Peren me Kohsang Ara Sohte Kin Kedirepwki Soahng kan me Sohte Uhdahn Kesempwal

DANIEL OH MIRIAM pwopwoudla nan September 2000 oh ahneki mour paiamwahu nan Barcelona, Spain. Daniel nda: “At doadoahk en mwohni kin mweidohng kiht en mwenge nan wasahn mwenge mwahu kan, seiloakseli, oh likawih likou mwahu. Se pil kin kaukaule iang kalohk.” Ahpw wekidekla ieu wiawi.

Nan mihting tohrohr ehu nan pahr 2006, Daniel rong padahk ehu me kihda peidek wet: “Kitail kin wia soahng koaros me kitail kak pwehn sewese irail kan ‘me pahn kamakamala ni sapwung’ pwe ren kak iang keid nan ahl me kolahng mour soutuk?” (Lep. Pad. 24:11) Padahko kawehwehda me kitail ahneki pwukoahn kalohki rongamwahu en Paipel pwehki met pidada mouren aramas. (Wiewia 20:26, 27) Daniel nda, “I pehm me Siohwa ketin mahmahseniong ie.” Padahko pil kasalehda me atail peren kin laudla ni atail kalaudehla atail papah nan sapwellimen Siohwa doadoahk. Daniel ese me met mehlel pwehki e kilang me Miriam, me tepidahier doadoahk en pioneer, kin uhdahn peren.

Padahko uhdahn kamwakid Daniel kahrehda e koasoanehdi me met iei ahnsou en wiahda wekidekla laud nan eh mour. E kamwotehla eh awahn doadoahk, tepida pioneer, oh medewe duwen peren me ih oh Miriam kak ahneki ma ira papah wasa kan me anahn laud mie ong sounkalohki Wehio.

TEPIDA APWAL A MWUHR ROHNG KAPEREN

Nan May 2007, Daniel oh Miriam uhdihsang ara doadoahk ko oh keseula Panama, sahpw ehu me ira mwemweitlahier mwoweo. Ara wasahn kalohk iei deke kei me mi Bocas del Toro Archipelago nan Sehd en Caribbean. Pali laud en aramas ako uhdahn mehn Guaymi. Daniel oh Miriam medewe me neira mwohni me ira nekidala kak sewese ira en mihmihki Panama mwein sounpwong waluh.

Ira kin dake pwoht oh pwaisikel ni ara kalohk pohn deke pwukat. Ira tamatamante tepin ara dakehki pwaisikel mpen mwail 20 tang kohda ni kumwukumw kan ni ahnsou me inenen karakar. Daniel inenen pwangada oh kereniong lipwongmasla. Ahpw mehn Guaymi ko me ira tuhwong kin uhdahn kasamwo ira ni kadek, ahpw mehlel mwurin ara esehla doadoahngki ekei lokaiahn wasao. Sohte pwand, ira kin onop Paipel rehn aramas 23.

Dahme wiawi mwurin ara doadoahngkihla neira mwohni ko? Daniel nda: “Pilen masat ka kin kohda ni at tepida medewe at pahn pwurala Spain. Se inenen nsensuwedki at pahn kohkohsang nait tohnsukuhl en Paipel kan.” Ahpw sounpwong ehu mwuri, ira alehdi rohng inenen kaperen ehu. Miriam nda: “Se ale luhk en wiahla pioneer tohrohr kei. Ia uwen kaperen me se kak wiewiahte at pwukoa wasao!”

PEREN ME KEIEU LAUD ONG IRA

Pwehki wekidekla kan nan sapwellimen Siohwa pwihn, Daniel oh Miriam anahne uhdihsang ara pwukoa nin duwen pioneer tohrohr kei nan pahr 2015. Dahme ira pahn wia met? Ira likih inou me mi nan Melkahka 37:5: “Mweidohng KAUN-O pein kowe; likih, e ahpw pahn seweseiuk.” Ira diarada ara doadoahk me kak apwalih ira nin duwen pioneer kei, oh rahnwet ira kin iang papah nan mwomwohdiso ehu nan Veraguas, Panama.

Daniel nda: “Mwohn at mweselsang Spain, se sohte uhdahn kamehlele ma se pahn kak mourki mour ehu me sohte nohn paiamwahu. Ahpw ihme se wia rahnwet, oh se ahneki soahng kan me uhdahn kesempwal ong kiht.” Peren me keieu laud dah me ira alehdi? Ira nda: “En sewese me aktikitik kan en sukuhlki duwen Siohwa kin wia soangen peren me sohte mehkot kak pahrekiong!”