Iren Sawas kan ong Doaropwehn Kasukuhl ong Mihting en Mour oh Kalohk
© 2023 Watch Tower Bible and Tract Society of Pennsylvania
JANUARY 1-7
SOAHNG KESEMPWAL KAN SANG MAHSEN EN KOHT | SOHP 32-33
Kansenamwahwih Irail me Ahneki Kapwunod
it-1 710
Elihu
Elihu sohte kin lipilipilki aramas, oh sohte kin kihong aramas emen lengileng ehu pwehn kapinga ih. E kin pohnese me e duwehte Sohp me wiawihkihda pwehl oh me Keieu Manamano iei Sounkapikpe. Elihu sohte kin songosong kamasepwehkih Sohp, ahpw e kin lokaiaiong ih duwehte kompoakepah mehlel men, oh kin ekerki Sohp edeo, mehkot me Elipas, Pildad de Sopahr sohte kin wia.—Sop 32:21, 22; 33:1, 6.
Ke Kin Kilangwohng Ahn Aramas Luwet kan Duwehte me Siohwa Kin Ketin Wia?
8 Dahme pahn sewese kitail en kalaudehla atail wehwehki riatail kan me anahne sawas? Tamataman me tohtohn irail pwukat kin lokolongki soumwahu de nsensuwed laud de pwehki irail kin mihmi nan peneinei ehu me ekei sohte iang padahk mehlel. Ma kitail ahneki soangen kahpwal kohte, kitail pahn men meteikan en wehwehkin kitail. Medewehla mehn Israel ko. Re ahneki lokolok laud nan Isip, ahpw mwohn re pedolong nan Sapwen Inowo, Siohwa ketin katamankihong irail me ren dehr kakeptakaila mohngiongirail. Siohwa ketin kasik mehn Israel ko en sewese riarail ko me semwehmwe oh luwet.—Deud. 15:7, 11; Lip. 25:35-38.
9 Kitail en dehr mwadang en kapwukoahkin riatail kan arail kahpwal kan oh lemeleme me kitail mwahusang irail. Kitail men sewese riatail kan ni arail kin luwetala. (Sohp 33:6, 7; Mad. 7:1) Karasepe, medewehla ma emen tangahki were skuhder, aksident oh ohla, oh aramas tangahkihla imwen wini. Ni ahnsou me e lella mwo, ia duwe, toahkte ko pahn kauwehla mwahl ahnsou en diarada ihs me re pahn kapwukoahki aksidento? Soh. Re pahn mwadangete sewese. Pil duwehte kitail. Ni ahnsou me riatail men kin luwet, dahme e keieu anahne iei atail en sewese pwehn kehlail nan pwoson.—Wadek 1 Deselonika 5:14.
10 Ekei riatail Kristian kan ele mwomwen luwet. Ahpw ma kitail medemedewe duwen arail irairo, mwein kitail pahn diarada me re sohte uhdahn luwet. Medewehla ia uwen apwal ong sister men me eh pwoud sohte kin papah Siohwa. Ahpw ia duwen nohno men me sohte eh pwoud me kin doadoahk laud pwehn pein apwalihada nah seri kan oh kin kohlahte towehda mihting kan? De pil medewehla irail me pwulopwul kan nan sukuhl me rahn koaros kin pelianda kasongosong kan en sohla iang padahk mehlel. Irail koaros kin ahneki limpoak mehlel ong Siohwa oh koasoanehdi teng ren loalopwoat ong ih. Ma kitail medewehla soahng koaros me riatail kan kin wiewia pwehn papah Siohwa, met pahn sewese kitail en kilangwohng irail me re “kepwehpwehkihla pwoson,” mehnda ma re mwomwen luwet.—Seims 2:5.
Ahnsou Dah me Keieu Mwahu en Koasoi?
17 Kapahmen en ohl me mwemweitla rehn Sohp iei Elihu, emen kisehn Eipraam. E kin rongorong ni Sohp oh ohl silimeno ar wie koasoakoasoi. E sansal me e kin rongorong kanahieng dahme irail ndinda pwehki en kak kihda kaweid me kadek ahpw ni inen me sewese Sohp en kapwungala eh madamadau. (Sohp 33:1, 6, 17) Dahme keieu kesempwal ong Elihu iei en kawauwihala Siohwa ah kaidehn pein ih de emen tohrohr. (Sohp 32:21, 22; 37:23, 24) Sang ahn Elihu mehn kahlemeng kitail sukuhlki me mie ahnsoun nennenla oh rong. (Seims 1:19) Kitail pil sukuhlki me ni atail pahn kihda kaweid, oh dahme keieu kesempwal ong kitail iei en kawauwihala Siohwa, ahpw kaidehn pein kitail.
18 Kitail kak kasalehda me kitail kin kesempwalki kisakis en koasoi sang ni atail idawehn kaweid en Paipel kan duwen ahnsou dah oh ia duwen atail en koasoi. Koht ketin doadoahngki Nanmwarki loalokongo Solomon en ntingihedi: “Lokaia ehu ni ahnsou me konehng duwehte apel me wiawihkihda kohl oh kapwatkihda silper.” (Lep. Pad. 25:11, NW) Ni atail rong kanahieng dahme meteikan nda oh kitail medewe mwohn atail koasoi, atail lokaia kan kak duwehte apel ko me wiawihkihda kohl—kesempwal oh kaselel. Eri, mendahki ma kitail perenki koasoi de sohte kalapw koasoi, atail koasoi kan pahn kakehlakahda meteikan, oh Siohwa pahn ketin kupwurperenkin kitail. (Lep. Pad. 23:15; Ep. 4:29) Ih ahl wet me keieu mwahu en kasalehda atail kalahnganki kisakis wet sang rehn Koht!
Ire Kesempwal kan
Pousehlahte Keiong Mpen Siohwa
10 Pil duwehte, kitail anahne nsenohki duwen mwomwatail. Ahpw kitail sohte anahne mwomwehda pwulopwul sang uhdahn atail sounpar. Paipel mahsanih: “Mour werei iei ketingpen pwung; moangepwet iei kapwat lingan ehu.” (Lep. Pad. 16:31) Siohwa ketin medewe me soangen aramas dah kitail kin kesempwal sang mwomwatail, oh kitail en pil ahneki soangen madamadau wet. (Wadek 1 Piter 3:3, 4.) Eri ia duwe, kitail anahne pilada en ale wiepen wini de leke masatail de paliwaratail pwehn kamwahwihala mwomwatail mehnda ma soahng pwukat keper ong atail roson de mouratail? Sohte lipilipil atail sounpar de ia uwen roson en paliwaratail, atail kaselel kin kohsang atail ahneki ‘peren me KAUN-O pahn ketikihong kitail.’ (Neh. 8:10) Nan sampah kapw, kitail pahn ahneki roson unsek oh pil pwurehng pwulopwulla. (Sohp 33:25; Ais. 33:24) Lao lel ahnsowo, kitail anahne wiahda pilipil mwahu kan oh pwoson sapwellimen Siohwa inou kan. Met pahn sewese kitail en perenki mour ahnsou wet oh sohte kin nsenohkihte roson en paliwaratail.—1 Tim. 4:8.
JANUARY 8-14
SOAHNG KESEMPWAL KAN SANG MAHSEN EN KOHT | SOHP 34-35
Ni Mour Eh Mwomwen Sapahrek
Soangen Koht Dahmen Ih?
Koht kin ketin ahnsou koaros wia dahme pwung. Ni mehlel, “Koht Wasa Lapalahpie sohte kin ketin wia me suwed; e sohte kin ketin kupwur sapahrek ong emen.” (Sohp 34:12) Sapwellime kadeik kan me pwung, duwehte dahme sounmelkahkao koasoia ni eh patohwan me Siohwa “kin ketin kapwungkihla pwung mehlel aramas akan.” (Melkahka 67:4) Pwehki Siohwa kin ketin “kasawih nan mohngiong en aramas akan,” aramas sohte kak pitiheki arail tiahk en mwalaun kan, pwe e kin kak ketin mwahngih dahme mehlel oh kin ketin wia kadeik ni pwung ahnsou koaros. (1 Samuel 16:7) Patehng met, Koht kin ketin mwahngih wiewia sapahrek oh suwed koaros nan sampah, oh e ketin inoukihda me kereniong e pahn “ketin koahkoahsang aramas suwed kan nan sahpwo.”—Lepin Padahk 2:22.
Dahme Pahn Sohrala ni Wehin Koht Eh Pahn Kaunda?
5 Dahme Siohwa pahn ketin wia? Ahnsou wet Siohwa kin ketin mweidohng aramas suwed kan ahnsou mwahu ren wekila. (Ais. 55:7) Mendahki koasoandien sampah wet pahn kereniong sohrala, re saikinte pakadeikda. Ahpw, dahme pahn wiawihong irail kan me sohte wekila oh me kin utung koasoandien sampah wet lella rahnen kahn kamakam kowahlapo? Siohwa ketin inoukihda me e pahn ketikihsang aramas suwed koaros nin sampah. (Wadek Melkahka 37:10.) Rahnwet, me tohto kin esehlahr arail en ekihla soahng suwed kan me re kin wia, oh re sohte kalapw ale kalokepen ar wiewia kan. (Sohp 21:7, 9) Ahpw Paipel katamankihong kitail: “E kin ketin mwasamwasahn kahk koaros me aramas kin wia. Sohte rotorot ehu me kak ekihsang aramas dipan emen mwohn silangin Koht.” (Sohp 34:21, 22) Eri kitail sohte douluhl kak ekihsang Siohwa mehkot. E kak ketin mahsanihada soahng koaros me aramas suwed kan kin wiewia. Mwurin Armakedon, kitail ele pahn rapahki ia aramas suwed pwukat, ahpw kitail sohte pahn diar irail. Re pahn sohrala douluhl!—Mel. 37:12-15.
Ke Pahn Dipekelekelki Sises?
19 Kitail kin kilang soangen kahpwalo rahnwet? Ei. Me tohto rahnwet kin dipekelekelki atail kin kasalehda soupoupali nan palien politik. Irail kin men kitail en iang usuhs. Ahpw ma kitail pilada aramas en wia atail kaun, kitail kin soikala Siohwa. (1 Sam. 8:4-7) Aramas ele pil medewe me kitail anahne kauwada imwen sukuhl oh imwen wini kan oh pil wia soahng mwahu teikan pwehn sewese atail wasa kan. Irail kin dipekelekel pwehki kitail kin nsenohkihte atail doadoahk en kalohk, a kaidehn en kamwahwihala atail kahpwal en ahnsou wet.
20 Ia duwen atail en dehr dipekelekel? (Wadek Madiu 7:21-23.) Dahme kitail en keieu nsenohki iei en wia doadoahko me Sises ketin kehkehlingkihong kitail en wia. (Mad. 28:19, 20) Kitail en dehr kedirepwkihla atail songosong en kamwahwihala kahpwal kan en sampah wet. Kitail kin poakohng aramas akan oh nsenohki arail kahpwal kan, ahpw kitail ese me ahl keieu mwahu en sewese mehn mpatail kan iei en padahkihong irail duwen Wehin Koht oh sewese irail en kakairada nanpwungmwahu rehn Siohwa.
Ire Kesempwal kan
Kapinga Siohwa ni Omw Toukihda Pein Uhk!
3 Mwahnakapw men me adaneki Elihu kin wie rongorong ahn Sohp oh ohl silimen ko ar koasoakoasoi. Ni arail nek arail koasoakoasoi, Elihu idek rehn Sohp duwen Siohwa: “Omwi pwung kin sewese Koht? Sohte mehkot me Koht kin ketin anahne sang rehmwi.” (Sohp 35:7) Ia duwe, Elihu pil kin nda me atail nantihong papah Koht sohte kesempwal? Soh. Siohwa sohte ketin kapwungala Elihu, duwehte me e ketin wia ong ohl silimeno. Elihu kasalehda ire ehu me weksang ahn ohl silimen ko. E nda me Siohwa sohte ketin anahne kitail en kaudokiong ih. Siohwa sohte ketin anahne mehkot. Sohte mehkot me kitail kak wia pwe en kahrehiong ih en ketin kepwehpwehla de kehlailla. Ni mehlel, irair kaselel de koahiek me kitail ahneki kohsang rehn Koht, oh e kin ketin tehk ia duwen atail kin doadoahngki met.
JANUARY 15-21
SOAHNG KESEMPWAL KAN SANG MAHSEN EN KOHT | SOHP 36-37
Kahrepen Omw Kak Likih Sapwellimen Koht Inou en Mour Soutuk
Kitail Uhdahn Kak Wehwehkihla Koht?
KOHT EH KETIKET KOHKOHLAHTE: Paipel padahngki me Koht wia “Koht poatopoat emen, oh pahn wia Koht kohkohlahte.” (Melkahka 90:2) Met wehwehki me Koht sohte tapwi oh sohte imwi. Ong me pid dahme aramas kin medewe, “kitail sohte kak wehwehkihla . . . tohtohn sapwellime sounpar akan.”—Sohp 36:26.
Ia duwen omw paiekihda: Koht ketin inoukihong uhk mour soutuk ma ke uhdahn esehla ih. (Sohn 17:3) Ia duwen inou wet eh pahn mehlel ma pein Koht sohte mour kohkohlahte? ‘Nanmwarki poatopoato’ kelehpw me kak ketin kapwaiada soangen inou wet.—1 Timoty 1:17.
Ke Kin Kalahnganki Soahng Mwahu kan me Koht Ketikihong Uhk?
6 Pihl kin mi nin sampah pwehki sampah mi wasa ehu me pwungiong karakar en ketipino. Ma sampah ekiste karanihala ketipino, pihl koaros pahn karakarala oh madekengla, oh sohte me kak mour pohn sampah. Ma sampah pil ekiste dohsang ketipino, pihl kan koaros pahn tenla, kahrehiong sampah en wiahla lapalahn pwonopwon en ais. Pwehki Siohwa ketikihdi sampah wasa me konehng, pihl kan pohn sampah kak weliweliali oh kahrehda en mie mour. Ketipino kin kakarakarihada pilen nansed oh nansapw oh ihkada pwehn wiahla depwek kan. Ehuehu sounpar, uwen lauden pihl me ketipino kin ihkada laudsang pihl me mi nan lehn pihl koaros nin sampah. Pihlo kin mi nan wehwe mpen rahn eisek mwohn e mweredi nin duwen keteu de sinoh. Pihlo eri pwuralahng nan sehd de pillap kan. Soangen koasoandi wet kin pwurupwurehng wiawi. Siohwa ketin wiahda soangen koasoandi wet pwe pihl en kin mi pohn sampah ahnsou koaros. Met kadehdehda me Siohwa ketin sapwellimanki erpit oh manaman.—Sohp 36:27, 28; Ekl. 1:7.
Pousehlahte Kakehlailih Omw Koapworopwor
16 Atail koapworopwor en mour soutuk wia kisakis kesempwal ehu sang rehn Koht. Kitail kin kasikasik ahnsou kaselel ehu me kohkohdo, ahnsou ehu me kitail kak kamehlele pahn leledo. Koapworopwor wet kin rasehng angke ehu ong kitail me kin katengekitaildi pwe kitail en kak dadaur pahn kahpwal kan, kalokolok kan, oh pil mehla. E pil rasehng atail lisoarop, me kin pere atail madamadau pwe kitail en kak soikala dahme sapwung oh wia dahme pwung. Koapworopwor me Paipel padahkihong kitail sewese kitail en kalaudehla atail karanihala Koht oh pil kasalehiong kitail ia uwen Koht eh ketin poakohng kitail. Kitail kin uhdahn paiekihda ni atail kin pousehlahte kakehlailih atail koapworopwor.
Ire Kesempwal kan
it-1 492
Wiepen Peuse Ire kan
Aramas kin peusehiong meteikan ire oh madamadau kan ni soangsoangen ahl akan nan sapwen mahs kan me Paipel kasalehda. Eri pali laud en rohng me kohsang nan sahpw ehu oh sapwen liki kan kin kohpeseng sang ni aramas ar kin koasoiaiong meteikan. (2Sa 3:17, 19; Sop 37:20) Kahrehda sounseiloak kan me kin kalapw seiloak ni pwihn kan kin peusehiong meteikan rohng en sahpw doh kan nan kahnimw kan de wasa kan me re kin lel ie ni arail kin uhdi pwehn ale mwenge, pihl de soahng teikan me re anahne. Pwehki sapwen Palestin kin mi wasa ehu me Eisia, Aperika oh Iurop pidakihpene, pwihnen seiloak kan kin kalapw seiloakdo wasao sang wasa doh kan. Kahrehda tohnsahpwo kin mwadangete alehdi ire kan me pid mwekid kesempwal kan en sapwen liki kan. Eri rohng kan, rongen sahpwo de rongen sapwen liki kan kin kalapw alahldi nan wasahn netinet kan nan kahnimwo.
JANUARY 22-28
SOAHNG KESEMPWAL KAN SANG MAHSEN EN KOHT | SOHP 38-39
Ke Kin Wiahda Ahnsou en Kasawih Kepikipik kan?
Ke Pahn Men Awiawihete Siohwa?
7 Ni ahnsou me Paipel kawehwehda ia duwen Siohwa eh ketin kapikada sampah, e kasalehda me e ketin “koasoanediong sampah mwomwe,” padokedi “uhr kan me kin utungada” oh “koasoanehdi takai me wia pwukakeimw.” (Sohp 38:5, 6) E pil ketin doadoahngki ahnsou pwehn tehk sapwellime doadoahk. (Sen. 1:10, 12) Ke kak medewehla ia en tohnleng ko pepehm ni arail kilang soahng kapw kan koaros me Siohwa ketin kapikada? Ia uwen arail perenkihda! Pwehki met, irail tepida “ngisingiski ar peren.” (Sohp 38:7) Dahme kitail sukuhlki? Erein sounpar kid kid kei me Siohwa ketin kapikkihda sampah, usu kan, oh soahng koaros me momour, ahpw ni eh ketin kasawih soahng kan me e ketin kapikada ni keneinei, e ketin mahsanih me e “inenen mwahu.”—Sen. 1:31, NW.
Kaiasada Kin Kasalehda Sapwellimen Koht Limpoak, Erpit, oh Kanengamah
2 Keieu, Siohwa ketin kapikada sapwellime Ohlo, Sises. Mwuhr, ni eh ketin doadoahngki sapwellime Meseniho, Siohwa ketin kapikada “soahng teikan koaros,” iangahki tohnleng kan koaros. (Kol. 1:16) Sises perenki en iang Semeo ketin doadoahk. (Lep. Pad. 8:30) Oh tohnleng kan pil iang peren. Irail kilang ni ahnsou me Siohwa oh sapwellime Sounsawaso Sises, ketin wiahda nanleng oh sampah. Ia duwen arail mwekidki met? Irail “ngisingiski ar peren” ni ahnsou me sampah wiawihda, oh pousehlahte kapinga ehuehu sapwellimen Siohwa doadoahk en kepikipik, iangahki kaimwiseklahn sapwellime kepikipik, me iei aramas. (Sohp 38:7; Lep. Pad. 8:31) Ehuehu kepikipik kan kin kasalehda sapwellimen Siohwa limpoak oh erpit.—Mel. 104:24; Rom 1:20.
Kalaudehla Omw Sukuhlki Duwen Siohwa Sang Sapwellime Kepikipik kan
8 Siohwa ketin warohng kitail en likih ih. Siohwa ketin sewese Sohp en kalaudehla eh likih Ih. (Sohp 32:2; 40:6-8) Ni Siohwa eh ketin mahseniong Sohp, e ketin kasalehda soahng tohto me e ketin kapikada, iangahki usu kan, depwek kan oh piripir en lioal kan. Siohwa ketin mahsanih duwen mahn akan me duwehte kou lawalo oh pil oahs. (Sohp 38:32-35; 39:9, 19, 20) Soahng pwukat koaros sohte kadehdehdahte sapwellimen Koht manaman kaselel, ahpw e pil kasalehda sapwellime limpoak oh erpit laud. Pwehki ara koasoipene, Sohp sukuhlki en kalaudehla eh likih Siohwa. (Sohp 42:1-6) Duwehte met, ni atail sukuhlki kepikipik kan, kitail kin tamataman me Siohwa uhdahn erpit oh manaman sang kitail. E pil kak oh pahn ketikihsang atail kahpwal kan koaros. Ire mehlel wet kak sewese kakehlaka atail likih ih.
Ire Kesempwal kan
it-2 222
Sounwiahda Kosonned
Siohwa nin duwen Sounwiahda Kosonned. Siohwa kelehpw me sapwellimanki pwuhng en ketikihda kosonned akan nanleng oh sampah. Ih me ketin warohng ale kapingki kosonned akan me kin kaweid mwekimwekid en kepikipik kan me sohte ar mour (Sop 38:4-38; Me 104:5-19), oh mahn akan. (Sop 39:1-30) Pwehki aramas wia sapwellimen Siohwa kapikipik, irail pil anahne idawehn sapwellimen Siohwa kosonned pwukat. Oh pwehki arail kapikipikda en ese tiahk, kak wehwehki mehkan oh madamadau, oh tehk arail anahn en esehla Koht, eri re pil anahne peikiong sapwellimen Koht kosonned kan me pid tiahk de wiewia. (Ro 12:1; 1Ko 2:14-16) Patehng met, sapwellimen Siohwa kosonned kin pil kaweid irail ngehn kan, de tohnleng kan.—Me 103:20; 2Pi 2:4, 11.
Sapwellimen Siohwa kosonned akan me kin kaweid mwekimwekid en kepikipik kan sohte kak sapwungala. (Ser 33:20, 21) Nan sampah oh lahng pwon, sapwellime kosonned akan kin uhdahn likilik oh sohte kin wekila. Kahrehda ni saintis kan ar kin wehwehki duwen kosonned pwukat, re kak kapatahda ni oaritik oh pwung mwekimwekid en maramo, sampah oh planet teikan, oh audepen lahng teikan. Ma aramas emen pahn uhwongada kosonned pwukat, e pahn mwadangete lelohng kahpwal kan. Pil duwehte sapwellimen Koht kosonned akan me pid tiahk oh wiewia, sohte me kak wekidala de soikala de mwamwahliki. Imwilahn kauwehla kosonned pwukat pil duwehte imwilahn kauwehla sapwellime kosonned akan me kin kaweid mwekimwekid en kepikipik kan, mendahki kalokepe sohte pahn mwadang wiawi. “Kumwail sohte kak pitih Koht. Pwe dahme aramas kin kamwarak, ih me e pahn pil dolung.”—Kal 6:7; 1Ti 5:24.
JANUARY 29–FEBRUARY 4
SOAHNG KESEMPWAL KAN SANG MAHSEN EN KOHT | SOHP 40-42
Mehn Kasukuhl kan Sang Dahme Sohp Lelohng
“Ihs me Ese Duwen Kupwur en Kaun-o?”
4 Ni atail kin doudouloale sapwellimen Siohwa wiewia kan, kitail anahne soikala madamadau me kitail kak kadeik Koht nin duwen aramas ar kin medewehki dahme pwung de sapwung. Madamadau wet kin dokedoke sapwellimen Siohwa mahsen me kileldi nan Melkahka 50:21 me mahsanih: “Ke ahpw kihkihong me I duwehte kowe.” E pahrekiong dahme ohl emen me sukuhlki laud duwen Paipel koasoia sounpar 175 samwalahro: “Aramas akan kin kadeik Koht sang pein arail koasoandi kan duwen dahme pwung oh sapwung oh re kin medewe me Koht anahne pil peikiong soangen kosonned kan me re medewe aramas akan anahne peikiong.”
5 Kitail anahne kanahieng dehr mweidohng atail koasoandi kan duwen dahme pwung oh sapwung oh atail ineng kan en kaunda atail madamadau duwen Siohwa. Dahme kahrehda met kin kesempwal? Ni atail kin onopki iren Paipel kan, ekei sapwellimen Siohwa wiewia kan ele mwomwen sohte pwungiong atail madamadau me sohte unsek oh sohte kin ese soahng koaros. Mehn Israel kan mahs ahnekihda soahng madamadau wet oh kin medewe me dahme Siohwa ketin wiahiong irail me sapwung. Tehk dahme Siohwa mahsanihong irail: “Kumwail kin nda, ‘Dahme KAUN-O, Wasa Lapalahpie, kin ketin wia me sapwung.’ Kumwail mehn Israel kan, kumwail rong ie! Ia duwe, kumwail lemeleme I kin wia me sapwung? Soh! A me kumwail kin wia me sapwung!”—Esek. 18:25.
6 Ehu ahl me kitail en dehr kadeik Siohwa nin duwen atail kin madamadau ong dahme pwung oh sapwung iei en pohnese me atail madamadau kan sohte unsek oh kitail pil sohte ese soahng koaros. Sohp anahne sukuhlki duwen met. Erein ahnsou me e mihla nan kahpwal, e solahr ahneki koapworopwor oh kin medemedewehte pein ih. E solahr medewe duwen ire kesempwal kan. Ahpw Siohwa ni limpoak ketin sewese ih en kalaudehla eh madamadau. Ni eh ketin keinemwe rehn Sohp soangsoangen peidek kan me tohto sang 70 me Sohp sohte kak sapengla, Siohwa ketin kasalehda me mie soahng kan me Sohp sohte wehwehki. Sohp eri ni aktikitik wekidala eh madamadau.—Wadek Sohp 42:1-6.
Medemedewehte Ire Kesempwalo
12 Ia duwe, Siohwa sohte ketin kasalehda kadek ni eh mahseniong Sohp ni ahl wet mwurin lokolok koaros me e lelohng? Soh, oh pein Sohp pil sohte medewe met. Sohp wehwehki oh kesempwalki sapwellimen Siohwa kaweido. E pil nda: “I patohwan namenengkilahr mehkoaros me I patohwandahr, oh I kolulahr nan pwelpar oh pehs pwukat.” (Sohp 42:1-6) Mwoweo, mwahnakapw men me adaneki Elihu pil sewese Sohp en kapwungala eh madamadauo. (Sohp 32:5-10) Sohp rong kaweid erpito oh kapwungala eh madamadauo. Siohwa ketin mahsanihada duwen Sohp eh wekila oh kasalehiong meteikan me e ketin kupwurki ahn Sohp lelepek.—Sohp 42:7, 8.
“Koapworopworki Siohwa”
17 Sohp iei emen sapwellimen Siohwa ladu kan me ahnekihte eimah oh kehlailte erein kahpwal laud kan. Nan nah kisinlikou ong mehn Ipru ko, wahnpoaron Pohl koasoia duwen me tohto teikan, oh kahdanekin irail ‘sounkadehde tohto me duwehte depwek kalaimwun ehu.’ (Ipru 12:1) Irail koaros lelohng kahpwal laud kan, ahpw erein arail mour, irail lelepekohngete Siohwa. (Ipru 11:36-40) Ia duwe, arail dadaur oh doadoahk laud sohte katepe? Uhdahn soh! Mendahki erein arail mour irail sohte kilang pweidahn sapwellimen Koht inou kan koaros, re pousehlahte koapworopworki Siohwa. Oh pwehki re kamehlele me Siohwa ketin kupwurkin irail, re uhdahn likih me re pahn kilang pweidahn inou ko. (Ipru 11:4, 5) Arail mehn kahlemeng kak kakehlakahda atail en koasoanehdi teng en pousehlahte koapworopworki Siohwa.
18 Rahnwet kitail mi nan sampah ehu me wie susuwedlahte. (2 Tim. 3:13) Sehdan saikinte uhdihsang kasonge sapwellimen Koht aramas akan. Mendahki kahpwal kan me mi mwohtail, kitail en koasoanehdi teng en doadoahk laud ong Siohwa, oh uhdahn kamehlele me “kitail kin koapworopworki Koht ieias.” (1 Tim. 4:10) Tamataman, dahme Koht ketikihong Sohp mwuhr kadehdehda me “Siohwa me diren limpoak oh kadek kalahngan.” (Seims 5:11) Kitail en pil loalopwoatohngete Siohwa, oh kamehlele me e pahn ketin katingih “irail kan me kin ngoangki rapahki ih.”—Wadek Ipru 11:6.
Ire Kesempwal kan
it-2 808
Kapailok
Sohp wia ohl pwung men me kin kolokolete eh lelepek erein aramas akan kin kapailoke ih. Ahpw e ahnekihda madamadau sapwung oh wiahda sapwung ehu me anahne kapwungpwungla. Elihu ndahki ih: “Mie aramas emen me duwehte Sohp, me kin nimala kapailok rasehng pihl?” (Sop 34:7, NW) Eri Sohp tepida nohn nsenohki en kasalehda kahrepen eh pwung oh kin men kasansalehda pein eh pwung laudsang sapwellimen Koht pwung. (Sop 35:2; 36:24) Ni kompoakepahn silimeno ar kin kapailoke, Sohp kin medewe me kapailok ko kohwong ih kelehpw, ahpw kaidehn ong Koht. Met kahrehda en duwehla aramas emen me kin mweidohng meteikan en kapailoke oh mwamwahliki ih oh kin perenki met, duwehte eh kin perenki nimala pihl. Mwuhr Koht ketin kawehwehiong Sohp me uhdahno, sounkepit pwukat kin wiahda likamw duwen Koht. (Sop 42:7) Met duwehte ni ahnsou me mehn Israel kan men emen en wiahla arail nanmwarki, Siohwa ketin mahsanihong soukohp Samuel: “Pwe kaidehk kowe me re soikalahr, pwe ngehi me re soikalahr I en dehr wia ar nanmwarki.” (1Sa 8:7) Oh Sises mahsanihong sapwellime tohnpadahk kan: “Wehi koaros pahn kailongkin kumwail [kaidehn pwehki kumwail, ahpw] pwehki mwarei.” (Md 24:9) En Kristian men eh kin tamataman mepwukat pahn kahrehiong en kak dadaurete ni madamadau pwung ni meteikan ar kin kapailoke, oh e pahn kak alehdi ketingpen eh kin dadaurete.—Lu 6:22, 23.
FEBRUARY 5-11
SOAHNG KESEMPWAL KAN SANG MAHSEN EN KOHT | MELKAHKA 1-4
Uhpalihki Wehin Koht
“I Pahn Itikada Wehi Koaros”
8 Ia duwen aramas akan ar mwekidki rohng wet? Pali laud en aramas akan soikala rohng wet. (Wadek Melkahka 2:1-3.) Wehi kan mwoarongadahr. Re sohte pwungki Kaun me Siohwa ketin idihada. Irail sohte medewe me rohng en Wehio me kitail kin kalohki wia “rongamwahu” ehu. Ni mehlel, ekei koperment kan kin keinapwidi atail doadoahk en kalohk. Mehnda ma tohtohn kaun en wehi pwukat nda me dene re kin papah Koht, irail sohte men pwilikihdi arail manaman en kaunda. Eri duwehte dahme kaun akan ni mwehin Siseso wia, kaun akan rahnwet kin uhwong sapwellimen Siohwa me Keidio sang ni arail uhwong sapwellime tohnpadahk lelepek kan.—Wiewia 4:25-28.
Kolokol Omw Soupoupali nan Sampah Saminimin Ehu
11 Poakohng kepwe. Ma neitail mwohni oh atail kepwe ar wiahla mehkan me uhdahn kesempwal ong kitail, ele kitail pahn diarada me e apwal en kolokol atail soupoupali. Mwurin pahr 1970, Sounkadehdehn Siohwa tohto nan Malawi anahne pwilikihdi soahng koaros me re ahneki pwehki ar sohte iang pwihn en politik ehu. Ahpw ekei sohte men uhdihsang arail ahneki mour nsenamwahu. Sister men me adaneki Ruth nda, “Ekei iang kiht kalipilipala ahpw mwuhr re iangala pwihn en politiko oh pwurala imwarail ko pwehki re sohte men dadaur pahn mour apwal en nan wasa me aramas kalipilipala ko kousoan ie.” Ahpw pali laud en sapwellimen Koht aramas akan sohte duwehte irail. Re kolokol arail soupoupali, mehnda ma imwilahn arail wia met kahrehiong neirail mwohni ko en tikitikla de re luhssang soahng koaros me re ahneki.—Ipru 10:34.
Ire Kesempwal kan
it-1 425
Kilin Krein
Kilin krein kin menipinip oh kin kidimpene weren krein kan me duwehte parli oh wihd. Mendahki Paipel kin doadoahngki kilin krein nin duwen karasaras kei, karasaras pwukat kin kohsang en mehn mahs kan ar kin kalapw wia doadoahk en kihsang kilin krein. Mwurin krein kan ar kin dondolda oh rikirikpene, kilin krein wet me aramas sohte kak kang me kin kidimpene krein kin solahr katepe. Ihme kahrehda e kin wia karasaras mwahu ong mehkot me marahra oh sohte katepe, mehkot me kin katohrohrsang me mwahwo oh kosokosla.
Keieu, irail kin anahne koahkoahsang kilin kreino sang ni weren kreino. Mwuri ni arail kin kesehda krein kan nan wehwe, kisiniengo kin ipirala duwehte pwelpar kilin krein kan me marahra. (Kilang WINNOWING.) Met karasahda mwahu ia duwen Siohwa Koht eh kin ketin katohrehsang irail me kesehla oh uhwongada kaudok mehlel sang nanpwungen sapwellime aramas akan, oh pil ia duwen eh pahn ketin kasohrehla aramas suwed kan oh wehi kan me kin uhwongada ih. (Sop 21:18; Me 1:4; 35:5; Ais 17:13; 29:5; 41:15; Os 13:3) Wehin Koht pahn kamwutepene eh imwintihti kan en duwehla kisin diper kan oh mengeiong kisiniengo en ipirala duwehte kilin krein kan.—Da 2:35.
Kilin krein me solahr katepe ko kin kalapw rikirikpene oh isihsla pwe kisiniengo en dehr ipirala oh kasaminehla koasoakoasoak en kreino. Rasehng met, Sohn Sounpapidais kohpada me tohn pelien lamalam likamw oh suwed kan pahn mwomwkihla kisiniei—ni Sounkamwomwalao, Sises Krais, eh pahn ketikipene wihd kan, “ahpw kilin wihd ko, e pahn ketin isingkihla kisiniei me sohte kak kunla.”—Md 3:7-12; Lu 3:17; kilang THRESHING.
FEBRUARY 12-18
SOAHNG KESEMPWAL KAN SANG MAHSEN EN KOHT | MELKAHKA 5-7
Kolokol Omw Loalopwoat Mendahki Wiewiahn Meteikan
Ia Duwen Wadawad en Paipel Eh Kak Kakehlailihiuk?
7 Mie pak me kompoakepahmw men de omw peneinei kamedekeiukala? Ma ei, ke pahn paiekihda ma ke onopki dahme Nanmwarki Depit wia ni ahnsou me nah ohlo Apsalom kamedekihala ih oh song en wiahla nanmwarki.—2 Sam. 15:5-14, 31; 18:6-14.
8 (1) Kapakap. Ni omw medewe duwen koasoipen Paipelo, padahkihong Siohwa ia omw pepehm ong soahng suwedo me wiawihong uhk. (Mel. 6:6-9) Padahkihong ih ia uhdahn omw pepehm. Mwuri, peki Siohwa en ketin seweseiuk kilang kaweid oh ire mehlel kan me kak seweseiuk ni omw song en apwalihala kahpwalo.
Tehk Mwahu me Dahme Ke Kamehlelehier Uhdahn Mehlel
3 Atail pwoson anahne poahsoankihda laudsang ihte limpoak me mi nanpwungen sapwellimen Koht aramas akan. Dahme kahrehda? Pwehki ma atail pwoson kin poahsoankihdahte soangen limpoak wet, kitail kakete mwadang sohla ahneki pwoson. Karasepe, kitail kakete uhdihsang papah Siohwa ma riatail Kristian men—mwein elder men de pioneer men—wiahda dihp laud. Kitail pil kakete uhdihsang papah Siohwa ma riatail Kristian men kamedekeikitailla de wiahla emen me kesehla oh uhwongada kaudok mehlel, oh nda me dahme kitail kin kamehlele sapwung. Eri ma kitail men atail pwoson en kehlail, e anahne poahsoankihda atail nanpwungmwahu kehlail rehn Siohwa. Ma ke kin ihte pwoson Koht pwehki dahme meteikan kin wia, ahpw kaidehn pwehki omw nanpwungmwahu rehn Siohwa, omw pwoson sohte pahn uhdahn teng. Omw pepehm ong Siohwa oh sapwellime aramas akan kak seweseiuk en ekis kakairada omw pwoson. Ahpw e pil uhdahn kesempwal en onopki Paipel ni mehlel, wehwehki dahme ke sukuhlki, oh wia roporop pwe ken uhdahn kamehlele me ke kin sukusukuhlki dahme mehlel duwen Siohwa. Ke anahne uhdahn kamehlele me Paipel kin padahkihong kitail dahme mehlel duwen Siohwa.—Rom 12:2.
4 Sises mahsanih me ekei pahn “perenkihda” padahk mehlel, ahpw arail pwoson pahn luwetala ni arail lelohng kahpwal kan. (Wadek Madiu 13:3-6, 20, 21.) Ele irail sohte wehwehki me irail kan me kin idawehn Sises pahn kin lelohng kahpwal. (Mad. 16:24) De mwein re medewe me en wia Kristian men kin wehwehki me re sohte pahn ahneki kahpwal, de me Koht pahn ahnsou koaros ketikihsang arail kahpwal kan. Ahpw nan sampah rahnwet, e pahn mie kahpwal kan. Soahng kan kak wekila nan atail mour oh kahrehiong atail peren en tikitikla.—Mel. 6:6; Ekl. 9:11.
Ire Kesempwal kan
it-1 995
Sousou
Nan Rom 3:13, wahnpoaron Pohl doadoahngki Melkahka 5:9 pwehn karasahiong nan kepinweren aramas suwed oh likamw kan, “sousou ehu me sansara.” Duwehte sousou sansara ehu me kin audaudki soahng kan me mehla oh ohla, kepinwararail kin sarapeseng pwehn koasoia soahng kan me kak kemehla oh kauwehla aramas.—Pil kilang Md 15:18-20.
FEBRUARY 19-25
SOAHNG KESEMPWAL KAN SANG MAHSEN EN KOHT | MELKAHKA 8-10
“Maing Siohwa, I Pahn Patohwan Kapinga Komwi”!
Kesempwalki Omw Pwukoa nan Sapwellimen Siohwa Peneinei
6 Siohwa ketin kaunopada atail wasahn kousoan ehu me kaselel. Ahnsou reirei mwohn eh ketin kapikada tepin ohlo, Siohwa ketin kaunopada sampah pwe aramas akan en kousoan loale. (Sohp 38:4-6; Ser. 10:12) Pwehki sapwellime kadek oh sapan, Siohwa ketin kapikada soahng mwahu tohto pwe kitail en perenki. (Mel. 104:14, 15, 24) Ekei pak, e kin ketikihong ahnsou en medewe soahng kan me e ketin kapikada oh ketin “kupwurperenkihda wiepen nin lime” kan. (Sen. 1:10, 12, 31) E ketikihong wahupen aramas sang ni eh ketikihong irail manaman “en kaunda” sapwellime kepikipik kaselel kan koaros nin sampah. (Mel. 8:6) Kupwuren Koht iei me aramas unsek kan en perenki apwalih sapwellime kepikipik kaselel koaros kohkohlahte. Ia duwe, ke kin kalapw kalahngankihong Siohwa sapwellime inou kaselel wet?
Ke Kin Kalahnganki Soahng Mwahu kan me Koht Ketikihong Uhk?
10 Ehu ahl me kitail kak kasalehda atail kalahnganki kisakis en lokaia iei sang ni atail kawehwehda atail kamehlele Koht ong irail kan me kin pwonopwonki dahme kahrehda kitail sohte kamehlele padahk me dene mour pein miehla. (Mel. 9:1; 1 Pit. 3:15) Irail kan me kin utung padahk wet kin nda me sampah oh mour pein miehla. Ma kitail doadoahngki Paipel oh ekei ire kan me kitail koasoiapenehr nan iren onop wet, kitail kak uhki Samatailo nanleng oh kawehwehiong irail kan me men rong dahme kahrehda kitail kamehlele me Siohwa iei Sounkapikpen nanleng oh sampah.—Mel. 102:25; Ais. 40:25, 26.
Ke Kin Wia “Mehn Kahlemeng Ehu . . . ni Lokaia”?
13 Koul sang nan mohngiong. Kahrepe keieu kesempwal me kitail kin koul nan atail mihting kan iei pwehn kapinga Siohwa. Sister men me adaneki Sara, sohte medewe me e uhdahn mai en koul. Ahpw, e men koul oh kapinga Siohwa. Eri ni eh kin kaunopada ong mihting kan, e pil kin kaunopada koul kan. E kin praktiski koul ko oh kilang ia duwen lokaia ko ar pahrekiong padahk en mihtingo. E koasoia: “Ni ei kin medemedewe duwen lokaia ko, I sohte kin nohn pwunodki ma I ngilamwahu de soh.”
Ire Kesempwal kan
it-1 832
Sendin Peh
Ni karasaras, Paipel kin mahsanih me Koht kin ketin kapwaiada sapwellime doadoahk sang ni sapwellime rekileng, de sang ni “pein nin lime,” karasepe, ni eh ketin ntingihdi Kosonned Eiseko pohn pelien takai patapat riapalio (Eks 31:18; Deu 9:10), ni eh ketin wiahda manaman akan (Eks 8:18, 19), oh ni eh ketin kapikada nanleng (Me 8:3). Sapwellimen Koht rekileng eh kin kadoadoahk nan kepikipik kan kin dokedoke sapwellime manaman. Met sansalda nan koasoipen kepikipik me mi nan pwuhken Senesis, wasa me e mahsanih me sapwellimen Koht manaman (ruʹach) kin “mwekimwekidseli pohnangin pihl akan.” (Sen 1:2, NW) Ahpw Palien Paipel ni Lokaiahn Krihs kin sewese kitail en wehwehki mwahu karasaras wet. Madiu kawehwehda me Sises ketin kauski ngehn suwed kan “sapwellimen Koht manaman,” a Luk padahkihong kitail me “sapwellimen Koht rekileng” me wia met.—Md 12:28; Lu 11:20.
FEBRUARY 26–MARCH 3
SOAHNG KESEMPWAL KAN SANG MAHSEN EN KOHT | MELKAHKA 11-15
Medewehla me Ke Mi nan Sapwellimen Koht Sampah Kapw me Popohl
Ire Kesempwal akan Sang Nan Pwuhk Keieu en Melkahka kan
11:3—Mehnia poahsoan akan me weweikdihsang? Met akan iei poahsoan akan me kousoan en pwihn en aramas kin pwilkihda—kosonned, kaweid oh kopwung. Ma mepwukat pahn pingada, ehupenehn pwihn en aramas ieu pahn sounsuwedla oh sohla pahn mie kopwungpwung. Nan soangen irair pwukat, “mehmen me pwung” pahn likih Koht ni unsek.—Melkahka 11:4-7.
Kak En Mie Sampah Ehu Me Sohte Tiahk Lemei?
Paipel inoukihda me ni ahnsou keren Koht pahn ketin kamwakelehsang tiahk lemei nin sampah. Sampah lemei en rahnwet kohkohlahng sapwellimen Koht “rahnen kadeik, iei rahnen kamwomwmwomwlahn me suwed kan.” (2 Piter 3:5-7) E pahn sohla aramas lemei me kin kaloke aramas teikan. Dahme kahrehda kitail kak likih me Koht kupwurki kauhdi de ketikihsang tiahk lemei?
Paipel mahsanih me Koht kalahdeki aramas kan me poakohng tiahk lemei. (Melkahka 11:5) Sounkapikadao kupwurki popohl oh pwung pahrek. (Melkahka 33:5; 37:28) Ihme kahrehda e sohte kupwurperenki oh sohte pahn ketin kanengamahiong aramas me kin wia tiahk lemei.
Ke Men Awiawih ni Kanengamah?
15 Dahme kahrehda Depit men awih ni kanengamah? E kihong kitail pasapengo nan melkahkaohte ni eh idek peidek wet pak limau: “Ia erein?” E nda: “I kin koapworopworki sapwellimomwi limpoak poatopoat; I kin peren, pwehki komwi pahn ketin doareiehla. Maing KAUN, I pahn kouliong komwi, pwehki sapwellimomwi kalahngan ong ie.” (Mel. 13:5, 6) Depit ese me Siohwa ketin poakohng ih oh pahn ahnsou koaros ketin loalopwoatohng ih. E tamanda ahnsou ko me Siohwa ketin sewese ih mwoweo, oh e kasikasik ahnsou ehu me Siohwa pahn ketikihsang eh kahpwal kan. Depit ese me mie katepen eh awih sapwellimen Siohwa kapai kan.
kr 236 par. 16
Wehio Kapwaiada Kupwuren Koht nin Sampah
16 Sohte Perki Mehkot. Eri, dahme Aiseia 11:6-9 kohpadahr pahn uhdahn pweida. Ohl akan, lih akan oh seri kan pahn sohte perki mehkot sohte lipilipil ia wasa re pahn kohla ie nin sampah. Soahng koaros me momour, sohte lipilipil ma aramas de mahn, pahn sohte keper ong meteikan. Song medewehla ni ahnsowo me ke pahn kilang sampah wet pwon eh pahn wiahla omw wasahn kousoan, wasa me ke kak pampap nan pillap akan, leh kan, oh nansed; kohdahla nin nahna kan; oh pil kohkohseli nan mohs akan ni omw sohte pahn douluhl perki mehkot. Oh pil nipwong kan, ke sohte pahn pwunod. Mahsen kan nan Esekiel 34:25 uhdahn pahn pweida, kahrehda sapwellimen Koht aramas akan pahn “kak silasil mwahu koukousoan nan mohs akan oh meir mwahu nanwel en tuhke kan.”
Ire Kesempwal kan
Ke Wiliakapwalahr?
12 Aramas tohto nan sampah kin ahneki soangen madamadau me Pohl kawehwehda. Re medewe me tiahk en mahs ehu en doadoahngki koasoandi oh kaweid kan nan atail mour oh emen en dehr idingki meteikan ren doadoahngki kaweid kan nan arail mour. Sounpadahk tohto oh pahpa oh nohno kan kin mweidohng seri kan ren wia sohte lipilipil dahme re men wia. Re pil padahkihong irail me emenemen ahneki saledek en pein pilada dahme pwung de dahme sapwung. Soangen aramas pwukat kin kamehlele me sohte ahl ehu en uhdahn ese dahme pwung oh dahme sapwung. Pil me tohto me dene re kamehlele Koht sohte kin medewe me re anahne wia dahme Koht ketin mahsanih me pwung. (Mel. 14:1) Soangen madamadau wet me keper ong Kristian kan. Ma kitail sohte kanahieng, kitail kakete sohla idawehn kaweid kan me kitail alehdi sang sapwellimen Koht pwihn oh mwein tepida kaulimki mehkoaros me kitail sohte pwungki. De mwein kitail sohte uhdahn pwungki kaweid en Paipel me kitail ale me pid mehn kamweit, doadoahngki Internet oh ale sukuhl laud.