Koht Kin Ketin Nsenohkin Ie?
Pasapeng kan me kalapw kohda:
▪ “Koht me nohn ileile pwehn medemedewe ei kahpwal kan.”
▪ “I sohte medewe me e kin ketin nsenohkin ie.”
Dahme Sises Mahsanih?
▪ “Kisin menpihr limmen soh kin netila sens riau? Ahpw sohte emen rehrail me Koht kin ketin meliehla. Pil pitenmoangamwail kan koaros wadawadier. Eri, kumwail dehr perki mehkot; pwe kumwail inenen kesempwalsang menpihr tohto!” (Luk 12:6, 7) E sansal me Sises ketin padahngki me Koht kin ketin nsenohkin kitail.
▪ “Kumwail dehr kin pwunodki ndinda, ‘Se pahn kihsang ia aht tungoal kisin mwenge, de nimat pihl? Se pahn diar ia at likou?’ (Pwe me rotorot akan kin ngoangki rapahki mepwukat koaros.) A Samamwail me ketiket nanleng ketin mwahngih duwen amwail kin anahne mepwukat koaros.” (Madiu 6:31, 32) Sises ketin kamehlele me Koht kin mwahngih atail anahn akan koaros.
NI MEHLEL Paipel mahsanih me Koht uhdahn ketin nsenohkin kitail. (Melkahka 55:22; 1 Piter 5:7) Ma Koht kin ketin nsenohkin kitail, dahme kahrehda kitail kin lelohng kahpwal nan rahnpwukat? Ma Koht me limpoak oh sapwellimaniki manaman lapalap, dahme kahrehda eh sou kauhdi kahpwal kan koaros?
Pasapengpen peidek wet pidada ire mehlel ehu me aramas tohto sohte kin wehwehki—Sehdan me Tepil iei kaun en sampah suwed wet. Ni en Sehdan kasonge Sises, e patohwanohng: “I pahn kihong komwi soangen manaman koaros oh lingan en wehi pwukat koaros. Pwe koaros kohiengieier oh I kak kihong mehmen me I men kihong.”—Luk 4:5-7.
Ihs me wiahda Sehdan en wiahla kaun en sampah wet? Ni ahnsou me tepin atail pahpa oh nohno, Adam oh Ihp, peikiong Sehdan oh sohpeisang Koht, ira pilada Sehdan en wiahla ara kaun. Sang ahnsowo kohdo, Siohwa Koht ni kanengamah mweidohng ahnsou pwehn kasalehda me en Sehdan kaunda uhdahn sohte kak pweida. Siohwa sohte kin ketin iding aramas en papah ih, ahpw e ketin ritingada ahl ehu ong kitail en kak pwurodohng reh.—Rom 5:10.
Pwehki Koht kin ketin nsenohkin kitail, e ketin koasoanehdi Sises en kapitkitaila sang en Sehdan kaunda. Ni ahnsou keren, Sises pahn ketin “kauwehla Tepil, me kakaun mehla.” (Ipru 2:14) Ni e pahn ketin wia met, e pahn “kauwehla doadoahk en Tepilo.”—1 Sohn 3:8.
Sampah pahn pwurehng wiahla paradais. Ni ahnsowo, Koht “pahn kin ketin limwihasang pilen [mesen aramas] koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan [pahn] sohralahr.”—Kaudiahl. 21:4, 5.a
[Nting tikitik me mi pah]
a Pwehn kalaudehla omw wehwehki dahme kahrehda Koht ketin mweidohng kahpwal kan en mie, menlau kilang irelaud 11 en pwuhken Dahme Paipel Uhdahn Padahngki? (What Does the Bible Really Teach?) me Sounkadehdehn Siohwa kan wiahda.
[Kawehwehpen kilel kan nan ehu ehu pali 8]
Sampah pahn pwurehng wiahla paradais