Ke Kin Kalahnganki Siohwa Eh Kin Ketin Nsenohki Tetehk Uhk?

1, 2. Ia duwen Siohwa eh kin ketin tetehk kitail eh weksang camera kan me kin tetehk nanial?

NAN sahpw tohto, palien polis kin doadoahngki camera pwe ren tetehk tangatang en sidohsa oh deipihdi aksident kan me kin wiawi. Re pil kin deipihdi soun tangahki sidohsa kan me loiong aramas akan nanial ahpw sohte sewese oh tangasang. Met kin sewese palien polis en diarada oh poarokedi irail pwukat. Pwehki camera pwukat, met e kin apwal ong aramas en pitsang arail kauwehla kosonned.

² Paipel mahsanih me silangin Siohwa kin mahmahsanih “wasa koaros.” (Lep. Pad. 15:3) Ia duwe, met wehwehki me e kin ketin tetehk kitail ahnsou koaros ihte pwehn mahsanih ma kitail kauwehla sapwellime kosonned kan? E kin ketin awiawihte pwehn kaloke kitail mwurinte atail wiahda sapwung kan? Soh douluhl! (Ser. 16:17; Ipru 4:13) Siohwa kin ketin tetehk kitail pwehki e ketin poakohng kitail oh e ketin kupwurki kitail en dehr loiong kahpwal ahpw ahneki nsenamwahu.​—1 Pit. 3:12.

3. Ni ahl limau dahkei me Siohwa kin ketin apwahpwalih kitail?

³ Ia duwen atail kak kalaudehla atail wehwehki sapwellimen Koht limpoak ong kitail? Kitail pahn koasoiapene ahl limau me Siohwa kin ketin apwahpwalih kitail. (1) E kin ketin kaweid kitail mwohn atail pahn wiahda mehkot suwed. (2) E kin ketin kapwung kitail ni ahnsou me kitail tepida wiahda sapwung. (3) E kin ketin kahluwahkin kitail kaweid kan en Paipel. (4) E kin ketin sewese kitail ni ahnsou me kitail lelohng kahpwal kan. (5) E kin ketin katingih kitail ni atail wiahda mehkot mwahu.

SIOHWA KIN KETIN KAWEID KITAIL

4. Dahme kahrehda Koht ketikihong Kain kaweid mwohn eh dipada?

⁴ Keieu, kitail pahn tehkpene ia duwen Siohwa eh kin ketin kaweid kitail mwohn atail pahn wiahda mehkot suwed. (1 Kron. 28:9) Karasepe, Kain “lingeringerkihda kowahlap” ni Siohwa eh sohte ketin kupwurki ih. (Wadek Senesis 4:3-7.) Siohwa ketin kaweid Kain me ma e sohte pahn “wia mehkot pwung,” e pahn wiahda dihp. Dihp ‘rasehng mahn lawalo men me nektehn poar pohe,’ awiawih en powehdi ih. Siohwa ketin mahsanihong Kain: “Ke uhdahn pahn powehdi.” Siohwa ketin kupwurki Kain en “pereperen.” Ma Kain rong kaweido, e pahn kolokolete eh nanpwungmwahu rehn Koht.

5. Ia duwen Siohwa eh kin ketin kaweid kitail?

⁵ Met pil duwehte kitail rahnwet. Siohwa kak ketin mahsanih uhdahn soangen aramas dah men kitail loalatail. E ketin mwahngih atail madamadau kan oh ineng kan, oh kitail sohte kak ekihsang ih mehkot. E kin ketin poakohng kitail oh kupwurki kitail en wiahda me pwung, ahpw e sohte kin ketin iding kitail. Kahrehda ma e ketin mahsanihada mehkot suwed rehtail, e kin ketin kaweid kitail. Ia duwen eh kin ketin wia met? Ni atail kin kaukaule wadek Paipel, neitail sawaspen Paipel kan, oh iang towehda mihting kan, kitail kak rong sapwellimen Koht kaweid kan. Mie pak me ke wadek de rong mehkot me sewese iuk ken powehdi kahpwal ehu me Siohwa kelehpw ketin mwahngih? Kaweid pwukat sang rehn Siohwa kin kohda ni ahnsou me kitail uhdahn anahne.

6, 7. (a) Mehn kadehde dahieu kitail ahneki me Siohwa kin ketin nsenohki emenemen sapwellime ladu? (b) Ia duwen omw kak paiekihda Siohwa eh kin ketin nsenohkin uhk?

⁶ Kaweid koaros nan Paipel kin uhdahn kasalehda me Siohwa kin ketin poakohng emenemen kitail. Mehlel me Paipel, neitail sawaspen Paipel kan oh atail mihting kan kin wia kamwahu ong aramas rar kei. Ahpw Siohwa kin ketin kupwurki ken rong sapwellime kaweid kan nan Paipel pwe ken kak wia dahme pwung. Met kin kasalehda me e kin ketin nsenohkin uhk.

⁷ Ia duwen atail kin paiekihda sapwellimen Koht kaweid kan? Keieu, kitail anahne kamehlele me e kin uhdahn ketin nsenohkin kitail oh kitail anahne kapwaiada sapwellime Mahsen. Eri, ma kitail ahneki soangen madamadau me kak kansensuwedih Koht, kitail anahne mwadang kihsang. (Wadek Aiseia 55:6, 7.) Ma kitail kin mwadang rong, kitail pahn pitsang kahpwal tohto. Ahpw ia duwen ma kitail sohte kin rong? Siohwa pahn ketin nsenohkin kitail?

SAMATAIL ME LIMPOAK KIN KETIN KAPWUNGKITAIL

8, 9. Ni ahnsou me emen kin kihong kitail kaweid sang nan Paipel, ia duwen met eh kadehdehda me Siohwa ketin nsenohkin kitail? Menlau kihda ehu karasaras.

⁸ Kitail kin ese me Siohwa ketin nsenohkin kitail ni ahnsou me e kin ketin kapwung kitail. (Wadek Ipru 12:5, 6.) Mehlel me kitail sohte kin perenki ale kaweid, peneu, de ni emen eh kin kapwung kitail. (Ipru 12:11) Ahpw ni emen eh kin kihong kitail kaweid sang nan Paipel, e inenen kesempwal en wehwehki ia kahrepen e wia met. E sohte wia met pwe e men kamedekitailla ahpw e wia met pwehki e tehkada me atail nanpwungmwahu rehn Siohwa mihla nan keper. E kin nantihong oh pil men kihong ahnsou pwe en kasalehiong kitail sang nan Paipel ia duwen atail kak kamwahwihala atail nanpwungmwahu rehn Siohwa. Kitail kin wauneki soangen kaweid wet pwehki e kohsang rehn Siohwa.

⁹ Karasepe, emen brother kin kilang kilel oh kasdo suwed mwohn eh iangala padahk mehlel. Ni ahnsou me e sukuhlki padahk mehlel, e uhdihsang wia tiahk wet. Mwuhr, e pwainda nah cellphone kapw ehu oh pwurehng tepida kilang kilel oh kasdo suwed nan Internet. (Seims 1:14, 15) E sansal me eh ineng en kilang kilel oh kasdo suwed mihmihte reh rasehng mwoalus me saikinte uhdahn kunla. Rahn ehu, e kihong nah cello pwe elder men en doadoahngki oh ekei site en kilang kilel oh kasdo suwed pwarada nan cello. Ni ahnsowohte eldero kaweid ih. Brothero rong kaweido oh mwuhr e powehdi tiahk suwed wet. Siohwa kin ketin mahmahsanih dipatail kan me kitail kin song ekihla oh kak ketin kapwungkitailla mwohn atail kauwehla atail nanpwungmwahu reh. Kitail kin kalahnganki me Siohwa kin ketin nsenohkin kitail.

PAIEKIHDA ATAIL DOADOAHNGKI KAWEID KAN EN PAIPEL

10, 11. (a) Ia duwen atail kin “tamanda” sapwellimen Koht kaweid? (b) Dahme wiawihong peneinei ehu me idawehn ni erpit sapwellimen Siohwa kaweid?

¹⁰ Sounmelkahkao koulkihong Siohwa: “Komw kin ketin kahluwahkin ie sapwellimomwi kaweid.” (Mel. 73:24) Kitail kak “tamanda” sapwellimen Siohwa kaweid ni atail kin onopki sapwellime Mahsen. Ni ahl wet, kitail kak diarada sapwellime madamadau, idawehn sapwellime kaweid oh kolokolete atail nanpwungmwahu reh. Sapwellimen Siohwa kaweid pil kin sewese kitail en apwalih pein kitail oh atail peneinei.​—Lep. Pad. 3:6.

¹¹ Karasepe, soumwet men, eh pwoud oh ara peneinei laud kin kousoan nan sahpw ehu me re kin pwapwain nan Philippine. Ih oh eh pwoud wia pioneer kei. Ehu rahn, aramas me sapweniki sahpwo kadarewohng irail kisinlikou ehu me padahkihong irail me irail solahr kak kousoan wasao. Irail pwuriamweikihla oh mwuhr esehda me aramas men karaunehkin irail me irail sohte kin mehlel. Brothero kin pwunodki ia wasa re pahn mi ie. Ahpw e kin likih Siohwa oh nda: “Siohwa pahn ketin apwalih kiht. Ahnsou koaros e kin ketikihong kiht at anahn kan, sohte lipilipil dahme kin wiawi.” Peneinei wet kin idawehn kaweid kan en Paipel oh re kin kasalehda wahu oh popohl mendahki mie me karaunehkin irail soahng suwed. Rahn kei mwuri, me sapweniki sahpwo ndaiong irail me irail kak mihmihte. Mwomwen arail mwekidki karaun likamwo kamwakid ih, kahrehda e wekidala eh madamadau oh pil kalaudehla sahpw me re kak koadoahke. (Wadek 1 Piter 2:12.) E sansal me ma kitail kin idawehn kaweid kan en Paipel, Siohwa pahn ketin kahluwa kitail nan ahnsou apwal kan.

KOMPOAKPATAIL MEN ME KIN SEWESE KITAIL EN DADAURETE PAHN KAHPWAL KAN

12, 13. Soangen ahnsou dah kan me e kak apwal en kamehlele me Koht kin ketin nsenohkin kitail?

¹² Nin duwen sapwellimen Siohwa ladu kan, kitail kin lelohng kahpwal tohto, oh ekei kahpwal pwukat ele kin mwomwen mihmi ahnsou werei me duwehte soumwahu, kalokolok de uhwong kan sang peneinei. Ehu me uhdahn apwal iei nanpwung suwed rehn emen nan mwomwohdiso pwehki atail wekpeseng.

¹³ Karasepe, dahme emen brother ndaiong uhk ele kamedekeiukala. Mwein ke pahn medewe: ‘Met sohte kak wiawi nan sapwellimen Koht pwihn!’ Ahpw mwomwohdiso katohtohla ahn brothero pwukoa kan oh meteikan kin medewe me brothero uhdahn mwahu. Ele ke pahn idek: ‘Ia duwen met eh kak wiawi? Siohwa sohte ketin mahsanih dahme wiawi? E sohte pahn ketin wia mehkot?’​—Mel. 13:1, 2; Apak. 1:2, 3.

14. Dahme kahrehda Siohwa kakete ketin mweidohng riatail kan en kihong kitail kaweid kehlail?

¹⁴ Siohwa ketin mahsanih soahng kan laudsang dahme kitail kak kilang, oh ele e kin ketin mweidohng irair ehu en mihmihte pwehki kahrepe kesempwal kan. Karasepe, ele emen kihong kitail kaweid me kitail sohte medewe me konehng oh kitail nsensuwedkihla. Ahpw mwein Koht ketin mahsanih irairo ni ehu ahl tohrohr. Ia duwe, kaweido sou kakete konehng kitail? Ni eh koasoia duwen eh mour, Brother Karl Klein nda me mie pak Brother Rutherford kihong ih kaweid kehlail. Mwurin ahnsoukis, ni Brother Rutherford eh rahnmwahwih, Brother Klein sohte uhdahn sapeng. Brother Rutherford kilang me Brother Klein nsensuwedkihte kaweido. Brother Rutherford kaweid Brother Klein: “Kanahieng. Tepilo pwakipwakih uhk.” Kaweid wet uhdahn sewese Brother Klein. Ahnsou me e wiahla emen tohn Pwihn me Kin Apwalih Mwomwohdiso nan Sampah Pwon, e nda me e sukuhlki me riatail kan kin ahneki pwuhng en kaweid kitail oh ma kitail kin kailongki irail, Tepilo pahn parok kitaildi.a

15. Dahme kitail anahne tamataman ni ahnsou me kitail kin lelohng kahpwal kan?

¹⁵ Kitail men kahpwal kan en mwadang imwisekla. Ahpw e kesempwal kitail en esehla kanengamah. Kahpwal kan kin duwehte omw kin tangahki sidohsa oh tengala nanialo pwehki diren sidohsa uhdi. Ke kak kanengamah oh awiawihete lao sidohsa kan tepida mwekid. Ahpw ke sohla kanengamah oh lemehda en wetla ehu ahl tohrohr. Met kahrehda ken pwandala lella wasa me ke men kohla ie. Ma ke kanengamah oh mihmihte nanialo, ele ke sohte pahn pwandala. Met kin duwehte atail kin lelohng kahpwal kan. Ma kitail kin kanengamah oh idawehn kaweid kan en Paipel, Siohwa pahn ketin sewese kitail en dadaurete.

16. Ia pil ehu kahrepen Siohwa ele pahn ketin mweidohng kitail en mi nan kahpwal kan?

¹⁶ Ele Siohwa pahn ketin mweidohng kahpwal kan en mihmihte pwehki e kin ketin kupwurki kahpwal pwukat en kaiahne kitailda. (Wadek 1 Piter 5:6-10.) Kitail en dehr medewe me Koht me kin ketin kahrehda atail kahpwal kan. (Seims 1:13) “Amwail imwintihtio, Tepil” me kin kahrehda pali laud en kahpwal kan. Ahpw e kesempwal en ese me Siohwa kin ketin mahsanih atail kahpwal kan oh e kin ketin poakohng kitail. E sohte pahn ketin mweidohng atail kahpwal kan en mihmi kohkohlahte. Kahpwal pwukat pahn mihmihte “ahnsou kis.” Kamehlele me Siohwa kin ketin nsenohkin uhk oh e pahn ketikihong uhk kehl pwe ken dadaur lel ni imwi.​—2 Kor. 4:7-9.

KATING SANG REHN SIOHWA

17. Dahme kahrehda Siohwa kin ketin kasawih mohngiong en aramas koaros?

¹⁷ Siohwa kin ketin kasawih mohngiong en aramas koaros pwehn mahsanih ihs me uhdahn poakohng ih. Soukohp Ananai ndaiong Nanmwarki Asa: “KAUN-O kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kron. 16:9) Siohwa pahn ketin “kakehlahda” kowe, me wehwehki me e pahn ketin pere oh katingih uhk.

18. Dahme kahrehda kitail anahne kamehlele me Siohwa pahn ketin katingih kitail ma kitail kin wia me mwahu? (Menlau kilang tepin kilel.)

¹⁸ Siohwa ketin “kupwurkalahngan” ong kitail, me wehwehki me e ketin kupwurki katingih kitail. Ma kitail men ale sapwellime kapai, kitail anahne “nantihong wiewia dahme pwung,” “kesempwalki dahme mwahu,” oh “wia me mwahu.” (Eimw. 5:14, 15; 1 Pit. 3:11, 12) Siohwa kin ketin katingih me pwung kan mehnda ma meteikan sohte kin kilang arail wiewia mwahu kan. (Mel. 34:15) Kitail kak kilang met sang karasaras en sounkeneitik riemen en Israel, Sipra oh Pua. Parao padahkihong ira en kin kemehla pwutak koaros ni arail ipwidi. Lih pwukat peikiong Koht a kaidehn Parao oh ira kamourala seri ko. Siohwa ketin mahsanih wiewia mwahu en Sipra oh Pua, oh e ketin katingiheki ira pein neira seri kan. (Eks. 1:15-17, 20, 21) Ekei pak mwein kitail pahn pehm me sohte me kin kilang atail wiewia mwahu kan, ahpw Siohwa kin ketin mahsanih wiewia mwahu koaros me kitail kin wia. E pahn katingih kitail.​—Mad. 6:4, 6; 1 Tim. 5:25; Ipru 6:10.

19. Dahme wiawihong emen sister?

¹⁹ Ekei pak, ele kitail pahn pehm me Siohwa sohte kin ketin tehk atail nannanti en kalohk, ahpw e kin ketin wia met. Sister men sang Hungary me mi nan Austria ale adres en emen lih me kin lokaiahki lokaiahn Hungary. Sistero mwadang kohla wasao ahpw sohte tohnihmwo. E kin pwurepwurehng pwurala erein sounpar ehu elep oh kihdi pwuhk kan, kisinlikou kan oh nah nempe en delepwohn. Ekei pak e kin pehm me mie tohnihmwo ahpw sohte me kin ritingada wenihmwo. Ehu rahn ni eh kohla mwo, lih emen me kadek ritingada wenihmwo oh nda: “Menlau pedolong. I wadekala soahng koaros me ke wahdo oh I kin awiawih uhk.” Liho kin ale sawasepen wini ong eh soumwahu laud oh ih kahrepen eh sohte men koasoiong aramas. E pwungki onopki Paipel. Sistero pehm me Siohwa kin ketin tehk oh katingih eh nannanti.

20. Ia omw pepehm duwen Siohwa eh kin ketin nsenohkin uhk?

²⁰ Nin duwen atail sukuhlkier nan iren onop wet, Siohwa kin ketin mahsanih soahng koaros me kitail kin wia oh kasawih mohngiong en aramas koaros. Kitail sohte kin pehm me e kin ketin raparapahki atail sapwung kan de kilelehdi sapwung koaros me kitail kin wiahda. Ahpw kitail kin karanihala Siohwa pwehki atail ese me e kin ketin nsenohkin kitail oh kin ketin kupwurki sewese oh katingih kitail pwehki atail wiewia mwahu kan.