Dahme Kitail Kak Wia nan Soangen Kahpwal Pwukat?
Dahme emen kak wia pwehki dodpene oh kehlailahn kahpwal pwukat eh kin wie lalaudla? Kitail en tehkpene ekei wiepe kan me kitail kak wia.
Dehr mihmi wasa me kahpwal pwukat mi ie. Paipel mahsanih: “Aramas me eh lamalam mie kak kilangada kahpwal me kohkohdo oh wetsang; ahpw aramas tohto kin inenwohngete, ahpw nsensuwedkihla mwuhr.” (Lepin Padahk 22:3) Kitail kak doadoahngki kaweid erpit wet ong ahnsou apwal kan. Ma pakairpen ilok laud, lapake, de melimel pahn wiawi, e pahn mwahu ma irail me mi wasa pwukat pahn mwekidlahng wasa me sohte keper. Mour kesempwal sang ihmw de dipwisou kan.
Ekei kin pilada ren dehr kousoan wasa me keper. Ehu ripoht koasoia: “Keperpen kahpwal en rerrer en sahpw, melimel, lapake ape kin wiawi wasa kei te. Kisin wasa keite nin sampah me keper, oh ih wasa me pali laud en kahpwal pwukat pahn kin wiawi.” Karasepe, wasa karakarahk kan ni oaroahr de wasa me elen rerrer en sahpw kin mi ie kin wia wasa keper kei. Ma ke kak dehr kousoan soangen wasa keper pwukat de keseu sang, eri ke kak katikala apwal me ke pahn loiong.
Kaunopada dahme ke pahn wia. Ele ke kakete loiong kahpwal kan me sohte kasikpe mendahte ma ke kin kaunopada mwahu. Ma ke pahn kaunopada mwohn apwal pahn wiawi, e pahn mengei en powehdi omw apwal. Met kin pahrekiong kaweid en Lepin Padahk 22:3 me kileldi mwoweo. Ke kaunopadahr soahng kan me ke pahn anahne ni ahnsou karuwaru? Ehu pwuhk kasalehda soahng kei me kitail anahne me duwehte: Wini, pihl, mwenge me pwand en ohla me duwehte pwoaht, pwereht ape oh pil iangahki neitail doaropwehn insurance oh ID card. (1-2-3 of Disaster Education) E pahn pil mwahu ma kowe oh omw peneinei pahn koasoiapene duwen soangen kahpwal kan me kak pwarada oh dahme kumwail kak wia ni ehuehu kahpwal pwukat.
Kolokol omw nanpwungmwahu rehn Koht. Met kak wia sawas laud nan soangen irair koaros. Paipel kin mahsanih me Koht iei “Samatail me kalahngan oh Koht me pwarer en kansenamwahu koaros. Ih me kin ketin sewesei kitail nan atail apwal akan koaros.” Ehu ire pil mahsanih me ih Koht men me “kin ketin kamarahda nan kapehd en me toutoulahr akan.”—2 Korint 1:3, 4; 7:6.
Ei, Koht kin uhdahn ketin mwahngih dahme kin wiawihong irail kan me kin pwoson ih. Ih Koht en limpoak men oh e kin ketikihda kangoang ni soangsoangen ahl kan. (1 Sohn 4:8) Kitail sohte kin kapakap pwe manaman ehu en wiawihong kitail ahpw kitail kin kapakapki sapwellimen Koht manaman, oh met kak sewesei kitail nan irair koaros. Sapwellimen Koht manaman kak katamankihong irail kan me lelohng kahpwal iren Paipel kan me kak kamwaitala oh kansenamwahwihala irail. Sapwellimen Koht ladu lelepek kan kak ahneki pepehm me duwehte nanmwarki en Israel, Depit, me koasoia: “Mehnda ma I weweidwei nan rotorot mosul, a I sohte pahn masak mehkot, pwe komw ketin ieiang ie! Sapwellimomwi irar oh lepin seipali pahn kin sinsile ie.”—Melkahka 23:4.
Kristian kan kin sawaspene. Ni mwehin wahnpoaron kan, soukohp Kristian men me ede Akapwus kohpada “me lehk laud ehu kereniongehr kipehdi sampah pwon. (Lehko wiawiher ni ahnsou me Klaudius wia nanmwarki lapalap en Rom).” Lehk laud wet kahrehda kahpwal laud ong sapwellimen Sises tohnpadahk tohto nan Sudia. Dahme tohnpadahk kan me mihmi wasa teikan kin wia ni arail rongada kahpwal en riarail Kristian ko? Paipel mahsanih: “Tohnpadahk ko ahpw koasoanehdi me emenemen irail pahn kadarala uwen me e kak pwe en sewese riarail me pwoson akan me koukousoan nan Sudia.” (Wiewia 11:28, 29) Limpoak me kamwakid irail en kadarala sawas kan.
Sapwellimen Koht ladu kan kin wia duwehte met ni ahnsou me kahpwal keper kan kin wiawi rahnpwukat. Aramas akan kin ese Sounkadehdehn Siohwa kan pwehki arail kin sewese riarail me pwoson akan. Karasepe, ni ahnsou me rerrer en sahpw laud ehu lel Chile nan February 27, 2010, Sounkadehdehn Siohwa kan mwadang mwekidki oh kohla sewese riarail kan me lelohng kahpwalo. Karla, me iloak laud ehu wahsang imweo, koasoia: “E kansenamwahu oh kin wia mehn kangoang ong ie en kilang me rahn mwurio, iengat Sounkadehde kan pwarado sang wasa teikan pwehn sewese kiht. E uhdahn mehlel me Siohwa kin ketin kansenamwahwikitala ni eh ketin doadoahngki kadek en sounsawas pwukat. I pehm me e kin ketin poakepoake ie oh I sohte anahne perki mehkot.” Eh pahpa kahlap, me kaidehn emen Sounkadehde, kin tetehk duwen sawas kan me kin kohda. E koasoia: “Met uhdahn weksang dahme I kin kilang rehn tohn ei pelien lamalam.” Dahme e kilang kin kamwakid ih en peki rehn Sounkadehdehn Siohwa kan ren onop Paipel reh.
Atail kin werekiong irail kan me poakohng Koht kak wia sawas laud ni ahnsoun kahpwal kan.
[Kilel nan pali 6]
Ke kaunopadahr soahng kan me ke pahn anahne ni ahnsou karuwaru?
[Kilel nan pali 7]
Kitail sohte kin kapakap pwe manaman ehu en wiawihong kitail ahpw kitail kin kapakapki sapwellimen Koht manaman, oh met kak sewesei kitail nan irair koaros
[Kilel nan pali 7]
Kristian kan kin sawaspene ni ahnsoun kahpwal laud kan
[Kilel nan pali 7]
“I pehm me e kin ketin poakepoake ie oh I sohte anahne perki mehkot”