OARALAP | MIE KATEPEN KAPAKAP?
Dahme Kahrehda Aramas Kin Kapakap?
“I kin apwalki uhdihsang pilein mwohni. I kapakapki I en kanahkihda mwohni laud. Ahpw met sohte douluhl wiawi.”—Samuel,a Kenya.
“Nan sukuhl ihte me anahn iei sen ndahla kapakap kan me se sukuhlki oh wadlikihala.”—Teresa, Philippines.
“I kin kapakap ni ahnsou me I kin lelohng kahpwal kan. I kin kapakap pekmahngki dipei kan oh en wia Kristian mwahu men.”—Magdalene, Ghana.
Dahme Samuel, Teresa, oh Magdalene koasoia kasalehda me aramas kin kapakapki soangsoangen kahrepe kan, ekei kahrepe kin mwahusang meteikan. Ahn ekei aramas ar kapakap kin kohsang mohngiongirail; ahpw meteikan sohte kasalehda arail pepehm ni arail kin kapakap. Ahpw mendahki re kapakap pwehn pahs test ehu nan sukuhl de kapakapki pwihn en mwadong me re perenki en kana, peki sapwellimen Koht kaweid ong arail mouren peneinei, de soangsoangen kahrepe teikan, aramas sapw kei kin pehm me re anahne kapakap. Ripoht kan kasalehda me pil ekei irail kan me sohte arail pelien lamalam kin kalapw kapakap.
Ke kin kapakap? Ma ei, dahme ke kin kapakapki? Mehnda ma ke kin kalapw kapakap de soh, ke ele kin medewe: ‘Mie katepen ei kin kapakap? Mie me kin karonge ie?’ Emen sounnting kasalehda me kapakap wiahte “wiepen sawas ehu . . . duwehte omw wie koasoakoasoiong mwahmw men me ke naineki.” Ekei sounsamanih palien wini kan ahneki soangen madamadauohte, re nda me kapakap mwomwen “wiliepen wini” ehu. Ia duwe, ong ekei kapakap kin wiahte tiahk ehu de wiahte mehn kansenamwahwihala aramas?
Weksang met, Paipel kasalehda me kapakap wia mehkot me laudsang ihte mehn kansenamwahwihala aramas. Paipel mahsanihong kitail me uhdahn mie emen me kin karonge atail kapakap kan me wiawi ni ahl oh kahrepe pwung. Ia duwe, met mehlel? Kitail kilang mehn kadehdepen met.
a Ekei ahd kan me pwarada wasaht kaidehn uhdahn adarail.