Siohwa Ketin Kasalehda Dahme “Pahn Wiawi Mwadang Mwurin Ahnsou Kis”
“Audepen pwuhk wet, iei mehkan me Sises Krais ketin kasaledahr. . . . Pwe en ketin kasalehiong sapwellimen Koht ladu kan soahng kan me pahn wiawi mwadang mwurin ahnsou kis.”—KAUD. 1:1.
IA DUWEN OMW PAHN SAPENG?
Ia wasa ni lapalahn sansalo kin wehwehki kaunda kehlail en Britain-Amerika?
Mehnia kaudiahl en Sohn kasalehda me United Nations kin alehdi eh manaman sang kaunda kehlail en Britain-Amerika?
Ia duwen kaudiahl kan en Daniel oh Sohn ar kasalehda me koperment koaros en aramas pahn kasohrala?
1, 2. (a) Dahme kitail kak wehwehkihda ni atail kin kapahrekihpene kokohp kan en Daniel oh Sohn? (b) Ia wehwehn moahng weneu ko en mahn lawalou?
NI ATAIL kin kapahrekihpene kokohp kan en Daniel oh Sohn, kitail kin wehwehkihda soahng tohto me wiewiawi nan sampah rahnwet oh dahme pahn wiawi ahnsou kohkohdo. Dahme kitail kak sukuhlki sang kaudiahl en Sohn me pid mahn lawalou me moange meh isuh, oh kaudiahl en Daniel duwen mahn kamwasepwehko me kode meh eisek, oh pil sang dahme Daniel koasoiahki lapalahn sansalo nan en Nepukadnesar ouramano? Oh dahme kokohp pwukat anahne kahrehiong kitail en men wia?
2 Kitail sukuhlkier nan iren onop en mwoweo duwen kaudiahl en Sohn me pid mahn lawalou nan Kaudiahl irelaud 13. Moahng weneu en mahno wehwehki Isip, Asiria, Papilon, Media oh Persia, Krihs oh Rom. Sehdan doadoahngki wehi kehlail pwukat koaros pwehn uhwongada sapwellimen Koht aramas akan pwehki e kin kailongki kadaudok en liho. (Sen. 3:15, NW) Ni ahnsou me Sohn ntingihedi eh kaudiahlo, Rom me wie kakaun. E wia wehi kehlail ehu me kakaunki erein sounpar epwiki kei mwurin ahnsowo. Ahpw mie keisuh en moahng me pahn wiliandi Rom. Mehnia kaunda kehlail me moahng keisuhwo wehwehki, oh dahme e wiahiong kadaudok en liho?
BRITIAN OH WEHIN AMERIKA UHDAHN KEHLAILLA
3. Ia wehwehn mahn kamasepwehko me kode meh eisek? Ia wehwehn kod eisek ko?
3 Kitail kak ese ihs me keisuhn moahngo ma kitail kapahrekihpene dahme Sohn nda duwen mahn lawalou me mi nan Kaudiahl irelaud 13, oh pil dahme Daniel koasoiahki mahn kamasepwehko me kode meh eisek.a (Wadek Daniel 7:7, 8, 23, 24.) Mahn lawalo menet me kode meh eisek wehwehki kaunda kehlail en wehin Rom. (Menlau kilang pali 14-15.) Mpen sounpar 400 mwurin Krais, Wehin Rom tepida pwalpeseng wiahla wehi tikitik kei. Kode eisek en mahno me Daniel kilangada wehwehki wehi kan me kohsang wehin Rom.
4, 5. (a) Dahme kisin kod tikitiko wia? (b) Dahme moahng keisuh en mahn lawalou wehwehki?
4 Nan kokohp en Daniel duwen mahn kamasepwehko me kode meh eisek, ehu kod me tikitik wosada oh wiliandi kod siluh sang kod eisek ko. Ia duwen met eh wiawi? Britain wiahte kisehn wehin Rom, ahpw mwuhr e wiahla wehi kehlail ehu. Wehin Spein, Netherland oh France pil wia kisehn wehin Rom. Wehi pwukat kin uhdahn kehlail sang wehin Britain lao lel erein pahr 1600 samwa. Ahpw, Britain mahweniong ehuehu wehi pwukat oh wiahla wehi me kehlail sang irail. Erein pahr 1700 samwa, Britain kohkohlahng wiahla wehi ehu nan sampah me keieu kehlail. Ahpw ahnsowo, e saikinte wiahla moahng keisuh en mahn lawalou.
5 Mendahki Britain wiahla wehi me keieu kehlail, wasa kan me e kaunda nan Amerika pelianda oh wiahla wehin Amerika (United States). Britain sohte kauhdi wehin Amerika (United States) en wiahla wehi kehlail ehu oh e pil doadoahngki nah sounpei en nansed kan en pere wehi wet. Nan pahr 1914, ni ahnsou me rahnen Kaun-o tepida, Britain me keieu kehlail sangete mahs kohdo, oh wehin Amerika (United States) me keieu kepwehpwe nan sampah.b Erein Mahwen Keieu en Sampah, wehin Amerika (United States) oh Britain wiahla ehu. Pwehki ira tepida ehupene ni ahl tohrohr ehu, ira wiahla kaunda kehlail me adaneki Britain-America. Kaunda kehlail wet iei moahng keisuh en mahn lawalou. Dahme moahng wet kin wiahiong kadaudoken liho?
6. Dahme moahng keisuhwo wiahiong sapwellimen Koht aramas akan?
6 Mwurinte tepidahn rahnen Kaun-o, moahng keisuho tepida uhwong sapwellimen Koht aramas akan, me iei, rien Krais kan me mihmihte nin sampah. (Mad. 25:40) Sang dahme Sises mahsanih, ekei kadaudok en liho pahn mihmihte nin sampah ni tepidahn rahnen Kaun-o, oh re pahn wia doadoahk me Sises ketikihong irail. (Mad. 24:45-47; Kal. 3:26-29) Kaunda kehlail en Britain-Amerika uhwongada sapwellimen Koht aramas sarawi kan. (Kaud. 13:3, 7) Erein Mahwen Keieu en Sampah, kaunda kehlail wet kaloke irail, kainepwiedi ekei neirail pwuhk kan, oh salihedi irail ko me kin kaweid arail doadoahk. E kereniong kauhdi, de kemehla ni karasaras arail doadoahk en kalohk. Siohwa ketin padahkihong Sohn nan kaudiahl ehu me met pahn wiawi. Ahpw Koht pil ketin padahkihong ih me irail me sarawi pwukat, me iei kisehn kadaudok en liho, pahn pwurehng tapiada doadoahk en kalohk de pwurehng mourda ni karasaras. (Kaud. 11:3, 7-11) Duwehte dahme Siohwa ketin mahsanih, kisehn kadaudoken liho ko me mihmihte nin sampah pwurehng tapiada ngoangki kalohk.
KAUNDA KEHLAIL EN BRITAIN-AMERIKA OH PATEHN NEH KO ME METE OH PWEHL
7. Depehnen lapalahn sansalo kin ahneki wehwetehieu ong keisuhn moangen mahn lawalou?
7 Patehnnehn lapalahn sansalo oh keisuh en moangen mahn lawalou ahneki wehwetehieu, me iei kaunda kehlail en Britain-Amerika. Wehin Britain kohsang wehin Rom. Oh pwehki wehin Amerika (United States) kohsang wehin Britain, kitail kak nda me wehin Amerika (United States) pil kohsang wehin Rom. Eri mie mete nan patehnneh ko. Ahpw pil mie pwehl nan patehnneh ko. (Wadek Daniel 2:41, 42.) Kawehwehn patehnneh ko kin koasokoasoia duwen soangen mwekidohte me duwehte ahnsou me moahng keisuh en mahn lawalo pwarada. Ih ahnsowo me kaunda kehlail en Britain-Amerika pahn pwarada. Rasehng mehkot me kin wiawihkihda mete ahpw doalkihda pwehl eh kin luwet sang mehkot me kin wiawihkihda mete tohr, wehi kehlail en Britain-Amerika kin luwet sang kaunda me e kohsang ie. Dahme kahrehiong wehi kehlail en Britain-Amerika eh luwetala?
8, 9. (a) Ia duwen keisuhn kaunda kehlailo eh kasalehda me e kehlail duwehte mete? (b) Ia wehwehn pwehlo nan patehnnehn sansalo?
8 Ekei pak wehi kehlail en Britain-Amerika kin kadehdehda me e kehlail duwehte mete. Karasepe, e kadehdehda me e kehlail ni ahnsou me e kana nan Mahwen Keieu oh Mahwen Keriau en Sampah oh sangete ahnsowo kohdo, pak tohto e kin kasalehda me e kehlail duwehte mete.c Ahpw mwurinte wehi kehlail en Britain-Amerika ehu pwarada, meteo doalkidahr pwehl.
9 Ahnsou reirei sapwellimen Siohwa ladu kan kin men wehwehkihla wehwehn patehnnehn sansalo. Daniel 2:41 kasalehda neh ko me wiawihkihda mete oh pwehl iei wehi ehute a kaidehn wehi tohto. Eri kitail kak wehwehki me pwehlo wehwehki me mie mehkot nan kaunda kehlail en Britain-Amerika me kahrehda eh luwet sang Rom, me iei neh ko me wiawihkihda mete tohr. Kokohp en Daniel koasoia me pwehlo wehwehki “kadaudok en aramas akan.” (Dan. 2:43, NW) Aramas akan kin kaluwetehla kaunda kehlail en Britain-Amerika ni ahnsou me re kin nantihong pwe soangsoangen aramas akan en ahneki pwuhng nan soahng koaros, oh kalaudehla arail pwuhng nan wasahn doadoahk kan, oh pil wiahla wehi uhtohrda kei. Aramas akan kin kahrehiong kaunda wet en apwalki wia kaunda kehlail ehu rasehng mete. Re kin ahneki soangsoangen madamadau kan me pid palien politik. Oh ni ahnsou me kaun emen kin kana nan usuhs ahpw me malaulau me usada, e sohte ahneki manaman laud pwehn kak kapwaiada eh inou kan. Daniel koasoia: “Met wehwehki me mwehio [“wehio,” NW] pahn kehlail, ahpw mengei en ohla.”—Dan. 2:42; 2 Tim. 3:1-3.
10, 11. (a) Dahme pahn wiawihong patehnnehn sansalo? (b) Dahme kitail wehwehki duwen sendin nehn sansalo?
10 Nan atail ahnsou, Britain oh wehin Amerika (United States) kin wie doadoahkpene ni ahl tohrohr ehu. Ira kin kalapw ehukihpene ire kesempwal kan. Nan kokohp en lapalahn sansalo, patehnneh ko iei kaimwiseklahn sansalo. Nan kokohp en mahn lawalo, keisuh en moahngo iei kaimwiseklahn moahng. Met wehwehki me sohte ehu kaunda pahn wiliandi kaunda kehlail en Britain-Amerika. Oh mendahki e luwet sang Rom, me iei nehn sansalo me wiawihkihda mete, e sohte pahn pein ohla.
11 Ia duwe, mie wehwehn uwen tohtohn sendin nehn sansalo? Nan ekei kaudiahl, Daniel kin koasoia duwen uwen tohto mehkot. Karasepe, tohtohn mahn lawalo ko kin kasalehda uwen tohtohn koderail ko. Nempe pwukat kesempwal. Ahpw Daniel sohte kasalehda uwen tohtohn sendin nehn sansalo. Eri e mwomwen me uwen tohtohn sendin neh ko sohte kesempwal, duwehte uwen tohtohn peh ko, sendin peh ko, neh ko oh patehnneh ko ar sohte kesempwal. Ahpw Daniel kasalehda ni sansal me patehnneh ko wiawihkihda mete oh pwehl. Sang dahme e koasoia, kitail kak wehwehki me kaunda kehlail en Britain-Amerika me pahn kakaun ahnsou me ‘takaio’ me wehwehki Wehin Koht, pahn lel patehnnehn sansalo.—Dan. 2:45.
BRITAIN-AMERIKA OH MAHN LAWALO ME KODE MEH RIAU
12, 13. Dahme mahn lawalo me kode meh riau wehwehki? Dahme e kin wia?
12 Nan kaudiahl me Sises ketikihong Sohn kasalehda me mendahki kaunda kehlail en Britain-Amerika wiawihkihda mete oh pwehl, e pahn wia mehkot me kesempwal ni imwin rahn akan. Sohn kilangada mahn lawalo men me kode meh riau oh e lokaia duwehte drakon. Ia wehwehn mahn menet? Pwehki kode meh riau, e kin wehwehki koperment riau me kin ehupene. Mahn menet pil wehwehki Britain-Amerika ahpw met e pahn wia mehkot tohrohr.—Wadek Kaudiahl 13:11-15.
13 Mahn lawalo me kode meh riau kin “ndahng” aramas akan ren wiahda sansal ehu en mahn lawalou me moange meh isuh. Sohn koasoia me sansal en mahn lawalou pahn pwarada, sohla mie, oh pil pwurehng pwarada. Ihme wiawihong pwihn ehu me pwarada mwurin Mahwen Keieu en Sampah. Wehin Britain oh wehin Amerika kin kangoange wehi teikan ren iangala pwihn wet. Pwihn wet pahn kaminiminihpene wehi kan oh pil weliwelian irail.d Pwihn wet adaneki League of Nations. League of Nations sohla mie ni ahnsou me Mahwen Keriau en Sampah tepida. Erein mahweno, sapwellimen Koht aramas akan kin koasoia me nin duwen kokohp en nan Kaudiahl, pwihn wet pahn pil pwurehng pwarada. Ih met me uhdahn wiawi oh met e uhd adanekihla United Nations.—Kaud. 17:8.
14. Dahme kahrehda Sohn kahdaneki sansal en mahn lawalou “kawelimen en nanmwarki”?
14 Sohn kawehwehda sansal en mahn lawalou me moange meh isuh nin duwen “kawelimen en nanmwarki.” Dahme kahrehda e kahdaneki “nanmwarki”? E sohte pwarada nin duwen kawaluh en moangen mahn lawalou. E wiahte sansal en mahno. Manaman en sansal wet kohsang wehi kan me wia kisehn United Nations, ahpw mehlel sang kaunda kehlail en Britain-Amerika. (Kaudiahl 17:10, 11) Eri, Sohn kin kahdaneki sansal wet “nanmwarki” pwehki e alehdi manaman en wia mehkot me pahn pidada sampah pwon.
SANSAL EN MAHN LAWALOU KAMWOMWALA LIHEN NETIKI PALIWEREO
15, 16. Ia wehwehn lihen netiki paliwereo nan kaudiahl me Sohn kilangadao? Dahme kin wiawihong pelien lamalam rahnwet?
15 Sohn pil kawehwehda duwen lihen netiki paliwere me kin dake mahn weitahta kamasepwehko. Mahn menet iei sansal en mahn lawalou me moange meh isuh. Lih menet adaneki “Papilon Lapalap.” (Kaud. 17:1-6) E wehwehki pelien lamalam likamw. Pelian lamalam en Kristian likamw kan uhdahn wia kisehn Papilon Lapalap. Ni sansal, pelien lamalam likamw kan kin utungada sansal en mahn lawalo me iei League of Nations oh United Nations, oh re kin song en kaweid pwihn pwukat.
16 Papilon Lapalap kin kawehwehda nin duwen me e mwomwohd pohn “pillap akan.” Pillap akan wehwehki aramas akan me kin utungada liho. Ahpw erein rahnen Kaun-o, aramas akan solahr kin utungada duwehte ar kin wia mahs. E rasehng me pihl akan “ngalangalada.” (Kaud. 16:12; 17:15) Karasepe, ni ahnsou me sansal en mahn lawalou tepin pwarada, pelien lamalam en Kristian likamw kan ahneki manaman laud nan sahpw tohto. Ahpw met, aramas tohto solahr kin wauneki pelien lamalam pwukat oh arail kaun akan. Me tohto pil kin kamehlele me pelien lamalam me kin kahrehda kahpwal kan nan sampah. Meteikan kin koasoia ni sansal me pelien lamalam koaros anahne kasohrala.
17. Dahme pahn kereniong wiawihong pelien lamalam likamw? Dahme kahrehda met pahn wiawi?
17 Pelien lamalam likamw kan sohte pahn ekisekis sohla ahneki manaman oh eri kasohrala. Lihen netiki paliwere pahn doulahte ahneki manaman oh e pahn song en wiahiong nanmwarki kan ren wia dahme e mwahuki. Ahpw ahnsou keren, Koht pahn ketin “audehkidahr kapehdirail kan dahme e ketin kupwukupwurehiong liho.” (Wadek Kaudiahl 17:16, 17.) Siohwa pahn ketin kahrehiong koperment en ahn Sehdan sampah me United Nation kin weliandi, en mahweniong pelien lamalam likamw. Liho solahr pahn kak kaunda pelien koperment oh pahn katihasang eh kepwehpwe. Sounpar rieisek de silihsek samwalahro, pali laud en aramas akan kin medewe me pelien lamalam pahn ahnsou koaros ahneki wahu oh kehlail. Ahpw met e tepida wekidekla. Lihen netiki paliwereo sohte pahn ekisekis sohla ahneki manaman. E pahn mwadangete kasohrala.—Kaud. 18:7, 8, 15-19.
MAHN LAWALO KO PAHN KASOHRALA
18. (a) Dahme mahn lawalou pahn wia? Ia pahn imwilahn met? (b) Me pid Daniel 2:44, mehnia wehi kan me Wehin Koht pahn kasorehla? (Menlau kilang koakon me mi pali 19.)
18 Mwurin pelien lamalam likamw eh pahn kasohrala, mahn lawalou me iei koperment en Sehdan nin sampah, pahn uhwongada Wehin Koht. Nanmwarki kan en sampah sohte pahn kak peiong Wehin Koht nanleng, kahrehda re pahn song en peiong irail kan me kin mihmi sampah oh utungada Wehio. Met pahn imwikihla kaimwiseklahn mahwen rehn Koht. (Kaud. 16:13-16; 17:12-14) Daniel padahkihong kitail mehkot me pid kaimwiseklahn mahweno. (Wadek Daniel 2:44.e) Mahn lawalou me kileldi nan Kaudiahl 13:1, eh sansalo oh mahn lawalo me kode meh riau pahn kasohrala.
19. Dahme kitail kak uhdahn kamehlele? Dahme kitail anahne wia met?
19 Kitail momour nan mwehin keisuhn moangen mahn lawalou nan Kaudiahl irelaud 13. Sohte pil ehu moahng kapw pahn pwarada pohn mahn menet lao e pahn kasohrala. Kaunda kehlail en Britain-Amerika me pahn kakaun ni ahnsou me pelien lamalam likamw pahn kasohrala. Kokohp kan en Daniel oh Sohn pweidahr nin duwen me ntingdier. Kitail kak kamehlele me kereniong pelien lamalam likamw kan pahn kasohrala oh mahwen en Armakedon pahn wiawi. Koht ketin padahkihong kitail dahme uhdahn pahn wiawi. Ahpw ia duwe, kitail pahn peikiong kaweid kan me sansal nan kokohp pwukat? (2 Pit. 1:19) Kitail anahne peikiong Siohwa ahnsou wet oh utungada sapwellime Wehio.—Kaud. 14:6, 7.
[Nting tikitik kan me mi pah]
a Nan Paipel, nempe eisek kin kalapw wehwehki pwihn ehu pwon. Kahrehda kod eisek ko kin wehwehki wehi ko koaros me kohsang wehin Rom.
b Wehin Britiain oh wehin Amerika (United States) koaros mihmihte sangete mpen pahr 1700 samwa. Ahpw nan kaudiahl me Sohn kilangada, e kasalehda me ni tepidahn rahnen Kaun-o, ira pahn wiahla kaunda kehlail ehu. Kaudiahl ko nan pwuhk en Kaudiahl iei kokohp kan duwen “rahnen Kaun-o.” (Kaud. 1:10) Nan Mahwen Keieu en Sampah me Britain oh wehin Amerika (United States) tepida ehupene nin duwen kaunda kehlail ehu.
c Duwehte Daniel eh kohpada, erein Mahwen Keriau en Sampah, kaunda kehlail en Britain-Amerika kahrehda ohla laud. (Dan. 8:24) Karasepe, wehin Amerika (United States) kesehdi pakudang kehlail riau pohn sapwen imwintihti en kaunda kehlail wet. Pakudang kehlail pwukat kahrehda ohla laud me ehdin eh wiawi oh inenen suwed.
d Menlau kilang pwuhken Revelation—Its Grand Climax at Hand! (lokaiahn wai), pali 240, 241, 253.
e Daniel 2:44 (NW): “Oh ni rahn akan en nanmwarki ko Koht en nanleng pahn ketin kauwada wehi ehu me sohte pahn ohla. Oh wehi wet sohte pahn kohwong aramas sohte lipilipil. E pahn kauwehla oh kaimwisekala wehi pwukat koaros, oh e pahn mihmi kohkohlahte.”
[Koakon nan pali 19]
IHS “WEHI PWUKAT KOAROS” NAN DANIEL 2:44?
Kokohp en Daniel 2:44 (NW) kasalehda me Wehin Koht “pahn kauwehla oh kaimwisekala wehi pwukat koaros.” Kokohp wet dokedokehte wehi kan me wia kisehn lapalahn sansalo.
Daniel 2:44 (NW) sohte kasalehda dahme pahn wiawihong wehi teikan koaros. Ahpw, kokohp nan pwuhken Kaudiahl pil koasoia duwen met oh e kalaudehla atail wehwehki ire wet. E padahkihong kitail me “nanmwarki kan en sampah pwon” pahn pokonpene pwehn uhwong Siohwa ong “ni mahwen me pahn wiawi ni Rahn Lapalap en Koht, Wasa Lapalahpie.” (Kaud. 16:14; 19:19-21) Eri, patehng wehi kan me lapalahn sansalo kin karasahiong, koperment teikan koaros pil pahn kasohrala ni Armakedon.