Me Pwung kan Pahn Kapinga Koht Kohkohlahte

“Aramas pwung kan sohte pahn manokonokla kohkohlahte.  . . . Eh pwung kin duweduwehte kohkohlahte.”​—Mel. 112:6, 9, NW.

1. (a) Soangen mour kaselel dahieu me irail me pwung kan mwohn silangin Koht pahn alehdi? (b) Peidek dahieu me pwarada?

MOUR en ahnsou kohkohdo ong aramas akan me kin pwung mwohn silangin Koht me inenen kaselel! Re pahn perenki kalaudehla arail esehla duwen sapwellimen Siohwa irair kaselel kan kohkohlahte. Mohngiongirail pahn direkihla kaping ni ar pahn sukuhlki wiepen limen Koht akan laudsang mahs. Pwehn alehdi mour kaselel wet, kitail en ahneki irair en “pwung,” nin duwen me Melkahka 112 kin kasalehda. Ahpw ia duwen Siohwa Koht, me sarawi oh pwung, kin ketin kilangwohng aramas dipan akan nin duwen aramas pwung kei? Mendahki ia uwen laud kitail kin nantihong en wia dahme pwung ahpw kitail kin sapwungala, oh ekei pak sapwung pwukat kin inenen laud.​—Rom 3:23; Seims 3:2.

2. Manaman riau dah me Siohwa ketin wiahda pwehki sapwellime limpoak?

² Pwehki sapwellime limpoak, Siohwa ketikihda ahl ehu me e pahn kak kilangwohng aramas dipan akan nin duwen aramas pwung kei. Ia duwen? Keieu, e ketin doadoahngki sapwellime manaman pwehn kahrehda mouren sapwellime Ohl en keseu sang nanleng ong nan kapehd en serepein meipwon men pwehn kak ipwidi nin duwen aramas unsek men. (Luk 1:30-35) Mwurin imwintihti kan kemehla Sises, Siohwa eri ketin wiahda pil ehu manaman kapwuriamwei. Koht ketin kaiasada Sises sang mehla nin duwen ngehn lapalap emen.​—1 Pit. 3:18.

3. Dahme kahrehda Koht kin kupwurki ketikihong sapwellime Ohl mour poatopoat nanleng?

³ Siohwa ketikihong sapwellime Ohl, Sises, mour ehu me e sohte sapwellimaniki nin tepio mwohn eh wiahla aramas, iei mour poatopoat. (Ipru 7:15-17, 28) Siohwa kin inenen kupwurki wia met pwehki Sises kin kolokol eh lelepek unsek pahn kasongosong laud. Eri Sises ketikihong Semeo pasapeng me keieu mwahu, ei, uhdahn unsek, ong ahn Sehdan karaun likamw me dene aramas kin papah Koht ki ineng en roporop ahpw kaidehn sang limpoak mehlel.​—Lep. Pad. 27:11.

4. (a) Ni eh ketidahla nanleng, dahme Sises ketin wiahda ong kitail, oh ia duwen Siohwa ketin mwekidki met? (b) Ia omw madamadau ong dahme Siohwa oh Sises ketin wiahda ong uhk?

⁴ Sises pil ketin wia laudsang met ni eh ketidahla nanleng. ‘Ki pein sapwellime nta,’ e ‘ketilong nanleng mwohn silangin Koht pwehn sewesei kitail.’ Samatail nanleng ketin kupwure ni kadek meirong kesempwal wet en Sises pwehki ih me “tomwkiher dipatail kan.” Pwehki met, kitail “kak papah Koht ieias” ki ‘kapehd mwakelekel.’ Met wia kahrepe ehu kitail en pil pwungki tepin mahsen kan en Melkahka 112 en “Kapinga Siohwa, kumwail aramas akan!”​—Ipru 9:12-14, 24; 1 Sohn 2:2.

5. (a) Dahme kitail anahne wia pwehn kolokolte atail irair en pwung mwohn silangin Koht? (b) Ia duwen Melkahka 111 oh 112 kin ehupene?

⁵ Pwe kitail en kolokol irair en pwung mwohn silangin Koht, kitail anahne en pwoson sapwellimen Sises nta me e ketin kakerehdi. Rahn koaros kitail anahne en kalahngankihong Siohwa pwehki e inenen poakohng kitail. (Sohn 3:16) Kitail pil anahne en kaukaule onopki sapwellime Mahsen oh wia uwen atail kak en mour pahrekiong mahsen pwukat. Melkahka 112 kin audaudki kaweid mwahu ong koaros me men kolokol arail nsen mwakelekel mwohn silangin Koht. Melkahka wet kin wia iengen Melkahka 111. Ira koaros kin tepikihda mahsen pwukat, “Kapinga Siohwa, kumwail aramas akan!”a

Ehu Utupen Nsenamwahu

6. Ia duwen Melkahka 112 kin kawehwe duwen kapai me “aramas” me wauneki Koht men kin ahneki?

⁶ “Meid pai aramas me kin wauneki Kauno, me kin alehki eh peren sang ni eh kin kapwaiada sapwellime kosonned akan. Nein aramas mwahu seri kan pahn ahneki manaman nan sahpwo; kadaudoke kan pahn ale kupwuramwahu.” (Mel. 112:1, 2) Melkahka wet kak pil dokedoke pwihn en aramas ehu. Pwehn utungada met, wahnpoaron Pohl kin mwekidki en doadoahngki Melkahka 112:9 ong tepin Kristian akan. (Wadek 2 Korint 9:8, 9.) Ia uwen melkahka wet kin kasalehda mwahu duwen sapwellimen Krais tohnpadahk kan nan sampah rahnwet ar kin kak peren!

7. Dahme kahrehda ladu en Koht akan anahne en wauneki ih? Ia omw madamadau ong kehkehlik kan en Koht?

⁷ Nin duwen Melkahka 112:1 kasalehda, Kristian mehlel pwukat kin ahneki peren laud ni arail weweidwei ki ar “wauneki KAUN-O.” Pwehki irail kin wauneki oh sohte men kansensuwedihala ih kin sewese irail en powehdi manaman en ahn Sehdan sampah. Irail kin ‘alehki ar peren’ ni arail kin onopki Mahsen en Koht oh kapwaiada sapwellime kehkehlik kan. Met kin pidada kehkehlik me re anahne en kalohkiseli rongamwahu en Wehio nan sampah pwon. Irail kin nantihong wia doadoahk en katohnpadahk ong aramas en wehi koaros oh pil pakairkiong aramas suwed akan duwen rahnen kadeik en Koht eh kerendohr.​—Esek. 3:17, 18; Mad. 28:19, 20.

8. (a) Ia duwen irail me poadidi kan ong Koht kin ale kapai sang arail eimah? (b) Kapai dah kei me mi ahnsou kohkohdo ong irail kan me pahn sohsohki sampah?

⁸ Pwehki irail kin peikiong kehkehlik pwukat, ladu en Koht akan nan sampah rahnwet lelehr meh isirar samwa. Ihs me kak peikasalki duwen sapwellime aramas akan ar ahneki “manaman nan sahpwo [“sampah,” NW]”? (Sohn 10:16; Kaud. 7:9, 14) Oh ia uwen ar pahn ale “kupwuramwahu” ni ahnsou me Koht pahn ketin kapwaiada kupwure kan! Nin duwen pwihn ehu, irail akan me ahneki koapworopwor en mour sampah kohkohlahte pahn pitsang ‘kahn kamakam kowahlap’ oh pahn wiahla “sampah kapw” ehu me “pwungen kalahngan en Koht pahn poadada ie.” Mwurin ahnsou kis, irail pwukat me pitsang Armakedon pahn ale “kupwuramwahu” kowahlap. Irail pahn iang kasamwohdo me rar kan me pahn kaiasada sang mehla. Ia uwen met e wia ahnsou mwahu ehu! Kedekedeo, irail kan me kin “alehki eh peren” kosonned kan en Koht pahn unsekla kohkohlahte nin duwen “sapwellimen Koht seri kan nan arail saledek lingan.”​—2 Pit. 3:13; Rom 8:21.

Doadoahngki Pai kan ni Elen Erpit

9, 10. Ia duwen Kristian mehlel kan kin doadoahngki arail kepwehpwehkihla loalokong oh erpit en Koht? Ia duwen arail mour pwung pahn mihmi kohkohlahte?

⁹ “Eh peneinei pahn paiamwahu oh kepwehpwe, oh e pahn paiamwahu kohkohlahte. Marain kin dakerada rotorot ong aramas mwahu kan, ong irail kan me kalahngan, kadek, oh pwung.” (Mel. 112:3, 4) Nan poadopoad en Paipel, ekei sapwellimen Koht ladu kan wia aramas kepwehpwe kei. Ahpw irail kan me Koht kin kupwurki kin uhdahn kepwehpwehla mendahki ar paisuwed. Ni mehlel, pali laud en irail kan me kin pilada en peikiong Koht kin semwehmwe oh mwamwahlla rehn meteikan duwehte dahme wiawi ni mwein Sises. (Luk 4:18; 7:22; Sohn 7:49) Ahpw mehnda ma emen kepwehpwe de semwehmwe, e kak kepwehpwehkihla loalokong oh erpit en Koht.​—Mad. 6:20; 1 Tim. 6:18, 19; wadek Seims 2:5.

¹⁰ Kristian keidi kan oh iangarail kan, sohte kin kolokol arail loalokong oh erpit ong pein irail. Ahpw, re kin “dakerada rotorot ong aramas mwahu kan” nan en Sehdan sampah suwed wet. Irail kin wia met sang ni arail kin sewesehki meteikan en paiekihda soahng kesempwal kan sang loalokong oh erpit en Koht. Irail kan me kin uhwong kin nantihong en kauhdi doadoahk en kalohki Wehio ahpw re sohte kak pweida. Pweidahn doadoahk pwung wet pahn mihmi “kohkohlahte.” En dadaurete pahn songosong kan, sapwellimen Koht ladu kan kak kamehlele me re pahn mour “kohkohlahte.”

11, 12. Ia ekei ahl kan me sapwellimen Koht aramas kin doadoahngki arail kepwe kan?

¹¹ Sapwellimen Koht me keidi kan oh ‘pokon kalaimwun,’ kin kadehdehda arail kadek ki arail dipwisou kan. Melkahka 112:9 mahsanih: “E kin sapan ong me paisuwed akan, oh eh kadek kin duweduwehte.” Kristian mehlel kan rahnwet kin kalapw kihda sawas en dipwisou kan ong iengerail Kristian kan oh mehn mparail kan me anahne sawas. Irail pil kin doadoahngki arail kepwe kan pwehn sewese meteikan ni ahnsou me kahpwal kin pwarada. Duwehte me Sises ketin kasalehda, met iei ehu utupen peren.​—Wadek Wiewia 20:35; 2 Korint 9:7.

¹² Patehng met, medewehla duwen pweinen makasihn wet me kin wiawihda ni lokaia 172, pali laud en irail me kin wadek kin wia aramas semwehmwe kei. Makasihn wet pil kin wiawihda ni mwomwen nting me irail kan me salengepon oh maskun en kak pil wadek.

Kadek oh Mehlel

13. Ihs me wiahda mehn kahlemeng keieu mwahu en kadek? Ia duwen kitail kak alasang ara mehn kahlemeng?

¹³ “Meid pai aramas me kin kadek ni eh kin kihwei lohn.” (Mel. 112:5) Kitail koaros kin kalapw kilang aramas kan me sewese meteikan ahpw kaidehn ni elen kadek. Ekei sewese meteikan ni elen mehnseiren de kin medewe me re kepwehpwe sang irail. E sohte kaperen en ale sawas sang irail kan me kin kahrehiong uhk en medewe me ke aramas mwahl men de ke kedirepwe irail. Ahpw e kin kaperen en ale sawas sang emen me kin kadek. Siohwa ketin wia mehn kahlemeng keieu mwahu pwehki e kin ketin kupwursapan. (1 Tim. 1:11; Seims 1:5, 17) Sises Krais ni unsek kin ketin kahlemengih Semeo ni elen kadek. (Mark 1:40-42) Eri, pwe Koht en ketin kilangwohng kitail nin duwen aramas pwung kei, kitail en perenki toukihda sawas ni elen kadek, ahpw mehlel ni ahnsoun kalohk ni atail kin sewese mehn mpatail kan en esehla Siohwa.

14. Ia ekei ahl akan me kitail kak wia doadoahk “ni mehlel”?

¹⁴ “Me kin wia eh doadoahk en netinet ni mehlel.” (Mel. 112:5) Nin duwen me kokohp kasalehdahr, ladu lelepek kan kin apwalih sapwellimen Soumaso dipwisou kan koaros pwehn pahrekiong sapwellimen Siohwa pwung oh pahrek. (Wadek Luk 12:42-44.) Met kin sansalda nan kaweid en Paipel me kohwohng elder kan me ekei pak anahne apwalih irair en dihp toutou kan me pwarada nan mwomwohdiso. En laduo kin apwalih soahng kan ni ahl pwung oh pahrek kin sansal nan koasoandi kan me irail kin kihda ong epwelpen mwomwohdiso, ihmw en misineri oh Pedel kan. Pwung oh pahrek kin anahn kaidehn ongete elder kan ahpw pil ong Kristian teikan ni ar pahn ehupene, oh pil arail en ehuong me sohte wia kisehrail nan kaudok ong mehkan me kin pidada pesines de mwohni.​—Wadek Maika 6:8, 11.

Kapai kan ong me Pwung kan

15, 16. (a) Dahme rong suwed en sampah kin wiahiong aramas pwung kan? (b) Dahme sapwellimen Koht ladu kan en koasoanehdi wia?

¹⁵ “Aramas mwahu sohte pahn sapwungala; e sohte pahn manokonokla kohkohlahte. E sohte kin masak rong rohng suwed akan; eh pwoson me kehlail, oh e kin likih KAUN-O. E sohte kin pwunod de masepwehk; e koapworopworki me e pahn kilang eh imwintihti kan ar pahn lohdi.” (Mel. 112:6-8) Rohng suwed kan kin tohtohla sang mahs me pid mahwen, tiahk mwersuwed oh soumwahu kapw, oh pil soumwahu kan me kin pwurepwurehng kohda, tiahk en loallap, semwehmwe oh saminlahn sampah. Irail kan me Koht kupwurki sohte kak pitsang rohng suwed pwukat, ahpw re sohte kin uhdi pwehki ar masak. Arail mohngiong kan kin ahneki “pwoson me kehlail” ni ar kin kilangwohng ahnsou kohkohdo ki koapworopwor me sapwellimen Koht sampah kapw kerendohr. Ma peien kahpwal kan pwarada, irail kak apwalihala kahpwalo pwehki re kin likih me Siohwa pahn sewese irail. E sohte pahn ketin mweidohng sapwellime aramas pwung kan en “sapwungala” ahpw e pahn ketikihong irail kehl ren kak dadaur.​—2 Kor. 4:7.

¹⁶ Sapwellimen Koht akan kin pil sohsohpai kailok oh karaun likamw akan me sounuhwong kan kin lohkiseli. Ahpw met sohte kin kauhdi Kristian mehlel kan sang doadoahk en kalohk. Sapwellimen Koht ladu kan kin usehlahte ni kehlail oh eimah nan doadoahk me Siohwa ketikihong irail en kalohki rongamwahu en Wehio oh katohnpadahki irail kan me kin men rong. Me pwung kan uhdahn pahn lelohng uhwong laud ni imwin koasoandi wet. Kailok pahn laudla ni uwe ehu me keieu laud ni ahnsou me Sehdan me Tepil pahn wia eh pwukoa nin duwen Kok en Makok nan mahwen. Eri ih ahnsou me kitail pahn ‘kilang atail imwintihti kan’ namenengkihla ar pahn lohdi. Ia uwen kaperen en kilang pweidahn sarawilahn mwaren Siohwa!​—Esek. 38:18, 22, 23.

‘Ahneki Manaman oh Wahu’

17. Ia duwen me pwung kan pahn ‘ahneki manaman oh wahu’?

¹⁷ Ia uwen kaperen en ehupene oh kapinga Siohwa ni ahnsou me sohte uhwong pahn kohsang Tepil oh eh sampah! Soangen peren wet pahn poatopoat ong irail akan me kin dadaur en pwungla mwohn silangin Koht. Re sohte pahn namenekla de lohdi pwe Siohwa pil ketin inoukihda me irail kan me pwung pahn “ahneki manaman oh wahun.” (Mel. 112:9) Sapwellimen Siohwa kan pahn kana ni wahu ahnsou me re pahn kilang lohdi en irail koaros me kin uhwong sapwellime pwung en kaunda.

18. Ia duwen kaimwisekpen Melkahka irelaud 112 pahn pweida?

¹⁸ “Aramas suwed kan re kilang met oh lingeringerkihda; re kangkakilkin irail ar kailok oh irail kohkohla; arail koapworopwor sohralahr kohkohlahte.” (Mel. 112:10) Peirin oh kailok en irail koaros me kin usehlahte uhwong sapwellimen Koht akan pahn kereniong “kohkohla [“peipeseng,” NW].” Arail ineng en kilang kitail uhdi sang atail doadoahk pahn sohrala nan “kahn kamakam kowahlap” me pahn leledo.​—Mad. 24:21, NW.

19. Dahme kitail kak koapworopworki?

¹⁹ Ke pahn iang irail me pitila kan perenki kana laud wet? De ma ke mehkihla omw mahla de soumwahu mwohn kasohrala en ahn Sehdan sampah, ke pahn iang irail “me mwahu kan” iasada? (Wiewia 24:15) Ke kak sapengki ei ma ke doulahte kakehlaka omw pwoson sapwellimen Sises meirong en tomw oh kahlemengih Siohwa nin duwen dahme Melkahka 112 kasalehda me pid duwen aramas mwahu. (Wadek Episos 5:1, 2.) Siohwa sohte pahn ‘manokehla’ irail pwukat, oh pil arail wiewia pwung kan. Siohwa pahn ketin tamatamante irail oh pil poakohng irail kohkohlahte.​—Mel. 112:3, 6, 9.

[Nting tikitik me mi pah]

Doudouloale Peidek Pwukat

• Ia ekei kahrepe kan kitail en nda “Kapinga Siohwa”?

• Dahme kin pweida rahn pwukat me kin kaperenda Kristian mehlel kan?

• Soangen aramas sapan dah me Siohwa ketin kupwurki?

[Kawehwehpen kilel kan nan ehu ehu pali 27]

Pwehn kolokol pwung mwohn silangin Koht, kitail anahne pwoson ntahn Sises

[Kawehwehpen kilel kan nan ehu ehu pali 28]

Atail sawas kan kin sewese ahnsoun kahpwal kan oh doadoahk en kihseli sawasepen Paipel kan