IREN MEHN KASUKUHL 26
Dahme Kahrehda Mie Soahng Suwed oh Lokolok?
Ni ahnsou me mehkot me uhdahn suwed kin wiawi, aramas kin kalapw idek: “Dahme kahrehda?” Ia uwen atail perenki me Paipel sapengala peidek wet ni sansal!
1. Dahme Sehdan wia me kahrehda soahng suwed kan tepida wiawi nin sampah?
Sehdan me Tepil uhwongada Koht. Sehdan men kaunda meteikan, kahrehda e kasonge tepin aramas ko, Adam oh Ihp, pwe ira en iangala eh uhwongo. Sehdan wia met ni eh ndaiong Ihp lokaia likamw ehu. (Senesis 3:1-5) E kahrehiong Ihp en medewe me Siohwa sohte ketin kupwurki en ahneki mehkot mwahu. E nda me dene aramas akan pahn ahpwte nsenamwahula ma re sapeikiong Koht. Sehdan wiahda tepin likamwo ni eh ndaiong Ihp me e sohte pahn mehla. Kahrehda, Paipel kin kahdaneki Sehdan “sounlikamw men oh semen likamw.”—Sohn 8:44.
2. Dahme Adam oh Ihp pilada en wia?
Siohwa uhdahn ketin kadekohng Adam oh Ihp. E ketin mahsanih me ira kak tungoale wahntuhke koaros nan mwetuwel en Ihden, ihte ehu me keinapwidi. (Senesis 2:15-17) Ahpw ira pilada ira en tungoale wahntuhkeo. Ihp “eri dolung wahntuhkeo oh tungoale.” Mwuri, Adam “ahpw pil iang tungoale.” (Senesis 3:6) Ira koaros sapeikiong Koht. Pwehki Adam oh Ihp unsek, ira sohte kin ahneki ineng en wia soahng suwed kan. Ahpw ira nsenki sapeikiong Koht, kahrehda ira dipada oh soikala sapwellime kaunda. Pilipil wet wadohng ira lokolok laud.—Senesis 3:16-19.
3. Dahme en Adam oh Ihp pilipil wiahiong kitail?
Ni ahnsou me Adam oh Ihp dipada, ira sohla unsek, kahrehda ira kadaurohng kadaudokara kan koaros soh unsek. Paipel mahsaniheki Adam: “Sang rehn aramas tehmen dihp leledohng sampah oh mehla sang ni dihp, ihme kahrehda mehla lelohngehr aramas koaros.”—Rom 5:12.
Kitail kin lokolok pwehki soangsoangen kahrepe kan. Ekei pak kitail kin lokolok pwehki atail pilipil sapwung kan. Ekei pak kitail kin lokolok pwehki en meteikan pilipil sapwung kan. Ekei pak kitail kin lokolok pwehki soahng soh kasikpe kan pwarada.—Wadek Eklesiasdes 9:11.
KALAUDEHLA OMW ESE MET
Tehk dahme kahrehda kaidehn Koht me ketin pwukoahki soahng suwed oh lokolok me kin wiawi nin sampah rahnwet oh ia sapwellime pepehm ni atail kin lokolok.
4. Ihs me kin pwukoahki atail lokolok?
Aramas tohto kamehlele me Koht me kin ketin kakaun sampah pwon. Met mehlel? Kilang KISIN KASDO.
Wadek Seims 1:13 oh 1 Sohn 5:19, oh mwuri koasoiapene peidek wet:
Koht me ketin pwukoahki lokolok oh soahng suwed kan?
5. Tehk imwilahn en Sehdan kaunda
Wadek Senesis 3:1-6, oh mwuri koasoiapene peidek pwukat:
Likamw dah me Sehdan wiahda?—Kilang iretikitik 4 oh 5.
Ia duwen Sehdan eh nda me dene Siohwa sohte ketikihong aramas akan mehkot mwahu?
Ia duwen Sehdan eh nda me aramas sohte anahne Siohwa en ketin kaunirailda pwe ren nsenamwahu?
Wadek Eklesiasdes 8:9, oh mwuri koasoiapene peidek wet:
Erein Siohwa eh sohte ketin kakaunki sampah, dahme kin wiawi?
Adam oh Ihp unsek oh kin kousoan nan Paradais. Ahpw ira rongala Sehdan oh uhwongada Siohwa
Mwurin uhwongo, sampah direkihla dihp, lokolok oh mehla
Siohwa pahn ketin katokehdi dihp, lokolok oh mehla. Aramas akan pahn pwurehng unsekla oh kousoan nan Paradais
6. Siohwa kin ketin nsenohki atail lokolok
Ia duwe, Koht kin ketin nsenohki atail lokolok? Tehk dahme Nanmwarki Depit oh wahnpoaron Piter ntingihedi. Wadek Melkahka 31:7 oh 1 Piter 5:7, oh mwuri koasoiapene peidek wet:
Ia omw pepehm ni omw ese me Siohwa kin ketin tetehk oh nsenohki atail lokolok?
7. Koht pahn ketin kaimwisekala en aramas akan lokolok koaros
Wadek Aiseia 65:17 oh Kaudiahl 21:3, 4, oh mwuri koasoiapene peidek wet:
Dahme kahrehda e kansenamwahu en ese me Siohwa pahn ketikihsang soahng suwed koaros me aramas akan kin lelohng?
Ke ese met?
Ni ahnsou me Sehdan wiahda tepin likamwo, e lahlahwe Siohwa. Me iei, e kauwehla adamwahu en Siohwa nin duwen Kaun pwung pahrek oh limpoak men. Ni ahnsou me Siohwa pahn ketikihsang en aramas akan lokolok ni ahnsou keren, e pahn ketin kawauwihala pein ih. Met wehwehki me e pahn ketin kadehdehda me sapwellime kaunda me keieu mwahu. Kawahulahn mwaren Siohwa me keieu kesempwal nin sampah oh nanleng.—Madiu 6:9, 10.
EKEI ARAMAS KIN NDA: “Lokolok pil wia kisehn kupwuren Koht ong kitail.”
Dahme ke pahn nda?
DAHME KE SUKUHLKIER
Sehdan me Tepil oh tepin aramas riemeno me uhdahn pwukoahki soahng suwed kan nin sampah. Siohwa uhdahn ketin nsenohki atail lokolok oh ni ahnsou keren e pahn ketikihsang met.
Kousapahl
Soangen likamw dah me Sehdan me Tepil ndaiong Ihp?
Dahme en Adam oh Ihp uhwong wiahiong kitail koaros?
Ia duwen atail ese me Siohwa kin ketin nsenohki atail lokolok?
PIL TEHK
Esehla ia wehwehn dihp nan Paipel.
Pil wadek duwen ire ieu me Sehdan me Tepil kihda nan mwetuwel en Ihden.
“Why Does God Allow Suffering?” (The Watchtower, January 1, 2014)
Tehk duwen pasapeng kansenamwahu kan ong peidek apwal ehu.
“Why Did the Holocaust Happen? Why Didn’t God Stop It?” (Web article)
Kilang dahme emen ohl esehda duwen lokolok me e kin kilang.