Iren Sawas kan ong Doaropwehn Kasukuhl ong Mihting en Mour oh Kalohk
© 2023 Watch Tower Bible and Tract Society of Pennsylvania
MARCH 4-10
SOAHNG KESEMPWAL KAN SANG MAHSEN EN KOHT | MELKAHKA 16-17
“Siohwa, Utupen Soahng Mwahu Koaros me I Ahneki”
Me Pwulopwul kan, Kumwail Kak Ahneki Mour Nsenamwahu
WIAHDA KOMPOAKEPAH MEHLEL KAN
11 Wadek Melkahka 16:3. Depit ese rapahkihda kompoakepah mwahu kan. E pilada kompoakepah kan me kin poakohng Siohwa, oh met kihong ih “peren laud.” E kawehwehda kompoakepah kan nin duwen ‘me sarawi kei’ pwehki re kin song en idawehn sapwellimen Siohwa koasoandi ong tiahk mwakelekel kan. Pil emen sounmelkahka ahneki soangen pepehmohte duwen en pilada kompoakepah kan oh ntingihedi: “I kin kompoakepahnki irail koaros me kin papah komwi, irail koaros me kin peikiong sapwellimomwi kosonned kan.” (Mel. 119:63) Nin duwen me kitail koasoiapenehr nan iren onop en mwoweo, ke pil kak diarada kompoakepah mwahu tohto nanpwungen irail kan me kin poakohng oh peikiong Siohwa. Oh kompoakepahmw kan sohte anahne uweiuk.
w14 2/15 29 par. 4
“Udiahl Sapwellimen Siohwa Lingan”
Depit patohwan: “Siohwa me ei pwais, ei sohso, oh ei tungoal kep. Komw kin ketin sinsile ei sohso. Wasa kansenamwahu kan sosohngdier ong ie.” (Me 16:5, 6, NW) Depit kin kalahnganki eh “pwais,” me iei, en ahneki nanpwungmwahu rehn Siohwa oh ahneki pwais kaselel en papah ih. Eri, duwehte Depit, ele kitail kin lokolongki kahpwal akan, ahpw kitail kin ahneki kapai tohto kan sang rehn Koht. Eri kitail en pousehlahte perenkihda kaudok mehlel oh ahnsou koaros kin ‘udiahl [sapwellimen Siohwa] tehnpas ni kalahngan.’
Mwohneki Siohwa Ahnsou Koaros
2 Kitail koaros kak ale mehn kasukuhl sang wiewiahn aramas akan me pwarada nan Paipel—Eipraam, Sara, Moses, Rud, Depit, Ester, wahnpoaron Pohl, oh meteikan. Ahpw koasoiepen irail aramas akan me sohte nohn lapalap de ndand pil kak wia kamwahupatail. En doudouloale mahsen kan en Paipel kak sewesei kitail en mwekid pahrekiong dahme Sounmelkahkao mahsanih: “I kin aririh KAUN-O ahnsou koaros; e kin ketiket limwahi, oh sohte mehkot kak kauweiehla.” (Mel. 16:8) Ia wehwehn mahsen pwukat?
3 Sounpei men kin doadoahngki peh palimaun pwehn koleki nah kedlahs, oh sohte mehkot kin pere peh palimaun pwe nah mehn sansaro kin mih ni palimeing. Ahpw e kin ale perepe sang rehn ienge sounpei me kin kesihnen ni palimauni. Ma kitail kin tamataman Siohwa oh kapwaiada kupwure, e pahn ketin perei kitail. Kahrehda kitail pahn tehkpene iaduwen atail kin doudouloale mahsen kan en Paipel kin kak kakehlaka atail pwoson pwe kitail en kak ‘aririh Siohwa ahnsou koaros.’
Ire Kesempwal kan
it-2 714
Toantoalennanmas
Ni ahnsou me lepin lokaiahn Ipruo ʼi·shohnʹ (Deu 32:10; Lep 7:2), kin iang lepin lokaiao ʽaʹyin (pwoaren mas), e kin wehwehki “ohl tikitik nan pwoaren mas”; e duwehte lepin lokaiao, bath (serepein) me kadoadoahk nan Koulen Kedepwidepw 2:18, me wehwehki “serepein en pwoaren mas,” oh lepin lokaia pwukat kin dokedoke toantoalennanmas. Lepin lokaia pwukat ar kin pwon kadoadoahk pwehn kasalehda wehwe sansal nan Melkahka 17:8 (ʼi·shohnʹ bath-ʽaʹyin), kin kawehwehdiong, “ohl tikitik, serepein en pwoaren mas” (“toantoalennanmas nan kutohr en mas,” NW). E sansal me met dokedoke kisin sansal en aramas men me kak sansalda nan pwoaren mesen emen tohrohr me kilikilangiho.
Pwoaren mesen aramas kin uhdahn mwuterek oh kehmedek; kahrehda aramas emen kin mwadang kehn ni pitenwel kis de pwelpar kis kohlong nanpwungen kilin pwoaren meseo oh kutohr en nan meseo. Kilin kutohr en nan mas (cornea) me kin kidimala toantoalennanmas kin anahne kanai oh epwel mwahu, pwehki ma mehkot de soumwahu ehu kin kauwehla wasaht, met kin imwikihla ediedlahn mesen aramas de maskun. Ni sansal oh keneinei, Paipel kin doadoahngki lepin lokaia pwukat “pwoaren mesomwen” ni eh kin mahsanih duwen mehkot me anahne silasil ni keneinei. Ih pil duwen me anahne wiawihong Kosonned en Koht. (Lep 7:2, NW) Deuderonomi 32:10 (NW) mahsanih duwen Koht eh ketin apwahpwalih Israel duwehte pahpa men oh mahsanih me E kin ketin sinsile wehio “duwehte eh kin ketin sinsile sapwellime limarepeileng.” Depit kapakapki me Koht pahn ketin sinsile oh apwalih ih duwehte ‘sapwellime limarepeileng.’ (Me 17:8) E mwahuki Siohwa en ketin sewese ih ni karuwaru ni ahnsou me eh imwintihti ko pahn peiong. (Pil kilang Sek 2:8, NW; wasa me lokaiahn Ipruo ba·vathʹ ʽaʹyin, “kutohr en mas,” kadoadoahk ie.)—Menlau kilang EYE.
MARCH 11-17
SOAHNG KESEMPWAL KAN SANG MAHSEN EN KOHT | MELKAHKA 18
‘Siohwa me . . . Kin Ketin Doareiehla’
w09 5/1 14 par. 4-5
Peren en Siohwa Iei Kakehlpat
4 Paipel pil kin karasahiong Siohwa soahng kan me sohte kin mwekid. E kin kawehwehda Siohwa nin duwen “Paip en Israel,” “paipalap” ehu, oh “wasahn ruk kehlail.” (2 Samuel 23:3, NW; Melkahka 18:2 NW; Deuderonomi 32:4) Ia duwen mepwukat ar duwehte Siohwa? Duwehte paip laud ehu me soandi teng oh sohte kin mwekidsang wasa ehu, ih duwen Siohwa Koht eh kak ketin wia Utupen kakehlpomw me kin tengeteng.
5 Pwuhken Melkahka audaudki lepin lokaia kan me kin kihda kilel nan omw madamadau me kin kasalehda soangsoangen irair kan me Siohwa sapwellimanki. Karasepe, nan Melkahka 84:11 (NW) karasahiong Siohwa “ketipin ehu oh mehn sansar ehu” pwehki ih me Utupen marain, mour, kehl, oh perepatail. A nan Melkahka 121:5 (NW) mahsanih me “Siohwa me wia mwete ni pehmw palimaun.” Duwehte mwetehn wasa ehu kak pereiukasang karakar en ketipin, Siohwa kak ketin pere irail kan me kin papah ih sang karakar en kahpwal akan oh ketikihong irail mehn perepe me rasehng mwetehn pahn nin ‘lime’ de pahn mwetehn sapwellime “pehnpihr kan.”—Aiseia 51:16; Melkahka 17:8 (NW); 36:7 (NW).
it-2 1161 par. 7
Ngile
Koht kin ketin karonge ngilen sapwellime ladu kan. Irail kan me kin kaudongki sapwellimen Koht manaman oh mehlel kak likweriong Koht oh kamehlele me e pahn ketin karonge ngilarail kan mendahki lokaia dah me re pahn doadoahngki ni arail likweriong ih. Mendahki emen kak kapakap pek sawas rehn Koht ni sohte ngile, Koht ketin mwahngih audepen mohngiong en aramas, oh kin ketin “karonge” de ketin pohnese arail kapakap. (Me 66:19; 86:6; 116:1; 1Sa 1:13; Neh 2:4) Koht kin ketin karonge irail kan me kin mi nan apwal me kin likweriong pwehn pek sawas. Oh e kak ketin rong oh mwahngih audepen nan kapehden aramas akan me kin uhwong ih oh koasoakoasoane mehkot suwed ong sapwellime aramas akan.—Sen 21:17; Me 55:18, 19; 69:33; 94:9-11; Ser 23:25.
Ia Duwen Omw Kak Dadaurete Pahn Kapwunod kan
2. Medemedewe. Ni omw medewehla dahme wiawihong uhk mahso, ke kak medewehla kahpwal kan me ke kak powehdi pwehki sapwellimen Siohwa sawas? Ni atail kin medemedewe ia duwen Siohwa eh ketin sewese kitail oh pil sapwellime ladu kan mahso, met kin kalaudehla atail meleilei oh atail likih Siohwa. (Mel. 18:17-19) Elder men me adaneki Joshua koasoia: “I kin ntingihedi ei kapakap kan me pasapengla. Met sewese ie en tamanda ahnsou kan me I peki rehn Siohwa soahng ehu me I uhdahn anahne oh e ketin sapengala.” Ei, ni atail kin medewehla dahme Siohwa ketin wiadahr ong kitail, kitail kin kehlailda oh dadaurete pahn atail kapwunod kan.
Ire Kesempwal kan
it-1 432 par. 2
Kerup
Mepwukat kaidehn sansal mwomwsuwed kei me wiawihda en duwehte sansal kamasepwehk kan me ahneki pehnpihr me wehi rotorot kan me kapilpene wasao kin pwongih, duwehte me ekei kin medewe. Nin duwen koasoi en mahs en mehn Suhs kan ar kin pwungkipene (Paipel sohte kin koasoia duwen met), kerup pwukat mwomwen aramas. Re wiawihda ni mwohmw uhdahn kaselel, me kasalehda tohnleng kei me uhdahn lingan, oh re wiawihda ni soangen oaritik koaros, “nin duwen koasoandi” me pein Siohwa ketikihong Moses. (Eks 25:9) Wahnpoaron Pohl kawehwehda mepwukat nin duwen “kerup lingaling kei me pwainkihdi pweineo.” (Ipr 9:5) Kerup pwukat kin dokedoke en Siohwa eh kin ketiket wasao, pwe e mahsanih: “I pahn tuhwong uhk wasao, oh pohn pweinen Kohpwao nanpwungen kerup riemeno.” (Eks 25:22; Nem 7:89) Ihme kahrehda Paipel mahsanih me Siohwa kin “ket nan mwoale pohnangin [de, nanpwungen] kerup kan.” (1Sa 4:4, NW; 2Sa 6:2; 2Na 19:15; 1Kr 13:6; Me 80:1; 99:1; Ais 37:16) Ni karasaras, kerup ko wia wiliepen “kuruma” me Siohwa kin ketin dake (1Kr 28:18), oh pehnpihr en kerup ko kin pere oh kamwadangahla seiloak. Eri Depit kawehwehda nan koul duwen uwen mwadang en Siohwa eh kin ketido pwehn sewese, rasehng emen me “ketin pihrdi ket pohn kerup kei” oh pil kin “ketin pihrki pehnpihr en kisinieng.”—2Sa 22:11; Me 18:10.
MARCH 18-24
SOAHNG KESEMPWAL KAN SANG MAHSEN EN KOHT | MELKAHKA 19-21
‘Pahnlahng Kin Kasalehda Sapwellimen Koht Lingan!’
Koaros En Kasalehda Sapwellimen Siohwa Lingan
DEPIT, nein Sehsi pwutak, tikada karanih kahnimw en Pedleem. Pak tohto ni pwong kan ni ahnsou me e kin kelekelepw oh apwapwalih nein seme sihpw kan, e kin saradala nanleng wasa diren usu! E kin kataman ohng ih duwen kapikapikda kaselel pwukat oh sapwellimen Koht ngehn sarawi kin kamwekid ih en wiahda oh koulki mahsen kaselel pwukat me ntingdi nan Melkahka 19: “Ia uwen sansal en pahnlahng eh kasalehda sapwellimen Koht lingan! Ia uwen eh kasalehda mwahu mehkan me eh ketin wiahda! Ahpw kalohk wet kin lelpeseng wasa koaros nin sampah. Koht ketikihong ketipin dewe pahnlahng.”—Melkahka 19:1, 4.
2 Sapwellimen Siohwa kapikapik en nanleng kan kin kapinga Siohwa rahn koaros, edetehn irail sohte kak lokaia. Kapikapik kan sohte kin uhdi sang ahr kin kapinga sapwellimen Koht lingan, oh met kin kahrehong aramas akan en pohnese uwen arail tikitik oh medemedewe duwen mehn kadehde wet ah sohte kin lokaia ahpw kin kasalehda sapwellimen Koht lingan “wasa koaros nin sampah” pwe tohn sampah koaros en kak kilang. Ahpw, mehn kadehde wet me sohte kin lokaia, sohte itar. Aramas lelepek kan kin pil ale kangoang en iang kadehde duwen sapwellimen Koht lingan. Sounmelkahka men me ede sohte sansal kin koasoahiong tohnkaudok lelepek kan lokaia pwukat me Koht ketin kamwekid ih en ntingihdi: “Tohn sampah koaros, kumwail kapinga Kauno [“Siohwa,” NW]; kumwail kapinga sapwellime lingan oh manaman.” (Melkahka 96:7, 8) Irail akan me kin karanih Siohwa kin perenki kapwaiada kaweid wet. Ahpw, dahme aramas akan anahne wia pwen kapinga Koht?
Kepikipikda Kan Kin Kasalehda Sapwellimen Koht Lingan!
8 Depit pil kasalehda ehu sapwellimen Siohwa mehn kepikipik kapwuriamwei: “Koht ketikihong ketipin dewe pahnlahng; ketipin ahpw kin kohieisang nan dewe nimenseng, rasehng ohl kamwohd emen me kin pereperen, oh pil rasehng sounweirentang men me onopadahr en weirentang. E ahpw kin tapihada eh seiloak pahnlahng sang ni palimese kolahng ni palikapi. Sohte mehkot kak rirsang eh karakar.”—Melkahka 19:4-6.
9 Ma kitail pahn kapahrekihpene ketipin ong usu teikan, ketipin sohte kin laud de tikitik (medium sized). Ahpw, e wia usu kaselel ehu, me kin laudsang douluhl planet teikan me kin pidakih ketipin. Ehu roporop kasalehda me uwen laud en ketipin mih ni uwen “ten lik lik kei”—me wehwehki persent 99.9 en soahng koaros me pidipidahki ketipin! Pwehki “gravity,” sampah kin mih mpen mwail rar 93 dohsang ketipino oh e sohte kin dohlahsang de pil nohn karanihala, ahpw e kin duhduwehte uwen dohpeseng en nanpwungara oh sohte kin sapwungala. Ketipino kin doadoahngki ekiste en ah kehlo pwehn kin kamour soahng koaros nan sampah wet.
10 Sounmelkahkao ni lokaiahn karasaras kin koasoiahki ketipino, me e duwehte “ohl kehlail men” me kin tangasang elep irepen sampah lel elep nin rahn oh ni pwong e kin kommoaldi nan “ihmw likou ehu.” Ni ahnsou me ketipin kin kihrla sang sampah, e kin mwomwen me e kohlahng pahn “ihmw likou ehu,” pwehn kommoal. Ni e kin rahnpeseng, e kin mwomwen wiahkintehieu marainpeseng oh lingaling duwehte “ohl kamwohd men me pidoi sang nan wasahn kapwopwoud.” Pwehki Depit wia sounsilepen sihpw, e kin wehwehki duwen pepehm me pid duwen ni pwong lemwulemwur. (Senesis 31:40) E kin tamanda duwen en ketipino kin kakarakarih paliwere oh duwen mwomwen sahpw me kapilpene. E sansal me ketipino sohte kin pwangahkihda ah seiloak sang pali mese lel pali kapi, pwe e duwehte “ohl kehlail men” me kin onopada en pwurehng wia ah seiloak.
g95 11/8 7 par. 3
Sounwiahda Mehkoaros me Aramas Sohte Kin Tehk Rahnpwukat
Atail kalahnganki kaselelpen wiawihdahn audepen sampah kak sewese kitail en esehla Sounkapikpatailo, me sapwellime doadoahk kan kin kapilkitailpene. Ehu pak, Sises mahsanihong sapwellime tohnpadahk ko ren tehk mwahu duwen wahnrohs en nan mohs akan nan Kalili. E mahsanih: “Tehk mwahu kiepw en nan mohs akan ni arail kin kekeirda; re sohte kin doadoahk oh sohte kin wiahda likou; ahpw I ndaiong kumwail me Solomon ni eh kapwatkihda eh lingan koaros, e pil sohte kaselel duwehte apwoat irail.” (Madiu 6:28, 29) Kaselelpen wahnrohs en nan mohs akan kak katamankihong kitail me Koht kin ketin nsenohki dahme aramas akan kin anahne.
Ire Kesempwal kan
it-1 1073
Ipru, II
Eri kin mie sendens (de, koasoandi, kokouda) me pahrekpene, me pwuloi keriauo sohte kin ihte kasalehda madamadau me duwehte pwuloi keieuo, de kihda ire ehu me weksang. Ahpw, e kin kalaudehla oh kapatahiong madamadau kapw. Melkahka 19:7-9, (NW) kin wia karasepen met:
Kosonned en Siohwa me unsek,
e kin pwurehng kakehlailihada emen.
Sapwellimen Siohwa mehn kataman me likilik,
e kin kaloalokongihala me soakoahiek men.
Sapwellimen Siohwa ruwes kan me pwung,
e kin kaperenda mohngiong;
Sapwellimen Siohwa kehkehlik me mwakelekel,
e kin kamarainihada mesen aramas.
Lemmwin Siohwa me min,
e pahn mihmi kohkohlahte.
Sapwellimen Siohwa kadeik kan me mehlel;
koaros kin pwung.
Tehk me pwuloi keriau en ehuehu sendens de pwuloi en sendens me mie perip kin kadokehla madamadau ehu; kahrehda iretikitik ehu pwon wialahr madamadau ehu, me iei kadokodokpenehn pwuloi keieu oh keriauo. Ihte nan pwuloi keriau ko, me duwehte “e kin pwurehng kakehlailihada emen” oh “e kin kaloalokongihala me soakoahiek men,” me sounwadawad men pahn wehwehkihda ia duwen ‘kosonnedo eh unsek’ oh ia duwen ‘sapwellimen Siohwa mehn kataman eh likilik.’ Nan soangen sendens pwukat me kin pahrekpene, tohrohrpeseng nanpwungen pwuloi keieu oh pwuloi keriau kin wiahda ngihl ehu en pwurupwurehng wiawi. Eri met kin kolokol wiepen koasoandien iretikitik ehu, ni mwohmw ehu me pahrekpene oh ni ahnsowohte kapkapatahiong ire kapw kan ni madamadauo. Ihme kahrehda pwuloi kin ekei pak adaneki koasoandi, de kokouda me pahrekpene.
MARCH 25-31
SOAHNG KESEMPWAL KAN SANG MAHSEN EN KOHT | MELKAHKA 22
Paipel Kohpada Oaritik kan Duwen Pwoulahn Sises
Re Diaradahr Mesaiao!
16 E mwomwen me Koht ketin likidmeliehla Mesaia. (Wadek Melkahka 22:1.) Mark koasoia: “Kulok siluh [mwurin souwas] Sises ahpw kapitie laudida, mahsanih, ‘Eloi, Eloi, lama sapakdani?’ me wehwehki ‘Maing ei Koht, Maing ei Koht, dahme komw ketin likidmeliekiniehla?’” (Mark 15:34) Ni Sises eh mahsanih me Koht ketin likidmeliehla, e sohte mahsanih met pwehki eh solahr pwoson Semeo. E mwahngih me Koht sohte pahn ketin doarehsang sapwellime imwintihti kan ni eh pahn pwoula. Met kin kasalehda me Sises pahn kin lelepek ong Koht ahnsou koaros. Ni Sises eh kapitie laudida mahsanih, “Maing ei Koht, Maing ei Koht, dahme komw ketin likidmeliekiniehla?” kokohp en Melkahka 22:1 pweida.
Re Diaradahr Mesaiao!
13 Depit kohpadahr me aramas akan pahn kauwe Mesaia. (Wadek Melkahka 22:7, 8.) Aramas akan kauwe Sises ni eh ketin lokolok pohn tuhkeo. Madiu padahkihong kitail: “Aramas akan me kin keid wasao ahpw kin tuhtuwelek oh lahlahwe Sises, ndinda, ‘Ih komwi me pahn kauwehla Tehnpas Sarawio oh pwurehng kauwada mwurin rahn siluh! Komw pein doareikomwihla, ma Sapwellimen Koht komwi! Komw keredihsang nin [“tuhkehn kalokolok,” NW]!’” Samworo lapalap oh sounkawehwehn Kosonnedo oh kaun ako kapailoke ih oh ndinda: “E komourala ekei, a e sohte kak komourala pein ih. Kaidehn ih nanmwarkien Israel? A en keredihsang nin [“tuhkehn kalokolok,” NW], se ahpw pahn kamehlele! E koapworopworkihla Koht; eri, Koht en ketin doarehla met, ma e kupwure ih; pwe e kahskier me dene Sapwellimen Koht ih.” (Mad. 27:39-43) Sises ketin lokolok, ahpw e ketin meleilei oh sohte mahsanih mehkot suwed. E ketin wia mehn kahlemeng mwahu ong kitail.
Re Diaradahr Mesaiao!
14 Re pahn usuhski sapwellimen Mesaia likou ko. Depit ntingihedi: “Re usuhski ei likou kan oh nehkpeseng nanpwungarail.” (Mel. 22:18) Ih me uhdahn wiawi. Paipel mahsanih me mwurin sounpei en Rom kan ar langahda Sises, re usuhski sapwellime likou ko oh nehkpeseng nanpwungarail.—Mad. 27:35; wadek Sohn 19:24.
Ire Kesempwal kan
Kasalehda Wauneki Atail Pokonpene Sarawi Kan
7 Mie ahl sansal kan me kitail kak wia pwe en kasalehda me kitail wauneki atail pokonpene kan. Ehu ahl iei en kin iang towehda ahnsoun koul en sarawi kan. Pali laud en koul pwukat iei kapakap kei, ihme kahrehda kitail anahne en iang koul ni wahu. Wahnpoaron Pohl kin kasalehda Melkahka 22 ni a ntingihdi met duwen Sises: “I pahn kapinga komwi ni ar kin pokonpenehn kaudok.” (Ipru 2:12) Ihme kahrehda, kitail anahne en koasoanehdi kitail en kin miher nan dewetail ni ahnsou me chairman pahn pakairki koul oh tehk kanahieng wehwehn lokaia kan en koulo ni ahnsou me kitail kin kokoul. Atail pepehm kan en duwehte pepehm en sounmelkahkao me ntingihdi: “I pahn kasapahlkalahngan ong Siohwa sang nan kapehdi unsek mwohn pokon en sapwellime aramas akan.” (Melkahka 111:1) Ei, en iang koulki kaping kan en Siohwa wia kahrepe mwahu ehu kitail en kin iang mwadang kohla mihding oh mihmi lao lel mihdingo imwisekla.
Kapinga Siohwa nan “Pokon en Aramas akan”
4 Rahnwet, duwehte mahs, koasoandi kan kin wiawihda ong emenemen Kristian en kasalehda arail pwoson “nan pokon en aramas akan.” Ehu ahl me koaros kak iang wia met iei ni arail kin iang sapeng peidek kan me kohwong tohnmwomwohdiso nan mihding kan en mwomwohdiso. Ke dehr pohnsehse kamwahupen pasapeng kan. Karasepe, pasapeng kan me kin kasalehda iaduwen kitail kak powehdi de liksang kahpwal kan kak kakehle riatail kan en koasoanehdi en idawehn mouren kosonned kan en Paipel. Pasapeng kan me pid duwen iren Paipel kan me eden pwuhk oh irelaud oh iretikitik kante me kileldi ahpw audepe kan sohte kileldi, de pasapeng kan me kin kasalehda dahme emen diarada sang pein eh roporop kak kangoange meteikan en kamwahwihala arail koasoandi en onop.
APRIL 1-7
SOAHNG KESEMPWAL KAN SANG MAHSEN EN KOHT | MELKAHKA 23-25
‘Siohwa, Iei Silepei’
Siohwa Iei Silepatail
9 Keieu, Siohwa kin ketin kahluwa sapwellime aramas akan. Depit ntingihdi: “E ketin kommoaleiehdi nan mohs en dihpw kaselel kei, oh kin ketin kahluwaielahng ni pihl mwakelekel. E kin ketin kakehleiehda. E kin ketin kahluwa ie nan ahl me pwung, nin duwen eh ketin inoukihdahr.” (Melkahka 23:2, 3) Pelin sihpw ieu me komkommoal nsenamwahu nan wasa me diren mwenge—wasaht Depit kin kasalehda irair en me pid itarki, nsenamwahu oh saledek sang keper. Lepin lokaiahn Ipru me kin kawehwe “nan mohs” kak wehwehki “wasa kansenamwahu.” Ele pein sihpw akan sohte kak pein diarada wasakis me re pahn wendi oh komkommoal ni meleilei. Sileparailo me pahn kahre irail lahng soangen “wasa kansenamwahu” duwe met.
10 Iaduwen Siohwa ah kin ketin kahluwa kitail rahnwet? Ehu ahl me e kin ketin wia met iei sang ni sapwellime mehn kahlemeng. Sapwellime Mahseno kangoangehkin kitail en “song en kahlemengih ih.” (Episos 5:1) Mour en mahsen pwukat kasalehda kadek, mahk oh limpoak. (Episos 4:32; 5:2) Ni mehlel, Siohwa ketikihda mehn kahlemeng mwahu duwen kasalehda soangen irair kan me kansenamwahu. Iaduwen, e ketin sapwung ni ah ketin kaweidki me kitail en kahlemengih ih? Soh. Kaweid en ngehn sarawi wet ni mehlel wia kasalepe mwahu ieu ohng kitail me e ketin koapworopworkin kitail. Ni ahl dah? Kitail wiawihda ni mwomwen Koht, me wehwehki me kitail alehier irair akan me wia tiahk mwakelekel oh kak audehda irair en atail pali ngehn. (Senesis 1:26) Kahrehda, Siohwa mwahngih me edetehn kitail ahneki irair en soh unsek, mie nan loaletail kehl en kakairada irair akan me e ketin kasalehiong kitail. Nna medewehla—pein atail Koht ketin koapworopworki me kitail kak duwehte Ih. Ma kitail kin idawehn sapwellime mehn kahlemeng, e pahn duwehte ah ketin kahluwa kitail ohng ‘wasahn kommoal’ me kansenamwahu. Nan pwungen wasa keper kan nan sampah wet, kitail pahn “kousoan nan irair me sohte keper,” oh ahneki popohl me kin kohsang ni atail wehwehki me Koht kin ketin kupwurkin kitail.—Melkahka 4:8; 29:11.
Siohwa Iei Silepatail
13 Depit kin kasalehda kahrepe keriau ohng sapwellime irair en likilik: Siohwa kin ketin pere sapwellime sihpw akan. Kitail wadek: “Mehnda ma I weweidwei nan wahu en rotorot mosul, a I sohte pahn masak mehkot, pwe komw ketin ieiang ie. Sapwellimomwi irar oh sokon en sile sihpw iei me kin ketin kamweitiehla.” (Melkahka 23:4) Nan iretikitik 4, Depit kin wia koasoi me kasalehda me e inenen karanih Siohwa oh solahr kin koasoia “e” ahpw kin likwerihki ih “komwi.” Met sohte kin wia mehkot kapwuriamwei, pwehki Depit kin koasoakoasoia duwen Koht ah kin ketin sewese ih pwe en kak powehdi kasongosong kan. Depit kin keidwei nan wahu rotorot akan pak tohto—ahnsou kan me ah mour kin mih nan irair keper. Ahpw, e sohte kin mweidong masak en powehdi ih, pwe e kin ahneki pepehm me Koht—ki sapwellime “irar” oh “sokon en sile sihpw” me kin onopadahng sawas—Koht kin ieiang ih. Pwehki Depit ah kin wehwehki me Siohwa kin ketin pere ih, met kin kansenamwahu ong ah lamalam oh kin kakaranihala ih ohng Siohwa.
14 Iaduwen Siohwa ah kin ketin pere sapwellime sihpw nan rahnwet? Paipel kamehlelehiong kitail me irail me kin uhwong kan—mehnda ma ngehn saut de aramas—sohte kak kamwomwala sapwellimen Siohwa sihpw kan koaros sang nin sampah. Siohwa sohte pahn ketin mweidohng met en wiawi. (Aiseia 54:17; 2 Piter 2:9) Ahpw, met sohte wehwehki me Silepetailo pahn pere kitail sang soangen kahpwal koaros en dehr lelohng kitail. Kitail kin iang pehm soangen mehn songosong kan me kin kalap wiawihiong tohnsampah kan, oh kitail kin iang lelohng uhwong me kin wiawihiong Kristian mehlel akan koaros. (2 Timoty 3:12; Seims 1:2) Mie ekei pak me kitail kak nda, ni karasaras, me kitail “kin keid nan wahu en rotorot mosul.” Karasepe, mwein ele kitail kak kereniong mehla pwehki kalokolok ieu me wiawi ong kitail, de pwehki soumwahu laud ehu. De mwein aramas men me kitail kin poakpoake laud kereniong mehla de pil mehla. Ni soangen irair akan me kin rasehng rotorot mosul, Silepatailo kin ketiket rehtail, oh e pahn kin ketin pere kitail. Iaduwen?
15 Siohwa sohte ketin inoukihda me e pahn ketin wiahda manaman pwe en irehweisang kahpwal akan. Ahpw, kitail kak kamehlele me Siohwa pahn ketin sewese kitail en pitsang soangen kahpwal sohte lipilipil kan me kitail kak lelohng oh e pahn kak ketikihong kitail erpit en kak powehdi “soangen apwal koaros.” (Seims 1:2-5) Silepen sihpw men kin doadoahngki nah irar de pil sokon en sile sihpw kaidehn en karawan kihsangte mahn lawalo kan, ahpw, ni kadek, e pil kin doadoahngki nah sokon en siken nah sihpw kan pwehn kainene irail. Siohwa kak ketin, “ni kadek, siken” kitail, ni e kin ketin doadoahngki iengetail tohnkaudok men, me kin kihda kaweid me poahsoankihda iren Paipel kan me kak wekidala laud atail irair me kitail mih loale. Patehng met, Siohwa kak ketikihong kitail kehl en kak dadaurete. (Pilipai 4:13) Sang ni sapwellime ngehn sarawi, e kak ketikihong kitail “kehl me laud sang dahme uhdahn kin mie.” (2 Korint 4:7) Sapwellimen Koht ngehn sarawi kak kakehle kitail en powehdi songosong sohte lipilipil me Sehdan pahn kasongekin kitail. (1 Korint 10:13) E sohte kin kansenamwahu en ese me Siohwa kin ketin kak ketin sewese kitail ahnsou koaros?
Siohwa Iei Silepatail
17 Met Depit pil kasalehda kesiluh en kahrepen ah koapworopwor ki ah Soun Silepe: Siohwa kin ketin kamwenge sapwellime sihpw akan oh e sohte kin ketin keseirailla. Depit ntingihdi: “Komw ketin kaunopadahng ie kamadipw ehu, wasa me ei imwintihti kan koaros kak kilang ie; komw ketin kasamwo ie oh kielediong leh pohn moangei oh kadikadirehdohte ei tungoal kep.” (Melkahka 23:5) Nan iretikitik wet, Depit kawehwe me Soun Silepe kin wia soun luhk mwahu men me kin kitkihda mwenge oh mehn nim tohto. Karasaras rioapwoat pwukat—soun silepe epwel mwahu oh soun luhk kadek—sohte kin wia koasoi liseliping kei. Ni mehlel, soun silepen sihpw mwahu men pahn uhdahn ese iawasa e pahn kin diar mohs kaselel akan me diren dihpw oh itar pilen nim pil pwe sihpw akan en dehr “apwaliki mehkot.”—Melkahka 23:1, 2.
18 Iaduwen atail Soun Silepe pil kin wia soun luhk kadek emen? Met me inenen dehde mwahu! Nna medewehla mwengehn ngehn kan me kitail kin paiekihda nan ahnsou wet duwen mwahu, laud, oh soangsoangen. Ni ah kin ketin doadoahngki irail pwihn en “ladu lelepek oh loalokong,” Siohwa kin ketikihda ong kitail pwuhk katapan akan oh prokram audapan akan nan mihding kan, nan kapokon akan, oh kapokon laud akan—oh mepwukat koaros kin audehda atail anahn akan en pali ngehn. (Madiu 24:45-47) Ni mehlel, sohte duhpek en pali ngehn me mie. “Ladu lelepek oh loalokong” wiadahr Paipel rar kei oh mehn sawaspen onop Paipel kan, oh soangen pwuhk pwukat ni ahnsou wet mihier ni soangen lokaia 413. Siohwa kin ketikihdahr mwengehn ngehn pwukat ni soangsoangen mwohmw—sang “milik,” padahk en Paipel mengei kan, lel “mwenge kekeluwak,” padahk en ngehn loal akan. (Ipru 5:11-14) Kahrehda, ni atail pahn lelohng kahpwal akan de pahn wia pilipil kan, kitail pahn kin kalap mengei en diar dahme kitail anahne. Dahme kitail pahn wia ma sohte soangen mwengehn ngehn pwukat? Atail Soun Silepen Sihpwo ni mehlel wia soun ketikihda kisakis me keieu sapan!—Aiseia 25:6; 65:13.
Ire Kesempwal kan
Poakohng me Pwung ni Mohngiongomw Unsek
SANG ni sapwellime Mahsen oh manaman, Siohwa kin ketin kahluwa sapwellime aramas akan nan “ahl me pwung.” (Mel. 23:3) Ahpw pwehki atail soh unsek, kitail kin kalapw wetsang nan ahlo. Pwe kitail en pwurehng wia dahme pwung, kitail anahne koasoanehdi teng en nannanti. Dahme pahn sewese kitail en pweida? Duwehte Sises, kitail anahne poakohng dahme pwung.—Wadek Melkahka 45:7.
2 Ia wehwehn “ahl me pwung”? “Ahl” wet wehwehki elen mour me poahsoankihda sapwellimen Siohwa koasoandi pwung. Ni lokaiahn Ipru oh Krihk, lepin lokaia “pwung” kin dokedoke en tengediong kaweid me pid wiewia kan. Pwehki Siohwa iei “Koht pwung men,” sapwellime tohnkaudok kan kin perenki kilangwohng ih pwe en ketin koasoanehdi ahl en wiewia pwung me re anahne idawehn.—Mel. 31:1.
3 Ihte ahl me kitail pahn uhdahn kaparanda Koht iei sang ni atail kin nantihong peikiong sapwellime koasoandi kan ni mohngiong unsek. (Deud. 32:4) Met tepikihda atail pahn sukuhlki duwen Siohwa Koht ni uwen atail kak sang sapwellime Mahsen, Paipel. Ma kitail pahn kalaudehla atail esehla ih oh karanihala ih rahn koaros, kitail pahn kalaudehla atail limpoak ong sapwellime irair pwung. (Seims 4:8) Kitail pil anahne peikiong kaweid en Mahsen en Koht ni ahnsou me kitail anahne wia pilipil kesempwal kan nan mour.
APRIL 8-14
SOAHNG KESEMPWAL KAN SANG MAHSEN EN KOHT | MELKAHKA 26-28
Dahme Depit Wia Pwehn Kakehlaka Eh Kin Lelepekohng Siohwa
Kekeid Ni Lelepek
8 Depit kapakapki: “Maing Siohwa, komw ketin sohng ie oh kasawih ie, komw ketin kamwakelehda ai mwidihlihk oh mohngiongi.” (Melkahka 26:2, NW) Mwidihlihk kan kin mih nan werengen paliwar en aramas akan. Ni karasaras, mwidihlihk kan kin rasehng ahn aramas madamadau oh pepehm loal kan. Mohngiong kin pil rasehng loalen aramas akan—ah ineng kan, pepehm akan, oh loalokong. Ni ahnsou me Depit peki rehn Siohwa en kasawih ih, e mwahuki Siohwa en tehk oh kasawih mwahu ahn Depit madamadau oh pepehm loal kan.
9 Depit peki rehn Siohwa en kamwakelehda ah mwidihlihk kan oh mohngiong. Iaduwen Siohwa kin kamwakelehda nan loalen aramas akan? Depit koulki: “I kin patohwan kapinga Siohwa, pwehki E kin ketin kaweid ie, oh sapwellime kaweid kin kapwungala ahi madamadau oh pepehm loal kan nipwong.” (Melkahka 16:7, NW) Ia wehwehn met? Met kin wehwehki me kaweid me kohsang rehn Koht kin lel wasa me keieu loal en Depit oh kapwungala ah madamadau oh pepehm loal kan. Duwehte kitail, ma kitail pahn kalahnganki kaweid me kohsang Mahsen en Koht, oh irail me kin wia wiliepen Koht nin sampah, oh sapwellime pwihn, oh mweidong kaweid pwukat en leledihla nan wasa loal kan nan atail mour. Kaukaule kapakap ong Siohwa pwen kamwakelehda loalatail kan pahn kak sewese kitail en kekeid ni lelepek.
Kekeid Ni Lelepek
12 Depit kasalehda duwen pil ehu sawas me kin kakehlahda ah lelepek ong Koht: “I sohte kin patehng aramas soh-katepe kan; sohte ahiong me liksansalamwahu kan. I kin tateki patehng aramas suwed kan oh kin pohnsehse aramas suwed kan.” (Melkahka 26:4, 5) Depit sohte pahn patehng aramas suwed akan. E kin tateki werek suwed akan.
13 Iaduwen kitail? Kitail kin kahng patehng aramas suwed akan me kin pwarada nan TV, video, kasdo, Internet sites, on soahng pwukat? Kitail kin kahng patehng irail aramas akan me kin mwomwehda me irail aramas mwahu ahpw ni mehlel irail kin ekihla soahng suwed me re wiewia? Mwein ekei iengetail tohnsukuhl akan de tohndoadoahk kan kin mwomwehda me irail wia kompoakpatail mwahu kan pwehki kahrepe widing soh sansal kan. Kitail men karanih soangen aramas pwukat me sohte kin kekeidki sapwellimen Koht mehlel? Mendahki irail kin mwomwen mehlel, irail aramas akan me kin lahlahwe padahk mehlel mwein ele kin song en ekihla me re men kahrehong kitail en sohpeisang papah Siohwa. Ahpw, dahme kitail pahn wia ma mie irail akan nan mwomwohdiso en Kristian me kin mour riau? Irail pil kin mwomwehda me irail uhdahn mwahu oh irail kin ekihla dahme mih loalarail kan. Jayson, wiahla emen ministerial servant ni ahnsou wet, ahpw mahs e kin kompoakepahnki soangen aramas pwukat ni ahnsou me e pwulopwul. E koasoia duwen irail: “Ehu rahn, emen irail ndaiong ie met: ‘E sohte lipilipil dahme kitail wiewia ahnsouwet, pwe ni ahnsou me koasondi kapw pahn leledo, kitail pahn mehla. Kitail pahn mehla oh kitail pahn sehse ma mie mehkot kitail katiasang.’ Soangen koasoi duwehte met kahrehong ie en tepida medemedewe duwen ai mour. Pwe I sohte men mehla ni ahnsou me koasoandi kapw pahn leledo.” Eri, Jayson, ni loalokong, sohlahr kin patehng soangen aramas pwukat. Wahnpoaron Pohl kihda kaweid wet, “Kaleke kumwail pitida pahn meteikan! Pwe werekiong aramas suwed kan e kin kauwehla tiahk mwahu.” (1 Korint 15:33) E inenen kesempwal kitail en dehr werek suwed!
Kekeid Ni Lelepek
17 Wasao me kaudok ong Siohwa kin wiawi nan wehi Israel iei Impwal Sarawio, oh ih wasao me pei sarawi ong meirong kan kin mie. Depit kapakapki duwen ah kin perenki wasao: “Siohwa, I patohwan wasa me komw kin ketin ketiket ie, wasa me sapwellimomwi lingan kin ket ie.”—Melkahka 26:8, NW.
18 Kitail kin perenki pokonpene pwehn sukuhliki duwen Siohwa? Kingdom Hall koaros kin ahneki prokram en kihda kaweid ni pali ngehn oh e kin wia wasahn kaudok mehlel nan ehu ehu kousapw kan. Patehng met, mie atail Kapokon en District kan, Kapokon en Circuit kan, oh Kapokon en Rahn Tohrohr me kin wiawi pahr koaros. Nan mihding pwukat, irail kin koasoiapene duwen sapwellimen Siohwa “mehn kataman kan.” Ma kitail sukuhliki en “poakohng ni mohngiong unsek,” kitail pahn kasikasik en iang towehda mihding kan oh rong kanahieng. (Melkahka 119:167) Ia uwen kansenamwahu en patehng iengetail pwoson akan me kin nsenohki kitail oh me kin sewese kitail en kolokolete atail lelepek ong Koht!—Ipru 10:24, 25.
Ire Kesempwal kan
Siohwa Kin Ketin Kapitala Ih Me Kin Mihla Nan Apwal
15 Sounmelkahka Depit koulki: “Semei oh inei pil kak keseiehla, ahpw Kauno pahn ketin apwahpwalih ie.” (Melkahka 27:10) Ia uwen kansenamwahu en ese me sapwellimen Siohwa limpoak inenen siksang limpoak en pahpa oh nohno koaros! Edetehn kailok, lemei de kesehla seri me pahpa oh nohno kin wia kin kamedek, ahpw met sohte kin wekidala uwen Siohwa kin ketin kupwure iuk. (Rom 8:38, 39) Tamataman me Koht kin ketin kakaranihodohng reh irail oko me e ketin loalloale. (Sohn 3:16; 6:44) Sohte lipilipil dahme aramas akan kin wiaiong uhk, Semomw me ketiket nanleng kin ketin limpoak ohng uhk!
APRIL 15-21
SOAHNG KESEMPWAL KAN SANG MAHSEN EN KOHT | MELKAHKA 29-31
Peneu—Kasalepen Sapwellimen Koht Limpoak
it-1 802 par. 3
Silangi
Mahsen wet ‘karirihala silangi’ kin mie wehwe tohto oh e kin pidada soangsoangen irair kan. Siohwa Koht eh kin ketin karirihala silangi kin wia kilelepen me e kin ketikihsang sapwellime kupwuramwahu de sapwellime manaman. Met ele iei imwilahn sapeik en emenemen aramas de pwihn en aramas ehu, me duwehte wehin Israel. (Sop 34:29; Me 30:5-8; Ais 54:8; 59:2) Ekei ahnsou ele e kin wehwehki me Siohwa kin ketin karirihala pein ih ni eh sohte kin ketin wia mehkot de sohte sapeng, oh awiawih sapwellime ahnsou me mwahu. (Me 13:1-3) Ni Depit eh patohwan, “sohpeiweisang dipei kan,” met kin wia pekipek ehu ong Koht en ketin mahkohng de manokehla dipe kan.—Me 51:9; pil kilang Me 10:11.
w07 3/1 19 par. 1
Awiawih Siohwa ni Peren
Elen sapwellimen Siohwa peneu kin wia kamwahupatail oh kak duwehte mwomwen wahntuhke ehu eh kin kekeirda oh mahier. Me pidada peneu sang Koht, Paipel mahsanih: “Ni mehlel, sohte peneu ehu kin kaperen ni emen eh kin ale, pwe e kin kamedek; ahpw mwuhr, e kin kapwarehda wahn popohl me iei elen pwung ong irail kan me kin ale.” (Ipru 12:11) Duwehte wahntuhke ehu eh kin anahne ahnsou en matala, ih pil duwen ahnsou eh kin anahn pwehn wekidala mwomwen atail madamadau ni atail kin mwekidki kaiahn me Koht kin ketikihda. Karasepe, ma atail wiewia sapwung kin kahrehiong kitail en sohla ahneki ekei pwais kan nan mwomwohdiso, atail awiawih Koht ni peren pahn perekitailsang mworusala oh uhdihsang papah Koht. Nan soangen irair pwukat, en Depit koasoi kan kin kangoang ni eh patohwan: “Pwehki en mi pahn [sapwellimen Koht] engieng kin ahnsoutehkis, ahpw en mi pahn sapwellime kupwuramwahu kin mihmi erein mour. Sengiseng kak wiawi nin soutik, ahpw weriwer en peren kin wiawi nimenseng.” (Melkahka 30:5, NW) Ma kitail kalaudehla atail kin nantihong awiawih Koht oh kapwaiada kaweid kan me kitail kin ale sang sapwellimen Koht Mahsen oh pwihn, atail ahnsou en “weriwer en peren” pahn leledo.
Ia Wehwehn Koluhla Mehlel?
18 Pwehn kasalehda me e koluhla mehlel, emen me piskenla pahn anahne iang kaukaule towehda mihting kan oh idawehn en elder kan kaweid en kaukaule kapakap oh onop Paipel. E pahn pil doadoahk laud pwehn nantihong soikala soahng kan me kakete kasonge ih en pwurehng wiahda dihp. Ma e nantihong en kamwahwihala eh nanpwungmwahu rehn Siohwa, e kak kamehlele me Siohwa uhdahn pahn ketin mahkohng ih oh elder kan pahn sewese ih en pwurehng wiahla kisehn mwomwohdiso. Ni elder kan ar song en diarada ma emen koluhla mehlel, irail ese me ehuehu irair ko wekpeseng. Eri irail anahne kasawih mwahu ehuehu irair ko.
Ire Kesempwal kan
Ire Kesempwal akan Sang Nan Pwuhk Keieu en Melkahka kan
31:23—Iaduwen aramas aklapalap ah kin ale pweipwei mwuledek? Pweipwei wasaht iei kalokolok. Aramas pwung men kin ale pweinen a sapwung kan me e sohte uhdahn pilahnehda wia ni ah kin ale kaweid en Siohwa. A pwehki aramas aklapalap emen sohte kin uhdihsang wiewia me sapwung, e pahn ale pweine ni kalokolok mwuledek.—Lepin Padahk 11:31; 1 Piter 4:18.
APRIL 22-28
SOAHNG KESEMPWAL KAN SANG MAHSEN EN KOHT | MELKAHKA 32-33
Dahme Kahrehda Kitail en Wehkada Dihp Laud?
w93 3/15 9 par. 7
Sapwellimen Siohwa Mahk Kalahngan Kin Doareikitailla Sang Kahpwal
7 Ma kitail wiahda dihp laud ni atail kauwehla sapwellimen Koht kosonned, ele kitail kak apwalki wehkada dipatail kan, pil ong Siohwa. Dahme kak wiawi nan soangen irair pwukat? Nan Melkahka irelaud 32, Depit patohwan: “Ni ei sohte kin wehkada dipei kan, I kin tihwohla wie sengiseng sang nimenseng lel nipwong. Maing KAUN, komw kin ketin kaloke ie ni rahn oh nipwong; solahr angin nan kapehdiet, e rasehngalahr pwoaiken nimenseng me kin sohrala ni karakar en ketipin.” (Iretikitik 3, 4) Ni Depit eh kin songosong en ekihla dipe oh pohnsehsehla kadeikpen loale, met kin uhdahn katoutouwihala ih. Uwen tihwo eh kaluwetehla ih kahrehda e duwehla tuhke ngalangal pwoat ni ahnsoun karakar. Ni mehlel, ele e luwetkilahr oh tihwokilahr imwila suwed kan. Ahpw me keieu suwed, solahr eh peren. Ma kitail mihla nan soangen irair me duwehte met, dahme kitail pahn wia?
cl 262 par. 8
Koht Emen me “Diren Mahk”
8 Ni Depit eh koluhlahr, e patohwan: “I ahpw wehkadahng komwi dipei kan, oh sohte ekihla ei sapwung kan. . . . Komwi ahpw ketin mahkikihong ie dipei kan koaros.” (Melkahka 32:5) Lepin lokaia “mahkikihong” kin kawehwehdiong ni lokaiahn Ipru ehu me wehwehki “pwekada” de “wahda.” Lepin lokaia wet eh kadoadoahk nan ire wet kin wehwehki en kihsang “dihp, wiewia suwed, oh dipen kauwehla kosonned.” Kahrehda Siohwa kin ketikihda oh ketikihsang dipen Depit kan. Met uhdahn kansenamwahwihala en Depit pepehm en dihp me e kin weuwa. (Melkahka 32:3) Kitail pil kak uhdahn likih Koht me kin ketikihsang dipen irail akan me kin raparapahki sapwellime mahk ni arail kin pwoson sapwellimen Sises pweinen pweipwei sapahlo.—Madiu 20:28.
w01 6/1 30 par. 1
Wehkada Dihp me Kin Kamwahwihala Emen
Mwurin Depit eh wehkada dipe ko, e sohla kin pwurupwurehng ahneki pepehm me e sohte katepe. Lepin lokaia kan me e doadoahngki nan melkahka kan me e ntingihada duwen wehkada dihp kin kasalehda pepehm en nsenamwahula oh eh koasoanehdi teng en papah Koht ni lelepek. Kilang karasepe nan Melkahka irelaud 32. Nan iretikitik 1, kitail wadek: “Meid pai aramas me kin ale lapwepen dipe kan, me Koht kin ketin mahkikihong eh sapwung.” Sohte lipilipil ia uwen laud en dihpo, ma emen koluhla mehlel, e kak uhdahn nsenamwahula. Ehu ahl en kasalehda koluhla mehlel iei sang ni emen eh pohnese me e pein pwukoahki eh wiewia kan, duwehte me Depit wia. (2 Samuel 12:13) E sohte kin song en kihda kahrepe kan mwohn Siohwa de kapwukoahki meteikan. Iretikitik 5 mahsanih: “I ahpw wehkadahng komwi dipei kan, oh sohte ekihla ei sapwung kan. I lemedahr I en wehkadahng komwi ei ketihwo kan, komwi ahpw ketin mahkikihong ie dipei kan koaros.” Wehkada dihp ni mehlel kin wahdo nsenamwahu, kahrehda kadeikpen loalen aramaso solahr kalokehki ih eh dihp en mahs akan.
Ire Kesempwal kan
w06 5/1 31 par. 1
Ire Kesempwal akan Sang Nan Pwuhk Keieu en Melkahka kan
33:6; footnote—Dahkot “ngehno,” de “angin,” en doauesen Siohwa? Ngehn wet iei sapwellimen Koht manaman, de ngehn sarawi, me e kin ketin doadoahngki pwehn wiahda mehkan nanleng. (Senesis 1:1, 2) E kin adaneki ngehn en doauese pwehki e duwehte angin doauese me manaman, e kak ketin kadarewei pwehn wiahda mehkan nan wasa me doh.
APRIL 29–MAY 5
SOAHNG KESEMPWAL KAN SANG MAHSEN EN KOHT | MELKAHKA 34-35
“Kapinga Siohwa Ahnsou Koaros”
Kitail Ehupene oh Kapinga Mwaren Siohwa
11 “I pahn patohwan kapingkalahngan ong KAUN-O ahnsou koaros; I sohte pahn tokedihsang ei kapikapinga.” (Melkahka 34:1) Ni eh wia mehn liki men, Depit ele kin medemedewe eh anahn en paliwar, ahpw nin duwen me mahsen pwukat kasalehda, e sohte mweidong eh anahn akan en ehu ehu rahn en kihsang eh ineng en men kapinga Siohwa. Ia wen met wia mehn kahlemeng mwahu ohng kitail ni ahnsou me kitail kin lelohng nan kahpwal kan! Edetehn kitail mihmi nan atail wasahn sukuhl, wasahn doadoahk, rehn riatail Kristian kan, de nan wasahn kalohk, kitail en keieu kesempwaliki atail ineng en kapinga Siohwa. Na song medewehla kahrepe tohto kan me kitail en wiahki met! Karasepe ehu, mie soahng tohtohie me Siohwa ketin kapikada me kitail kak kilang oh perenki. Oh na song pil medewehla duwen mehkan me e ketin kahrehiong en pweida ni ah ketin doadoahngki sapwellime pwihn nin sampah! Siohwa kin ketin doadoahngki laud irail aramas pwoson kan en rahn pwukat, mendahki irail soh unsek. Ni ahmw pahn kapahrekihpene doadoahk kan en irail aramas akan me sampah wet kin wadek oh doadoahk me Koht kin ketin wia, ahn ihs me keieu mwahu? Ia duwen, ke kin pwungki en Depit lamalam ni eh ntingihdi: “Maing ei Kaun, sohte emen koht mie duwehte komwi, sohte emen me wiadahr dahme komw ketin wiadahr”?—Melkahka 86:8.
Kitail Ehupene oh Kapinga Mwaren Siohwa
13 “I pahn kin patohwan kapingahki wiepen nin lime kan; kumwail me toutoulahr akan [“me aktikitik kan,” NW], kumwail rong oh nsenamwahula!” (Melkahka 34:2) Depit sohte suweiki duwen eh pweida kan. Karasepe ehu, e sohte suweiki duwen mwomwen eh pitihdi nanmwarki en Kad. E pohnese me Siohwa ketin sinsile ih ni ahnsou me e mih nan Kad oh pohnese me sapwellimen Siohwa sawas me sewese ih en pitla. (Lepin Padahk 21:1) Kahrehda Depit kin kapinga Siohwa ah kaidehn pein ih. Pwehki Depit kin kawauwih Siohwa, irail me opampap akan kin karanih Ih. Duwehte met, Sises kin ketin kawauwih mwaren Siohwa, oh met kahrehda irail me opampap akan me kin men rong kin men karanih Ih. Rahnwet, irail me opampap kan kin wiahla kisehn mwomwohdisohn Kristian keidi kan me Sises kin wia Tapwi. (Kolose 1:18) Mohngiong en irail me opampap kan kin mwekidkihda ni ahr kin rong irail ladu aktikitik kan kin kalinganahda mwaren Koht, oh pil ni ahnsou me re kin rong mahsen en Paipel, me ngehn sarawi en Koht kin ketin kahrehiong irail en kak wehwehki.—Sohn 6:44; Wiewia 16:14.
Kitail Ehupene oh Kapinga Mwaren Siohwa
15 “I kapakapohng KAUN-O, e ahpw ketin sapeng ie; e ketin kasaledekihiehla sang nan ei masak koaros.” (Melkahka 34:4) Depit inenen kesempwalki irair wet. Kahrehda e pousehla oh mahsanih. “Me sohte sawasaparail akan kin likweriong, oh e kin ketin sapeng irail; e kin ketin doareirailla sang ar apwal akan koaros.” (Melkahka 34:6) Ni atail kin werekiong riatail kan nan pwoson, kitail kin ahneki ahnsou mwahu en kin ehukihong irail duwen ekspiriens en kangoang kan me pid iaduwen Siohwa kin ketin sewese kitail en powehdi irair apwal akan. Met kin kakehlaka pwoson en riatail kan nan pwoson, duwehte sapwellimen Depit mahsen kan kin kakehlaka pwoson en irail kan me kin utung ih. Ohng ni irair en Depit, ienge kan kin “sohpeiong [Siohwa] oh kin nsensenamwahu; re sohte pahn nsensuwedla.” (Melkahka 34:5) Mendahki irail wie tangatangasang Nanmwarki Sohl, irail sohte namenek. Irail koapwoaroapwoarki me Siohwa ketin ieiang Depit, kahrehda pohn meserail kan kin masperen. Duwehte met, irail Kristian kapw akan iangahki irail akan me wereilahr nan pwoson kin koapwoaroapwoarki me Siohwa pahn ketin sewese irail. Pwehki pein irail kin pein pehm duwen Siohwa eh kin ketin sewese irail, pohn meserail kan me kin kalapw masperen kin kasalehda me irail koasoanehdi teng me irail pahn kolokolete arail lelepek.
Ire Kesempwal kan
Ire Kesempwal akan Sang Nan Pwuhk Keieu en Melkahka kan
35:19—Ia wehwehn sapwellimen Depit pekipek en dehr mweidong irail me kin kailongki ih en marep? Marep wasaht kin kasalehda me sapwellimen Depit imwintihti kan kin perenki arail pilahn en kauwehla ih ar kin pweida. Depit peki met en dehr wiawi.