Ia Duwen Siohwa Eh Ketin pere Sises?

EKEI pak Siohwa kin ketin wia soahng kan ni ahl kapwuriamwei pwehn pere seri kan me sohte kak pere pein irail. Ma ke mwemweitla nanwel, mwein ke pahn kilangada ehu ahl me Siohwa kin ketin wia met. Ahpw mwein nin tapio, ke sohte pahn nohn wehwehki dahme wiawi.

Mwein ke kilangada menpihr men me sokedi nan pwehlo. E mwomwen medekla. Ni ahmw kohkohlahng reh, e kin wawai kohla oh uruhrahdehki peho. Ni ahnsou me ke pwakih, e kin keikeila sang uhk lao e uhdahte pihrla sang mwo. Peho sohte mwahno medekla! Ke ese dahme e wiao?—

Nah seri ko mi nan dihpw ko, limwahn wasa me menpihro tepin sokedi ieo. Nohno menpihro perki pwe ke de diarada nah seri ko oh wiahiong irail mehkot. Ihme kahrehda e mwomwehda me e medekla oh kahreiuk sang nah seri ko. Ke ese ihs me pil kak pere kitail duwehte nohno menpihro eh kin wiahiong nah ko?— Paipel kin karasahiong Siohwa duwehte ikel men me kin sewese nah kan.​—Deuderonomi 32:11, 12.

Seri me keieu kesempwal rehn Siohwa iei sapwellime pwutak, Sises. Ni ahnsou me Sises ketiket nanleng, e wia ngehn kehlail men duwehte Semeo. E kak ketin apwalih pein ih. Ahpw ni ahnsou me Sises ketin ipwidi nin sampah, e sohte kak pein sewese ih. E ketin anahne sawas.

Pwehn kapwaiada kupwuren Koht nin sampah, Sises anahne kekeirda oh wiahla ohl unsek emen. Ahpw Sehdan song en kemehla Sises mwohn e laudla. En Sehdan eh kin song en kemehla Sises ni eh wia seri men oh mwomwen en Siohwa eh ketin pere Sises kin kaperen en rong. Ke men rong duwen met?—

Mwurinte Sises eh ketin ipwidi, Sehdan kahrehiong mehkot me duwehte usu ehu en lingaling nan palimese en pahnlahng. Ohl ekei me kin sukuhlki duwen usu kan idawehnla usuo mwail epwiki kei lao re lel Serusalem. Mwurin mwo, re idek ia wasa me ih me pahn wiahla nanmwarki en mehn Suhs kan pahn ipwidi ie. Ni ohl ekei me ese dahme Paipel kin mahsanih ar rong peidek wet, irail sapeng: ‘Nan Pedleem.’​—Madiu 2:1-6.

Erod, nanmwarki suwed me mi nan Serusalem, rongada duwen nanmwarki kapw menet me ahpwtehn ipwidi nan kahnimw en Pedleem me karanih wasao. Mwurin mwo e padahkihong ohlo ako me kin sukuhlki duwen usu kan: ‘Kumwail rapahki mwahu seri pwelelo oh kumwail pakairkidohng ie.’ Ke ese dahme kahrehda Erod men ese ia wasa me e kak diarada Sises ie?— Pwehki Erod luwak oh e men kemehla ih!

Ia duwen Koht eh ketin pere sapwellime Pwutako?— Ni en ohl ako arail diarada Sises, irail kihong ih kisakis kan. Mwuri, Koht ketikihong irail kaweid nan ouraman ehu ren dehr pwurala rehn Erod. Irail eri pwurala arail wasa ni ehu ahl tohrohr oh sohte pwurala Serusalem. Ni Erod eh diarada me ohl pwukat samwalahr, e uhdahn lingeringerda. Pwehn kemehla Sises, Erod koasoanehdi pwutak koaros nan Pedleem me pahnangin sounpar 2 en kamakamala! Ahpw ni ahnsowo, Sises solahr mi wasao.

Ke ese ia duwen Sises eh ketin pitla?— Mwurin ohl ako arail samwalahr, Siohwa ketin padahkihong en Mery eh pwoud, Sosep, en tangala Isip. Erod sohte pahn kak kemehla Sises wasao. Sounpar kei mwuri, ni en Mery oh Sosep ara pwurodo sang nan Isip iangahki Sises, Koht pil pwurehng ketikihong Sosep ehu kaweid. E mahsanihong ih nan ehu ouraman en keseula Nasaret, wasa me Sises sohte pahn lelohng keper.​—Madiu 2:7-23.

Ke kin kilang ia duwen Siohwa eh kin ketin pere sapwellime Pwutako?— Ihs me ke kak nda me duwehte kisin menpihr ko me arail nohno ekihla nan dihpw ko de me duwehte Sises ni ahnsou me e tikitik? Ke sou duwehte irail?— Mie me pil men kamedekihiukala. Ke ese ihs me kak wia met?—

Paipel mahsanih me Sehdan duwehte laion weriwer men me kin men kadallehla kitail. Duwehte laion kan arail kin kalapw lidere kisin mahn akan, Sehdan oh nah ngehn saut akan pil kin kalapw lidere kisin seri kan. (1 Piter 5:8) Ahpw Siohwa kehlail sang Sehdan. Siohwa kak ketin pere sapwellime seri kan de kamwahwihala soahng suwed koaros me Sehdan kin wiahiong irail.

Ke taman nan Irelaud 10 en pwuhk wet me koasoia dahme Tepilo oh nah ngehn saut akan kin song en kahrehiong kitail en wia?— Irail kin song kitail en wia nsenen pwopwoud ni ahl me Koht mahsanih me sapwung. Ihs kelehpw me kak wia nsenen pwopwoud?— Ihte pwopwoud ehu.

Ahpw e kansensuwed pwehki ekei aramas laud kan kin men wia nsenen pwopwoud rehn seri kan. Ni arail kin wia met, seri kan kin tepida wia soahng suwed kan me re sukuhlki sang irail. Irail pil kin tepida doadoahngki neirail dipwisoun kaparapar ni ahl me sapwung. Ih met me wiawi mahs nan kahnimw en Sodom. Paipel mahsanih me aramas en wasao, ‘me pwulopwul oh me mah kan,’ song en wia nsenen pwopwoud rehn ohl akan me kohla rehn Lot.​—Senesis 19:4, 5.

Eri, duwehte Sises eh ketin anahne perepe, ke pil anahne perepomw sang aramas laud kan oh pil seri teikan me pahn song en wia nsenen pwopwoud rehmw. Pali laud en ahnsou, irail pwukat pahn mwomwehda me irail kompoakepahmw kei. Irail pahn song en kihong uhk mehkot ma ke pahn inoukihong irail me ke sohte pahn ndaiong meteikan duwen dahme re men wiahiong uhk. Ahpw aramas pwukat roporop duwehte Sehdan oh nah ngehn saut akan. Irail kin men alehte dahme re mwahuki. Oh re kin wia met ni arail kin wia nsenen pwopwoud rehn seri kan. Met uhdahn sapwung!

Ke ese dahme re kak wia pwehn ale dahme re mwahuki?— Irail kak mwadongki noumw dipwisoun kaparapar. De re pahn doadoahngki neirail dipwisou en kaparapar oh sairki noumw dipwisoun kaparapar. Ahpw ke dehr mweidohng emen en mwadongki noumw dipwisou en kaparapar. Pil kaidehn riomw pwutak de serepein de pahpa oh nohno. Sohte emen kak doahke wasa pwukat rehmw.

Ia duwen ahmw kak pere paliweromw sang aramas me kin wia soahng suwed pwukat?— Keieu, ke dehr mweidohng emen en mwadongki noumw dipwisoun kaparapar. Ma emen song en wia met, ngihl laudida oh nda: “Ke dehr! I pahn ndahda!” Ma aramaso nda me ahmw sapwung mwo, ke dehr kamehlele. E sohte mehlel. Kohlahte oh ndahda dahme e wiao sohte lipilipil ihs me wiahiong uhk! Ke anahne ndahda duwen met mehnda ma aramaso nda me met nanpwungen kowehte oh ih. Mehnda ma aramaso inoukihong uhk kisakis kaselel kan de e kamasak uhk, ke anahne kohkohla sang ih oh ndahda dahme e wiao.

Ke sohte anahne masak, ahpw ke anahne kanahieng. Ma ahmw pahpa oh nohno ndaiong uhk me ekei aramas oh pil ekei wasa me keper, eri ke anahne rong ira. Ma ke wia met, eri aramas suwedo sohte pahn kak wiahiong uhk mehkot suwed.