Solahr Kahpwal Pwukat!
MA ARAMAS emen ndaiong uhk, “Ahnsou keren pahn sohla kahpwal,” dahme ke pahn wia? Mwein ke pahn nda, “Mehlel? Kahpwal kin mie ahnsou koaros.” De ke pahn medewe, ‘Ihs me e pitipitih?’
Mehnda ma e mwomwen me kahpwal pwukat pahn kin wiawi ahnsou koaros, uhdahn mie koapworopwor me met pahn wekidekla. Wekidekla wet sohte pahn kohsang rehn aramas. Aramas akan sohte kak uhdahn wehwehkihla ia duwen oh ia kahrepen mwekid pwukat kin wiawi, oh re sohte kak wekidala. Nanmwarki Solomon en Israel me kin ndandki eh loalokong ntingihedi me kitail “sohte kak wehwehkihla dahme Koht ketin wiewia. Ni uwen me ke nannantihong, ke sohte kak diarada. Aramas kupwurokong kan kin kose me re ese, ahpw re sehse.”—Eklesiasdes 8:17.
Ma aramas sohte kak kauhdi kahpwal pwukat, a ihs me kak? Paipel kasalehda me Sounkapikpatail me pahn ketin wia wekidekla wet. Ih me ketin koasoanehdi mwekimwekid en audepen pahnlahng oh sampah, duwehte mwekimwekid en pihl kan. (Eklesiasdes 1:7) Weksang douluhl aramas, sohte idin sapwellimen Koht manaman. Soukohp Seremaia kadehdehda met ni eh koasoia: “Maing KAUN, Wasa Lapalahpie, komw me ketin wiahda sampah oh lahng sang ni sapwellimomwi roson oh manaman lapalap; sohte mehkot me apwal ong komwi.” (Seremaia 32:17) Pwehki Koht me ketin kapikada sampah oh audepe kan koaros, e sansal me e mwahngih dahme e pahn ketin wia pwe aramas akan en kak kousoan ni meleilei oh nsenamwahu.—Melkahka 37:11; 115:16.
Eri, ia duwen Koht eh pahn ketikihdo wekidekla wet? Soahng kamasepwehk kan me kin wihwiawi rahnpwukat kin wia “kilel” ehu me kasalehda duwen imwin koasoandi wet en sampah. Sises mahsanih: “Ni amwail pahn kilang mepwukat ar pahn wiawi, kumwail pahn esehki me Wehin Koht kerendohr.” (Madiu 24:3; Luk 21:31) Wehin Koht, me wia koperment ehu nanleng me e ketin koasoanehdi, pahn wahdo wekidekla laud nin sampah oh pil pahn kaunda mwekimwekid en nan wehwe duwehte keteu oh kisinieng. Mendahki pein Siohwa Koht sapwellimanki manaman en ketin wia met, ahpw e ketin idihada sapwellime Ohl en wia pwukoa wet. Soukohp Daniel koasoiahki menet: “E ahpw ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih.”—Daniel 7:14.
Sapwellimen Koht Ohl, Sises Krais, ketin alehdier manaman pwe en wiahda wekidekla kan koaros me anahn pwe sampah en wia wasa kansenamwahu ehu. Sounpar riekid samwalahro ahnsou me Sises ketiket sampah, e ketin kasalehda ni tikitik me e kak ketin kaunda keteu oh kisinieng. Ehu pak ni ahnsou me Ih oh sapwellime tohnpadahk mi nan pwoht ehu nan Sehd en Kalili, “engmahda, oh iloak kan pwungupwungdahng pohn pwohto, kereniong kamwowihedi.” Sapwellime tohnpadahk kan masepwehkada. Arail mour mihla nan keper, irail eri sohpeilahng Sises. Dahme Sises ketin wia? E ketin “mahsanihong iloak kan, ‘Kumwail meleileidi!’ Eri, ni ahnsowohte melimelo pa tokedi, ahpw meleileidi kowahlap.” Sapwellime tohnpadahk kan pwuriamweikihla met oh patohwan idek: “Ihs memenet, me kisinieng oh iloak kan pil kin peikiong?”—Mark 4:37-41.
Mwuhr, ni eh patohdahla nanleng, Siohwa ketikihong manaman me laudsang met. Nin duwen Nanmwarki en Wehin Koht, e ketin pwukoahki oh pil sapwellimaniki koahiek en ketin wiahda wekidekla koaros me anahn pwe aramas akan en mour meleilei oh nsenamwahu nin sampah.
Ahpw nin duwen kitail kilangehr, pali laud en kahpwal kan kin kohsang rehn aramas, oh e kin susuwedla pwehki arail noahrok oh roporop. Dahme Wehio pahn wiahiong irail kan me nantihlahte wiewia soahng pwukat oh sohte men wekidala arail mour? Paipel mahsanih me Kaun Sises pahn ketido “sang nanleng, iangahki sapwellime tohnleng manaman akan, oh pil iangahki mpwulen kisiniei, pwe en kaloke irail kan me pohnsehse Koht oh irail kan me sohte kin peikiong Rongamwahu en Kaun Sises.” Ei, Sises pahn ketin “kauwehla irail kan me kin kauwehla sampah!”—2 Deselonika 1:7, 8; Kaudiahl 11:18.
Mwuhr, “Nanmwarkien nanmwarki kan,” Sises Krais, pahn ketin kaunda ni unsek mwekimwekid en nan wehwe, duwehte keteu oh kisinieng ape. (Kaudiahl 19:16) E uhdahn pahn ketin koasoanehdi me towe kan en Wehio solahr pahn lokolongki kahpwal kan. E pahn ketin doadoahngki sapwellime manaman pwehn kaunda mwekimwekid en nan wehwe pwehn wia kamwahu ong aramas. Met pahn kamehlelehiong kitail dahme Siohwa Koht ketin inoukihong sapwellime aramas akan mahso: “I pahn kin kadaridiong kumwail keteu ni ahnsou mwahu, pwe sapwamwail kan en kin kihda wahnsahpw mwahu oh en kin mie wahntuhke kan.” (Lipai 26:4) Aramas akan pahn kauwada ihmw kan oh re sohte pahn perki mehkot de kauwehla: “Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan.”—Aiseia 65:21.
Dahme Ke Anahne Wia?
Ele ke duwehte ekei aramas me men kousoan nan sampah ehu me solahr kahpwal laud kan. Ahpw dahme ke anahne wia? Pwehki “irail kan me pohnsehse Koht oh irail kan me sohte kin peikiong Rongamwahu” sohte pahn kousoan nan sampah me sohte kahpwal loale ni ahnsou kohkohdo, eri e sansal me emen anahne en sukuhlki duwen Koht ahnsou wet oh utung sapwellime koasoandi en kaunda nin sampah. Koht kupwurki kitail en esehla ih oh peikiong rongamwahu en Wehio me e ketikihda ni eh ketin doadoahngki sapwellime Ohl.
Ahl me keieu mwahu en wia met iei onop Paipel ni keneinei. E kin audaudki kaweid kan me emen anahne pwehn mour nsenamwahu pahn kaundahn Wehio. Ke sou peki rehn Sounkadehdehn Siohwa kan en seweseiuk sukuhlki dahme Paipel padahngki? Re pahn perenki wia met. Ke kak uhdahn kamehlele me ma ke nantihong esehla Koht oh peikiong rongamwahwo, eri mahsen en Lepin Padahk 1:33 pahn pweida rehmw: “A ma mehmen pahn rong ie, e pahn ale komour. E pahn poadoandoarla, oh sohte kahrepen eh pahn masak mehkot.”