Siohwa Kin Ketin Pere Kitail Pwe Kitail en Komourala
“Kumwail . . . aleier silasil mwahu pahn manaman en Koht pwehki amwail pwoson, nindokon amwail awiawih komourpamwail me nektehn sansalda ni imwilahn ahnsou.”—1 PIT. 1: 5.
IA OMW PASAPENG?
Ia duwen Siohwa eh kin ketin kahrehda kitail en iangala kaudok mehlel?
Ia duwen atail kak mweidohng Siohwa en ketin kaweid kitail?
Ia duwen Siohwa eh kin ketikihong kitail mehn kangoang kan?
1, 2. (a) Dahme kitail kak kamehlelehki me Koht pahn ketin sewese kitail en loalopwoat lao lel imwi? (b) Ia uwen laud Siohwa eh ketin mwahngih emenemen kitail?
“AHPW me pahn dadaurete lel ni imwi, ih me pahn mourla.” (Mad. 24:13) Sapwellimen Sises mahsen pwukat kasalehiong kitail ni sansal me pwe kitail en pitsang kasohrlahn ahn Sehdan sampah, kitail anahne loalopwoatohng Siohwa lao lel imwi. Ahpw met sohte wehwehki me Siohwa kin ketin kasik kitail en dadaurete ni atail kin likih pein atail loalokong de kehl. Paipel inoukihda: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Kor. 10:13) Dahme kitail kak sukuhlki sang mahsen pwukat?
2 Siohwa kin ketin tehk mwahu pwe kitail en dehr lelohng kasongosong ehu me kitail sohte kakohng. Siohwa kak ketin wia met pwehki e ketin mwahngih soahng koaros duwen kitail, iangahki atail kahpwal kan, soangen aramas dahkei kitail oh ia uwen atail kak dadaurete. Ia duwe, Koht kin ketin uhdahn mwahngih kitail? Ei. Iren Paipel kan padahkihong kitail me Siohwa ketin mwahngih soahng koaros duwen emenemen kitail. E ketin mwahngih dahme kitail kin wiewia oh atail tiahk koaros nan ehuehu rahn. E pil ketin mwahngih atail madamadau oh dahme mi nan mohngiongitail.—Wadek Melkahka 139:1-6.
3, 4. (a) Ia duwen nsenoh me Siohwa ketin kasalehiong Depit eh kadehdehda me Siohwa kin ketin tetehk emenemen kitail? (b) Ia duwen Siohwa eh kin ketin kasalehda eh ketin nsenohki kitail rahnwet?
3 Ia duwe, Koht Wasa Lapalahpie uhdahn ketin nsenohki kitail aramas? Sounmelkahkao Depit kin medemedewe met oh patohwan ong Siohwa: “Ni ei kin kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure?” (Mel. 8:3, 4) Ele Depit patohwan idek soangen peidek wet pwehki soangen nsenoh me Siohwa ketin kasalehiong ih. Ni Depit, nein Sehsi pwutak me keieu tikitik eh wiewiahte soun silepen sihpw men, Siohwa ketin wiahki ih “ohl emen me e ketin kupwurki” oh e ketin pilada pwehn wiahla kaunen Israel. (1 Sam. 13:14; 2 Sam. 7:8) Sounkapikpen lahng oh sampah ketin mwahngih ahn Depit madamadau rir kan oh eh pepehm kan mendahki ih silepen sihpw pwulopwul men. Medewehla ahn Depit pepehm ni eh esehda met!
4 Nsenoh me Siohwa kin ketin kasalehiong kitail rahnwet pil kin kapwuriamwei. E ketin kihpene aramas en “wehi koaros” me kin “kesempwal” ong ih pwe ren wiahla sapwellime tohnkaudok kan. (Ak. 2:7) E pil kin ketin sewese irail kan me kin papah pwe ren kin loalopwoatete. Ia duwen Siohwa eh kin ketin wia met? Mwohn atail pahn tehkpene pasapeng en peidek wet, kitail kak koasoiapene ia duwen Siohwa eh kin ketin tepida kainangiong aramas akan kaudok mehlel.
KOHT KETIN KAHREHDA KITAIL EN KARANIHALA
5. Ia duwen Siohwa eh kin ketin kahrehiong aramas en karanihala Sapwellimeo? Menlau kihda ehu karasaras.
5 Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Mahsen pwukat kasalehda me kitail anahne sapwellimen Koht sawas pwehn wiahla sapwellimen Krais tohnpadahk. Kitail anahne Koht en ketin kahrehda kitail en karanihala sapwellime Ohlo. Ia duwen eh kin ketin wia met? E kin ketin doadoahngki doadoahk en kalohk oh sapwellime manaman. Karasepe, ni Pohl oh ienge misineri ko arail mi nan Pilipai, re tuhwong lih emen adaneki Lidia. Paipel padahkihong kitail me ni arail tepida kalohkihong rongamwahwo, “Kaun-o ketin ritingada eh mohngiong pwe en rong kanahieng dahme Pohl koasoakoasoia.” Koht ketin doadoahngki sapwellime manaman pwehn sewese en wehwehki oh alehda rongamwahwo. Met imwikihla Lidia oh eh peneinei arail papidaisla.—Wiewia 16:13-15.
6. Ia duwen Siohwa eh kin ketin kahrehda kitail koaros en iangala kaudok mehlel?
6 Ia duwe, met wiawihiongete Lidia? Soh. Ma kowe Kristian papidaislahr men, Koht pil kin ketin kainangihiukedo nan padahk mehlel. Duwehte Samatail me ketiket nanleng eh ketin mahsanihada mehkot mwahu nan ahn Lidia mohngiong, e pil ketin mahsanihada mehkot mwahu rehmw. Ni omw kin tepida rong rongamwahwo, Siohwa kin ketin doadoahngki sapwellime manaman pwehn sewese iuk ken wehwehki oh alehda rongamwahwo. (1 Kor. 2:11, 12) Ni omw kin song doadoahngki nan omw mour dahme ke sukuhlki sang nan Paipel, e kin ketin kapaiaiukada. Ni omw inoukihong omw mour, e kin ketin kupwurperenki. Eri udahno, Siohwa me kin ketin sewese iuk ni omw tepida papah ih oh e kin ketin seweseiuk sang ahnsowo leledo met.
7. Ia duwen atail ese me Koht pahn ketin sewese kitail en loalopwoatete?
7 Siohwa ketin sewese kitail en tepida papah ih, eri kitail kak kamehlele me e pahn ketin pousehlahte sewese kitail en kolokolete atail loalopwoat. E ketin mwahngih me, duwehte kitail sohte pein iangala padahk mehlel, kitail sohte pil kak pein mihmihte nan padahk mehlel. Wahnpoaron Piter ntingkihlahng Kristian me keidi kan me re “aleier silasil mwahu pahn manaman en Koht” de sapwellimen Koht manaman kin pere irail pwe ren kak pousehlahte loalopwoatohng ih. (1 Pit. 1:5) Dahme Piter koasoia kak kadoadoahk ong Kristian koaros. Ia duwen Siohwa eh kin ketin sinsilei kitail rahnwet? Kitail men ese pasapengpen peidek wet pwehki kitail koaros anahne sapwellimen Koht sawas pwe kitail en kin loalopwoatohng.
KOHT KAK KETIN DOAREIKITAILSANG WIAHDA SAPWUNG
8. Dahme kahrehda kitail kakete wiahda sapwung laud ehu?
8 Kahpwal en mour oh atail soh unsek kak kahrehda atail sohte kak kilangwohng soahng kan ni ahl me Siohwa kin ketin mahsanih. Eri kitail pahn kakete wiahda sapwung laud ehu mwohn atail tehkada. (Wadek Kalesia 6:1.) Mie pak me met wiawihong Depit.
9, 10. Ia duwen Siohwa eh ketin kauhdi Depit sang wiahda sapwung laud ehu? Dahme Siohwa kin ketin wiahiong kitail rahnwet?
9 Depit kasalehda kanengamah laud ni ahnsou me Nanmwarki Sohl pwakipwakih. Mendahki Depit ahneki ahnsou mwahu en song dupukohng Sohl, ahpw e sohte wia met. (1 Sam. 24:2-7) Ahpw mwurinte mwo, Depit sohla ahneki kanengamah. Ih oh nah ohl ako anahnehda kanarail mwenge oh nimerail pihl, eri ni wahu e peksawas rehn emen ohlen Israel ede Napal. Napal kidahwehda Depit oh sohte sewese. Met kahrehiong Depit en uhdahn lingeringerda ih eri koasoanehdi ren kemehla Napal oh ohl koaros me mi nan imweo. Depit sohte uhdi oh medewe me Siohwa kakete kadeikihda eh pahn kemehla aramas soh dipe kan. Ahpw Apikail ahn Napal pwoud, kauhdi Depit en dehr wiahda soangen sapwung suwed wet. Depit esehda me Siohwa ketin doadoahngki Apikail pwehn kauhdi ih, eri e ndahng Apikail: “Kaping ong KAUN-O, Koht en Israel, me ketin poaroneikomwihdo pwehn tuhwong ie. Kalahngan en Koht pwehki omwi kupwuramwahu oh dahme komw wiadahr rahnwet pwe I en dehr wiahda sapwung laud en kemehla aramas oh I en dehr dupukohng ar wiewia suwed ong ie.”—1 Sam. 25:9-13, 21, 22, 32, 33.
10 Dahme kitail kak sukuhlki sang poadopoad wet? Siohwa kak ketin kauhdi kitail sang wiahda sapwung laud ehu. Kitail sohte pahn kasik me ahnsou koaros me kitail pahn kereniong wiahda sapwung laud ehu, Siohwa pahn ketin doadoahngki emen pwehn kauhdi kitail. Kitail pil sohte uhdahn kak ese ia duwen Koht eh pahn ketin mwekid nan soangsoangen irair kan de dahme e pahn ketin mweidohng en wiawi pwehn kapwaiada kupwure. (Ekl. 11:5) Ahpw kitail kak kamehlele me ahnsou koaros Siohwa kin ketin mwahngih atail irair kan oh e pahn ketin sewese kitail en pousehlahte loalopwoatohng ih. E ketin inoukihong kitail: “I pahn padahkihong uhk ahl me ke pahn weid ie; I pahn kaweid uhk oh panawihiuk.” (Mel. 32:8) Ia duwen Siohwa eh kin ketikihong kitail kaweid? Ia duwen atail kak paiekihda? Oh dahme kahrehda kitail kak kamehlelehki me Siohwa kin ketin kaukaweid sapwellime aramas akan rahnwet? Tehk duwen peidek pwukat ar pasapengla nan pwuhken Kaudiahl.
KAWEID KIN PERE KITAIL
11. Ia uwen laud Siohwa eh kin ketin mwahngih dahme kin wiewiawi nan mwomwohdiso en sapwellime aramas akan?
11 Nan kasansal me kileldi nan Kaudiahl irelaud 2 oh 3, Nanmwarki Sises Krais mwahngih dahme wiewiawi nan mwomwohdiso isuh ko. Krais sohte mwahngihete mwomwen mwomwohdiso pwukat. Nan kasansal wet, e ketin kasalehda dahme kin uhdahn wiewiawi oh pil ihs me kin wia soahng pwukat. E pil ketin kapinga mwomwohdiso pwukat oh ketikihda kaweid me ehuehu mwomwohdiso anahne. Ia wehwehn kasansal wet ong kitail? Mwomwohdiso isuh ko kin wiliandi Kristian me keidi kan mwurin pahr 1914. Mendahki kaweid me Krais ketikihda kin doke mehlel me keidi ko, mwomwohdiso en sapwellimen Koht aramas koaros nan sampah rahnwet kak paiekihda. Eri kitail kak nda me Siohwa kin ketin doadoahngki sapwellime Ohlo pwehn kaweid sapwellime aramas akan rahnwet. Ia duwen atail kak mweidohng Siohwa en ketin kaweid kitail?
12. Ia duwen atail kak mweidohng Siohwa en ketin kaweid kitail?
12 Ehu ahl me kitail kin mweidohng Siohwa en ketin kaweid kitail iei sang atail kin wia pein atail onop. Siohwa ketikihong kitail kaweid tohto sang nan neitail pwuhk kan me ladu lelepek oh loalokong kin wiahda. (Mad. 24:45) Ahpw ma kitail men paiekihda kaweid pwukat, kitail anahne wiahda ahnsou en onopki oh doadoahngki dahme kitail sukuhlki nan atail mour. Ni atail kin wia pein atail onop, kitail kin mweidohng Siohwa en ketin pere kitail en dehr wiahda sapwung. (Sud 24) Mie pak me ke kin onopki ire ehu nan neitail pwuhk oh medewe, ‘Met uhdahn wiawihda ong ie’? Ke anahne pwungki me met Siohwa ketin kapwunguhkala. Duwehte kompoakepatail men eh kin doahke pwopwatail pwe kitail en tehk, Siohwa kak ketin doadoahngki sapwellime manaman en sewese kitail en tehkada me mie mehkot nan atail wiewia de mwomwatail kan me kitail anahne kamwahwihala. Ni atail kin kapwaiada kaweid en sapwellimen Koht manaman, kitail kin mweidohng Siohwa en ketin kaweid kitail. (Wadek Melkahka 139:23, 24.) Kitail pahn pil kalaudehla atail koasoiapene uwen laud en ahnsou oh nanti me kitail kin wia nan atail onop.
13. Dahme kahrehda e wia elen loalokong ong kitail en medewe ia uwen ahnsou oh nanti me kitail kin kihong atail onop?
13 Ma kitail pahn nohn doadoahngki ahnsou laud ong mehn kamweit kan, kitail sohte pahn ahneki ahnsou itar ong pein atail onop. Emen brother koasoia me met inenen mengei en wiawi. Dahme kahrehda? E koasoia: “Mehn kamweit kan tohtohsang mahs oh re pweitikitik sang mahs. Re kin pwarada nan kasdo, computer oh pil nan cellphone. Re mi wasa koaros.” Ma kitail sohte pahn kanahieng, kitail kak tepida doadoahngki ahnsou laud ong mehn kamweit kan lao sohla atail ahnsou en onopki padahk loal kan. (Ep. 5:15-17) Emenemen kitail kak pein idek rehtail: ‘Ia uwen ei kin kalapw doadoahngki ei ahnsou ong onopki ire loal kan en Mahsen en Koht? I kin wia met ihte ma mie ei padahk?’ Mwein kitail kak kamwahwihala atail doadoahngki atail ahnsou ong pein atail onop oh Kaudok en Peneinei pwehn onopki ire loal kan oh rapahki sapwellimen Siohwa erpit nan Paipel, duwehte atail kin rapahki silper de takai kesempwal. Erpit wet kak pere kitail oh sewese kitail en loalopwoatete lel ni imwi.—Lep. Pad. 2:1-5.
MEHN KANGOANG KAN KIN SEWESE KITAIL EN DADAUR
14. Ia duwen iren Paipel kan ar kasalehda me Siohwa kin ketin tetehk atail pepehm kan?
14 Depit lelohng irair kansensuwed oh kapwunod tohto nan eh mour. (1 Sam. 30:3-6) Paipel kasalehda me Siohwa ketin mwahngih ahn Depit pepehm kan. (Wadek Melkahka 34:18; 56:8.) Koht pil ketin mwahngih atail pepehm kan. E kin kansenamwahwih kitail en tamataman me Koht ketin mwahngih ni ahnsou me kitail kin “nan kapehd tikitiklahr” oh ‘sohla atail koapworopwor.’ Ire mehlel wet kansenamwahwihala Depit me koulki: “I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.” (Mel. 31:7) Ahpw Siohwa kin ketin wia laudsang mwahngih atail kapwunod kan. E kin ketin sewese kitail en dadaurete ni eh kin ketin kansenamwahwih kitail oh ketikihong kitail mehn kangoang kan. Ehu ahl me e kin ketin wia met iei nan mihting en Kristian kan.
15. Dahme kitail sukuhlki sang dahme wiawihong Asap?
15 Dahme lelohng Asap sewese kitail en wehwehki dahme kahrehda e kesempwal en iang towehda mihting kan. Asap kin medemedewe dahme kahrehda me pwung kan kin lokolongki, a me suwed kan mwomwen kin pweida mwahu, oh met kaluwetehla ih. E tepida medewe me sohte katepen eh papah Siohwa. E kasalehda eh pepehm kan ni ahl wet: “Ni ei lamalam eh suwedla oh I pil nsensuwedla.” Met kahrehda eh kereniong uhdihsang papah Siohwa. Dahme sewese Asap en kapwungala eh madamadawo? E koasoia: “I lao patohlong nan Tehnpasomwio.” E kak kapwungala eh madamadau oh pepehm sang ni eh werekiong meteikan me kin kaudokiong Siohwa. Asap diarada me pweidahn me suwed kan kin ongete ahnsou mwotomwot oh Siohwa uhdahn pahn ketin kapwungala irairo. (Mel. 73:2, 13-22) Mwein ekei pak kitail kin ahneki soangen pepehm wet. Soahng kan me sohte pwung oh sapahrek me kitail kin kilang nan ahn Sehdan sampah kak kahrehda kitail en pwunod oh nsensuwedla. Ahpw ni atail kin tuhwong riatail kan, kitail kin alehdi kehl oh sawas me kitail anahne pwehn wie papah Siohwa ni peren.
16. Ia duwen mehn kahlemeng en Ana eh kak sewese kitail?
16 Ahpw ia duwen ma mie irair ehu nan mwomwohdiso me kahrehda e apwal ong uhk en iang towehda mihting kan? Mwein ke anahne uhdihsang wia pwukoa ehu nan mwomwohdiso oh ke namenekla. De mwein mie mehkot me kowe oh emen Kristian sohte pwungkipene. Ma ke mihla nan ehu irair pwukat, mehn kahlemeng en Ana kak sewese iuk. (Wadek 1 Samuel 1:4-8.) Eh pwoudo pil pwoudiki emen lih ede Penina. Penina kin kalapw kahrehda Ana en inenen nsensuwedla. Met kin keieu apwal ni ahnsou me peneineio kin kohla Sailo pwehn wia arail meirong ong Siohwa nan ehuehu pahr. E kin inenen nsensuwedla kahrehda e kin “sengiseng oh sohla kin men mwenge.” Ahpw Ana sohte uhdihsang kohla wasa me e kak kaudokiong Siohwa Koht ie. Siohwa ketin kupwurki eh loalopwoat oh ketin kapaiada ih.—1 Sam. 1:11, 20.
17, 18. (a) Ni ahl dahkei kitail kin alehdi mehn kangoang kan ni mihting kan? (b) Ia omw pepehm duwen Siohwa eh kin ketin apwalih iuk ni limpoak?
17 Rahnwet, Kristian kan anahne kahlemengih Ana sang ni arail kin kaukaule towehda mihting kan. Atail mihting kan kin kihong kitail mehn kangoang kan me kitail anahne. Kitail koaros kin paiekihda mehn kangoang pwukat. (Ipru 10:24, 25) Ni mihting kan, kitail kin pehm limpoak en riatail kan oh met kin kansenamwahwihala kitail. Karasepe, mie padahk de pasapeng ehu me kak sair atail mohngiong. Emen riatail ele rong kitail ni kadek de nda mehkot me kahrehda kitail en nsenamwahula. (Lep. Pad. 15:23; 17:17) Oh ahnsou me kitail kin iang koul ong Siohwa, kitail kin pwurehng kehlailda oh perenda. Kitail kin keieu anahne mehn kangoang kan sang ni mihting kan ni ahnsou me kitail kin ahneki madamadau kan me kin kapwunode kitail. Ni mihting kan me Siohwa kin ketin ‘kansenamwahwihkitailla,’ oh met kin sewese kitail en dadaurete oh pousehlahte loalopwoat.—Mel. 94:18, 19.
18 Siohwa kin ketin apwalih kitail ni limpoak oh met kahrehda kitail en pehm me kitail sohte anahne perki mehkot duwehte sounmelkahka Asap ni eh koulkihong Siohwa: “Komwi kin ketin kolokolete pehiet. Komw kin ketin kahluwahkin ie sapwellimomwi kaweid.” (Mel. 73:23, 24) Kitail kin uhdahn kalahngankihong Siohwa mehn perepatail oh sawas me e ketikihong kitail pwe kitail en dadaurete lel ni imwi!
[Kilel nan pali 29]
Koht pil ketin kahrehda ken iangala kaudok mehlel
[Kilel nan pali 30]
Atail kapwaiada sapwellimen Koht kaweid kin pere kitail
[Kilel nan pali 31]
Mehn kangoang kan kin sewese kitail en dadaur