Kalaudehla Atail Koahiek nan Doadoahk en Kalohk—Ia Duwen Omw Pahn Sapeng Pasapeng me Kin Kasalehda Sohte Men Rong

Dahme Kahrehda E Kesempwal: Medewehla ma ke ese me melimel de rerrer en sahpw ape kereniong pahn wiawi. Aramas pahn mehla ma re sohte tangala wasakis pwehn rukala. Ke kohla rehn mehn mpomw men en padahkihong ih duwen met, ahpw e kauhdi ahmw koasoio oh nda me e kedirepw. Uhdahn ke sohte pahn mwadang uhdihsang omw songosong en sewese ih! Aramas tohto nan atail wasahn kalohk kin pil kahng rong, pwe re sehse me rong me kitail wahla rehrail pahn kak kamourirailla. Ni ahnsou me kitail kohla rehrail mwein re kin kedirepw. (Mad. 24:37-39) De mwein re kin lemelemehk suwediong kitail pwehki soahng kan me sohte mehlel me re rong duwen kitail. (Mad. 11:18, 19) Ele re pahn pein lemeleme me kitail sohte weksang pelien lamalam teikan me kin kapwarehda wah suwed kan. (2 Pit. 2:1, 2) Ma nin tapio tohnihmwo sohte men rong, kitail en dehr mwadang pwangahkihda.

Ia Duwen Ke Pahn Wia Met:

Mwohn ahmw pahn kohla kalohk ihmw lel ihmw, kihong ekis ahnsoun medemedewe duwen soangen pasapeng kan me tohnihmw kin koasoia pwehn kasalehda eh sohte men rong oh ia duwen omw pahn sapengala met.
Ma tohnihmwo koasoia mehkot pwehn kauhdi kitail, ni kadek song en pousehlahte amwa koasoakoasoi. Mwein ke kak wia met sang ni omw pahn kapinga ih. Karasepe ieu, ma e nda me mie pein eh pelien lamalam, ke kak sapengki, “I perenki me komwi emen me kin poadidi ong sarawi.” Ekei pak omw kin kasalehda me ke pohnese ahn tohnihmwo pepehm oh irair kan pahn kahrehiong ken kak kalohk ong ih. Karasepe ieu, ma e nda me e kedirepw, ke kak nda: “I wehwehki. Ahpw mwohn ei pahn kohkohla, I men kihong noumw met.” Ehu me ke pil kak wia iei en idek rehn tohnihmwo peidek ieu ma e nda me e sohte perenki rong. Ke kak nda, “Met wehwehki me komw sohte kin perenki koasoia pelien lamalam de Pwuhk Sarawi me komw sohte kin perenki koasoia?”
Doadoahngki omw koahiek en madamadau. Tamataman me Siohwa sohte kin ketin iding aramas ren rong. (Deud. 30:19) Emenemente pahn kin pein wia eh pwukoa mwohn silangin Siohwa. (Kal. 6:5) Ma tohnihmwo ngihtehtehki, e pahn keieu mwahu ken kohkohla. Ni omw kin kasalehda omw wauneki eh pepehm kan, met pahn kak kahrehiong emen sounkalohk tohrohr en kak kalohk ong ih mwuhr.—1 Pit. 3:15, 16.

Song Wia Met Erein Sounpwongo:

Ni omw tuhwong emen me sapeng uhk ni ahl ehu me pahn kasalehda eh sohte men rong, mwurin ahmw kohkohlahsang rehn tohnihmwo, koasoia rehn iengomw sounkalohko ia duwen omw kak kamwahwihala omw sapeng tohnihmwo.