1 Kalaudehla Omw Likih Paipel

“Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan.”—2 Timoty 3:16.

IA OMW MEHN KEREMPWA KAN? Aramas tohto kin nda me Paipel kin wiahte pwuhk ehu me audaudki madamadau en aramas loalokong kan. Ekei kin nda me poadopoad en Paipel sohte pwung. Pil ekei kin kamehlele me kaweid kan en Paipel sohte katepe de sohla kak sewese kitail.

IA DUWEN KE KAK POWEHDI KAHPWAL WET? Irail kan me sohte kin likih Paipel de sohte kin lemeleme me e kak sewese kitail, sohte kin kalapw pein kasawih audepe kan. Re kin ndahte dahme meteikan kin nda. Ahpw, Paipel mahsanih: “Aramas pweipwei kin kamehlele mehkoaros; aramas loalokong kin kanahieng arail kahk koaros.”—Lepin Padahk 14:15.

Ke dehr mwadangete kamehlele dahme meteikan kin nda, ahpw ke sou idawehn mehn kahlemeng en tepin Kristian akan me kin mi nan Peria, paliepeng en Krihs? Irail sohte kin mwadang kamehlele dahme meteikan kin ndaiong irail. Ahpw “rahn koaros irail kin onopki Pwuhk sarawi pwe re en kadehde ma en Pohl koasoi me mehlel de soh.” (Wiewia 17:11) Kitail pahn ekis tehkpene kahrepe riau me ke kak likih me Paipel iei Mahsen en Koht.

Poadopoad kan en Paipel kin pwung. Erein sounpar tohto, ekei kin koasoia me eden aramas akan oh wasa kan me kileldi nan Paipel sohte mehlel. Ahpw pak tohto, mehn kadehde kan kin kasalehda me arail madamadau sohte pwung oh dahme ntingdi nan Paipel kin mehlel.

Karasepe, mahs irail me samanih Paipel sohte kin kamehlele me mie Nanmwarki en Asiria men me adaneki Sarkon, me kileldi nan Aiseia 20:1. Ahpw, mpen nan pahr 1840, irail kan me kin sukuhlki dipwisou en mahs kan diarada eh tehnpaso. Met, Sarkon iei nanmwarki en Asiria men me keieu ndand.

Pil mie me kin peikasalki ma Pontius Pailet, kepina en Rom me koasoanehdi kamakamlahn Sises uhdahn mie. (Madiu 27:1, 22-24) Ahpw nan pahr 1961, takai ehu dierekda nan Sesaria nan Israel oh eden Pailet oh eh pwukoa kan kileldi pohn takaio.

Me pid duwen mehlelpen poadopoad kan en Paipel, ehu makasihn ripohtki: “Irail me kin sukuhlki dipwisou en mahs akan kin diarada ni sansal me poadopoad kan en Kadehde Mering oh Kadehde Kapw, me iangahki poadopoad kan duwen pahpa kahlap en mehn Israel kan, duwen mehn Israel kan ar pitsang nan Isip, Nanmwarki kan en kadaudok en Depit, oh mouren aramas akan ni mwein Sises, me mehlel.” (U.S.News & World Report, October 25, 1999) Mendahki en emen pwoson Paipel sohte kin poahsoankihda soahng pwukat, ahpw met kin wia mehn kadehde me Paipel kohsang rehn Koht.

Kweid kan en Paipel kak sewese soangsoangen aramas koaros. Mwohn aramas diarada mwahs kan me kin kadar soumwahu, Paipel kasalehda ia duwen aramas en mwakelekel oh met kin pil kesempwal nan atail ahnsou. (Lipai 11:32-40; Deuderonomi 23:12, 13) Tohn peneinei kan me kin doadoahngki kaweid kan en Paipel duwen wiewia kan ong meteikan kin ahneki nsenamwahu. (Episos 5:28—6:4) Emen me kin mourki kaweid kan en Paipel kin wia tohndoadoahk mwahu men de kaun en wasahn doadoahk mwahu men. (Episos 4:28; 6:5-9) En doadoahngki kaweid kan en Paipel pil kak sewese kitail en ahneki meleilei nan atail madamadau oh pepehm. (Lepin Padahk 14:30; Episos 4:31, 32; Kolose 3:8-10) Kitail kin kasik soangen kaweid mwahu pwukat sang rehn atail Sounkapikada.

IA KATINGPEN EN LIKIH PAIPEL? Kaweid kan en Paipel kak kahrehiong emen en loalokongla. (Melkahka 19:7) Patehng met, ma kitail pahn kalaudehla atail kin likih Paipel, met pahn kak sewese kitail en ahneki pwoson kehlail. Sohte ehu pwuhk likin Paipel me kak wia met.

Pwehn kalaudehla omw wehwehki ire wet, menlau kilang irelaud 2 en pwuhken Dahme Paipel Uhdahn Padahngki?a, “Paipel—Pwuhk Ehu Sang Rehn Koht.”

[Nting tikitik me mi pah]