En Pwopwoud oh Naineki Seri ni Imwilahn Ahnsou

“Atail ahnsou mwotomwotalahr.”—1 KOR. 7:29.

1. (a) Soangen wekidekla dah kei nan atail ahnsou me wia kisehn “ahnsou apwal ekei”? (b) Dahme kahrehda e kesempwal kitail en ese duwen wekideklahn mour en peneinei?

SAPWELLIMEN Koht Mahsen kohpada me “imwilahn ahnsou” pahn sansalkihda mahwen, rerrer en sahpw, lehk lapalap, oh soumwahu lusulus laud kan. (Dan. 8:17, 19; Luk 21:10, 11) Paipel pil kaunopada atail lamalam ong ahnsou ehu nan poadopoad en aramas me mie wekidekla laud kan pahn wiawi. Pingiping en nan mouren peneinei pahn wia kisehn mehkan me kin wiawi nan “ahnsou apwal ekei ni imwin rahn akan.” (2 Tim. 3:1-4) Dahme kahrehda wekidekla pwukat wia mehkot kesempwal kitail en ese? Pwehki mepwukat kin inenen rek oh wuk me kak kamwakid lamalam en Kristian en rahnpwukat ong me pid pwopwoud oh naineki seri. Ni soangen ahl dahieu e kin wia met?   

2. Dahme pali laud en aramas en sampah kin medewehki pwopwoud oh mweipeseng?

² Rahn pwukat e kin mengei ong pwopwoud kan en kin mweipeseng oh met kin rekla wasa koaros kahrehda nempehn pwopwoud me mweipeseng nan sahpw tohto kin pil mwadang tohtohla sang mahs. Ahpw kitail anahne tamataman me Siohwa Koht sapwellimaniki madamadau me uhdahn weksang dahme pali laud en aramas en sampah kin medewehki duwen pwopwoud oh mweipeseng. Eri ia sapwellimen Siohwa madamadau me pid duwen met?

3. Iaduwen Siohwa oh Sises Krais kin ketin kilangwohng pwopwoud?

³ Siohwa Koht kin kupwurki irail akan me pwopwoud en loalopwoatohng arail inou en pwopwoud. Ni ahnsou me e kapwopwoudla tepin ohl oh lih, Siohwa mahsanih me “ohl emen pahn . . . ehukihong eh pwoud, pwe ira en kin wiahla ehu.” Sises pil mwuhr ketin kapwurehiong mahsen pwukat oh kapatahiong: “Eri kaleke aramas de kamweidpeseng me Koht ketin kapatapenehr.” Sises pil pousehla mahsanih: “Mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.” (Sen. 2:24; Mad. 19:3-6, 9) Kahrehda, Siohwa oh Sises kin ketin kilangwohng pwopwoud nin duwen inou ehu me aramas riemen wiahda oh pahn mihmi erein ara mour oh ihte me kak kauhdi iei ma emen rehra pahn mehla. (1 Kor. 7:39) Pwehki pwopwoud kin wia koasoandi sarawi ehu, kitail sohte kak mwamwahleki mweipeseng en pwopwoud. Ni mehlel, Mahsen en Koht kin mahsanih me Siohwa kin ketin kalahdeki mweipeseng en pwopwoud me sohte poahsoanda pohn Pwuhk Sarawi.a—Wadek Malakai 2:13-16; 3:6.

Wiahki Pwopwoud Pwukoa Kesempwal Ehu

4. Dahme kahrehda ekei Kristian pwulopwul kan kin koluhkihla arail mwadang en pwopwoudla?

⁴ Nan sampah ehu me kitail mihmi loale me kin pohnsehse Koht, madamadau en wia nsenen pwopwoud kin audehla nan madamadau en me tohto. Rahn koaros soangen madamadau pwukat kin kadire atail lamalam. Kitail sohte kak pohnsehsehla iaduwen met kin kamwakid kitail ahpw mehlel ong neitail seri pwulopwul kan nan mwomwohdiso. Iaduwen Kristian pwulopwul kan en mwekidki soahng suwed pwukat me kin kalaudehla arail ineng suwed me re nannanti en powehdi? Ekei kin song en powehdi met ni arail kin mwadang en pwopwoudla. Ni ahl wet, re kin medewe me irail sohte pahn lelong nan dipen nenek. Ahpw sohte pwand mwurin re kapwopwoudla, ekei irail koluhkihla arail pilipilo. Pwekida? Mwurinte kaperen en pwopwoud kapw kin sohla mie, re kin esehda me irail oh arail pwoud kan sohte kin wehwehpene nan soangen irair tohto kan me pid mour en ehuehu rahn. Kitail kak wehwehki me soangen pwopwoud pwukat ahnekier kahpwal laud ehu.

5. Dahme pahn kak sewese pwopwoud ehu pwe ira en loalopwoat ong ara inou en kapwopwoud? (Pil kilang footnote)

⁵ En kin pwoudiki emen—mendahki e wia Kristian emen—kin kak wia mehkot me uhdahn apwal ma e inenen weksang dahme ke kin medewehki ih. (1 Kor. 7:28) Ahpw mendahki ia uwen met kin apwal, Kristian mehlel kan kin ese me mweipeseng en pwopwoud me sohte poahsoanda pohn Pwuhk Sarawi pahn sohte kamwahwihala kahpwal kan me pid pwopwoud soansuwed. Ihme kahrehda ong irail akan me kin nannantihong en kamwahwihala arail pwopwoud pwehki re men loalopwoat ong arail inou en kapwopwoud kin warohng wahu oh sawas en limpoak sang mwomwohdiso en Kristian.b

6. Iaduwen emen Kristian pwulopwul pahn medemedewe en pwopwoudla?

⁶ Ke wia emen me pwulopwul me saikinte pwopwoud? Ma ei, eri iaduwen ke kin kilangwohng koasoandi en pwopwoud? Ke kak katihasang kansensuwed kan ma ke pahn awih lao ke kakehr ni paliwar, madamadau oh ahneki nanpwungmwahu rehn Siohwa mwohn ahmw pahn kak tepiada medemedewe en pwoudikihda emen. Mehlel pwe Pwuhk Sarawi sohte kin mahsanih sounpar depe emen anahne lel ni ahnsou pwe en kak pwopwoudla.c Ahpw Paipel kin kasalehda me e pahn konehng en awih lao ke lel sounpar kan me ke kakehr powehdi ineng kehlail en men wendi rehn emen. Pwekida? Pwehki soangen ineng pwukat pahn kahrehda ken wiahda pilipil kan me kak mwuhr imwikihla kansensuwed kan. Tamataman met, sapwellimen Siohwa kaweid erpit nan Paipel me pid pwopwoud kin wia kamwahu ong uhk oh ong ahmw nsenamwahu.—Wadek Aiseia 48:17, 18.

Wia Pahpa oh Nohno Koahiek kan me Kin Kesempwalki Ara Pwukoa

7. Dahme ekei pwopwoud pwulopwul kin lelong oh dahme kahrehda met kak kahrehda pwunod nan pwopwoud?

⁷ Ekei pwopwoud me pwopwoudla ni arail pwulopwulte lelohngehr pwukoahn naineki seri ni pein ira pil pwulopwulte. E saikinte mie ahnsou itar ong ira en wehwehkihla emenemen ahpw miehier neira seri, pwukoa ehu me kin anahne awa 24 nan ehuehu rahn. Ohl pwopwoud pwulopwul men kakete peirinki ahnsou laud me nohno men kin kihong neira serio sang ahnsou me e ipwidier. Pil kapatahiong, sohte itar en meir pwehki pepehd oh apwahpwalih serio kak kahrehda pwunod nan ara pwopwoud. Met kahrehda pwopwoud pwulopwulo en tehkada me solahr ara saledek. Met solahr ara saledek en kohla wasa kan de wia soahng kan me re kin wia mahs ni ahnsou me sohte neira seri. Iaduwen ara pahn kilangwohng soangen wekidekla wet?

8. Iaduwen kitail en kilangwohng pwukoahn naineki seri, oh pwekida?

⁸ Duwehte atail kin wiahki pwopwoud nin duwen pwukoa kesempwal ehu, kitail anahne en pil kilangwohng pwukoahn naineki seri nin duwen pwukoa oh kapai kesempwal ehu sang rehn Koht. Sohte lipilipil soangen wekidekla dah kan me kin wiawi nan mouren pwopwoud Kristian ehu ni en seri men kin ipwidi ong ira, ira anahne wia ara koahiek ni uwen ara kak pwe en wekidala ara mour pwe en kak soanamwahu ong wekidekla pwukat. Pwehki Siohwa ketikihong aramas akan kapai en kak naineki seri, pahpa oh nohno kan anahne en kilangwohng seri pwelelo nin duwen “kisakis ehu sang rehn KAUN-O.” (Mel. 127:3) Pahpa oh nohno Kristian kan anahne en nantihong en wia arail pwukoa kan nin duwen “pahpa oh nohno kan me kin miniminiong Kauno.”—Ep. 6:1, NW.

9. (a) Dahme kin iang pidada kakairada emen seri? (b) Dahme Ohl pwopwoud men kak wia pwehn sewese en eh pwoud nanpwungmwahu rehn Siohwa en kehkehlailte?

⁹ Kakairada seri men kin pidada emen en kin ahneki tounmetei ni erein sounpar tohtohie. E kin anahne ahnsou laud oh kehl laud sang pahpa oh nohno kan. Ohl pwopwoud Kristian men anahne en wehwehki me sounpar kei mwurin serio ipwidi, eh pwoud ele sohte kak rongorong mwahu nan mihding kan oh mwein e sohte kin ahneki ahnsou mwahu en wia pein eh onop en Paipel oh doudouloale mehkan me e onopki. Met kin kak kahrehda eh nanpwungmwahu rehn Siohwa en luwetala. En wia pahpa koahiek men me kin kesempwalki eh pwuKoa kin wehwehki me ohl pwopwoudo men en anahne en wia uwen me e kakohng pwehn sewese apwalih serio. E kak song en alehdi ire kesempwal akan me mwein eh pwoud sohte kak alehdi ni ahnsou en mihding kan oh mwuhr ehukihong ih ekei ire pwukat ni arail lella ni imwarailo. Ele e kak sewese apwalih serio pwehn kihong eh pwoud ahnsou mwahu en iang kalohkiseli Wehio.—Wadek Pilipai 2:3, 4.

10, 11. (a)  Iaduwen seri kin kaiahnda ‘nan padahk en Kristian kan’? (b) Dahme kahrehda Kristian tohto warohng en alehdi kaping?

¹⁰ En wia pahpa oh nohno koahiek kei me kin kesempwalki ara pwukoa kin pidada laudsang ihte kihong serio kene mwenge, eh likou, wasahn kousoan oh apwalih roson mwahu en serio. Nan ahnsou en imwilahn koasoandi suwed wet me diren kahpwal kan, me pwulopwul kan anahne en sukuhliki kosonned kan me pid wiewia oh tiahk mwahu ong iaduwen emen en kin momour, sangete ni arail pwulopwul. Anahne en kakairada seri kan oh ‘kaiahneirailda nan padahk en Kristian oh dahme re uhdahn pahn wia nin duwen Kristian.’ (Ep. 6:4) En ‘kaiahneirailda nan padahk en Kristian’ kin pidada kaiahne serio pwehn ahneki sapwellimen Siohwa madamadau kan sang ni eh kisin seri lao eh laudla.—2 Tim. 3:14, 15.

¹¹ Ni ahnsou me Sises padahkihong sapwellime sounpadahk kan me re anahne en kin “padahkihong tohn wehi kan koaros; pwe re en wiahla nei tohnpadahk,” met e uhdahn wehwehki me pahpa oh nohno kan anahne sewese neirail seri kan en wiahla tohnpadahk kei. (Mad. 28:19, 20) Met kin kak apwal pwehki kasongosong kan me sampah wet kin kihong me pwulopwul kan. Ihme kahrehda pahpa oh nohno kan, me kin pweida ni arail pwukoa en kakairada neirail seri kan en wiahla Kristian papidaisla kan, kin warohng ale kaping en limpoak sang rehn koaros tohnmwomwohdiso kan. Re kakehr “kalowehdi” mwekid en sampah ki arail pwoson oh lelepek nin duwen pahpa oh nohno koahiek kan.—1 Sohn 5:4.

Kiripw de Sohte Naineki Seri ong Kahrepe Kesempwal Ehu

12. Dahme kahrehda ekei Kristian akan kin pilada en kiripw erein ahnsou ehu?

¹² Pwehki “ahnsou mwotomwotalahr” oh “mwomwen sampah wet pahn mwadang rosala,” Mahsen en Koht kin kangoangehki kitail en kin medemedewe kamwahupen wia emen me kiripw. (1 Kor. 7:29-31) Ihme kahrehda ekei Kristian akan kin pilada en sohte pwopwoud erein arail mour de en wia emen me kiripw ni erein sounpar kei mwohn re pahn pwopwoudla. Kitail en kin kapinga irail pwehki re sohte kin isaneki arail saledek en kiripw en wia mehkan me pahn kamwahu ongete pein irail. Tohto kin wie kiripw pwe ren kak papah Siohwa “ni kapehd mehlel oh unsek.” (Wadek 1 Korint 7:32-35.) Ong ekei Kristian me kiripw kan, re kin papah nin duwen pioneer kei de irail kin doadoahk nan Bethel. Tohto irail kin rapahki elen kalaudehla arail koahiek kan ong sapwellimen Siohwa pwihn ni arail kin towehda kasukuhl en Ministerial Training Sukuhl. Ni mehlel, irail ako me kin papah nin duwen pioneer kan de tohndoadoahk en Bethel kan erein irail kin wie kiripw oh mwuhr pwopwoudla kin kalapw pehm me arail pwopwoud kin paiekihda sang mehn kasukuhl mwahu kan me re alehdi erein sounpar kan me re kiripw.

13. Dahme kahrehda Kristian me pwopwoud kan kin pilada en sohte naineki seri kan?

¹³ Nan ekei wasa kan nan sampah mie wekidekla ehu nan mouren peneinei me wiawiher—me kahrehda pwopwoud tohto kin pilada ren dehr naineki seri. Ekei irail kin wia met pwehki soh itar en mwohni, ahpw ekei pwehki re men saledek ong wia doadoahk en mwohni pweimwahu. Nanpwungen Kristian akan kin mie irail akan me pilada en dehr naineki seri kan. Ahpw re kin pilada en wia met pwehki irail en saledek ong papah Siohwa. Met sohte wehwehki me soangen pwopwoud pwukat sohte kin men iang ahneki dahme pwopwoud tohto kin paiekihda. Re kin men iang duwehte, ahpw re kin mwohneki mehkan de doadoahk kan me pid duwen Wehio sang en ahneki kapai tohrohr kan me pwopwoud kan kin ahneki. (1 Kor. 7:3-5) Ekei pwopwoud pwukat kin papah Siohwa oh riarail brother kan nan doadoahk en circuit oh district de nan Bethel. Ekei irail kin papah nin duwen pioneer kan de misineri kan. Siohwa sohte pahn manokehla arail doadoahk kan oh limpoak me re kasalehda ong mware.—Ipru 6:10.

“Apwal Tohto nan Mouren Sampah”

14, 15. Dahme “apwal tohto nan mouren sampah” kin kak wiahiong pahpa oh nohno Kristian akan?

¹⁴ Wahnpoaron Pohl padahkihong Kristian kan me pwopwoud me irail pahn ahneki “apwal tohto nan mouren sampah ni arail pwopwoud.” (1 Kor. 7:28) Met ele kin pidada soumwahu en paliwar ong pwopwoudo, neirail seri kan, de inarail oh samarail kan me mahlahr. Ele e kin pil pidada apwal oh kansensuwed kan me kohsang apwalihada neirail seri kan. Nin duwen me sansalda ni tepin artikel wet, Paipel kin kohpada me “imwilahn ahnsou” pahn wahdo “ahnsou apwal ekei.” Seri kan “sohte pahn peikiong ar pahpa oh nohno kan” iei ekei apwal akan me pahn wiawi.—2 Tim. 3:1-3.

¹⁵ En apwalihada seri kan kin wia apwal laud ehu ong pahpa oh nohno Kristian. Kitail sohte kin pereperlahsang mwekid en “ahnsou apwal ekei” nan atail ahnsou. Ihme kahrehda pahpa oh nohno Kristian kan anahne en kin kaukaule peiong mwekid keper kan me “sampah wet” kakete wiahiong neirail seri kan. (Ep. 2:2, 3) Oh pei wet sohte kin pweida ahnsou koaros! E kin uhdahn “apwal” ong pahpa oh nohno Kristian kan ni ahnsou me neira pwutak emen de serepein emen uhdihsang papah Siohwa ni pahpa oh nohno kin nantihong en kakairada ih nan padahk mehlel.—Lep. Pad. 17:25.

‘Kahn Kamakam Kowahlap Pahn Wiawi’

16. “Apwal” laud dahieu Sises kohpada?

¹⁶ Sohte lipilipil “apwal” dah me kin wiawi nan erein ahnsou me ke pwopwoud de naineki seri kan, ahpw pahn mie ehu apwal me pahn kohdo me inenen laud. Nan sapwellime kokohp duwen eh pahn ketido oh imwilahn koasoandi wet, Sises mahsanih: “Pwe apwal en ni ahnsowo [“kahn kamakam kowahlap,” NW] pahn laudsang apwal me kin wiawi sang mahs kohdo lel met; pil sohte me pahn duwe sang met kohla.” (Mad. 24:3, 21) Sises mwuhr kasalehda me pokon kalaimwun pahn pitsang “kahn kamakam kowahlap.” Ahpw en Sehdan koasoandi en ahnsou wet pahn usehlahte uhwong sapwellimen Siohwa Sounkadehde meleilei kan. Mehlel me e pahn wia ahnsou apwal ehu ong kitail koaros—me laud kan oh pil seri kan.

17. (a) Dahme kahrehda kitail en kilangwohng ahnsou kohkohdo ki koapworopwor? (b) Dahme pahn kamwakid atail madamadau ong iaduwen kitail kin kilangwohng pwopwoud oh naineki seri?

¹⁷ Ahpw kitail sohte anahne masak daulihla ong dahme pahn wiawi ni ahnsou kohkohdo. Pahpa oh nohno kan me kin lelepek ong Siohwa kak koapworopworki me irail iangahki neirail seri kan pahn pitsang kalokolok en rahno. (Wadek Aiseia 26:20, 21; Sep. 2:2, 3; 1 Kor. 7:14) Ahpw ong ni ahnsouwet, en kin pepehd ong ahnsou apwal akan me kitail mihmi loale pahn kamwakid mwomwen atail madamadau duwen pwopwoud oh naineki seri nan ahnsouwet en imwi. (2 Pit. 3:10-13) Ni ahl wet, atail mour—sohte lipilipil ma kitail kiripw de pwopwoud, de sohte naineki seri—pahn wahdo wahu oh kaping ong Siohwa oh mwomwohdiso en Kristian.

[Nting tikitik me mi pahs]

Kousapahl

• Dahme kahrehda Kristian pwulopwul kan en dehr mwadang en pwopwoud?

• Dahme kin pidada kakairada seri men?

• Dahme kahrehda Kristian tohto kin pilada en sohte pwopwoud, de ma re pwopwoud a re sohte pahn naineki seri?

• Mehnia “apwal” ele kak lelong pahpa oh nohno Kristian akan?

[Kawehwehpen kilel kan nan ehu ehu pali 21]

Dahme kahrehda e kin wia elen erpit ong Kristian pwulopwul kan en awih lao re laudla pwe en pwopwoudla?

[Kawehwehpen kilel kan nan ehu ehu pali 22]

Ohl pwopwoud men kak sewese eh pwoud en ahneki ahnsou mwahu en iang kaudok

[Kawehwehpen kilel kan nan ehu ehu pali 23]

Dahme kahrehda ekei Kristian kan me pwopwoud kin pilada en sohte naineki seri kan?