Ke Kin Mweidohng Koht en Mahseniong Uhk Rahn Koaros?

PAK depe ke kin irongen nan kilahs? Pali laud en kitail kin wia met rahn koaros, ele tohto sang pak ehu. Dahme kahrehda? Pwehki kitail kin nsenohki mwomwatail.

Wadek Paipel kin duwehte ahn emen kin irongen nan kilahs ehu. (Seims 1:23-25) Ire kan me kileldi nan Mahsen en Koht ahneki manaman me kak sewese kitail en wehwehkihla ihs kitail. E kin “lellong loalen aramas lel wasa keieu rir, . . . wasa me kakon oh sahl akan kin tuhpene ie.” (Ipru 4:12) E kin kasalehda dahme uhdahn mi loalatail, kaidehn ihte mwomwatail kan mas liki. Duwehte kilahs ehu, e kin kasalehiong kitail wasa kan me kitail anahne kamwahwihala.

Paipel sohte kin ihte kasalehda wasa kan me kitail anahne kamwahwihala, ahpw e pil kin padahkihong kitail ia duwen atail pahn kamwahwihala wasa pwukat. Wahnpoaron Pohl ntingihdi: “Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16, 17) Tehk nanpwungen kamwahu pahieu me sansalda, me siluh kin pid atail pahn kamwahwihala atail madamadau oh wiewia kan—kamwahu ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek. Ma kitail kin anahne kaukaule irongen nan kilahs pwe kitail en mwomw mwahu, ia uwen eh kesempwal kitail en kaukaule wadek Mahsen en Koht!

Ni eh ketin idihada Sosua en kahluwa wehin Israel, Siohwa Koht mahsanihong ih: “Kanahieng pwe pwuhken Kosonnedo pahn kin wadawad ni ahnsoun kaudok koaros. Ke pahn kin sukusukuhlki nin rahn oh nipwong, oh kanahieng soahng koaros me ntingdier loale. Eri, ke ahpw pahn kepwehpwehla oh pweida.” (Sosua 1:8) Ei, Sosua anahne kaukaule wadek Mahsen en Koht “rahn oh nipwong” pwehn pweida mwahu.

Tepin melkahkao pil kasalehda kamwahupen kaukaule wadek Paipel ni eh mahsanih: “Meid pai aramas akan me kin soikala kaweid en aramas suwed kan, me sohte kin men kahlemengih me dipan akan, de patehng irail akan me sohte kin wauneki Koht; ahpw re kin perenki peikiong Kosonned en Kauno, oh medemedewe nan kapehdihr nin rahn oh nipwong. Re rasehng tuhke kan limwahn pihl akan, me kin materek nan rahk koaros, oh tehrail kan sohte kin mengila. Re kin pweida mwahu ni soahng koaros me re kin wia.” (Melkahka 1:1-3) Uhdahn kitail men duwehte soangen aramas menet.

Me tohto kin wiahki wadawad en Paipel kisehn arail koasoandi en ehuehu rahn. Ni ahnsou me peidek kowohng emen Kristian duwen dahme kahrehda e kin wadek Paipel rahn koaros, e sapengki: “Ma I kin pwurepwurehng kapakap ong Koht nan rahn ehu oh kasik me e pahn ketin karonge ie, a dahme I sou pil rong Koht sang ni ei wadek Paipel rahn koaros? Ma kitail men wia kompoakepah mwahu men, kaidehn ihte kitail me pahn wia koasokosoi.” Ire kesempwal ehu me e kasalehda. Wadek Paipel kin duwehte atail rongorong Koht pwehki kitail kin ale sapwellime madamadau ong ire kan.

Ia Duwen Omw kak Kolokolete Koasoandi en Kaukaule Wadek Paipel

Ele ke song en tapiada wadek Paipel. Ke wadekalahr Paipelo pwon? Met wia ahl mwahu pwehn esehla audepen Paipel. Pak tohto, ekei song en tepida wadekala Paipelo pwon ahpw mwurin ahnsoukis re uhdi. Ke pil kin lelohng soangen kahpwal wet? Dahme ke kak wia pwehn lel omw men akadei en wadekala Paipelo pwon? Ke sou doadoahngki iren sawas riau pwukat?

Koasoanehdi wadawad en Paipel nan omw koasoandi en ehuehu rahn. Pilada ehu ahnsou nan rahn ehu me pahn mwahu ong uhk en kak wia omw wadawad en Paipel. Wiahda pil ehu ahnsou tohrohr likin met ma ke sohte kak wadek Paipel ni ahnsou me ke koasoanedier, pwe ken dehr mweidohng ehu rahn en nekila ahpw ke sohte wadek Mahsen en Koht. Ma ke wia met, ke pahn duwehte mehn Peria ko. Paipel padahkihong kitail: “Irail ngoangki mehlel rong mahseno, oh rahn koaros irail kin onopki Pwuhk Sarawi pwe re en kadehde ma en Pohl koasoi me mehlel de soh.”—Wiewia 17:11.

Ahneki mehn akadei. Karasepe, ma ke wadek irelaud 3 de 5 nan ehuehu rahn, ke kak wadekala Paipelo pwon nan sounpar ehu. Ke sou koasoanehdi en wia met?

Ma ke wadekalahr Paipelo pwon, ke anahne uhdi? Ke kak wadekala Paipelo pwon nan sounpar koaros. Ehuehu ahnsou me ke pahn pwurehng tapiada omw wadawad, ke kak pilada ehu wasa tohrohr me ke men tepisang ie. De ma ke men wawai nan omw wadawad en Paipel, ke kak pilada en wadek irelaud ehu de riau nan ehuehu rahn.

Ehuehu ahnsou me ke kin wadek Paipel, ke pahn diar soahng kapw kan me ke kak doadoahngki nan omw mour, soahng kan me ke sohte ese duwe mahs. Dahme kahrehda? “Sampah wet pahn mwadang rosala,” oh atail mour oh irair kan kin kalapw wekidekla. (1 Korint 7:31) Eri, koasoanehdi teng ken irongen nan kilahs en Mahsen en Koht, Paipel. Ni ahl wet, ke kak kamehlele me ke kin mweidohng Koht en mahsanihong uhk rahn koaros.—Melkahka 16:8.

[Kawehwehpen kilel kan nan ehu ehu pali 12]

Ke kak koasoanehdi ahnsou nan rahn ehu pwehn wadek Paipel?