Paipel Audaudki Pwuhk kan me Ehupene
“Pwe sohte mwahn kokohp ehu kin pwilisang ni nsenen aramas emen, ahpw Ngehn Sarawi [“sapwellimen Koht manaman,” NW] me kin ti pohn aramas ni ar kin lohkihda mahsen en Koht.”—2 PITER 1:21.
IA DUWEN PAIPEL EH WEKSANG PWUHK TEIKAN? Pwuhken mahs kan sohte kin kalapw ehupene mehnda ma re ntingdi ahnsou tehieu. Pwuhk kan me kin ntingdi sang soangsoangen aramas kan, soangsoangen wasa oh soangsoangen ahnsou sohte kin ehupene. Ahpw Paipel kin kasalehda me pwuhk 66 ko koaros pwilsang rehn emente oh e kin ehupene oh dokpene.—2 Timoty 3:16.
KARASEPE: Moses, sounsilepen sihpw men nan pahr 1500 samwa mwohn Krais ntingihedi nan tepin pwuhk en Paipel me “nein liho” pahn kohdo pwehn doarehla tohnsampah. Pwuhk wet pil kohpada mwuhr me kadaudoko pahn kohsang kadaudok en Eipraam, Aisek oh Seikop. (Senesis 3:15; 22:17, 18; 26:24; 28:14) Mpen sounpar 500 mwuri, soukohp Nadan kasalehda me kadaudoko pahn kohsang nan peneinei en nanmwarki Depit. (2 Samuel 7:12) Sounpar kid mwurin mwo, wahnpoaron Pohl kawehwehda me kadaudoko pahn wiawihkihda Sises oh pwihn ehu me pilipilda en wia sapwellime kan. (Rom 1:1-4; Kalesia 3:16, 29) Eri lel ni kaimwiseklahn erein pahr epwiki, kaimwiseklahn pwuhken Paipel kohpada me tohn kadaudoko pahn kadehde duwen Sises pohn sampah, kaiasada kohdahla nanleng oh iang ih kakaun erein pahr 1000. Kadaudok wet pahn kauwehla Tepil oh doarehla tohnsampah.—Kaudiahl 12:17; 20:6-10.
DAHME EKEI KOASOIAHKI PAIPEL: Mwurin eh kasawih mwahu pwuhk 66 en Paipel ko pwon, Louis Gaussen ntingihedi me e pwuriamweikihla me “pwuhk wet uhdahn ehupene douluhl mendahki sounnting tohto iang ntingihada erein sounpar 1,500, . . . oh song en kapwaiada mehn akadei ehute oh pousehlahte kanekehla pwuhko mendahki re sohte uhdahn wehwehki ire me pid poadopoad en sapwellimen Koht Ohl eh kamaiauda tohnsampah.”—Theopneusty—The Plenary Inspiration of the Holy Scriptures.
IA OMW MADAMADAU? Ia duwe, ke pahn kasik me pwuhk ehu me soangsoangen aramas 40 ntingihedi erein sounpar tohtohsang 1,500 en uhdahn ehupene? De Paipel weksang pwuhk teikan?
[Blurb nan Pali 7]
“Ni ahnsou me nting pwukat kohpene, re wiahda ehu pwuhk . . . Sohte pwuhk ehu me pahrekiong nanpwungen pwuhk koaros nan sampah.”—THE PROBLEM OF THE OLD TESTAMENT, BY JAMES ORR