Rapahki Kaweid Mwahu kan
MA KE kin raparapahki kaweid, ke pahn kak diar soangsoangen kaweid tohto. Aramas tohto kin rapahki kaweid sang kompoakparail kan me re kak likih de aramas wahun men nan arail wasa. Me tohto kin men ale kaweid sang arail peneinei kan me duwehte arail pahpa oh nohno kahlap kan. Rahnpwukat, me pwulopwul kan kin ale kaweid sang makasihn kan, pwuhk kan, TV, oh Internet.
Ia duwe, kaweid pwukat kak wia sawas mwahu? Ekei pak e kak sawas, ahpw pak tohto e sohte kin sawas. Ihme kahrehda e konehng en tehk dahme Paipel mahsanih: “Aramas pweipwei kin kamehlele mehkoaros; aramas loalokong kin kanahieng arail kahk koaros.”—Lepin Padahk 14:15.
Kaweid pwukat kin kalapw poahsoanda sang dahme wiawihong aramas pwukat me kihda kaweid. Irail me kin kihda kaweid kan sohte kin ahnsou koaros kasawih ire tohto ni keneinei oh koasoanehdi arail kaweid kan. Ekei kak kihda kaweid pwehki re kin ese me re kak wiahda mwohni laud ma re pahn padahkihong aramas akan dahme re men rong. Nan ehu sahpw, en kihda kaweid kan kin wiahda mwohni me laud sang tala wali lik (8 billion) nan ehuehu pahr. Ihme kahrehda e pahn mwahu en idek peidek pwukat: ‘Ihs me kihda kaweid pwukat? Ia wasa eh kaweid kan kohsang ia?’
Kaweid Pwukat kin Wia Sawas Mwahu?
Ma kitail pahn ale kaweid sang rehn aramas wahun kan nan atail wasa de me mah kan, kitail kin kalapw medewe me arail kaweid pahn wia sawas mwahu. Ahpw ekei pak, irail kak kihda kaweid sapwung kan.
Karasepe, ekei pahpa oh nohno kin nsensuwedla ahnsou me re diarada me sukuhl me neirail seri ko kin iang kin padahkihong seri ko duwen wia nsenen pwopwoud ahpw sohte kin padahkihong irail tiahk mwakelekel oh dahme konehng irail en kin wia. Emen nohno me naineki serepein me sounpar 12 koasoia: “Se kin kousoan nan wasa ehu me aramas tohto kin wauneki sarawi. Ahpw nan high-sukuhlo, re kin kihong seri kan condom kan!” Ih oh eh pwoud kin nsensuwedla ni ara esehda me pwutak kan me wehte neira serepeino kin ndaiong ih me re men wendi reh.
Mehlel, kitail kin ale kaweid kan sang meteikan ahpw kaidehn koaros kin mwahu. Emen kak kihda kaweid mwahu ong ehu irair ahpw mwein ehu eh kaweid ong ehu ire tohrohr sohte pahn pweida. E sohte mengei en tehk kaweid koaruhsie me miher pwe ken kak pilada mehnia me pahn mwahu. Eri, ahn ihs kaweid me ke kak likih? E pahn mwahu ken idek rehmw: ‘Ia duwe, aramas me kihda kaweid wet uhdahn kin wehwehki mwahu ire kan, de e kihdahte pein eh madamadau? E kihda kaweid kan pwehki e men ndandla oh kepwehpwehla?’
Paipel kin kihda kaweid mwahu kan erein ahnsou reirei. E kin kihda kaweid mwahu kan ong soahng koaros me pid atail mour. E kin kamwakid aramas tohto en mwekidki kaweid wet: “Kumwail pahn onehda sapahl pein kumwail ong ni aramas kapw.” (Episos 4:23, 24) Paipel kin kasalehda dahme kin kahrehda atail kahpwal kan oh kin padahkihong kitail en ese ia duwen kitail kak powehdi atail kahpwal kan. Me keieu kesempwal, e kin kihda kahrepe mwahu ong wia dahme pwung. Oaralap mwurin met pahn koasoia duwen met.