E Kesempwal Kitail en Ese Pasapeng kan?
“Kumwail pahn dehdehki dahme mehlel, oh me mehlelo pahn kasaledengkumwailla.”—SOHN 8:32.
PAIPEL audaudki padahk mehlel me kak kasaledengkitailsang pingiping de pil lamalam sapwung kan duwen Sises. Ia duwe, e uhdahn kesempwal dahme kitail kin kamehlele duwen ih? Ei, uhdahn! E kesempwal ong Siohwa. E kesempwal ong Sises. Oh e pil kesempwal ong kitail.
● Dahme kahrehda e kesempwal ong Siohwa? E kesempwal pwehki “Koht iei limpoak.” (1 Sohn 4:8) Siohwa ketin kupwurki kitail en mour nsenamwahu kohkohlahte. Sises mahsanih: “Pwe iei uwen Koht eh ketin loalloale sampah [tohnsampah], me e ketikihdohki Sapwellime Iehros, pwe mehmen me kin pwosonla ih . . . en ahneki mour soutuk.” (Sohn 3:16) Koht ketikihdo sapwellime Ohlo en kamaiaukitailda oh ritingada elen ahneki mour soutuk nan Paradais nin sampah, me pahrekiong sapwellime koasoandi sang nin tapio. (Senesis 1:28) Koht ketin kupwurki ketikihong kisakis en mour ong irail me sukuhlki padahk mehlel duwen sapwellime Ohlo oh kapwaiada.—Rom 6:23.
● Dahme kahrehda e kesempwal ong Sises? Sises pil ketin poakohng tohnsampah. E ketin kasalehda limpoak laud sang ni eh kupwurki tounmeteikihla eh mour ong kitail. (Sohn 15:13) E mwahngih me ihete me kak kahluwaikitaillahng elen komourala. (Sohn 14:6) E pahn kapwuriamwei me Sises kupwurki aramas tohto ni uwen me kak ren paiekihda sapwellime meirong? Ihme kahrehda e ketin kehkehlikihong sapwellime tohnpadahk mehlel kan ren padahkihong aramas akan nan sampah pwon duwen kupwuren Koht.—Madiu 24:14; 28:19, 20.
● Dahme kahrehda e kesempwal ong kitail? Nna song medewehla soahng kan me ke kin kesempwalki mehlel, me duwehte omw roson oh omw peneinei. Ia duwe, ke kin men kowe oh irail me ke poakohng en ahneki roson mwahu oh mour nsenamwahu? Pwehki Sises, Siohwa ketikihong uhk oh irail me ke poakohng koapworopwor en ahneki roson en paliwar unsek oh mour soutuk nan koasoandi kapw en sampah, wasa me sohte medek oh lokolok. (Melkahka 37:11, 29; Kaudiahl 21:3, 4) Ke men iang mi nan sampah duwehte met? Ma ei, mie mehkot me ke anahne wia.
Menlau pil pwurehng tehk iren Paipel me sansal nan tepin oaralap wet: “Kumwail pahn dehdehki dahme mehlel, oh me mehlelo pahn kasaledengkumwailla.” Padahk mehlel duwen Sises oh sapwellime pwais ong pweidahn kupwuren Koht kak kasaledengkitailsang soangen kalidu me keieu suwed me iei lidu en dihp oh mehla. Ahpw pwe ken iang ahneki soangen saledek wet, ke anahne “dehdehki dahme mehlel.” Ke sou kalaudehla omw sukuhlki padahk mehlel wet oh pil duwen kowe oh irail me ke poakohng amwail kak paiekihda? Sounkadehdehn Siohwa kan pahn perenki iang uhk koasoiapene ire pwukat.