Kahpwal kan Duwehte Melimel Ape​—Mehn Kadehde Me Koht Ketin Lemei?

DAHME EKEI ARAMAS KIN NDA: “Koht ketin kaunda sampah, eri ih me ketin kahrehda kahpwal en melimel, rerrer en sahpw de iloak laud ape; kahrehda, e ketin lemei.”

DAHME PAIPEL MAHSANIH: “Sampah unsek mi pahn manaman en Me Suwedo.” (1 Sohn 5:19) Ihs “Me Suwedo”? Paipel kahdaneki ih Sehdan. (Madiu 13:19; Mark 4:15) E apwal en kamehlele? Medewehla met: Ma Sehdan ahneki manaman pohn sampah, eri e kin kamwakid aramas akan ren duwehte ih me roporop, noahrok oh sohte medewe mwahu duwen ahnsou kohkohdo. Met sou pahn kawehwehda dahme kahrehda aramas sohte kin apwalih mwahu sampah, eh wasahn kousoan? Me saman tohto kin kaweidki me aramas ar sohte kin apwalih mwahu nansapw oh nansed ele kin kahrehda oh pil kalaudehla kahpwal en melimel, rerrer en sahpw, de iloak laud ape, de kahrehda aramas en kalapw lelohng apwal pwukat.

Eri dahme kahrehda Koht ketin mweidohng Sehdan en kamwakid laud aramas akan? Pwehn esehda pasapengpen met, kitail medewehla tepin poadopoad en aramas, ni ahnsowo me tepin ohl oh lih uhwongada Koht nin duwen ara Kaun. Pali laud en aramas akan pil iang wia soahngohte. Pilipil wet, en soikala kaundahn Koht, kahrehiongehr tohnsampah en mihla pahn Sehdan, sapwellimen Koht imwintihti. Sises eri ketin kahdaneki Sehdan “kaunen sampah wet.” (Sohn 14:30) Ia duwe, Sehdan pahn kakaun kohkohlahte? Soh!

Ahpw, Siohwaa sohte ketin pohnsehsehla de sohte ketin nsenohki lokolok kan me Sehdan kahrehda. Ni mehlel, Koht kin uhdahn ketin mwekidki lokolok en aramas. Karasepe, me pid kahpwal kan me lelohng wehin Israel, Paipel mahsanihki duwen Koht: “Sang sapwellime limpoak oh kalahngan me e ketin kapitkinirailla.” (Aiseia 63:9) Koht ketin kalahngan oh ketin koasoanehdi en ketikihsang kaunda lemei en Sehdan ahnsou keren. E ketin idihada sapwellime Ohl, Sises Krais, pwehn wia Nanmwarki pwung oh pahrek men kohkohlahte.

IA DUWEN OMW PIDADA MET? Kaundahn Sehdan sohte kin pere aramas akan sang kahpwal pwukat, ahpw sapwellimen Sises kaunda pahn wia met. Ehu pak Sises ketin sewesehda sapwellime tohnpadahk ko erein melimel laud ehu. Paipel mahsanih: “Sises eri ketin . . . angiangihada melimelo, mahsanih, ‘Tokedi!’ E ahpw pil mahsanihong iloak kan, ‘Kumwail meleileidi!’ Eri, ni ahnsowohte melimelo pa tokedi, ahpw meleileidi kowahlap.” Tohnpadahk ko nda: “Ihs memenet, me kisinieng oh iloak kan pil kin peikiong?” (Mark 4:37-41) Dahme wiawio kamehlelehiong kitail me Sises pahn ketin pere aramas peik koaros erein sapwellime kaunda nin duwen Nanmwarki.​—Daniel 7:13, 14.