ketin wiahda irail ong soangen aramas me e kin ketin kesempwalki. (Aiseia 64:8) Siohwa kin ketin kesempwalki sapwellime tohnkaudok lelepek kan. E kin ketin “kasikasik” en pwurehng kilang me loalopwoat kan me melahr. Semen men kawehwehda lepin lokaiahn Ipru wet oh nda me, “e wia ehu lepin lokaia me uhdahn kehlail, me kin kasalehda pepehm en inengieng oh kasikasik laud.” Ei, Siohwa kin ketin tamatamante sapwellime tohnkaudok kan oh pil ketin kasikasik laud en pwurehng komourirailda.
Ire Kesempwal kan
it-1 191
Pehs
Pehs kin karasahiong mehkot me sohte nohn kesempwal de sohte katepe. Karasepe, mwohn silangin Siohwa, Eipraam pohnese me e “wia pwelpar oh pehs.” (Sen 18:27, NW; pil kilang Ais 44:20; Sop 30:19, NW.) Oh Sohp kapahrekiong en sounkamweit likamw ko arail koasoi kan, lepin padahk kan me “rasehng pehs.”—Sop 13:12.
NOVEMBER 13-19
SOAHNG KESEMPWAL KAN SANG MAHSEN EN KOHT | SOHP 15-17
“Dehr Alasang Elipas ni Omw Kihda Kamweit”
w05 9/15 26 par. 4-5
Pelianda Madamadau Sapwung!
Nan eh kapahrek siluh ko koaros, Elipas kasalehda madamadau me dahme Koht kin ketin kupwurki sang rehtail kin nohn daulihala, kahrehda sohte mehkot me sapwellime ladu kan pahn kak wiahda me pahn itarohng ih. Elipas ndahng Sohp: “Kilang! E sohte kin ketin likih sapwellime ladu kan, oh e kin ketin diarada sapwung rehn sapwellime tohnleng kan.” (Sohp 4:18, NW, nting tikitik kan me mi pah) Mwuhr, Elipas ndahki duwen Koht: “E sohte kin ketin likih sapwellime tohnleng kan, oh pil nanleng sohte kin mwakelekel mwohn silangi.” (Sohp 15:15, NW) Oh e idek: “Ia duwe, me Keieu Manamano ketin nsenohki omw kin wia aramas pwung?” (Sohp 22:3, NW) Pildad pwungki madamadau wet pwehki e nda: “Maram pil sohte kin marain mwohn silangi, de usu kan sohte mwakelekel.”—Sohp 25:5.
Kitail anahne kalekeikitailsang soangen madamadau wet. E kin kak kahrehda kitail en pehm me dahme Koht kin ketin kupwurki sang rehtail kin nohn daulihala. Soangen madamadau wet kin kauwe atail nanpwungmwahu rehn Siohwa. Patehng met, ma kitail kin dukula pahn soangen madamadau wet, ia pahn mwomwatail ni ahnsou me kitail pahn alehdi kaweid ehu me anahn? Ele kitail sohte pahn aktikitik ni emen pahn kopwung kitail de kitail pahn kakete “lingeringerda pahn Siohwa” nan atail mohngiong, oh kitail ele pahn kolokol atail lingeringer pah. (Lepin Padahk 19:3, NW) Ia uwen met eh pahn suwediong atail nanpwungmwahu rehn Siohwa!
Alasang Sapwellimen Sises Aktikitik oh Eh Kin Ketin Poakehla Aramas
16 Atail lokaia ni elen limpoak. Atail pepehm en poakehla aramas pahn kamwakid kitail en “kakehlaka irail kan me nan kapehd tikitik” sang ni mwomwen atail lokaiahiong irail. (1 Des. 5:14) Dahme kitail kak nda pwehn kangoange irail? Kitail kak ndaiong irail ia uwen atail nsenohkin irail. Kitail kak kapinga irail oh sewese irail en kilang arail irair kaselel oh koahiek kan. Kitail kak katamankihong irail me Siohwa me ketin sewese irail en diarada padahk mehlel, eri re uhdahn kesempwal mwohn silangih. (Sohn 6:44) Kitail kak kamehlelehiong irail me Siohwa uhdahn ketin nsenohki sapwellime ladu kan me “nan kapehd tikitiklahr” de “sohla ar koapworopwor.” (Mel. 34:18) Atail lokaia ni elen limpoak kak kansenamwahwihala irail kan me nsensuwed.—Lep. Pad. 16:24.
Ire Kesempwal kan
Ire Kesempwal akan Sang Nan Pwuhken Sohp
7:9, 10; 10:21; 16:22—Mahsen pwukat kin kasalehda me Sohp sohte kamehlele kaiasada? Mahsen pwukat kin koasoia duwen dahme pahn mwadangete wiawihiong Sohp ni ahnsou keren. Ia wehwehn ah lokaia? Ehu me e kak wehwehki me dene ma e pahn mehla, sohte nanpwungen aramas en nan ah ahnsou pahn kilang ih. Ohng irail, e sohte pahn pwurodohng ni imweo oh pil sohte me pahn tamanda duwen ih lao lel ahnsou me Koht pahn ketin koasoanehdi. Ahn Sohp lokaia kak pil wehwehki me sohte emen kak pein pwurodo sang Sheol. Ahn Sohp koapworopwor en iasada ni ahnsou kohkohdo kin sansal nan Sohp 14:13-15.
NOVEMBER 20-26
SOAHNG KESEMPWAL KAN SANG MAHSEN EN KOHT | SOHP 18-19
“Dehr Kesehla Iengomw Tohnkaudok kan”
Dahme Kitail Kak Sukuhlkihsang Sises Eh Tentenihr?
9 Ke kak sewese irail kan me pahtoula. Sises sohte ketin iangete Mery oh Marda tentenihr, ahpw e pil ketin karonge ira oh kansenamwahwihala. Kitail pil kak wia duwehte ong irail kan me pahtoula. Dan, elder men sang Australia, koasoia: “Mwurin ei pwoudo mehla, I kin anahne sawas. Tohtohn riei Kristian kan oh arail pwoud ko kin ahnsou koaros onopadahng en karonge ie. Irail kin mweidohng ie en kasalehda ei nsensuwed, oh sohte kin suwedkihda ei kin sengiseng. Irail pil kin sewesehkin ie soahng kei, duwehte kamwakele werei sidohsa, kohla netinet, oh kukihada mwenge ni ahnsou me I sohte kak wia soahng pwukat. Oh irail kin kalapw iang ie kapakap. Irail uhdahn kadehdehda me irail wia kompoakepahi oh riei Kristian mehlel kei me kin ‘sewese ie ni ahnsou apwal.’”—Lep. Pad. 17:17.
Ni Ahnsou me Emen me Kitail Poakohng Sohla Papah Siohwa
16 Pousehlahte utung tohnpeneinei kan me wie lelepek. Ahpw ni mehlel ahnsou wet irail anahne omw limpoak oh kangoang. (Ipru 10:24, 25) Ekei pak, tohnpeneinei kan me emen ar peneinei piskenla kin tehkada me ekei nan mwomwohdiso sohla kin koasoiong irail, mwomwen me re pil iang piskenla. Dehr mweidohng met en wiawi! Kitail anahne kangoange oh kapinga me pwulopwul kan me ar pahpa oh nohno kan sohla papah Siohwa. Maria, me eh pwoudo piskenla oh kohkohsang eh peneineio koasoia: “Ekei kompoakepahi kan kohdo ni imwato oh kukihada kanat mwenge oh sewesei kiht nan at onop en peneineio. Re iang pehm ei medek oh iang ie sengiseng. Irail kin utung ie ni ahnsou me aramas teikan kin koasoiahkin ie soahng kan me sohte mehlel. Re kangoange ie douluhl!”—Rom 12:13, 15.
w90 9/1 22 par. 20
Nantihong Ale Pwukoa kan?
20 Pwihn en elder kan anahne pohnese me ni ahnsou me sounapwalih men de sounsawas men pahn doudihsang eh pwukoa, met kak kapwunode ih, mehnda ma e pein pilada en doudihsang eh pwukoa. Ma brother menet sohte piskenla ahpw elder kin kilang me e kin pahtou, irail anahne kangoange ih ni limpoak. (1 Deselonika 5:14) Re anahne sewese ih en pohnese me e anahn nan mwomwohdiso. Mehnda ma kaweid anahne kohwong, ele sohte pahn werei mwohn ohl aktikitik oh kalahngan men pahn pwurehng ale pwukoa kan nan mwomwohdiso.
Ire Kesempwal kan
w94 10/1 32
Manaman en Lokaia Kadek
Ahpw ni ahnsou me Sohp anahne kangoang, Elipas oh ienge ko sohte ndahla lokaia kadek kan. Re nda me Sohp pein pwukoahki eh kahpwal kan, oh mwomwen nda me mie eh sapwung kan me e ekihla. (Sohp 4:8) Ehu kawehwehn Paipel (The Interpreter’s Bible) koasoia: “Dahme Sohp anahne iei aramas emen en poakehla ih sang nan eh mohngiong. Dahme e pwurupwurehng alehdi iei koasoi kan me mwomwen ‘mehlel’ oh lingan me pelien lamalam oh tiahk kin kalapw doadoahngki ahpw me aramas tohto pwangahkidahr rong.” Uwen Sohp eh nsensuwedla ni eh rong en Elipas oh ienge ko arail koasoi, kahrehda e ngihl laudida oh nda: “Dahme kumwail kapwukapwunodehkin ie mahsen pwukan?”—Sohp 19:2.
Uhdahn kitail sohte men kahrehiong iengatail tohnkaudok en Koht men en ngihl laudkihda arail nsensuwed pwehki atail lokaia kin salamalam oh sohte kadek. (Pil kilang Deuderonomi 24:15.) Lepin padahk en Paipel ehu kaweidki: “Dahme ke koasoia kak kolokol de kauwehla mour, eri, ke uhdahn pahn dolung wahn omw koasoi kan.”—Lepin Padahk 18:21.
NOVEMBER 27–DECEMBER 3
SOAHNG KESEMPWAL KAN SANG MAHSEN EN KOHT | SOHP 20-21
“Kepwehpwe Sohte Kin Wiahiong Emen en Wia Aramas Pwung”
Ke Kin Kepwehpwe “Mwohn Silangin Koht”?
12 Nan sapwellimen Sises mahsen, e ketin kapahrekiong ahn emen eh kepwehpwehla mwohn silangin Koht ong en koasoakepene ong pein ih, de kepwehpwehla ong pein ih. Kahrehda Sises kin ketin kasalehda me kitail en dehr keieu nsenohki en koasoakepene kepwe kan nan atail mour de pereperenki dahme kitail ahneki. Ni pali teio, kitail anahne doadoahngki dahme kitail ahneki ni ahl me kak kamwahwihala de kakehle atail nanpwungmwahu rehn Siohwa. Atail kin wia met pahn sewese kitail en kepwehpwehla mwohn silangin Koht. Pwekida? Pwehki e pahn ritingada wenihmw ong kapai tohto sang reh. Paipel mahsanih: “Kupwuramwahu en KAUN-O me kahrehda omw kepwehpwe.”—Lepin Padahk 10:22.
Ire Kesempwal kan
w95 1/1 9 par. 19
Kalowehdi Sehdan oh Eh Doadoahk kan
19 Sapwellimen Koht laduwo Sohp kin apwalkihda ‘madamadau kapwunod kan’ me Sehdan kahrehiong Elipas oh Sopahr en nda. (Sohp 4:13-18; 20:2, 3, NW) Met kahrehda Sohp en ahneki “apwal oh pahtou” me kahrehiong eh kin wia “pato mwahl akan” me pid eh “masepwehk” me kin kapwunode eh madamadau. (Sohp 6:2-4; 30:15, 16) Elihu kin nennenlahte rongorong Sohp oh uhdahn sewese ih en kilang sapwellimen Siohwa madamadau erpit ong soahng kan. Pil duwehte rahnpwukat, elder kan kin kasalehda me re wehwehki oh nsenohki ahn meteikan arail kahpwal kan ni arail sohte kin “katoutouwih” irail. Ahpw duwehte Elihu, irail kin rongorong irail ni kanengamah pwe ren kansenamwahwihkin irail Mahsen en Koht me rasehng leh kansenamwahu. (Sohp 33:1-3, 7, NW; Seims 5:13-15) Eri irail kan me arail pepehm kin ohkihla kahpwal kan me uhdahn wiawi de me re pein medewehda, de me kin ‘masak . . . ouraman kan oh . . . kaudiahl kan’ duwehte Sohp, ele pahn diarada nsenamwahu me poahsoankihda Paipel nan mwomwohdiso.—Sohp 7:14, NW; Seims 4:7.
DECEMBER 4-10
SOAHNG KESEMPWAL KAN SANG MAHSEN EN KOHT | SOHP 22-24
“Aramas ‘Mie Katepe ong Koht?’”
w05 9/15 27 par. 1-3
Pelianda Madamadau Sapwung!
Me pil kereniong duwehte madamadau me dahme Koht kin ketin kupwurki sang rehtail kin nohn daulihala iei madamadau me e kin ketin wiahki aramas sohte mehkot. En Elipas kesiluhwen koasoio kasalehda peidek wet: “Mie aramas emen, me pil keieu loalokong, me pahn mie katepe ong Koht?” (Sohp 22:2) Elipas kin mwomwen koasoia me aramas sohte katepe ong Koht. Me pil duwehte madamadau wet, Pildad akupwungki: “Eri ia duwen aramas eh kak pwung mwohn silangin Koht, de ia duwen emen me ipwidihsang lih emen eh kak sohte dipe?” (Sohp 25:4, NW) Nin duwen madamadau wet, ia duwen Sohp me wiahte aramas emen eh kak medewehda me e wia aramas pwung mwohn silangin Koht?
Ekei aramas rahnpwukat kin lokolongki madamadau sapwung kan duwen pein irail. Dahme pil kin kahrehda soangen madamadau sapwung pwukat iei mwomwen ar tikida, lelohng kapwunod laud kan nan ar mour, de wia soangen aramas akan me meteikan kin lipilipilki pwehki ar wehi de keinek. Ahpw Sehdan oh nah ngehn suwed akan pil kin perenki kauwehla aramas. Ma irail kak kahrehiong emen en pehm me sohte mehkot ehu e wia kak itarohng Koht me Keieu Manaman, eri e pahn kin mwadang mworusala. Kedekedeo, soangen aramas menet pahn peila de pil kadohwanewei ih sang rehn Koht ieias.—Ipru 2:1; 3:12.
Mahla oh soumwahu kin katikala dahme kitail kak wia. Atail kin iang doadoahk en Wehio ele mwomwen tikitik sang dahme kitail kin wia ni atail pwulopwul, roson oh kehlail. Eri ia uwen eh kesempwal en ese me Sehdan oh nah ngehn suwed akan men kitail en pehm me dahme kitail kin wia sohte itarohng Koht! Kitail anahne pelianda soangen madamadau wet.
w95 2/15 27 par. 6
Mehn Kasukuhl Duwen Apwalihala Kahpwal kan
Kompoakepahn Sohp silimeno pil doulahte kansensuwedih Sohp sang ni arail koasoia pein arail madamadau a kaidehn sapwellimen Koht erpit. Elipas pil koasoia soahng suwed me ‘Koht sohte kin ketin likih sapwellime ladu kan’ oh me Siohwa sohte ketin nsenohki ma Sohp wia aramas pwung de soh. (Sohp 4:18; 22:2, 3) E apwal en medewehda koasoi me pahn kamworus de likamw sang koasoi wet! E sohte kapwuriamwei me mwuhr Siohwa ketin panawih Elipas oh ienge ko pwehki arail wia soangen lahlahwe wet. E ketin mahsanih: ‘Kumwail sohte koasoiahda me mehlel duwen ngehi.’ (Sohp 42:7) Ahpw irail pil pahn pwurehng kasalehda pein arail madamadau me suwedsang met.
Pwulopwul Kan Me Kin Kaperenda Mohngiong En Siohwa
10 Nin duwen me Paipel kin kasalehda, Sehdan kin kalikamwe kaidehn ahn Sohp lelepek kelepw ahpw pil ahn aramas koaros me kin papah Koht arail lelepek—pil iangahki kowe. Ni mehlel, Sehdan mahsanihong Siohwa duwen aramas koaros: “Aramas [kaidehn Sohp kelepw, ahpw aramas koaros] kin mweidala mehkoaros me e ahneki pwe en doarehla pein eh mour.” (Sohp 2:4) Ke kin kak kilang omw pwais me kin pid peidek kesempwal wet? Nin duwen me Lepin Padahk 27:11 mahsanih, Siohwa mahsanih me mie mehkot me ke kak kihong Ih—ahmw wiewia mwahu oh lelepek kan me pahn kak mweidong Siohwa Koht en sapeng Sehdan me kin kauwe Siohwa. Medemedewe duwen met—Kaunepen Lahng oh Sampah kin likwerihong uhk en utungada peidek me keieu kesempwal me mihmi sangete mahs leledo ahnsouwet. Ia uwen laud omw pwukoa oh pwais! Ke kak kapwaiada dahme Siohwa kin peki ken wia? Sohp kin kapwaiada. (Sohp 2:9, 10) Ni erein poadoapoad en aramas, Sises oh pil aramas tohto, iangahki me pwulopwul tohto kin kapwaiada dahme Siohwa kin peki irail en wia. (Pilipai 2:8; Kaudiahl 6:9) Ke pil kak wia met. Ahpw, ke dehr pa sapwungala pwe ke sohte kak sohte uhki apali nan irair wet. Sang ni omw wiewia, ke pahn kasalehda ma ke kin utungada Sehdan de Siohwa. Mehnia ke pahn pilada ken utungada?
Siohwa kin Ketin Apwalih Iuk
11 Siohwa kin nsenohki mehnia pilipil ke pahn wiahda? E saikinte itar uwen aramas pwoson akan me kin utungada Siohwa, pwe Siohwa en sapeng ong ahn Sehdan karaun likamwe Ih? Ni mehlel, Tepil kose me aramas akan sohte kin papah Siohwa pwehki limpoak, ahpw e sansal me koasoia wet me likamw. Ahpw, Siohwa kin kupwurki ken utungada sapwellime kaunda pwehki E kin ketin apwalih iuk. Sises mahsanih: “Ih pil duwen Samamwail me ketiket nanleng, e sohte kin ketin kupwurki emen me tikitik pwukat en kin salongala.”—Madiu 18:14.
12 E sansal me Siohwa kin ketin kupwurki en mwahngih mehnia ahl me ke pilada. Ahpw me keieu kesempwal, ahmw pilipil kin kak kaperenda de katoutouwihala kupwuren Koht. Paipel kadehdehda mwahu me Siohwa sapwellimaniki pepehm loal akan me wiewia mwahu de suwed kin kak kamwekidada. Karasepe ieu, ni ahnsou me mehn Israel akan kin pwurpwurehng uhwong Siohwa, met kin “katoutouwihala” nan kupwuren Siohwa. (Melkahka 78:40, 41) Mwohn Nohliko wiawi ni mwehin Noha, ni ahnsou me “aramas akan ar suwedlahr nin sampah,” Siohwa “eri toutoukihla.” (Senesis 6:5, 6) Medemedewe ia wehwehn met. Ma ke pahn wia ehu pilipil sapwung, ke pahn katoutouwihala Sounwiepomw. Met sohte kin wehwehki me Koht luwet. Ahpw, met kin kasalehiong uhk me E kin ketin apwalih oh poakpoake iuk. Ahpw, ma ke pahn wia mehkot me pwung, met pahn kaperenda Siohwa. E kin kupwurperen kaidehnte pwehki ah miehr sapwellime pasapeng me E kak ketikihong Sehdan, ahpw pwehki ah pahn pil wiahla sounkatingpomw. (Ipru 11:6) Ke kin ahneki Sahm limpoak men, iei Siohwa Koht!
Ire Kesempwal kan
w04 7/15 21-22
Doadoahngki Mehn Akadei kan Pwehn Kalinganahla Sounkapikpomw
Medewehla ia duwen Siohwa eh ketin kapwaiada kepikipikdahn nanleng oh sampah. Ni Siohwa eh ketin mahsanih, “miehla nin soutik oh miehla nimenseng,” e ketin kilelehdi irekidien ahnsoun kepikipik kan. (Senesis 1:5, 8, 13, 19, 23, 31, NW) Ni tepin ehuehu ahnsoun kepikipik kan, e ketin mwahngiher dahme e pahn ketin kapwaiada rahno. Oh Koht ketin kapwaiada dahme e ketin kupwurki kapikada. (Kaudiahl 4:11) Semen keineko Sohp koasoia: “Ni [Siohwa] eh kin ketin kupwurki wia mehkot, e kin ketin kapwaiada.” (Sohp 23:13, NW) Siohwa uhdahn ketin kupwurperenkihda eh mahsanihada “mehkoaros me e ketin wiahda,” oh ketin mahsanih “inenen mwahu”!—Senesis 1:31, NW.
Pwe atail mehn akadei kan en kak pweida, kitail anahne inengieng laud en men kapwaiada. Dahme pahn sewese kitail en kakairada soangen ineng laud wet? Pil ni ahnsou me sampah sohte mwomwe oh tehn, Siohwa kak ketin mwahngih me e kak wiahla mehkot kaselel nan wehwe me pahn wadohng ih lingan oh wahu. Pil duwehte, atail ineng en kapwaiada dahme kitail koasoanehdi en wia kak laudla ni atail medemedewe kamwahu kan me kohsang atail lel mehn akadeio. Ihme wiawihong Tony, me sounpar 19. E sohte kin manokehla dahme e medewehki tepin eh mwemweitla ni ohpis en Sounkadehdehn Siohwa kan me mi Palikapi en Iurop. Sang ahnsowo kohla, peidek me Tony kin kalapw medewe iei, ‘Ia pahn mwomwen ma I pahn kousoan de papah nan soangen wasao?’ Tony sohte kin uhdi medemedewe duwen met oh e pousehlahte nantihong lel eh mehn akadeio. Ia uwen eh perenda sounpar kei mwuri ni ahnsou me nah doaropwehn iang doadoahk ni ohpis en Sounkadehdehn Siohwa kan eh pweida!
DECEMBER 11-17
SOAHNG KESEMPWAL KAN SANG MAHSEN EN KOHT | SOHP 25-27
“Sohte Anahne Unsek Pwehn Loalopwoat”
it-1 1210 par. 4
Loalopwoat
Sohp. Sohp kin momour sang ahnsou me Sosep mehla lel ni mwehin Moseso, oh Paipel kin kawehwehda ih nin duwen ohl “pwung oh loalopwoat [Ni lokaiahn Ipru, tam] men; e kin lemmwiki Koht oh soikala dahme suwed.” (Sop 1:1, NW; kilang JOB.) En aramas loalopwoat eh wia kisehn ireo me pwarada nanpwungen Siohwa Koht oh Sehdan kin sansalda ni Siohwa eh ketin kalelapak rehn eh Imwintihtio duwen Sohp ni ahnsou me Sehdan pwarala mwohn pokon en tohnleng kan nan mwoalen kopwung en nanleng. Sehdan karaunehki en Sohp eh kin kaudokiong Koht, me dene e kin papah kaidehn pwehki e poadidiong Koht, ahpw pwehki e kin raparapahki pein kamwahupe. Ih eri peidengki ma Sohp kin loalopwoat ong Koht. Mendahki e mweimweiong en kihsang en Sohp kepwe kan koaros pil iangahki nah seri ko, Sehdan sohte pweida ni eh song en kauwehla en Sohp loalopwoat. (Sop 1:6–2:3) Ih eri koasoia me dene Sohp kin roporop ni eh men luhssang eh kepwe kan oh nah seri kan pwehn ihte doarehla pein eh mour. (Sop 2:4, 5) Pil mwurin Sohp eh alehdi soumwahu kamedek ehu me kauwehla kili, oh kin rongorong koasoi kamworus kan sang rehn pein eh pwoud, iangahki koasoi kamedek kan sang rehn irail kan me mwomwehda wia kompoakepah ahpw kin koasoia sapwellimen Koht koasoandi kan oh kupwure kan ni ahl sapwung (Sop 2:6-13; 22:1, 5-11), Sohp sohte kahmahmkihla me ih aramas loalopwoat men. E nda: “I pahn keptakaila koasoakoasoia ei mwakelekel lao lel rahn en ei mehla. I sohte pahn tokedihsang ei repenpwungki ei pwung; pwe kadeikpen loalei me mwakelekel.” (Sop 27:5, 6) Eh kolokolete eh loalopwoat kasalehda me sapwellimen Koht Imwintihtio sounlikamw men.
Kolokolete Omw Lelepek!
3 Ia duwen sapwellimen Koht ladu kan ar kin kasalehda lelepek? Sang arail poakohng Siohwa ni mohngiong unsek, oh met kin imwikihla arail kin ahnsou koaros kaperenda ih. Tehk ia duwen lepin lokaiao “lelepek” eh kin kadoadoahk nan ekei wasa nan Paipel. Ehu wehwehn lepin lokaia wet nan Paipel iei unsek, mwakelekel de sohte samin kis, de sohte ohla. Karasepe, mehn Israel kan kin meirongkihong Siohwa mahn kan, oh Kosonnedo nda me mahn kan en sohte samin kis rehrail. (Lip. 22:21, 22) Sohte mweimwei sapwellimen Koht aramas akan en meirongki mahn emen me nehtuk, sohte apali salenge, de apali mese; oh re sohte kak meirongki mahn emen me soumwahu. E kesempwal ong Siohwa me mahno pahn unsek, mwakelekel de sohte ohla. (Mal. 1:6-9) Kitail kak wehwehki dahme kahrehda Siohwa ketin nsenohki duwen unsek de sohte ohla. Ni atail kin pwainda mehkot, mehnda ma wahn tuhke, pwuhk, de dipwisoun doadoahk ehu, kitail sohte men ale ehu me mie pwoar laud de ekei wasa sohte mie ni dipwisowo. Kitail mwahuki ehu me unsek, mwakelekel de sohte ohla. Siohwa pil ketin sapwellimanki madamadauohte ong atail limpoakohng ih oh atail loalopwoat. Atail lelepek anahne unsek, mwakelekel de sohte ohla.
4 Ia duwe, kitail pahn medewe me kitail anahne unsek pwe kitail en kak lelepek? Ele kitail kin medewe me kitail kin wiahda sapwung tohto. Tehk kahrepe riau dahme kahrehda kitail en dehr medewe me kitail anahne unsek pwehn lelepek. Keieu, Siohwa sohte kin ketin medemedewehte atail sapwung. E ketin mahsanihong kitail: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Mel. 130:3) E ketin mwahngih me kitail sohte unsek, wia aramas dipan ekei, oh e kin ketin mahkohng kitail ni kadek. (Mel. 86:5) Keriau, Siohwa ketin mwahngih atail soh itar kan, oh e sohte ketin kasik laudsang dahme kitail kak wia. (Wadek Melkahka 103:12-14.) Eri ni ahl dah me kitail kak unsek, mwakelekel de sohte ohla mwohn silangi?
5 Ong sapwellimen Siohwa ladu kan, limpoak me kin kamwakid irail en kin lelepek. Atail limpoak ong Koht oh poadidiong atail loalopwoat ong ih nin duwen Samatailo nanleng, anahne unsek, mwakelekel de sohte ohla. Ma atail limpoak kin pousehlahte wiawi ni ahl wet pil ni atail kin lelohng kasongosong, eri kitail kin lelepek. (1 Kron. 28:9; Mad. 22:37) Pil pwurehng medewehla Sounkadehde silimeno me kitail koasoiapene mwoweo. Dahme kahrehda irail wia soahng kan me irail wia? Ia duwe, serepeino sohte perenki soahng kaperen kan ni eh wasahn sukuhlo, de mwahnakapwo men sarohdi ni ihmw me e kolahng kalohk ong, de ohlo men luhssang eh doadoahko? Uhdahn soh. Weksang met, irail ese me Siohwa sapwellimanki koasoandi pwung kan, oh irail kin medemedewehte en kaperenda Samarailo nanleng. Pwehki irail poakohng ih, irail kin ahnsou koaros medewe mahs ih mwohn arail wiahda pilipil ehu. Ni ahl wet, irail kasalehda me irail kin lelepek.
Ire Kesempwal kan
Soandi Mwahu nin Duwen me Pahrekiong Sapwellimen Koht Pwuhko
3 Ni atail kilang soahng kan me Siohwa ketin kapikada, e sansal me ih Koht men me kin ketin soandi mwahu. E ketin “kapikekihda sampah sapwellime kupwurokong; sapwellime erpit me e ketin koasoanehkihdiong pahnlahng nan dewe.” (Lep. Pad. 3:19) Mie soahng tohto me kitail sehse duwen soahng kan me Siohwa ketin kapikada. Ni mehlel, dahme kitail ese wia “ihte ngilen mwenginingin me kitail rongehr.” (Sohp 26:14) Ahpw sang soahng keite me kitail ese, e sansal me lahng oh sampah uhdahn kin soandi mwahu. (Mel. 8:3, 4) Usu rar rar kei kin mwekimwekid kohwei nan wehwe ni soandi mwahu. Oh medewehla duwen planet kan ar kin pidakih ketipino. Koasoandi kapwuriamwei wet kak wiawi ihte pwehki Siohwa ketin koasoanehdi mwomwen arail kin mwekimwekid. Ni atail kin medewehla duwen eh ketin doadoahngki sapwellime erpit en wiahda nanleng oh sampah, kitail kin men kapinga, kaudokiong, oh loalopwoatohng ih.—Mel. 136:1, 5-9.
DECEMBER 18-24
SOAHNG KESEMPWAL KAN SANG MAHSEN EN KOHT | SOHP 28-29
“Ke Wia Soangen Aramas me Duwehte Sohp?”
Kasalehda Limpoak-Kadek ong Irail akan me Anahne Sawas
19 Poadoapoad en Paipel kan me kitail ahpwtehn koasoia kin kasansalehda me kitail kak kasalehda limpoak-kadek ong irail akan me sohte kak pein kaitarala arail anahn akan. Eipraam anahne sawas sang rehn Petuel, ma kadaudok en Eipraam pahn pweida. Seikop anahne sawas sang rehn Sosep ma paliware pahn kak wisiklahng Kenan. Pwen mie kadaudoke, Naomi anahne sawas sang rehn Rud. Eipraam, Seikop, de Naomi sohte kak pein kaitarala anahn pwukat, irail koaros anahne sawas sang meteikan. Duwehte rahnwet, kitail anahne kasalehda limpoak-kadek ong aramas akan me anahne sawas. (Lepin Padahk 19:17) Kitail anahne alasang Sohp, me kin nsenohki “me semwehmwe kan me kin peki sawas, oh me sepwoupwou kan oh mehmen me sohte sawasparail” oh irail akan “me mihla nan apwal mwuledek.” Sohp pil kin ‘kaperenda mohngiong en liohdi kan’ oh ‘wia mesen maskun kan, oh nehn me nehtuk kan.’—Sohp 29:12-15
it-1 655 par. 10
Likou
Pil mie lokaiahn karasaras tohto teikan me kin koasoia duwen likou. Duwehte uniform de soangen likou ehu me kin kasalehda duwen pwihn me ke kin iang de mwekid me ke utung, Paipel pil doadoahngki karasaras en likou pwehn kasalehda ia mwomwen aramas emen sang ni dahme e pilada oh eh wiewia kan me utung eh pilipilo, duwehte nan sapwellimen Sises karasaras duwen kapwat en kapwopwoud. (Md 22:11, 12; kilang HEADDRESS; SANDAL.) Nan Kaudiahl 16:14, 15, Kaun Sises Krais kin katamanda keperpen en luwetala nan pwoson oh kapwuhrasang atail mour nin duwen sounkadehde lelepek men en Koht mehlelo. Met pahn kahrehiong kitail nan kahpwal laud ni “Rahn Lapalap en Koht, Wasa Lapalahpie.”
Dahme Eden Emen Kin Kasalehda?
Ni ahnsou me kitail ipwidi, kitail sohte kak pilada pein adatail. Ahpw kitail kelehpw me kak koasoanehdi soangen aramas dah kitail pahn wiahla. (Lepin Padahk 20:11) Kitail kak pein idek rehtail: ‘Ma Sises oh wahnpoaron kan kak pilohng edei, soangen ahd dah me re pahn kihong ie? Soangen ahd dah me pahn konehng pwehn kawehwehda soangen irair dah me I kin keieu kasalehda de soangen aramas dah men ngehi?’
Kitail anahne medemedewe mwahu peidek wet. Dahme kahrehda? Nanmwarki Solomon me loalokong ntingihdi: “Pilada adamwahu a kaidehn kepwe tohto.” (Lepin Padahk 22:1, NW) Ma kitail ahneki adamwahu nan wasa me kitail kin kousoan ie, kitail pahn wia aramas katapan kei nan atail wasahn kousoan. Ahpw kesempwalsang met, ma kitail wiahda adamwahu rehn Koht, kitail pahn alehdi kapai poatopoat ehu. Ia duwen? Koht ketin inoukihda me e pahn ketin ntingihedi eden irail me kin lemmwiki Ih nan sapwellime “pwuhk en kataman,” oh e pahn ketikihong irail koapworopwor en mour soutuk.—Malakai 3:16, NW; Kaudiahl 3:5; 20:12-15.
Ire Kesempwal kan
g00 7/8 11 par. 3
Sirei Kin Mwahu ong Uhk!
Sirei kin wia kamwahu ong uhk? Ke tamanda ahnsou me mie me sirei ong uhk oh kahrehda ken nsenamwahula? De ni sohte me sirei, ah met kahrehda ken salohda de ke pehm me sohte me perenkin uhk? Ei, sirei kin wia kamwahu. E kin wia kamwahu ong me sireio oh pil me kilang sireio. Sohp nan Paipel ndahki eh imwintihti ko: “Ni ei kin sirei ong irail, re sohte kak kamehlele, pwehki re sohte kasik; Marain en meseiet kin kakehlairailda.” (Sohp 29:24, NW) “Marain” en mesen Sohp kin kasalehda eh peren.
DECEMBER 25-31
SOAHNG KESEMPWAL KAN SANG MAHSEN EN KOHT | SOHP 30-31
“Ia Duwen Sohp Eh Kolokolete Eh Mwakelekel”
Mesomwen en Sohpeisang Mehkan me Sohte Katepe!
8 Mehkan me aramas kin kilang oh ahnehda oh dipen ineng en uduk pil kak kasonge Kristian mehlel kan. Kahrehda, Mahsen en Koht kin kangoange kitail en kaiahne pein kitail ong dahme kitail kilang oh inengieng. (1 Kor. 9:25, 27; wadek 1 Sohn 2:15-17.) Ohl pwungo Sohp kin wehwehki me kilang oh ineng kin uhdahn dokpene. E koasoia: “I wiadahr inou lapalap ehu: I en dehr kin kangkakil serepein men ni ineng suwed.” (Sohp 31:1) Sohp sohte men doahke lih men ni ahl suwed oh e pil sohte men mweidohng eh madamadau en ahneki madamadau suwed. Sises ketin kasalehda kesempwalpen kihsang madamadau suwed ni eh mahsanih: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde.”—Mad. 5:28.
Medewehla ‘Dahme Pahn Wiawi’
Mwohn omw pahn kahkolong nan soangen ahl wet, pein idek rehmw, ‘Ia wasa ahl wet pahn kahluwaielahng ie?’ Omw pahn uhdihte oh medewe dahme kakete wiawi ele pahn seweseiuk en soikala ahl akan me pahn kak imwikihla kahpwal laud kan. Irail kan me pilada en keid nan soangen ahl wet kin lelohng imwila suwed duwehte AIDS oh soumwahu suwed teikan (STD), liseianda, kauwehla liseian, ohlahn nanpwungmwahu, oh ohlahn kadeikpen loalarail. Wahnpoaron Pohl kasalehda ni sansal dahme pahn wiawihong irail kan me kin wia tiahk samin. Re “sohte pahn iang sohsohki Wehin Koht.”—1 Korint 6:9, 10.
Me Pwulopwul kan, Weweidki Mahsen en Koht
15 Iahd me ke medewe omw loalopwoat ong Koht pahn kin keieu lelohng kasongosong, ni omw mi rehn meteikan de ni omw kin kelehpwla? Eri ni omw kin mi wasahn sukuhl de doadoahk, ke kin kalaudehla omw kin mwasamwasahn dahme kakete kauwehla omw nanpwungmwahu rehn Koht. Ahpw ni ahnsou me ke kin kelehpw oh komkommoal oh sohte mwasamwasahn iei ahnsou me e keieu mengei ken lohdiong kasongosong en kauwehla omw tiahk mwahu.
16 Dahme kahrehda ke anahne men peikiong Siohwa mendahte ma ke kin kelehpwla? Tamataman met: Ke kak kansensuwedihada de kaperenda Siohwa. (Sen. 6:5, 6; Lep. Pad. 27:11) Omw wiewia kan kin kamwakid kupwuren Siohwa pwehki ‘eh kin ketin apwahpwalih uhk.’ (1 Pit. 5:7) E kupwurki ken rong ih pwe ke en paiekihda. (Ais. 48:17, 18) Ni ahnsou me ekei sapwellimen Siohwa ladu kan nan Israel pohnsehsehla sapwellime kaweid, re kansensuwedihala ih. (Mel. 78:40, 41) Ahpw Siohwa kin kupwurki mehlel soukohp Daniel pwehki emen tohnleng nda: “Daniel, Koht ketin poakohng uhk.” (Dan. 10:11) Dahme kahrehda? Daniel kin loalopwoat ong Koht kaidehn ahnsou kante me e mi nan pokon ahpw pil ahnsou kan me e kin kelehpwla.—Wadek Daniel 6:10.
Ire Kesempwal kan
w05 11/15 11 par. 3
Koahiek en Rongorong ni Limpoak
Iengen Sohp ko kin rong eh koasoi kan me e kin wia lella pak eisek. Ahpw Sohp koasoia: “Ia duwe, sohte me pahn rong dahme I ndindaht?” (Sohp 31:35) Dahme kahrehda? Pwehki arail rong ih sohte kahrehiong ih en nsenamwahula. Re sohte nsenohki Sohp de pil men wehwehki eh pepehm kan. Uhdahn re sohte kin rongorong oh poakehla ih. Ahpw wahnpoaron Piter kaweidki: “Kumwail koaros en ahneki madamadau teieu, iang iangamwail kan nan arail lokolok, ahneki limpoak en pirien, poakeirailla oh kin aktikitik.” (1 Piter 3:8) Ia duwen atail kak kasalehda me kitail poakehla meteikan? Ehu ahl iei sang ni atail kasalehda me kitail kin nsenohki pepehm en meteikan oh song en wehwehki irail. Atail kin wia soangen koasoi me duwehte “soahng en uhdahn kansensuwed” de “uhdahn sapwung dahme re medewe” iei ehu ahl en kasalehda me kitail nsenohki irail. Pil ehu ahl iei en nda dahme re kin koasoia ni pein omw lokaia pwehn kasalehda me ke wehwehki dahme re ndinda. Atail rongorong ni limpoak kin wehwehki me kitail kin tehk kanahieng kaidehn ihte arail lokaia kan, ahpw pil arail pepehm me re kin ekisekis kasalehda.