Pangala Emen—Kilelepen Imwin Rahn akan!

“At mour me mwakelekel [“lelepek,” NW] oh pwung, oh sohte kisin sapwung kis mie.”​—1 DES. 2:10.

RAPAHKIHDA IRE KESEMPWAL PWUKAT:

Dahme kitail sukuhlki sang ahn Dilehla, Apsalom, oh Sudas Iskariot arail pangala meteikan?

Ia duwen atail kak alasang soangen loalopwoat me Sonadan oh Piter kasalehda?

Ia duwen atail kak kolokol atail loalopwoatohng atail pwoud oh pil ong Siohwa?

1-3. (a) Ia kilelepen atail momour ni imwin rahn akan? Dahme e pidada? (b) Mehnia peidek siluh me kitail pahn sapengala?

IA DUWEN Dilehla, Apsalom oh Sudas Iskariot arail duwepenehte? Irail koaros soaloalopwoat. Dilehla soaloalopwoat ong Sounkopwung Samson me poakohng ih. Apsalom soaloalopwoat ong eh pahpao, Nanmwarki Depit. Oh Sudas soaloalopwoat ong eh Soumas, Sises Krais. Wiewia inenen suwed kan me re wiahda kahrehiong meteikan kahpwal oh nsensuwed! Dahme kahrehda kitail anahne nsenohki met?

² Emen sounnting kin wiahki tiahk en pangala emen nin duwen luwet ehu me aramas tohto kin ahneki rahnpwukat. Met sohte kapwuriamwei ong kitail. Ni Sises eh ketin kohpada kilel en imwin koasoandi suwed en sampah, e mahsanih: “Me ngeder . . . pahn pangala ekei.” (Mad. 24:3, 10) “Pangala” emen kin wehwehki mweidala emen ong imwintihti men sang ni eh kin soaloalopwoat. Nin duwen Pohl eh kohpada, tiahk en soaloalopwoat me kitail kin kilang rahnpwukat kin kasalehda me kitail kin momour “ni imwin rahn akan.” E koasoia me aramas akan “pahn pangala iangarail kan.” (2 Tim. 3:1, 2, 4) Soun wiahda pwuhk oh kasdo kan kin kalapw wiahki tiahk en soaloalopwoat mehkot kaperen de kasalepen limpoak nanpwungen ohl oh lih. Ahpw pwuhk oh kasdo pwukat sohte kin uhdahn kasalehda dahme mehlel. Ni mehlel, tiahk en soaloalopwoat oh pangala emen kin kamedek oh kansensuwed. Soangen wiewia pwukat kin kasalehda me kitail kin momour ni imwin rahn akan!

³ Mehn kasukuhl dah kan me kitail kak sukuhlki sang Paipel duwen irail mehn mahs kan me soaloalopwoat? Mehn kahlemeng dah kan me kitail kak alasang en irail me kasalehda arail loalopwoat ong meteikan? Ihs me kitail en koasoanehdi teng en loalopwoatohng? Kitail pahn diarada pasapengpen peidek pwukat.

MEHN KAHLEMENG SUWED KAN EN MAHS

4. Ia duwen Dilehla eh pangala Samson? Dahme kahrehda met uhdahn suwed?

⁴ Keieun mehn kahlemeng suwed iei lih mwersuwed Dilehla me Sounkopwung Samson poakepoake. Samson men kahluwa sapwellimen Koht aramas akan ren mahweniong mehn Pilisdia. Ele kaun en mehn Pilisdia limmeno ese me Dilehla sohte kin poakohng oh loalopwoatohng Samson. Re nda me re pahn kihong ih mwohni laud ma e padahkihong irail dahme kin kihong Samson kehl laud pwe ren kak kemehla. Dilehla pwungki met pwehki eh noahrok. Ahpw mendahki e kin nantihong diarada dahme kin kihong Samson kehl, pak siluh e sohte pweida. E kin songosong “idihdek rahn koaros kahrepen eh kehlailo.” Kahrehda, “Samson eri pwangahkihda eh lidiliderehki.” Ih eri ndaiong me pitenmoange ko sohte kin seiseisang oh ma e seiseisang, e pahn sohla kehlail.a Ni eh esehda met, Dilehla ekerodo emen en sehkasang pitenmoangen Samson ko ni eh wie memeir pohn neh ko. Ih eri mweidala Samson rehn eh imwintihti ko pwe ren wia dahme re mwahuki. (Sounkopwung 16:4, 5, 15-21) E inenen suwed dahme e wiao! Pwehki eh noahrok, Dilehla pangala emen me kin poakohng.

5. (a) Ia duwen Apsalom eh soaloalopwoatohng Depit? Dahme met kasalehda duwen Apsalom? (b) Ia ahn Depit pepehm ong ahn Ahidopel eh pangala ih?

⁵ Keriaun mehn kahlemeng suwed iei Apsalom me soaloalopwoat. E inenen inengieng ahneki manaman en kaunda. Apsalom men adihasang en eh pahpao Depit pwukoahn nanmwarki oh uhd wiahla nanmwarki men. Keieu, e song en “alkeniken” pahn mehn Israel kan. E mwomwehda me e poakohng aramas ako oh kin wiahiong irail inou likamw kei. E pil kin pwoaleiraildi oh metik oh mwomwehda me e nsenohki irail oh arail anahn akan. (2 Sam. 15:2-6) Apsalom pil kak kahrehiong Ahidopel, kompoakepahn Depit me e likih, en pangala Depit oh iangala uhwong. (2 Sam. 15:31) Depit ntingihedi uwen eh lokolongki tiahk en soaloalopwoat me wiawihong nan Melkahka irelaud 3 oh 55. (Mel. 3:1-8; wadek Melkahka 55:12-14.) Ahn Apsalom koasoandi suwedo uhwongada nanmwarkio me Siohwa ketin idihada. Tiahk en pangala wet kasalehda me e kasohwahuwih sapwellimen Koht pwuhng en ketin pilada ihs me pahn wia nanmwarki. (1 Kron. 28:5) Ahn Apsalom uhwongo sohte pweida oh Depit pousehlahte kakaun nin duwen nanmwarki men me Siohwa ketin idihada.

6. Ia duwen Sudas eh pangala Sises? Ia duwen ahd wet Sudas eh kin kadoadoahk rahnpwukat?

⁶ Nna medewehla duwen dahme sounpangala aramaso Sudas Iskariot wiahiong Krais. Ni keimwiseklahn Pahsohpa me Sises ketin iang sapwellime wahnpoaron 12 ko kasarawi, e mahsanihong irail: “Kumwail en ese pwe emen kumwail pahn pangiehla.” (Mad. 26:21) Mwuhr nipwongo, Sises ketin mahsanihong Piter, Seims oh Sohn nan mwetuwel en Kedsemeni: “Iet me pahn pangiehlao samwodohr!” Ni ahnsowohte, Sudas kohdo nan mwetuwelo iangahki pokon laud ehu, “e inenlahngete Sises, patohwanohng, ‘Maing ei Sounpadahk, komw meid roson!’ E ahpw metik.” (Mad. 26:46-50; Luk 22:47, 52) Sudas “pangalahr aramas mwakelekel” men ni eh mweidala Sises rehn irail ko me men kemehla. Ia uwen mwohni me ohl noahrok Sudas pangkihla Sises? Ong silper silihsekte! (Mad. 27:3-5) Sangete ni ahnsou leledo met, aramas akan kin doadoahngki ahd wet Sudas pwehn kawehwehda sounpangala aramas men, ahpw mehlel emen me kin pangala kompoakepah.

7. Mehn kasukuhl dahkei me kitail sukuhlki sang (a) Apsalom oh Sudas oh (b) Dilehla?

⁷ Dahme kitail sukuhlki sang mehn kahlemeng suwed pwukat? Apsalom oh Sudas koaros mehla ni elen kanamenek pwehki ara pangala me Siohwa ketin keiehdi. (2 Sam. 18:9, 14-17; Wiewia 1:18-20) Ni aramas ar kin rong ahd wet Dilehla, re kin medewe ia duwen eh kin soaloalopwoat oh mwomwehda poakohng emen. (Mel. 119:158) E kesempwal kitail en soikala noahrok de ineng en ahneki manaman en kaunda me pahn kahrehiong kitail en sohla kompoakepahnki Siohwa! Mepwukat kin wia mehn kasukuhl kehlail kan en sewese kitail en soikala soahng koaros me kak kahrehiong kitail en soaloalopwoat.

KAHLEMENGIH IRAIL KAN ME KIN LOALOPWOAT

8, 9. (a) Dahme kahrehda Sonadan inoukihda me e pahn loalopwoatohng Depit? (b) Ia duwen atail kak alasang Sonadan?

⁸ Paipel pil audaudki karasepe tohto en irail kan me kin loalopwoat. Kitail pahn tehkpene dahme kitail kak sukuhlki sang meh riemen. Kitail pahn tepikihda ohl emen me kin kasalehda eh loalopwoat ong Depit. Sonadan, nein Nanmwarki Sohl me keieu laud, pahn kakete wia nanmwarki en Israel mwurin eh pahpao. Ahpw Siohwa ketin pilada Depit. Sonadan kin wauneki sapwellimen Koht pilipilo oh sohte peirinki Depit. Sonadan “inenen poakepoakehla Depit duwehte eh poakohng pein eh mour,” oh Sonadan inoukihda me e pahn loalopwoatohng. E pil kasalehiong Depit wahu ni eh kihong eh likou, nah kedlahs, ketieu oh kateng. (1 Sam. 18:1-4) Sonadan wia uwen eh kak pwehn utung Depit. E pil mweidala eh mour en mihla nan keper ni eh perehla Depit sang Sohl. Sonadan kin loalopwoat oh ndaiong Depit: “Komwi me pahn wiahla nanmwarkien Israel oh ngehi me pahn keriaun kaun.” (1 Sam. 20:30-34; 23:16, 17) E sohte kapwuriamwei me mwurin Sonadan eh mehla, Depit kasalehda eh pahtou oh limpoak ong ih nan koul ehu.​—2 Sam. 1:17, 26.

⁹ Sonadan ese ihs me e anahne loalopwoatohng. E kin loalopwoatohng douluhl Siohwa, Kaunen lahng oh sampah, oh e kin utung Depit nin duwen emen me Koht ketin keiehdi. Pil duwehte kitail rahnwet. Mehnda ma kitail sohte ale pwukoa tohrohr ehu nan mwomwohdiso, kitail anahne perenki utung brother kan me kin idihdida pwehn tiengla mwowe nanpwungatail.​—1 Des. 5:12, 13; Ipru 13:17, 24.

10, 11. (a) Ia kahrepen Piter eh mihmihte rehn Sises oh loalopwoatohng? (b) Ia duwen atail kak alasang Piter? Dahme met pahn kangoange kitail en wia?

¹⁰ Pil ehu karasepe mwahu me kitail kak ale kasukuhl sang iei wahnpoaron Piter. E inoukihong Sises me e pahn loalopwoatohng ih. Krais ketin doadoahngki karasaras ehu pwehn sewese sapwellime tohnpadahk ko ren wehwehki ia uwen kesempwal ren pwoson kahlepe oh ntah me e pahn ketin kereniong meirongkihla. Karasaras wet sohte wehwehki me irail pahn uhdahn kang oh nim kahlepeo oh ntah, ahpw sapwellime tohnpadahk tohto pwuriamweikihla oh re sohla idawehn. (Sohn 6:53-60, 66) Sises eri keinemwe rehn sapwellime wahnpoaron 12 ko: “Ia duwe, kumwail pil men keseiehla?” Piter me sapeng oh patohwan: “Maing, ihs me se pahn patohla reh? Sapwellimomwi mahsen kan, iei mahsen en mour soutuk. Eri, met se pwosonlahr oh eseier me sapwellimen Koht me Sarawio komwi.” (Sohn 6:67-69) Ia duwe, met wehwehki me Piter uhdahn wehwehki soahng koaros me Sises ahpwtehn mahsanih duwen meirong me e pahn ketikihda? Mwein soh. Ahpw, Piter koasoanehdi en loalopwoatohng Sises, sapwellimen Kohto me keidi.

¹¹ Piter sohte medewe me sapwellimen Sises madamadau sapwung oh mwuhr Sises pahn ketin wekidala dahme e mahsanihong. Piter kin aktikitik oh e ese me Sises sapwellimanki “mahsen en mour soutuk.” Met pil duwehte kitail rahnwet. Ia duwen atail pahn mwekidki ni atail wadek mehkot nan neitail pwuhk kan me kohsang “ladu lelepek oh loalokong” me kitail apwalki wehwehki de weksang dahme kitail kin medewe? Kitail anahne nantihong wehwehki. Kitail en dehr awiawihte oh kasik me wekidekla ehu pahn wiawi me pahn pwungiong atail madamadau.​—Wadek Luk 12:42.

KOLOKOL OMW LOALOPWOAT ONG OMW PWOUD

12, 13. Dahme kahrehda emen ele pahn pangala eh pwoud? Dahme kahrehda uwen sounpar sohte kihda kahrepe mwahu ong soangen tiahk wet?

¹² Sohte lipilipil ia duwen emen eh kin pangala emen, met kin wia tiahk widing ehu. Kitail en dehr mweidohng tiahk wet en kauwehla popohl oh miniminpene nan peneinei Kristian kan oh mwomwohdiso. Kitail pahn tehkpene ia duwen atail kak kakehlaka atail loalopwoatohng atail pwoud oh atail Koht.

¹³ Kamwahl iei tiahk en pangala emen me keieu kamedek. Emen me sohte kin lelepek ong eh pwoud kin kauwehla eh loalopwoat oh uhd kin poakepoake emen tohrohr. Emen me eh pwoudo pitihedi kin uhd kelehpwla. Met eh mour wekila douluhl. Ia duwen met eh kak wiawihong meh riemen me mahs limpoakpene? E kin kalapw tepida ni pwopwoud ehu ara sohla nsenohki pepehm en emenemen. Emen sounpadahk me adaneki Gabriella Turnaturi kawehwehda me en pitihedi ahn emen pwoud kak wiawi pwehki pwopwoud ehu sohla wia uwen ara kak koaros pwe ira en kakehlaka ara nanpwungmwahu. Met pil kak wiawihong pwopwoud kan me mahlahr oh pwopwoudkier sounpar tohto. Karasepe, ohl emen me sounpar 50 oh pwopwoudkier sounpar 25 mweisang eh pwoud lelepeko pwehn kak pwoudikihda emen lih tohrohr me e mwahukihda. Ekei kin nda me ihme aramas kin kalapw wia nan soangen sounparo. Ahpw uwen sounpar sohte kihda kahrepe mwahu ong soangen tiahk wet. Emen eh soaloalopwoat ong eh pwoud uhdahn sohte konehng. E wia tiahk en pangala emen.b

14. (a) Ia sapwellimen Siohwa pepehm ong irail me soaloalopwoatohng arail pwoud? (b) Dahme Sises mahsanih duwen soaloalopwoat nan pwopwoud ehu?

¹⁴ Ia sapwellimen Siohwa pepehm duwen irail ko me kesehla arail pwoud ni kahrepe me sohte poahsoankihda Paipel? Atail Koht kin ketin kalahdeki mweipeseng oh e kin ketin doadoahngki mahsen kehlail kan ong irail kan me kin wiakauwe arail pwoud oh kesehla. (Wadek Malakai 2:13-16.) Duwehte Semeo, Sises pil sapwellimaniki pepehmohte duwen soaloalopwoat nan pwopwoud ehu. E mahsanih me emen sohte kak kesehla eh pwoud oh wiahki met mwomwen sohte mehkot.​—Wadek Madiu 19:3-6, 9.

15. Ia duwen irail me pwopwoud kan ar kak kakehlaka arail loalopwoatohng arail pwoud?

¹⁵ Ia duwen irail me pwopwoud kan ar kak kakehlaka arail loalopwoatohng arail pwoud? Mahsen en Koht mahsanih: “Rapahki omw peren rehn serepein [de pwutak] me ke pwoudiki” oh “dadaurete omw peren ong lih [de ohl] emen me ke poakohng.” (Lep. Pad. 5:18; Ekl. 9:9) Ni ara mahmahla, ira anahne wia soahng koaros me ira kak pwehn kolokol ara nanpwungmwahu en kehlail ni paliwar oh pepehm. Ia wehwehn met? Pwopwoud ehu anahne kerenpene sang ni ara kin kadekpene, apwalih anahn en emenemen, oh kihong ahnsou ong emenemen. Ira anahne nantihong perehla ara mouren pwopwoud oh nanpwungmwahu rehn Siohwa. Pwe ira en wia met, ira anahne onopkihpene Paipel, kaukaule doadoahkpene nan kalohk, oh kapakapkipene sapwellimen Siohwa kapai kan.

KOLOKOLETE OMW LOALOPWOATOHNG SIOHWA

16, 17. (a) Ia duwen atail loalopwoatohng Koht kak lelohng kasongosong nan peneinei oh nan mwomwohdiso? (b) Karasepe dahieu kasalehda me imwila mwahu kak kohsang atail kin peikiong kaweid en dehr werekiong peneinei me piskenla?

¹⁶ Mie irail kan nan mwomwohdiso me wiahda dihp laud oh ale peneu kehlail “pwe irail en kak ahneki pwoson kehlail.” (Taitus 1:13) Pwehki arail wiewia kan oh sohte men koluhla, ekei anahne piskenla. Met sewese irail me kapwaiada kaiahn wet ren kamwahwihala arail nanpwungmwahu rehn Koht. (Ipru 12:11) Ia duwen ma emen omw peneinei de kompoakepahmw piskenla? Dahme kitail kin wia nan soangen irair wet pahn kasalehda ma kitail kin loalopwoatohng aramaso de Koht. Kitail anahne loalopwoatohng Siohwa. E kin ketin mahmahsanih ma kitail kin idawehn sapwellime kaweid en dehr werekiong emen me piskenla sohte lipilipil ihs ih.​—Wadek 1 Korint 5:11-13.

¹⁷ Ehu karasepe kasalehiong kitail me imwila mwahu kak wiawi ma peneinei ehu kin kolokol arail loalopwoatohng Siohwa sang ni arail kin idawehn sapwellime kaweid en dehr werekiong arail peneinei me piskenla. Ohl pwulopwul men piskenla erein sounpar 10. Erein ahnsowo, eh pahpa oh nohno oh rie pwutak pahmeno sohte kin “patehng” ih. Ekei pak e kin song en kohla rehrail ahpw emenemen irail kolokolete arail loalopwoatohng Siohwa. Irail sohla pwurehng tuhwong. Mwurin eh pwurodo nan mwomwohdiso, e nda me ahnsou koaros e kin loaleidkihda eh kin mi rehn eh peneinei, ahpw keieu nipwong kan me e kin kelekelehpw. E nda me ma eh peneinei kin mi reh kisin ahnsoukiste, met kak kaitarala eh men mi rehrail. Ahpw re sohte kin koasoiong ni ahl sohte lipilipil. Eri eh uhdahn men mi rehrail wia ehu kahrepen eh men kamwahwihala eh nanpwungmwahu rehn Siohwa. Tamataman karasepe wet ma mie pak me ke men kauwehla sapwellimen Koht koasoandi en dehr werekiong omw peneinei me piskenla.

18. Dahme ke pahn wia mwurin atail sukuhlkier duwen karasepe kan en loalopwoat oh soaloalopwoat?

¹⁸ Kitail kin mi nan sampah ehu me aramas tohto kin soaloalopwoat oh pangala emenemen. Ahpw nan mwomwohdiso, mie mehn kahlemeng mwahu tohto en irail kan me kin loalopwoat me kitail kak kahlemengih. Mwomwen arail mour kin kasalehda uwen ar kin “mwakelekel [“loalopwoat,” NW], oh pwung, oh sohte kisin sapwung kis mie.” (1 Des. 2:10) Kitail en wia soahng koaros me kitail kak pwehn kolokol atail loalopwoatohng Koht oh emenemen.

[Nting tikitik kan me mi pah]

[Kilel nan pali 16]

Mendahki meteikan soikala Sises, Piter kin loalopwoatohng nin duwen Sapwellimen Kohto me keidi