IREN MEHN KASUKUHL 32

Wehin Koht Wie Kakaun ni Ahnsou Wet!

Me kin print

Wehin Koht tepida kakaun nanleng nan pahr 1914. Ih pil ahnsowo me imwin rahn en kaundahn aramas akan tepida. Ia duwen atail ese met? Kitail pahn kilang dahme Paipel kohpada oh dahme wiewiawi nin sampah oh mwomwen mwekid en aramas akan sangete pahr 1914.

1. Dahme Paipel kohpada?

Nan Paipel, pwuhken Daniel kasalehda me Wehin Koht pahn tepida kakaun ni imwin ahnsou ehu me kin adaneki “sounpar isuh [ahnsou isuh, NW].” (Daniel 4:16, 17) Sounpar epwiki kei mwuri, Sises mahsaniheki ahnsowo nin duwen “ahnsou me kileldier ong wehi kan,” oh e ketin padahngki me met saikinte imwisekla ahnsowo. (Luk 21:24) Kitail pahn tehkpene me ahnsou isuhwo imwisekla nan pahr 1914.

2. Dahme wiewiawi nin sampah oh ia mwomwen wiewiahn aramas akan sang pahr 1914?

Sapwellimen Sises tohnpadahk ko kalelapak reh: “Ia pahn kilel en omwi ketier oh imwin koasoandi en mwehi wet?” (Madiu 24:3) Sises ketin sapeng irail ni eh ketin kohpada soahng tohto me pahn wiawi mwurin eh tepida kakaun nanleng nin duwen Nanmwarkien Wehin Koht. Ekei soahng pwukat kin duwehte mahwen, lehk lapalap oh rerrer en sahpw. (Wadek Madiu 24:7.) Paipel pil kohpada me en aramas akan wiewia “ni imwin rahn akan” pahn kahrehiong mour en “apwal.” (2 Timoty 3:1-5) Irair pwukat oh wiewia pwukat uhdahn sansalda sangete pahr 1914.

3. Dahme kahrehda sampah suwedla douluhl sangete ahnsou me Wehin Koht tepida kakaun?

Mwurinte Sises eh ketin wiahla Nanmwarkien Wehin Koht, e ahpw ketila mahweniong Sehdan oh ngehn suwed kan nanleng. Sehdan eri lohdi nan mahweno. Paipel mahsanih me “e lekdekdiong nin sampah iangahki nah tohnleng kan.” (Kaudiahl 12:9, 10, 12) Sehdan uhdahn lingeringer pwehki e ese me e pahn kamwomwmwomwla. Eri e kin kahrehda medek oh lokolok nan sampah pwon. Met sewesei kitail en wehwehki ia kahrepen sampah eh uhdahn suwedla! Wehin Koht pahn kamwahwihala kahpwal pwukat koaros.

KALAUDEHLA OMW ESE MET

Tehk ia duwen atail ese me Wehio tepida kakaun nan pahr 1914 oh ia duwen met eh pahn kamwakid kitail.

4. Kokohp en Paipel me dokedoke pahr 1914

Kilang KISIN KASDO.

KISIN KASDO: God’s Kingdom Began Ruling in 1914 (5:02)

Koht ketin kahrehiong Nanmwarki Nepukadnesar en Papilon en mahs, en ouramankihda kokohp ehu. Ouramano oh kawehwe me Daniel wiahda kasalehda me met dokedoke kaundahn Nepukadnesar oh pil Wehin Koht.—Wadek Daniel 4:17.a

Wadek Daniel 4:20-26, oh mwuri doadoahngki koakon wet pwehn sapengala peidek pwukat:

(A) Dahme Nepukadnesar kilangada nan eh ouramano?—Kilang iretikitik 20 oh 21.
(B) Dahme pahn wiawihong tuhkeo?—Kilang iretikitik 23.
(C) Dahme pahn wiawi ni imwin “sounpar isuh [“ahnsou isuh,” NW]”?—Kilang iretikitik 26.

Ia Duwen Ouraman en Tuhkeo Eh Dokedoke Wehin Koht

KOKOHP (Daniel 4:20-36)

Kaunda

(A) Tuhke lapala pwoat

Uhdi kaunda

(B) “Pelehdihsang tuhkehn” oh en mihmihki “erein sounpar isuh [ahnsou isuh, NW]”

Tuken tuhke pwoat me pirapirkihdi mete oh prons.

Pwurehng kaunda

(C) “Komw pahn ketin pwurehng wiahla nanmwarki”

Nan keieun pweidahn kokohp wet . . .

(D) Ihs me tuhkeo kin karasahiong?—Kilang iretikitik 22.
(E) Ia duwen eh kaunda eh uhdi?—Wadek Daniel 4:29-33.
(F) Dahme wiawihong Nepukadnesar ni imwin “sounpar isuh”?—Wadek Daniel 4:34-36.

KEIEUN PWEIDA

Kaunda

(D) Nepukadnesar, Nanmwarkien Papilon

Nanmwarki Nepukadnesar kesikesihnen ni aklapalap.

Uhdi kaunda

(E) Mwurin pahr 606 Mwohn Krais, Nepukadnesar iahkala oh sohte kak kakaunki erein sounpar isuh

Nepukadnesar wonohn nanpwel oh kangkang dihpw duwehte mahn.

Pwurehng kaunda

(F) Nepukadnesar mwahula oh tepida pwurehng kakaun

Nanmwarki Nepukadnesar kilengdahla nanleng oh kapahda peh kan.

Nan keriaun pweidahn kokohp wet . . .

(G) Ihs me tuhkeo kin karasahiong?—Wadek 1 Kronikel 29:23.
(H) Iahd me arail kaunda uhdi? Ia duwen atail ese me re sohte wie kakaun ahnsou me Sises ketiket nin sampah?—Wadek Luk 21:24.
(I) Iahd oh ia wasa me kaunda wet kapwurupwurodo?

KERIAUN PWEIDA

Kaunda

(G) Nanmwarkien Israel kan me kin wiliandi kaundahn Koht

Irekidien nanmwarkien Israel kan mwomwohd pohn mwoalarail kan. Lingen marain daker pohrail.

Uhdi kaunda

(H) Serusalem ohla, sohte nanmwarkien Israel me kakaun erein sounpar 2,520

Kisiniei ehu kamwomwala Serusalem en mahso nan pahr 607 Mwohn Krais. Mwurin mwo sounpar 2,520 dou powe.

Pwurehng kaunda

(I) Sises ketin tepida kakaun nanleng nin duwen Nanmwarkien Wehin Koht

Sises ketin kakaun sampah sang nan mwoale nanleng tepida sang nan pahr 1914. Lingen marain kohpeseng sang ni mwoale.

Ia uwen reirei en ahnsou isuh?

Ekei iren Paipel kan kin sewese kitail en wehwehki iren Paipel teikan. Karasepe, pwuhken Kaudiahl mahsanih me ahnsou siluh oh elep en ahnsou kin pahrekiong rahn 1,260. (Kaudiahl 12:6, 14) Ahnsou isuh kin pak riau reireisang, kahrehda e wiahda rahn 2,520. Ekei pak nan Paipel, lepin lokaia rahn ehu kin wehwehki sounpar ehu. (Esekiel 4:6) Eri ahnsou isuh nan pwuhken Daniel kin reireiki sounpar 2,520.

5. Sampah wekila sangete pahr 1914

Kilang KISIN KASDO.

KISIN KASDO: The World Has Changed Since 1914 (1:10)

Sises ketin kohpada ia pahn mwomwen sampah mwurin eh wiahla Nanmwarki. Wadek Luk 21:9-11, oh mwuri koasoiapene peidek wet:

Ke kin kilang de rong soahng pwukat?

Wahnpoaron Pohl kawehwehda mwomwen aramas akan ni imwin rahn akan. Wadek 2 Timoty 3:1-5, oh mwuri koasoiapene peidek wet:

Ke kin kilang aramas akan kin wia soahng pwukat rahnwet?

Kilel kan: Kilel kan kasalehda irair en sampah oh wiewiahn aramas akan ni imwin rahn akan. 1. Kaunen sounpei men me mi ni wasahn kapahrek wie weriwer oh kapahda peh kan. 2. Ihmw kan mweredi mwurin rerrer en sahpw ehu. 3. Sompihr en mahwen kan. 4. Aramas ekei doadoahngki mask oh alialu. 5. Twin Tower ko nan New York lulda mwurin terrorist kan ar kauwehla. 6. Ohl emen doadoahngki wini en kasahliel. 7. Ohl pwopwoud men pahn pakere oh wering eh pwoudo. 8. Soangsoangen wini en kasahliel oh sakau en wai kan. 9. Lih riemen sidailda oh kilel. 10. DJ men kamwakid pokon ehu nan concert ehu. 11. Me kin kamwoarong men koski pwoatol kisiniei ehu.

6. Kaundahn Wehin Koht anahne kamwakid kitail

Wadek Madiu 24:3, 14, oh mwuri koasoiapene peidek pwukat:

Doadoahk kesempwal dahieu me kasalehda me Wehin Koht kin kakaun ni ahnsou wet?
Ia duwen omw kak iang doadoahk wet?

Wehin Koht kin kakaun ahnsou wet, oh ahnsou me e pahn kaunda sampah pwon kerendohr. Wadek Ipru 10:24, 25, oh mwuri koasoiapene peidek wet:

Dahme emenemen kitail anahne wia ni atail kilang me “rahno kerendohr”?

Kilel kan: 1. Tohnsukuhl en Paipel men iang towehda mihting en Sounkadehdehn Siohwa kan. 2. Tohnsukuhl en Paipelo kalohk ong kompoakepah men. — Ma ke esehda mehkot me pahn sewese oh doarehla meteikan, dahme ke pahn wia?

MA EMEN IDEK: “Dahme kahrehda Sounkadehdehn Siohwa kan kin kalapw koasoia duwen pahr 1914?”

Dahme ke pahn nda?

DAHME KE SUKUHLKIER

Kokohp en Paipel oh irair en sampah wet kin kadehdehda me Wehin Koht kin kakaun ni ahnsou wet. Kitail kin kasalehda me kitail kamehlele met ni atail kin kalohki oh iang towehda mihting en mwomwohdiso kan.

Kousapahl

Dahme wiawi ni kaimwiseklahn ahnsou isuhwo me kokohpda nan pwuhken Daniel?
Dahme kamehlelehiong uhk me Wehin Koht tepida kakaun nan pahr 1914?
Ia duwen omw kak kasalehda me ke kamehlele me Wehio kin kakaun ni ahnsou wet?

Rahn me ke kanekehla:

Dahme ke kak wia

Nantihong wiahla emen sounkalohki rongamwahwo.

Soahng teikan:

Your other goal

PIL TEHK

Tehk dahme soupoad kan oh meteikan koasoiahki duwen wekilahn irair en sampah sang pahr 1914.

“When Morals Declined Dramatically” (Awake!, April 2007)

Wadek ia duwen kokohp me mi nan Madiu 24:14 eh kamwakid mouren ohl emen.

“I Perenki Iakiu Laudsang Soahng Teikan Koaros!” (Kahn Iroir No. 3 2017)

Ia duwen atail ese me kokohp me kileldi nan Daniel irelaud 4 kin dokedoke Wehin Koht?

“Iahd me Wehin Koht Tepida Kakaun?—Pali 1” (Atail Doadoahk ong Wehio, October 2014)

Dahme kasalehda me ahnsou isuh me kileldi nan Daniel irelaud 4 imwisekla nan pahr 1914?

“Iahd me Wehin Koht Tepida Kakaun?—Pali 2” (Atail Doadoahk ong Wehio, October 2014)

a Kilang ire kesiluh oh kapahieu me mi nan Pil Tehk, nan iren mehn kasukuhl wet.